Moõpa ñaimevaʼerã oñehundíta vove ko múndo aña?

MBAʼÉPA oikóta umi hekojojávagui Jehová ohundi vove ko múndo aña Armagedónpe? Proverbios 2:​21, 22 heʼi: “Hekojojávamante oikóne ko yvy ape ári, ijoheipyrévamante hendáne pype. Iñañáva katu oñehundipáne, ojehapoʼóne ko yvýgui”.

Péro mbaʼéichapa ojesalváta umi hekojojávape? Ohovaʼerãpa okañy peteĩ lugárpe? Moõpa oĩvaʼerã oñehundíta vove ko múndo aña? Ñambohovái hag̃ua koʼã porandu ikatu jahecha cuatro mbaʼe oikovaʼekue yma. Ha umíva ohechaukáta ñandéve mbaʼéichapa Jehová osalva hembiguaikuérape.

Oĩvaʼerã peteĩ lugárpe ojesalva hag̃ua

Pe 2 Pedro 2:​5-7-pe jahechamíta mbaʼéichapa Jehová osalvavaʼekue Noé ha Lótpe. Upépe heʼi: ‘Ñandejára noperdonaivaʼekue umi yvypóra yma guarépe, ombou uvei ama guasu umi tekove ñaña ári ha osalva Noépe ha siete tapichápe hendive. Noé ningo oñeʼẽvaʼekue tekomarangatu rehe. Ñandejára ohundivaʼekue avei Sodoma ha Gomorra, ohapypa ha upéicha omoĩ ehémploramo umi tekove aña upe rire oikóvape g̃uarã. Péro Lot marangatúpe Ñandejára oguenohẽ ijapyteguikuéra, haʼe ningo jepyʼapýpe oikovaʼekue umi tekove rekovai apytépe’.

Mbaʼéichapa Noé ojesalvarakaʼe oúrõ guare pe ama guasuete? Ñandejára heʼi chupe: ‘Haʼéma ahunditaha yvypóra, haʼekuéra ningo omyenyhẽ ko yvy teko añágui. Upévare ahundíta chupekuéra opaite mbaʼe yvýpe oĩva reheve. Nde katu ejapo peteĩ káha guasu yvyrágui ha ikoty hetáva’ (Gén. 6:​13, 14). Ha Noé ojapo pe káha guasu Jehová heʼi haguéicha chupe. Upéi siete día ou mboyve pe ama guasu, Jehová heʼi Noépe oike hag̃ua pe káha guasúpe ifamiliakuéra ndive ha umi mymbakuéra. Ha ohasa rire umi siete día, oñemboty pe okẽ ha oñepyrũ tuichaiterei ‘oky 40 ára ha pyhare pukukue’ (Gén. 7:​1-4, 11, 12, 16). Upéicha Noé ha ifamiliakuéra ojesalvavaʼekue (1 Ped. 3:20). Jahechakuaa avei tekotevẽ hague iñeʼẽrendu hikuái ha oike pe káha guasúpe. Upépe añoite ikatu ojesalva hikuái (Gén. 7:​19, 20).

Lot katu idiferénte la ikáso. Chupe mokõi ánhel heʼivaʼekue osẽvaʼerãha upe oikohágui ikatu hag̃uáicha ojesalva. Ñepyrũrã umi ánhel heʼi Lótpe ombyatypa hag̃ua ihentekuéra oĩva guive Sodómape. Ha upéi heʼi chupe: ‘Enohẽ chupekuéra koʼágui. Ore rohundíta ko táva guasu’. Péicha jahecha Lot ha ifamiliakuéra ‘osẽvaʼerãha oho pyaʼe umi sérrore’ ikatu hag̃uáicha ojesalva (Gén. 19:​12, 13, 17).

Noé ha Lot rembiasakue ohechauka ñandéve ‘Jehová oikuaaha mbaʼéichapa osalváta umi imarangatúvape ha oheja umi heko añávape ojekastiga hag̃ua’ (2 Ped. 2:9). Jahechákuri mbaʼéichapa Noé ha Lot ojapovaʼerã Jehová heʼíva ojesalva hag̃ua. Noé oikevaʼerã pe káha guasúpe ha Lot katu osẽvaʼerã Sodómagui. Péicha añoitépa Jehová ikatu ñandesalva ñandéve avei? Térãpa haʼe ikatúnte avei ñandesalva tañaime ñaimehápe? Ñambohovái hag̃ua koʼã porandu ikatu jahechave mokõi mbaʼe oikovaʼekue.

