Ména, ehayhúkena ne rembirekópe Jesucristo oporohayhuháicha

OMANO mboyvemi Jesús heʼivaʼekue ijapostolkuérape: “Pejoayhúkena. Ha che pohayhu haguéicha pejoayhu avei peẽ. Peẽ pejoayhúramo opavave ohechakuaáta peẽ che remimboʼeha” (Juan 13:​34, 35). Péicha jahecha ojoayhuvaʼerãha opavave oservíva Ñandejárape.

Upe rireve, apóstol Pablo ohai menakuérape: ‘Peẽ menakuéra, pehayhúke pene rembirekópe Cristo ohayhu haguéicha ikongregasiónpe, ha omeʼẽ hese hekove’ (Efe. 5:25). Jahechamína mbaʼéichapa menakuéra ikatu ojapo upéva, koʼýte hembireko oservíramo avei Jehovápe.

Jesucristo oñangareko kongregasiónre

Ñandejára Ñeʼẽ heʼi: ‘Pe ména ohayhuvaʼerã hembirekópe hete ohayhuháicha. Pe ohayhúva hembirekópe ojehayhu ijupe voi. Ndaipóri ningo avave ohayhuʼỹva hete, omongaru ha oñangareko porã uvei hese. Upéicha Jesucristo ojapo avei ikongregasión rehe’ (Efe. 5:​28, 29, ÑÑB). Jesús ningo ohayhuetereivaʼekue hemimboʼekuérape iñimperféktoramo jepe hikuái. Pyʼaporã ha mborayhúpe otrata chupekuéra. Jesús ohecha umi mbaʼe porã hemimboʼekuéra ojapóva ha ndoikói ohecha mbaʼépepa ojavy hikuái. Haʼe voi ningo ‘orekose henondépe peteĩ kongregasión porãgui ojajaipáva’ (Efe. 5:27).

Jesús ohayhuháicha umi hemimboʼépe, menakuéra avei ohayhuvaʼerã hembirekópe. Opa mbaʼe heʼíva ha ojapóvape ohechaukavaʼerã mbaʼeichaitépa ohayhu chupe. Tembireko ningo ovyʼa ha oñeñandu porã iména akóinte omokunuʼũramo chupe. Péro peteĩ tembireko nomokunuʼũiva chupe iména, ndovyʼái ha oñeñandu vai orekóramo jepe peteĩ óga porã ha opa mbaʼe oikotevẽva hogapýpe.

Mbaʼépa ojapovaʼerã peteĩ ména ohechauka hag̃ua hembirekópe ohayhuha chupe? Oñeʼẽ jave hembirekópe hapichakuéra rovake ohechaukavaʼerã orrespeta ha ohayhuha chupe. Notĩrivaʼerã avei heʼi hag̃ua hapichakuérape mbaʼeichaitépa oipytyvõ chupe hembireko. Ha koʼýte oĩ jave hikuái haʼeño ohechaukavaʼerã hembirekópe ohayhuetereiha chupe. Ikatu ojagarra chupe ipógui, omoñeʼẽ, opukavymi ha oañuã. Koʼã mbaʼe ningo omoñeñandu porãiterei tembirekokuérape ha arakaʼeve ndahesaraimoʼãi chugui.

‘Notĩri ohenói hag̃ua chupekuéra “che ermáno”’

Jesucristo notĩrivaʼekue ohenói hag̃ua ‘che ermáno’ umi ungídope (Heb. 2:​11, 12, 17, ÑÑB). Nde karai, oiméramo ne rembireko oservi Jehovápe, aníkena nderesarái haʼeha avei ne ermána. Ha pe kompromíso iñimportantevéva ne rembireko ojapovaʼekue ningo: oñemeʼẽ Jehovápe ha ojevautisa. Upéva ningo iñimportantevehína pe ñemendágui jepe. Upévare, kongregasiónpe peteĩ ermáno omeʼẽtaramo komentário hembirekópe, heʼivaʼerã chupe ermána. Ne rembireko ningo ne ermána avei tahaʼe kongregasiónpe térã nde rógape. Upéicharõ tahaʼe haʼehápe, ména otrata porã vaʼerã hembirekópe ha ohechaukavaʼerã chupe ohayhuha.

