Ñandejára siervokuéra ‘ikyreʼỹ ojapo hag̃ua iporãva’

‘Jesús voi omeʼẽ hekove ñandesalva ha ñandepeʼa hag̃ua mbaʼe vaígui. Ñanepotĩ ha jaiko hag̃ua peteĩ tetã ipotĩvaramo, imbaʼerãnte. Ha ñanekyreʼỹve hag̃ua jahávo jajapo hag̃ua iporãva.’ (TITO 2:​14, ÑÑB.)

1. Mbaʼépa Jesús ojapo pe témplope yma 10 de nisán?

 YMA 10 de nisán, áño 33-pe umi hénte heta mbaʼe ojapo Jerusalénpe pe témplope hiʼag̃uimbaitéma rupi pe Páskua. Ha upérõ Jesús oho avei ha otopa umi hénte ombaʼevende ha ombaʼejoguahína upépe. Ipochyeterei upévare ha omosarambi chupekuéra upégui. Otumbapaite chuguikuéra ikosakuéra, imesa ha isílla umíva. Umi mbaʼe oĩmbaitehína la Bíbliape, jajuhukuaa pe lívro de Mateo, Marcos ha Lúcaspe (Mat. 21:12; Mar. 11:15; Luc. 19:45). Péro ndahaʼéi upérõ añónte Jesús ojapóva koʼã mbaʼe. Tres áño upe mboyve ojapóma voi kuri péicha (Juan 2:​13-17). Koʼã mbaʼe ojapovaʼekuére jahechakuaa mbaʼeichaitépa Jesús akóinte ohayhu Ñandejára róga.

2, 3. Mbaʼéichapa Jesús ohechauka kyreʼỹme ojapo hague iporãva?

² Upe 10 de nisán áño 33-pe, Jesús heta hendáicha ohechauka ikyreʼỹha ojapo hag̃ua iporãva. Mateo omombeʼu Jesús omosẽmba rire umi ombaʼevendévape, omonguera hague avei umi hesatũva ha ikarẽvape (Mat.  21:14). Lucas katu omombeʼu upe árape Jesús oporomboʼe hague oikóvo pe témplope (Luc. 19:47; 20:1). Péicha jahecha Jesús kyreʼỹme ojapo hague opa mbaʼe Ñandejárape g̃uarã ha omboʼe hag̃ua umi héntepe.

³ Heta áño rire apóstol Pablo ohai peteĩ kárta Títope ha omombeʼu chupe Jesucristo ‘omeʼẽ hague hekove ñandesalva ha ñandepeʼa hag̃ua opa mbaʼe vaígui. Ñanepotĩ ha jaiko hag̃ua peteĩ tetã ipotĩvaramo, imbaʼerãnte. Ha ñanekyreʼỹve hag̃ua jahávo jajapo hag̃ua iporãva’ (Tito 2:​14, ÑÑB). Upévare, mbaʼéichapa ikatu ñande jahechauka ‘ñanekyreʼỹha jajapo hag̃ua iporãva’? Ha mbaʼérepa ñanemokyreʼỹta umi rréi Judaygua iñeʼẽrenduvaʼekue ehémplo?

Kyreʼỹme opredika ha oporomboʼe

4, 5. Mbaʼéichapa ohechauka Asá, Jehosafat, Ezequías ha Josías oipotaha Jehovápe añoite oñemombaʼeguasu?

⁴ Rréi Asá, Jehosafat, Ezequías ha Josías kyreʼỹme ombaʼapovaʼekue ohundipaite hag̃ua umi lugár ha opa mbaʼe ojeporúva oñemombaʼeguasu hag̃ua ñandejára guaʼúpe. Asá ‘oipeʼapaite umi tupão guaʼu ha altár oñemopuʼãva ñandejára guaʼúpe’ (2 Cró. 14:3). Rréi Jehosafat katu ipyʼaite guive oservi Jehovápe ha upévare ‘ohundi umi ñandejára guaʼu tupão ha itaʼangakuéra’ (2 Cró. 17:6; 19:3). *