 Ñaimevaʼerãpa peteĩ lugárpe jajesalva hag̃ua?

Jehová ombou mboyve Egíptope pe diez plagaha, heʼi umi Israelguápe mbaʼépa ojapovaʼerã ojesalva hag̃ua. Heʼi chupekuéra omona hag̃ua hóga rokẽre ovecha ruguy, upe ojukavaʼekue Paskuarã. Upéicharõ Jehová ou vove ojuka hag̃ua umi Egiptoyguápe, oheja reíta umi óga orekóva guive pe ovecha ruguy ha ndojapomoʼãi mbaʼevete ifamiliakuérare. Ha upe pyharépe voi ‘Jehová ojukapaite opavave Egiptoygua raʼy ypykuépe. Faraón raʼy ypykue guive, pe tembiguái oĩva kárselpe raʼy ypykue peve. Ha hymbakuéra memby ypykue avei’. Péicha jahecha umi Israelgua natekotevẽi hague oho mamove osalva hag̃ua ifamília ypykue (Éxo. 12:​22, 23, 29).

Jahechamína koʼág̃a Rahab ohasavaʼekue, haʼe ningo peteĩ kuña rekovai oikóva Jericópe. Rahab ohechakuaa umi Israelgua ohundiʼintemaha upe táva. Haʼekuéra ojagarráta upe yvy Jehová oprometevaʼekue chupekuéra. Upérõ oñemondókuri mokõi kuimbaʼe Israelguápe ohecha hag̃ua Jericó, ha opyta hikuái Rahab rógape, upéi haʼe heʼi chupekuéra umi hénte oikóva upépe okyhyjetereiha chuguikuéra. Upémaramo, Rahab omokañy chupekuéra hógape ha ojerure umi kuimbaʼépe ani hag̃ua ohundi chupe ha ifamiliakuérape ou vove ojagarra hag̃ua Jericó. Ha umi kuimbaʼe heʼi chupe ombyatypaite hag̃ua ihentekuérape hógape, pe murálla gotyo ikatu hag̃uáicha ojesalva. Ha heʼi avei chupe osẽramo upégui omanotaha umi ótro hénteicha (Jos. 2:​8-13, 15, 18, 19). Upe riréma Jehová heʼi Josuépe hoʼapataha pe murálla omongoráva upe táva (Jos. 6:5). Upévare ikatu ñapensa Rahab ha ifamiliakuéra ikatuetenteha avei omano. Mbaʼéicha piko ojesalváta hikuái?

Og̃uahẽvo pe tiémpo umi Israelgua ojagarra hag̃ua Jericó, umi saserdóte ombopu la turu ha umi ótro katu osapukái. Josué 6:​20-pe heʼi: ‘Ohendúvo hikuái pe turu pu, osapukái hatã ha upe táva murálla ou yvýpe’. Ha upéva ndaipóri yvypóra ojokovevaʼerã. Péro Jehová ojoko ohutypotaitévo Rahab róga. Upépe Josué heʼi umi mokõi kuimbaʼépe: ‘Tapeho Rahab rógape, penohẽ chupe ha ihentekuérape. Pejapo peje haguéicha chupe pejapotaha’ (Jos. 6:22). Péicha ojesalva Rahab ha hogayguakuéra.

Mbaʼépa jajapovaʼerã upéicharõ jajesalva hag̃ua?

Jahecháma mbaʼéichapa Jehová osalvavaʼekue Noé, Lot, Rahab ha Israelguápe. Mbaʼépa ñaaprende chuguikuéra?  Tekotevẽpa ñaime peteĩ lugárpe jajesalva hag̃ua oñehundi vove ko múndo aña?

Jahechakuaa ningo añete Noé ojesalva hague oĩ rupi pe káha guasu ojapovaʼekuépe. Péro mbaʼérepa haʼe oikéraʼe upépe? Ojerovia rupi Jehováre ha iñeʼẽrendúgui chupe. La Biblia ningo heʼi: ‘Noé ojapo opa mbaʼe Ñandejára heʼi hagueichaite chupe’ (Gén. 6:22; Heb. 11:7). Ñandépa jajapo avei Jehová heʼíva ñandéve? Noé ningo ‘omombeʼuvaʼekue opavavépe mbaʼéichapa Ñandejára oipota ojeiko’ (2 Ped. 2:5). Ha ñandépa kyreʼỹme avei ñamombeʼu Ñandejára marandu, oĩramo jepe nañanerenduséiva?