Oiméramo nde siervo ministerial térã ansiáno, ikatu ne rembiapoitereígui ijetuʼu  ndéve sapyʼánte reñatende porã hag̃ua ne rembireko ha ne familiakuérare. Péro remohenda porãramo ne rembiapo kongregasionpegua, katuete ne tiempovéta ne rembirekópe g̃uarã. Haʼe ningo oikotevẽ nderehe. Ha umi tembiapo kongregasionpegua ikatúnte avei ojapo ótro ermáno, péro ne rembirekóre ndémante reñangarekovaʼerã.

Nde ningo remoakã ne rembirekópe, ha la Biblia heʼi voi: “Aipota peikuaa porã Cristo opa kuimbaʼe akãha, ha pe ména hembireko akãha” (1 Cor. 11:3). Mbaʼéichapa nde remoakãvaʼerã ne rembirekópe? Remoakãvaʼerã mborayhúpe ha ndovaléi ere: Che hína la amandáva koʼápe pórke la Biblia heʼi voi ména omoakãha hembirekópe. Nahániri, retrata porã vaʼerã katu ne rembirekópe Jesús oporotrata haguéicha (1 Ped. 2:21).

‘Peẽ ningo che amígo’

Jesús ningo ohenói umi hemimboʼépe ‘che amígo’. Haʼe heʼi: ‘Che ndaʼevéima penderehe peẽ che rembiguaiha, peteĩ tembiguái ningo ndoikuaái mbaʼépa ojapo ijára. Che koʼág̃a poroguereko che amígoramo, aikuaaukágui peẽme opa mbaʼe che Ru heʼivaʼekue chéve’ (Juan 15:​14, 15). Jesús ningo akóinte oñemongetavaʼekue hemimboʼekuéra ndive ha ohasa porã oñondive hikuái. Pór ehémplo, oho hikuái peteĩ kasamientohápe Canápe (Juan 2:2). Ha pyʼỹinte oñembyatymivaʼerã hikuái pe hardín de Getsemanípe avei. La Biblia heʼi voi heta vése ‘Jesús ohómi hague upépe hemimboʼekuéra ndive’ (Juan 18:2).

Ne rembireko avei ohechakuaavaʼerã haʼe ne amigaiteha. Upévare pejapovaʼerã opa mbaʼe oñondive. Pemombaʼeguasu Jehovápe oñondive, avei pestudia, pekaru ha pesẽ peguata oñondivemi ha peñemotiémpo peñemongeta hag̃ua. Tojekuaa penderehe pejoayhuha ha oñoamigoiteha.

“Ohayhu chupekuéra ipahaite peve”

Jesús ohayhu hemimboʼekuérape “ipahaite peve” (Juan 13:1). Péro oĩ ména ndojapóiva Jesús ojapo haguéicha. Oĩ ohejáva hembirekópe ha oheka iñirũrã peteĩ ipyahuvéva (Mal. 2:​14, 15).

Willi katu peteĩ karai oñehaʼãva ojapo Jesucristo ojapo haguéicha. Haʼe heta áñore oñangareko hembireko hasykatúvare. Upéicharõ jepe Willi heʼi: “Che rembireko ningo haʼe pe jopói iporãvéva Ñandejára omeʼẽvaʼekue chéve. Haʼe niko ndaijojahái! Ojapóma sesenta áño haʼe hague añangarekotaha hese tahaʼe ivai ha iporã jave ha ndacheresaraimoʼãi upe aprometevaʼekuégui”.

Menakuéra pehayhúkena pene rembirekópe Jesús ohayhuháicha ikongregasiónpe. Pene rembireko ningo pene ermána ha pene amíga hína.

[Nóta oĩva taʼanga ndive páhina 20]

Ne amigaitépa hína ne rembireko?

[Nóta oĩva taʼanga ndive páhina 20]

Akóintekena “pehayhu pene rembirekópe”