⁵ Rréi Ezequías oprepara porãiterei ojejapo hag̃ua pe Páskua Jerusalénpe, ipukúva siete día. Upe rire ‘opa Israelgua oĩvaʼekue upépe oho Judá tavakuéra rupi ha omonguʼipaite umi ñandejára guaʼu raʼanga. Oity ha ohundipaite hikuái umi lugár yvate ha umi kuaveʼẽmby rendakuéra oĩva Judá, Benjamín ha Manaséspe’ (2 Cró. 31:​1, ÑÑB). Rréi Josías katu ocho áño orekórõ guare oñepyrũmavaʼekue ogoverna. Ñandejára Ñeʼẽ heʼi: ‘Ocho áño oñepyrũ haguépe oisãmbyhy, ipyahúrõ gueteri Josías, oñepyrũ oheka Ñandejárape, Itúva ypykue David Járape. Ha doce áño ogoverna haguépe oñepyrũ omopotĩ Judá ha Jerusalén opaichagua ñandejára guaʼu tupãógui ha ñandejára guaʼu raʼangágui’ (2 Cró. 34:3). Péicha jahecha mbaʼéichapa umi cuatro rréi ohayhuvaʼekue ipyʼaite guive Jehovápe ha oipota chupe añoiténte oñemombaʼeguasu.

6. Maʼerãpa ñande ñaipytyvõñaína la héntepe?

⁶ Ñande avei koʼág̃a rupi ñaipytyvõñaína la héntepe oheja hag̃ua umi rrelihión japu omboʼéva ha anivéma hag̃ua omombaʼeguasu umi taʼanga. Upearã ningo ñande ñasẽ japredika umi ogaha rupi (1 Tim. 2:4). Jahechamína peteĩ mbaʼe oikovaʼekue: Peteĩ kuñataĩ Asiaygua imanduʼa isy orekoha heta taʼanga ha omombaʼegusúmi hague. Péro haʼe opensa ndaikatuiha umi taʼanga omoag̃ui chupe Ñandejárare. Upévare oñemboʼe ha ojerure Ñandejárape ojekuaaukami hag̃ua chupe. Ha peteĩ árape og̃uahẽ hógape mokõi testigos de Jehová, koʼãva omombeʼu pe kuñataĩme Ñandejára añeteguáva heraha Jehová. Avei heʼi chupe Ñandejárape ndogustaiha oñemombaʼeguasu umi taʼanga. Ovyʼaiterei ningo pe kuñataĩ oikuaávo upéva! Koʼág̃a haʼe opredika kyreʼỹma avei ha oipytyvõ umi héntepe oikuaa hag̃ua Ñandejárape (Sal. 83:18; 115:​4-8; 1 Juan 5:21).

7. Mbaʼépa ñanemboʼe Jehosafat ojapoukavaʼekue?

⁷ Japredika jave ogaha rupi, ñañehaʼãpa ñamombeʼu enterovetépe pe marandu porã? Tres áño ogoverna haguépe ningo Jehosafat omondo ‘opa táva Judaygua rupi’ cinco prínsipe, nueve levíta ha dos saserdótepe. Maʼerãpa upéva? Omboʼe hag̃ua umi héntepe Jehová léi. Ha ojapo porãiterei ningo hikuái upe tembiapo, upévare umi tetã ijykeregua jepe okyhyjéma Ñandejáragui (jaleemína 2 Crónicas 17:​9, 10). Ñande avei ñasẽramo  japredika diferénte día ha óra, katuete jajuhuvéta umi ogajárare ha ambue hogayguáre.

8. Mbaʼépa ikatu jajapo japredika hag̃ua hetave ñande rapichápe?

⁸ Heta Ñandejára rembiguái koʼag̃agua oĩ ohejáva hóga oho hag̃ua opredika umi lugár oñekotevẽhápe. Ejapomína nde avei upéicha. Ha ndaikatumoʼãirõ katu, eñehaʼãna epredika umi nde rapicha oñeʼẽvape ótro idióma ha oikóva nde repredikaha rupi. Upéicha ojapovaʼekue peteĩ ermáno hérava Ron ha orekóva 81 áño. Haʼe opredikaha rupi oĩ hetaiterei tapicha tetã ambueguáva ha upévare oñehaʼã oaprende 32 idiómape oporosaluda hag̃ua. Ramoite osẽ jave oguata otopa peteĩ karai ha kuñakarai Africaygua rehe ha osaluda chupekuéra iñeʼẽtépe, yorúbape. Ha upévo oporandu chupe hikuái haʼépa ohómava mbaʼe Áfricape. Ha nahániri heʼi Ron. Upépe oikuaaséma hikuái mbaʼéicha rupípa osaluda chupekuéra iñeʼẽme. Ha Ron oaprovecha upéva opredika hag̃ua. Ohendu porãnte hikuái ha oheja umi rrevísta oikuaveʼẽva chupekuéra. Upéi omombeʼu avei hikuái pe ermánope moõitépa opyta la hóga ikatu hag̃uáicha ojeho ojevisita chupekuéra ostudia hag̃ua la Biblia.

