Nemanduʼápa koʼã mbaʼére?

Katuete revyʼáneraʼe releévo umi rrevísta Ñemañaha ramoite osẽvaʼekue. Ehechamína ikatúpa nemanduʼa koʼã mbaʼére:

• Mbaʼérepa tekotevẽterei jahechauka meme ñanderekopotĩha?

Ñañehaʼã meméramo ñanderekopotĩ jahechauka Satanás ijapuha ha jaserviha Jehovápe jahayhúgui chupe. Avei Ñandejára ohecháta ñanderekopotĩpa ñandehusga hag̃ua. Ha upévare odepende jaikótapa opa ára g̃uarã (15/12, páh. 4-6).

• Jesús ojapóva ndaijojahái, mbaʼéichapa oñehenói chupe upévare?

Ñandejára Raʼy peteĩetéva, pe Ñeʼẽ, Amén, Mediador, Saserdóte Guasu ha pe Ñemoñare (15/12, páh. 15).

• Mbaʼérepa proféta Elías oñemboʼe aja oky hag̃ua, omondo hembiguáipe omaña hag̃ua ‘már gotyo’? (1 Rey. 18:​43-45.)

Jahecha Elías oikuaa hague mbaʼépa oiko oky hag̃ua. Haʼe oikuaa umi arai oñepyrũha már ári ha upéi pe yvytu ogueruha oky hag̃ua yvy ape ári (1/1, páh. 15-16).

• Mbaʼépa ikatu jajapo javyʼave hag̃ua predikasiónpe?

Jahechavaʼerã mbaʼépa oĩ ñane korasõme ha ñanemanduʼa ikatuha tuicha ñaipytyvõ ñande rapichakuérape. Iporãta avei ñañehaʼã jastudia umi héntendi. Ha ñande territóriope oĩramo heta nañanerenduséiva, ñañeʼẽvaʼerã umi mbaʼe oipyʼapývare chupekuéra (15/1, páh. 8-10).

• Mbaʼérepa ikatu jaguerovia oiko hague añetehápe umi mbaʼe omombeʼuvaʼekue Jonás?

Ñepyrũrã haʼe omombeʼu oikovaʼekue pe várkope ha umi tapicha oĩvare ipype. Avei omombeʼu mbaʼéichapa rakaʼe táva Nínive. Ha pe iñimportantevéva katu Jesucristo voi heʼivaʼekue Jonás ohasa hague mbohapy ára pe pira ryepýpe (1/1, páh. 29).

• Mbaʼépa naiporãi ojapo kristianokuéra oĩ jave omanóva?

Jehová siervokuéra ningo ombyasy pe omanóvape, péro oikuaa porã ndaikatuveimaha ojapo mbaʼevete. Oĩramo jepe okopíva hesekuéra, testigos de Jehová omboyke opa mbaʼe ojejapóva omanovahápe oñeimoʼãgui umi omanovaʼekuégui oikoha espíritu. Ani hag̃ua iprovléma ko mbaʼépe, heta kristiáno ohai peteĩ dokuménto heʼíva mbaʼépa oipotáta ojejapo omano vove (15/2, páh. 29-31).

• Mbaʼéicha javépa naiporãi ñañemohatã ñande jaʼévapente?

Jaiporavo jave ñande travahorã, ñane amigorã, ñande aorã, jaiporu jave pláta ha umi mbaʼe michĩvape jepe, ñamotenondevaʼerã ñande rapichakuérape. Oĩramo peteĩ mbaʼe ñandegustáva ñañeporanduvaʼerã: “Amboykénepa umi mbaʼe chegustáva ani hag̃ua ojeiko vai kongregasiónpe? Ajapótapa la Biblia heʼíva ndachegustapáiramo jepe?” (15/2, páh. 19-21).

• Oiméparaʼe pe “libro de Jasar” ha “libro de las Guerras de Jehová” oñehundínte ha upévare noĩrĩ la Bíbliape? (Jos. 10:13; Núm. 21:​14, NM.)

Nahániri. Umíva ningo oiméne lívro omombeʼúva yma oikovaʼekue ha umi ohaíva la Biblia oiporúneraʼe (15/3, páh. 32).

• Mbaʼépa oñekambia peteĩ Biblia pyahúpe oĩva Latín ñeʼẽme?

Áño 1979-pe, Papa Juan Pablo Segundo heʼi ojetradusi hag̃ua peteĩ biblia pyahu latínpe, hérava Nova Vulgata. Upérõ oñemoĩkuri Ñandejára réra, Yavé mbovymi hendápe (Éx. 3:15; 6:3). Upéi áño 1986-pe osẽ jey ko biblia, péro upépe oñekambiáma Ñandejára réra ha ivése oñemoĩntema Dominus, heʼiséva “Señor” (1/4, páh. 22).