Oñeporandúva jepi

Arakaʼépa Satanáspe oñemosẽ yvágagui? (Rev. 12:​1-9)

Lívro de Revelaciónpe ndeʼíriramo jepe arakaʼetépa oñemosẽ Satanáspe yvágagui, omombeʼu mbaʼe mbaʼépa oikovaʼerã jaikuaa hag̃ua mbaʼe tiémpopepa oiko upéva. Primero heʼi Ñandejára omoĩha Irréino yvágape. Upe rire ‘oiko peteĩ ñorairõ guasu yvágape’ ha oñemosẽ Satanáspe upégui.

La Biblia ohechauka 1914-pe opaha ‘umi ára oñemeʼẽvaʼekue umi tetãnguérape’ ha oñepyrũ hague Ñandejára Rréino oisãmbyhy (Luc. 21:24). * Péro mboy tiémpo haguépepa oñepyrũ oñeñorairõ yvágape ha oñemosẽ Satanáspe?

Revelación 12:​4-pe heʼi: ‘Satanás oho oñemboʼy pe kuña imembypotáva renondépe, imemby vove hoʼu hag̃ua chugui imemby’. Upéva ohechauka Satanás ohundise hague oñepyrũ rehe voi Ñandejára Rréino yvágape. Péro Jehová ndohejái chupe ojapo upéva. Upéicharõ jepe, Satanás osegi ojapo oimeraẽ mbaʼe ohundi hag̃ua Ñandejára Rréino. Upévare “Miguel ha hiʼanhelkuéra” oñangareko hag̃ua Ñandejára Rréinore pyaʼe porã oñemoĩ oñorairõ Satanás ha hiʼanhelkuéra ndive. Ha upéi omosẽ hikuái yvágagui Satanás ha hiʼanhelkuérape. Upéva ningo oiméne oikóraʼe 1914-pe oñepyrũ riremi Ñandejára Rréino.

La Bíbliape heʼi avei Ñandejára omoñepyrũ riremi Irréino yvágape omoingove jey hague umi ungídope (Rev. 20:6). * Péro ndeʼíri umi ungido omoirũ hague Jesúspe oñorairõ hag̃ua Satanás ha hiʼanhelkuéra ndive. Upéicharõ, oiko rire pe ñorairõ guasu yvágape ha oñemosẽ rire Satanáspe, oñepyrũ oñemoingove jey umi ungídope.

Jahecha haguéicha la Biblia ndeʼíri arakaʼetépa oñemosẽvaʼekue yvágagui Satanás ha hiʼanhelkuérape. Péro umi mbaʼe oikovaʼekuére jahechakuaa 1914-pe Jehová omoĩ hague Jesúspe oisãmbyhy hag̃ua yvágape ha upe riremi omosẽ hague Satanás ha hiʼanhelkuérape.

[Nóta]