Umi ánhel oñangareko umi ojeroviávare Jehováre

Omombeʼu Christabel Connell

Christopher oporandu oréve heta mbaʼe ha rombohovairoína chupe la Biblia rupive. Ore ndorohechakuaái tardemaha, ha haʼe manterei omaña jepi pe ventána gotyo. Rohopotápema omaña jey ha heʼi: ‘Koʼág̃a ikatúma peho, ndoikovéima penderehe mbaʼeve’. Upéi oremoirũ ore visikléta roheja hague peve ha ojedespedi orehegui. Ha mbaʼépa la ohechavaʼekue? Ha mbaʼérepa heʼi ndoikoveimaha orerehe mbaʼeve?

CHE ningo cheréra Christabel ha anase Shefield-pe, áño 1927-pe (che apellído de soltéra ningo Earl). Pe segunda guerra mundiálpe ore róga ári hoʼa peteĩ vómba ha ohundiete, upévare chemondo hikuái che avuéla rógape amohuʼã hag̃ua che eskuéla. Upépe aike peteĩ eskuéla católicape, ha pyʼỹinte aporandu jepi umi mónhape mbaʼérepa oĩ heta iñañáva ha oñorairõva ko múndope. Haʼekuéra ni umi ambue rrelihión omoakãva ndaikatúi ombohovái chéve upéva.

Opávo pe segunda guerra mundial, astudia enfermerarã. Upe rire ava Londres-pe ambaʼapo hag̃ua Hospital General de Paddington-pe, péro upe távape ningo ndojeikóinte avei pyʼaguapýpe. Ha che kyvy oho riremi gerrahápe Coreápe, ahecha oñorairõva pe ospitál ypýpe. Avave anga noipytyvõi peteĩ kuimbaʼépe, oñenupã vaipaite chupe ha opyta hesatũ. Upérõ che aha jepi avei oñembyatyhápe umi espiritísta, ha che sy oho chendive. Péro ni upépe noñembohováiri chéve mbaʼérepa oĩ hetaite iñañáva.

Añepyrũ astudia la Biblia

Che ermáno ypykue ningo héra John, chugui oikóma testigo de Jehová. Peteĩ árape ou chevisita ha oporandu chéve: “Reikuaa piko mbaʼérepa oiko hetaite mbaʼe ivaíva?”. “Nahániri”, haʼe chupe. Upémaramo oguenohẽ la Biblia ha olee chéve Revelación 12:​7-12. Upépe ahechakuaa Satanás ha idemoniokuéra ojapoukaha umi mbaʼe vaieta oikóva ko múndope. Upe riremi, ajapo che kyvy heʼivaʼekue chéve ha añepyrũ astudia la Biblia umi Testígo ndive. Péro upéi akyhyjégui oñeñeʼẽ vaírõ g̃uarã cherehe ndajevautisái (Pro. 29:25).

Dorothy ningo che ermána ha oiko avei chugui Testígo. Haʼe ha imenarã Bill Roberts, oho peteĩ asambléa internacionálpe, Nueva York-pe áño 1953-pe, ha ou rire amombeʼu chupekuéra peteĩ tiémpo astudia hague la Biblia. Upépe Bill oporandu chéve: “Reheka piko umi téysto la Bíbliape? Remarka piko la nde lívro?”. Haʼe chupe nahaniriha, ha heʼi chéve: “Upéicharõ ningo nderestudiái! Ehekána pe  ermána nemboʼevaʼekuépe ha estudia jey”. Upe tiémpope, umi demónio oñepyrũ chepersegi. Chemanduʼa añemboʼémi hague Jehovápe oñangareko hag̃ua cherehe ha chepeʼa hag̃ua aña poguýgui.

Aservi prekursóraramo Escocia ha Irlándape

Ajevautisa 16 de enero 1954-pe, máyope katu aheja che traváho ha junio guive ajapo che prekursorádo. Ocho mése haguépe añemondo aservi hag̃ua de precursora especial Grangemouth, Escóciape. Upépe ahechakuaa jey mbaʼeichaitépa Jehová “oñangareko” cherehe hiʼanhelkuéra rupive (Sal. 34:​7, ÑÑB).