9. Mbaʼérepa iñimportantete jaiporu la Biblia japredika jave? Emombeʼu peteĩ ehémplo.

⁹ Umi kuimbaʼe Jehosafat omondovaʼekue oporomboʼe hag̃ua ningo oiporu pe lívro ‘orekóva Ñandejára léi’. Ha ñande Testigos de Jehová jaiporu avei Ñandejára Ñeʼẽ ñamboʼe hag̃ua ñande rapichápe. Japredika jave ñañehaʼã jalee peteĩ téysto jepe ikatu hag̃uáicha ohechakuaa hikuái ñamombaʼeha pe marandu porã. Peteĩ ermána hérava Linda opredika jave ogaha rupi, peteĩ kuñakarai heʼi chupe ndaikatumoʼãiha oñatende hese pórke iménape ojagarra derrame cerebral ha oñangarekovaʼerãha hese. Ha upéi heʼi: “Che ningo ndaikuaái mbaʼérepa Ñandejára oheja oiko koʼã mbaʼe, oiméneko afalla vaietereíraʼe”. Upémarõ Linda oporandu ikatúpa ohechaukami chupe mbaʼépa heʼi la Biblia ha olee Santiago 1:13. Upéi heʼi: “Koʼág̃a ningo ñande jahasa asy, péro ndahaʼéi Ñandejára ñandekastiga haguére”. Ha pe kuñakarai oañua Líndape ohendúvo upéva. Upe rire Linda heʼi: “Avyʼaiterei ningo ambopyʼaguapy haguére pe kuñakaraípe Ñandejára Ñeʼẽ rupive. Péichango sapyʼánte opyta porã ñandéve jalee hag̃ua la héntepe umi téysto ndoikuaáiva”. Upe guive pe kuñakarai oñepyrũ ostudia la Biblia.

Mitãrusu ha mitãkuña kyreʼỹme oservíva Ñandejárape

10. Mbaʼérepa Josías ehémplo umi imitãvape g̃uarã?

¹⁰ Rréi Josías ningo imitã guive odefendemavaʼekue Ñandejára réra. Ha 20 áño orekópe ohundikapaite umi lugár ojeporúva oñemombaʼeguasu hag̃ua ñandejára guaʼu raʼanga  (jaleemína 2 Crónicas 34:​1-3). Koʼág̃a rupi avei oĩ heta imitãva kyreʼỹme ombaʼapóva Jehovápe g̃uarã.

11-13. Mbaʼépa ñanemboʼe umi mitãkuña ha mitãrusu kyreʼỹme oservivahína Jehovápe?

¹¹ Hannah ningo peteĩ mitãkuña Inglaterraygua. Ha orekórõ guare 13 áño oikuaa oĩha peteĩ grúpo francéspe, ag̃uieténte pe táva haʼe oikohágui. Hannah ningo eskuélape ostudiavaʼekue francés ha heʼi itúvape ohoseha upe grúpo rreunionhápe, ha oraha chupe itúva. Koʼág̃a Hannah oreko 18 áño, ojapóma iprekursorádo ha kyreʼỹme opredika umi francéspe oñeʼẽvape. Nde mitãkuña ha mitãrusu, nereaprendeséipa avei ótro idióma reipytyvõ hag̃ua nde rapichakuérape oikuaa hag̃ua Jehovápe?