Lot katu ojesalvavaʼekue osẽ rupi Sodómagui. Haʼe ningo hekojoja ha omyangekói chupe umi hénte rekovai oikóva Sodoma ha Gomórrape. Koʼag̃aguáicha avei hekokyʼa umi hénte oikóva upépe. Ñandévepa ñanemyangekói ha ñandeharu avei umi mbaʼe térãpa jajepokuaáma hese? Ñañehaʼãpañaína ñanderekoporã? (2 Ped. 3:14.)

Rahab ha umi Israelgua ojesalva hag̃ua tekotevẽvaʼekue opyta hógape. Ha upearã ojeroviavaʼerã Jehováre ha iñeʼẽrendu chupe (Heb. 11:​28, 30, 31). Epensamíntena mbaʼéichapa oñeñandúneraʼe umi tuvakuéra Israelguáva ohendúvo pe ánhel ojukapahikóni opavave taʼýra ypykuépe! Oimevaʼerã ningo ni ndojeíri hikuái ifamília ypýgui (Éxo. 12:30). Ha Rahab katu oiméne oho okañýraʼe pe hóga eskínape ifamiliakuéra ndive. Haʼe ningo ojeroviaiterei Ñandejárare ha upévaguinte nosẽi hógagui ohendúvo mbaʼéichapa hoʼa oúvo pe murálla.

Koʼẽrõitéma ningo oñehundíta ko múndo aña. Ha ñande ndajaikuaái gueteri mbaʼéichapa Jehová oñangarekóta ñanderehe ‘ipochytaha árape’ (Sof. 2:3). Péro jaikuaa porã, tañaime ñaimehápe jajeroviavaʼerãha Jehováre ha ñaneñeʼẽrendu chupe. Upéicha avei ñamombaʼevaʼerã koʼág̃a pe ‘koty’ Isaías oñeʼẽ hague.

‘Tereho eike nde kotýpe’

Isaías 26:20 heʼi: ‘Tereho, nde che retã, eike nde kotýpe ha emboty okẽ nde rapykuerépe. Ekañy sapyʼaitemi, ohasa peve pe jehasa asy guasu’. Ko profesía oñekumplíneraʼe umi Media ha Persiaygua ojagarrárõ guare Babilonia 539-pe Jesús ou mboyve. Yma Ciro, pe Persiaygua oikévo upe távape heʼi ani hag̃ua avavete osẽ hógagui pórke umi soldádo ojukapaitéta umi ojuhúvape guive kállere.

Upe ‘koty’ Isaías oñeʼẽ hague ikatu ñambojoja koʼág̃a umi cien mil kongregasión orekóvare Testigos de Jehová opaite hendárupi. Umi kongregasión ningo tuichaiterei ñanepytyvõ koʼág̃a ha koʼýte ñanepytyvõta pe ‘jehasa asy guasúpe’ (Rev. 7:​14, ÑÑB). Jehová rembiguaikuérape ojeʼe oike hag̃ua upe ‘kotýpe’ okañy ohasapa peve pe ‘jehasa asy guasu’. Upévare ñamombaʼevaʼerã pe kongregasión ha ni mbaʼeveichavérõ ani ñañemomombyry chugui. Ha jajapovaʼerã apóstol Pablo heʼivaʼekue: ‘Ñañehaʼã ñañomokyreʼỹ ha jajoayhu, jajapove jahávo tembiapo porã. Ani ñañemomombyry kongregasióngui, oĩ ningo ojapóva upéicha. Ñañomokyreʼỹ uvei jahechágui oñemoag̃uiha oúvo Ñandejára ára’ (Heb. 10:​24, 25, ÑÑB).

[Nóta oĩva taʼanga ndive páhina 7]

Mbaʼépa ñanemboʼe Jehová ojapovaʼekue yma osalva hag̃ua hembiguaikuérape?

[Nóta oĩva taʼanga ndive páhina 8]

Mbaʼérepa oñembojojahína pe ‘koty’ oñeʼẽ hague Isaías?