Año 1956-pe añeinvita aha hag̃ua aservi Irlándape. Chemondo hikuái mokõi ermánandi peteĩ távape, hérava Galway. Primer día asẽrõ guare apredika, ag̃uahẽ peteĩ paʼi rógape. Upe riremínte og̃uahẽma peteĩ polisía ha oregueraha komisaríape. Oporandu oréve mbaʼéichapa oreréra ha moõpa roiko, ha upe rire oho oñeʼẽ teléfonope. Rohendu ningo heʼi: “Sí paʼi, aikuaáma moõpa oiko hikuái”. Pe paʼi voi omondóraʼe chupe orejagarra hag̃ua! Pe ore róga járape ojopy hikuái oremosẽ hag̃ua, upémaramo umi ermáno sukursalpegua heʼi oréve rosẽ hag̃ua upégui. Upe rire roho pe estación de trénpe ha diez minúto tárdema rog̃uahẽ, péro nosẽi gueteri pe trén. Upépe peteĩ karai omañahína orerehe ohecha hag̃ua rohópa upe távagui. Ha hiʼarive tres semána ramo roiko hague upépe!

Upéi oremondo hikuái ropredika hag̃ua táva Limerick-pe. Upépe ningo tuicha omanda rrelihión católica. Heta oĩ oñembohorýva orerehe, ha oĩ avei okyhyjégui noñatendéiva orerehe. Ha ojapo voi un áño rupi peteĩ ermánope oñembyepoti vaipaite hague ag̃uieténte upégui, pe táva Cloonlara-pe. Upévare rovyʼaiterei roikuaárõ guare Christopher-pe, hese ningo añeʼẽkuri ko artíkulo oñepyrũvo. Haʼe ningo ojerurevaʼekue oréve rohomi jey hag̃ua rombohovái chupe umi mbaʼe oikuaaséva. Ha rovisita jeýrõ guare chupe, oho peteĩ paʼi oikéntema hógape ha heʼi chupe oremosẽ hag̃ua. Péro haʼe ombohovái chupe: “Che ainvita koʼã kuñataĩme og̃uahẽ hag̃ua che rógape ha haʼekuéra ombota raẽ okẽ oike hag̃ua. Ndéve katu avave naneinvitái ni nerembotái okẽ reike hag̃ua”. Pe paʼi ipochyeterei ha osẽ ohopa hese.

Ore ningo ndoroikuaáikuri pe paʼi oreraʼãrõha éntre heta kuimbaʼe ndive Christopher róga ypýpe. Christopher ohechakuaa hesekuéra ojaposeha ivaíva orerehe, upévare ojapóraʼe pe amombeʼuvaʼekue ajeʼi. Ohaʼarõ oho raẽ hikuái ha upe rire oheja roho. Tiémpo rire roikuaa mbaretépe oñeguenohẽ hague Cristopher ha ifamíliape upe távagui ha oho hikuái Inglatérrape. Che haʼe voi Jehová oñangareko hague orerehe hiʼanhelkuéra rupive, ndorohechakuaáiramo jepe ipeligrosoha.

Aha eskuéla de Galaádpe

Ajepreparárõ guare aikóvo aha hag̃ua Nueva York-pe asambléa internasionál “Voluntad Divina” 1958-pe, añeinvita aha hag̃ua clase 33, eskuéla de Galaádpe. Upévare asambléa rire ndahavéima ógape, ahántema Collingwood-pe (Ontario, Canadá) oñepyrũ meve la eskuéla 1959-pe. Péro upe asambléape aikuaa Eric Connell-pe. Haʼe ningo oikuaa ypy Jehovápe 1957-pe ha oiko chugui prekursór 1958-pe. Upe asambléa rire oñepyrũ oskrivi chéve kárta káda día aiko aja entéro Canadápe ha aime aja eskuéla de Galaádpe. Péro mbaʼépa oikóta orehegui asẽ rire upégui?

Amombaʼeterei ningo aha haguére eskuéla de Galaádpe. Dorothy ha iména oĩ avei chendive upépe. Opávo la eskuéla ojelee oréve moõpa rohóta roservi. Chupekuéra oñemondo Portugálpe, ha chéve katu Irlándape. Ambyasyeterei ningo ndahamoʼãi haguére che ermánandi! Upémaramo aporandu peteĩ oremboʼevaʼekuépe mbaʼépa ajapóraʼe ajeve chemondo ótro hendápe. Haʼe heʼi chéve: “Ndaupéichai ningo, nde ha ne irũ Eileen Mahoney ningo peime peservi hag̃uáicha oimehápe” ha Irlándape ningo oñekotevẽ.

 Aha jey Irlándape

Aha jey Irlándape agosto de 1959-pe ha añepyrũ aservi kongregasión oĩva Dún Laoghaire-pe. Upérõ, Eric oho jeýma Inglatérrape ha ovyʼaiterei hiʼag̃ui haguére chehegui. Haʼe oikose avei misionéroramo, upévare opensa: “Omondo ningo hikuái misionéro Irlándape, ha che aháta avei aservi upépe”. Upémaramo, ova Dún Laoghaire-pe ha romenda 1961-pe.