¹² Rachel katu peteĩ mitãkuña ojevautisavaʼekue 1995-pe. Haʼe heʼi: “Ajevautisa rire, haʼetévaicha chéve ajapómava opa mbaʼe oñehaʼarõva chehegui. Péro ndaʼareiete ahecha pe vidéo Vayamos tras metas que honran a Dios, ha upépe ahechakuaa heta mbaʼe ikatuha ajapove Jehovápe g̃uarã. Avei añehaʼãvevaʼerãha apredika ha kyreʼỹme amboʼe che rapichakuérape Ñandejára Ñeʼẽ”. Mbaʼéichapa oñeñandu Rachel koʼág̃a? Haʼe heʼi: “Koʼág̃a añandu aimeha ag̃uiete Jehovágui ha añemboʼéma chupe che pyʼaite guive. Añemotiempove avei astudia hag̃ua la Biblia ha igustoiterei voi chéve, haʼetevaicha ahechapáva umi mbaʼe aleéva. Apredika jave katu haʼete ku chepiroʼy asýva ha añeñandu porãiterei ahechávo mbaʼéichapa la Biblia ombopyʼaguapy umi héntepe”.

¹³ Luke katu heʼi omokyreʼỹeterei hague chupe pe DVD Los jóvenes preguntan... ¿Qué haré con mi vida? Ha ohechapa rire upe vidéo haʼe heʼi: “Pe vidéo añetehápe chemopensa mbaʼépa ajapovaʼerã che rekovépe. Heta oĩ heʼíva chéve aha raẽ vaʼerãha universidápe ikatu hag̃uáicha ambaʼapo porã ha upéi katu ahecha hag̃ua mbaʼépa ikatu ajapove Jehovápe g̃uarã. Péro che ahechakuaa ajapóramo upéicha nachepytyvõmoʼãiha aikuaave hag̃ua Jehovápe, chemomombyrevéta katu chugui”. Peẽ mitãrusu ha mitãkuña, ikatúpa pejapo Hannah ojapo haguéicha ha pemombeʼu pende rapichápe pe marandu porã? Térãpa pesegíta Rachel ehémplo ha pembaʼapove Jehovápe g̃uarã? Ikatu avei Luke ojapo haguéicha pepensa porã ha pemboyke umi mbaʼe ogueraha vaíva hetápe.

Ñahendúkena Jehová heʼíva

14. Mbaʼéichapa jaikovaʼerã Jehová ñandeguerohory hag̃ua ha mbaʼérepa ijetuʼu upéva?

¹⁴ Jehová rembiguaikuéra hekomarangatuvaʼerã haʼe oguerohory hag̃ua chupekuéra. Isaías heʼi porã voi: ‘Neike, pesẽ katu upégui. Ani pepoko mbaʼeve ipotĩʼỹva rehe, pesẽ katu Babilóniagui. Penepotĩke peẽ pegueraháva Jehová rembiporu’ (Isa. 52:11). Isaías ohai mboyvete koʼã mbaʼe, rréi Asá ombaʼapo mbarete vaʼekue omopotĩ hag̃ua Judá umi mbaʼe tieʼỹ ojejapóvagui (jaleemína 1 Reyes 15:​11-13). Upéi, heta áño rire apóstol Pablo heʼi Títope Jesús omano hague ikatu hag̃uáicha omopotĩ hemimboʼekuérape opa mbaʼe vaígui. Ha ojapo chuguikuéra ‘peteĩ tetã imbaʼerãva, ikyreʼỹva ojapo hag̃ua iporãva’ (Tito 2:14). Péro koʼág̃a ningo ko múndope henyhẽ la hekovaíva ha upéicha rupi ijetuʼueterei ñandéve ñanderekopotĩ hag̃ua, ha koʼýte umi imitãvape. Upévare, opavave jaservíva Jehovápe tahaʼe kakuaa térã imitãva, ñañehaʼãkena ani ñanemongyʼa ko múndo aña. Aníkena ñamaña umi taʼanga tieʼỹ oñemoĩvare propagandarã  térã umi ojehechaukávare télepe ha Internétpe.