Seis mése haguépe, Eric oñaksidénta móto ári. Iñakã jekapaite, ha umi doktór ndoikuaái ojesalvánepa. Tres semána oĩ ospitálpe ha upéi roho ógape añangareko hese cinco mése aja oĩ porã jey peve. Ñandejára oñangareko rupi cherehe hiʼanhelkuéra rupive añeñandu porãve, imbareteve che jerovia ha asegi aservi Jehovápe.

Pe áño 1965-pe roñemondo roservi hag̃ua peteĩ kongregasión oĩhápe ocho puvlikadór, táva Sligo-pe opytáva noroeste gotyo. Upéi tres áño haguépe roservi peteĩ kongregasiónpe Londonderry-pe, opytáva norte gotyove. Ha peteĩ árape roju rire predikasióngui rojuhu peteĩ alambráda pe tape yképe. Irlándape norte gotyo oñepyrũ peteĩ tiémpo ijetuʼúva, oñehenóiva The Troubles (Los problemas). Umi mitãrusu oñembyaty ha ohapy aúto ha mbaʼe. Upe táva ojedividi mokõi hendápe: católico ha protestante, ha ipeligróso voi peteĩgui oñesẽ ha ojeike hag̃ua ótrope.

Roiko ha ropredika peteĩ tiémpo ijetuʼúvape

Ropredika rupi roho heta henda rupi. Upévare roñeñandu jey umi ánhel oñangarekorõguáicha orerehe. Oĩ jave oñorairõva pe ropredikaha rupi, rosẽ upégui pyaʼe ha ohasapa rire pe guyryry roho jey ropredika. Peteĩ árape óga ypyetépe oiko sarambi, peteĩ negósio oñevendeha pintúra ojehapy ha umi mbaʼe okáiva okuimimi jepi ore ventánape. Upévare ndorohói roke upépe, rokyhyjégui okaipárõ g̃uarã upe edifísio. Áño 1970-pe rova Belfast-pe, ha upépe roikópema oñemombeʼu oréve peteĩ vómba kaséra ojepoi hague upe negósiope, ha okaipaite hague pe edifísio roiko hague.

Ropredika jave peteĩ ermánandi, rohecha peteĩ túvo osẽva ventánagui. Péro rosegínte roguata ha upe riremínte okapu, peteĩ vómba raʼe upéva. Umi vesíno opensa ore romoĩ hague upe vómba. Upévo peteĩ ermána oremog̃uahẽ hógape ha umi vesíno ohechakuaa ore ndorojapói hague upéva ha ipyʼaguapy jey hikuái.

Áño 1971-pe roho jey Londonderry-pe rovisita hag̃ua peteĩ ermánape. Ha romombeʼúrõ guare chupe tapére rojuhu hague peteĩ varréra, oporandu oréve: “Ndaipóri piko raʼe avave upépe?”. Roʼe chupe oĩ hague, péro ni nomañái hikuái orerehe. Pe ermána omombaʼeterei upéva. Pórke upe mboyve ojejagarrákuri peteĩ doktórpe ha peteĩ polisíape, ha ojehapy chuguikuéra hiʼáuto.

Áño 1972-pe rova Cork-pe. Upe rire roservi Naas-pe ha upéi Arklow-pe. Ha 1987-pe roñemondo roservi hag̃ua Castlebar-pe, roikohápe koʼág̃a peve. Rovyʼaiterei roipytyvõ haguére upépe ojejapo hag̃ua peteĩ Salón del Reino. Áño 1999-pe Eric hasyete, péro Jehová ha umi ermáno chepytyvõ rupi aiko heseve okuera jey peve.

Eric ha che ningo dos vésema roho Escuela del Servicio de Precursor-pe, ha haʼe ningo oservi gueteri ansiánoramo. Che katu koʼág̃a areko artritis aguda ha prótesis che kadérape ha che renypyʼãme (penarãme). Che ningo heta mbaʼe vaíma agueropuʼaka ha heta mbaʼe ijetuʼúvama ahasa. Péro la ijetuʼuvéva chéve ningo namanehavéima ni áuto, upévape mánteko che asẽva ajapo hag̃ua opa mbaʼe. Umi ermanokuéra ningo chepytyvõ ha oñangareko cherehe. Koʼág̃a aikóma vastón reheve ha aiporu peteĩ carrito eléctrico aha hag̃ua mombyry.

Eric ndive roservíma cien áño ári de precursor especial, upévagui noventa y ocho áño roservi Irlándape, ha ni noropensái rohejávo gueteri. Norohaʼarõi ningo peteĩ milágro, péro rojerovia umi ánhel oñangarekoha opavave ojerovia ha oservívare Jehovápe.