15. Mbaʼépa tekotevẽ jaikuaa ñanembojeguaru hag̃ua umi mbaʼe vai?

¹⁵ Jajapóramo Jehová heʼíva ñandéve, ndajachaʼemoʼãi umi mbaʼe vaíre (Sal. 97:10; Rom. 12:9). Peteĩ ermáno ningo heʼi umi mbaʼe tieʼỹ ñandetiraitereiha voi. Upévare ani hag̃ua jaʼa upe ñuhãme tekotevẽ ñanembojeguaru. Ha mbaʼépa ikatu jajapo upearã? Ñanembaretevaʼerã ha jahechakuaa mbaʼépa ikatu ojapo ñanderehe. Peteĩ ermáno ojepokuaavaʼekue ohecha pornografía Internétpe, oñehaʼã mbarete anive hag̃ua ohecha. Ñepyrũrã ojedesidi omboykepaitetaha umi mbaʼe vai, oservi hag̃ua Jehovápe ipyʼaite guive ha tekomarangatúpe. Upéi omoĩ ikomputadóra peteĩ lugár enterove ohecha hag̃uáme. Ha oiporúta jave Internét ombaʼapo hag̃ua ojerure hembirekópe oĩ hag̃ua ijykére upépe.

Mbaʼérepa iporã ñanderekopotĩ

16, 17. Mbaʼépa oiko la hénte ohechávo mbaʼéichapa jajapo iporãva?

¹⁶ Umi hénte ningo oguerohoryeterei ohechávo mbaʼéichapa hekopotĩ umi mitãrusu ha mitãkuña oservíva Jehovápe (jaleemína 1 Pedro 2:12). Peteĩ karai ndochaʼéiva Testigos de Jehová rehe oho Betélpe Lóndrespe omyatyrõ hag̃ua peteĩ impresóra tuicháva ha upéi okambiaite oúvo. Upe tiémpope hembireko ostudiahikóni la Biblia ha ohechakuaa hese upéva. Pe karai ningo ndoipotaietevaʼekue testigokuéra og̃uahẽ hógape, péro ou rire Betélgui omombaʼeterei mbaʼéichapa ojetrata chupe upépe. Omombeʼu hembirekópe igustoiterei hague chupe ombaʼapo Betélpe, enterovénte ipasiénsia ha nohendúi avavépe ijurutieʼỹramo. Péro la oguerohoryvéva ningo umi mitãrusu ha kuñataĩ kyreʼỹme ombaʼapóva pe marandu porã rehehápe ndaisuéldoiramo jepe hikuái.

¹⁷ Jaguerohoryeterei ningo avei umi ermáno kyreʼỹme oservivahína Jehovápe ha ombaʼapóva omantene hag̃ua ifamília (Col. 3:​23, 24). Iguapoiterei haguére hikuái avei hasyve oñemosẽ hag̃ua chupekuéra itravahohágui. Pórke ipatronkuéra ningo omombaʼeterei umichaguápe ha hakateʼỹeterei hesekuéra.

18. Mbaʼéichapa ikatu jahechauka ‘ñanekyreʼỹha jajapo hag̃ua iporãva’?

¹⁸ Jahecha haguéicha, heta mbaʼe ikatu jajapo jahechauka hag̃ua jahayhuha Jehová róga. Pór ehémplo, ikatu jajerovia Jehováre, jajapo opa mbaʼe haʼe heʼihaichaite ha ñañangareko umi lugár ñañembyatyháre. Ñasẽ meme vaʼerã avei predikasiónpe ha ñaipytyvõ umi héntepe oikuaa hag̃ua Ñandejárape. Ha ñanemitãramo jepe ñañehaʼã ñanderekopotĩ ha ñamombaʼeguasu Jehovápe añoite. Jajapóramo péicha jahupytýta heta mbaʼe porã ha ojehechakuaáta Jehová siervokuéra ‘ikyreʼỹha ojapo hag̃ua iporãva’ (Tito 2:14).

[Nóta]

Jahecha rire Ñandejára siervokuéra ehémplo.

• Mbaʼépa jajapovaʼerã kyreʼỹme japredika ha ñaporomboʼe hag̃ua?

• Mbaʼéichapa umi imitãva ikatu ohechauka ‘ikyreʼỹha ojapo hag̃ua iporãva’?

• Mbaʼépa jajapovaʼerã ani hag̃ua jaʼa mbaʼe vaípe?

[Porandu ñahesaʼỹijóva]

[Nóta oĩva taʼanga ndive páhina 13]

Jajepokuaápa jaiporu la Biblia japredika jave?

[Nóta oĩva taʼanga ndive páhina 15]

Umi imitãva oaprendéramo ótro idióma ikatu omombeʼu pe marandu porã hetave hapichápe