Mbaʼérepa jahejavaʼerã ñande rapicha ñanepytyvõ ha mbaʼéichapa?

YMAITE guivéma ningo oĩ ohejáva oñepytyvõ chupe ojapo hag̃ua hembiapo. Pór ehémplo Jehová voi ojapo rire Itaʼýrape, oñepytyvõka chupe ojapo hag̃ua opa mbaʼe ko univérsope (Pro. 8:​22, 23, 30; Juan 1:3). Ñandejára ojapórõ guare Adán ha Évape, heʼi chupekuéra: ‘Peñembohetákena pemyanyhẽ meve ko yvy ha peguereko pende poguýpe’ (Gén. 1:​28, ÑÑB). Péicha Jehová ojerovia yvyporakuérare ohejágui chupekuéra ombotuichave pe hárdin de Edénpe ojagarrapa peve ko yvy. Jahechakuaa ymaite guive Jehová ojerureha ótrope ombaʼapo hag̃ua hendive ha iñorganisasiónpe avei ojejapo upéicha.

Mbaʼérepa jahejavaʼerã ñande rapichápe ñanepytyvõ? Mbaʼérepa umi ansiáno ohejavaʼerã ótro ermáno oipytyvõ chupekuéra kongregasiónpe? Mbaʼéichapa ikatu ojapo hikuái upéva?

Mbaʼérepa jahejavaʼerã ñande rapichápe ñanepytyvõ?

Jaheja ñande rapichápe ñanepytyvõ ningo heʼise ñameʼẽha chupe ojapo hag̃ua ñane rembiapo rangue. Térã jajerureha ñande rapichakuérape ojapo hag̃ua ñanendive ñane rembiapo, ha upéva heʼise avei jahejaha ikárgope heta mbaʼe.

 Ermanokuéra kárgope ningo ojeheja heta mbaʼe kongregasiónpe ha heta hembiapo hikuái. Ha omombeʼuvaʼerã mbaʼéichapa oho chupekuéra hembiapópe ha oporanduvaʼerã avei mbaʼéichapa ojapóta umi omeʼẽvape chupe hembiaporã. Upéicharõ jepe pe ansiáno gueteri rresponsávle upe tembiapóre, haʼe ohechavaʼerã ojejapópa ha tekotevẽramo heʼivaʼerã mbaʼeichaitépa ojejapóta. Upévare ikatu oĩ oñeporandúva: “Maʼerã piko ahejáta ótro kárgope chete voi ikatúramo ajapo?

Maʼérepa jahejavaʼerã ótrope ñanepytyvõ

Ñapensamíntena Jehová ojapo hague Itaʼýra ‘peteĩetévape’ ha upéi oheja oipytyvõ chupe ojapo hag̃ua opa mbaʼe. Jaikuaa ningo Jesús rupive ‘Ñandejára ojapo hague opa mbaʼe oĩva yvágape ha yvýpe, ojehecháva ha ojehechaʼỹva’ (Col. 1:16). Ñande Apohare ningo ikatu vaʼekue haʼeñónte ojapopa entéro mbaʼe, péro oheja Itaʼýra oipytyvõ chupe. Upéicha Jesús ovyʼáta avei ojapo haguére peteĩ tembiapo iporãva (Pro. 8:31). Upéva oipytyvõ Jesúspe oikuaa porãve hag̃ua Itúvape. Péicha ningo Jehová oipytyvõ avei Itaʼýrape ikatupyryve hag̃ua.

Jesús ningo osegivaʼekue Itúva ehémplo oĩrõ guare ko yvy ape ári. Haʼe mbeguekatúpe ombokatupyryvaʼekue hemimboʼekuérape oipytyvõ hag̃ua chupe. Ñepyrũrã omondo umi doce apóstolpe ha upéi umi 70 hemimboʼépe omotenonde hag̃ua pe predikasión (Luc. 9:​1-6; 10:​1-7). Upéicha Jesús ohóvo peteĩ lugárpe opredika hag̃ua, haʼekuéra ohasapyréma upérupi ha ojekuaáma mbaʼépa Jesús omboʼéta. Ha Jesús oho jeýtarõ guare yvágape oheja hemimboʼekuérape heta tembiapo iñimportánteva ojapo hag̃ua, umíva apytépe opredika hag̃ua hikuái opárupi ko yvy ape ári (Mat. 24:​45-47; Hech. 1:8).

Kongregasiónpe péicha oñeñepyrũvaʼekue avei ojejapo, umi ansiáno omeʼẽ avei ótrope hembiaporã ha upéicha oporombokatupyry. Apóstol Pablo heʼi Timotéope: ‘Umi mbaʼe nde rehenduvaʼekue che jurúgui, péva eikuaauka kuimbaʼe ikatupyrývape ojerovia hag̃ua, haʼekuéra omboʼekuaa jey hag̃ua ambuépe’ (2 Tim. 2:​2, ÑÑB). Upéicharõ umi ikatupyrýva omboʼevaʼerã hapichakuérape ikatu hag̃uáicha haʼekuéra avei omboʼe ótrope.

Peteĩ ansiáno ombovyʼáta avei ótro ermánope ohejáramo oipytyvõ chupe oporomboʼe ha oñangareko hag̃ua kongregasiónre. Peteĩ yvypóra ningo ndaikatúi ojapopa haʼeño opa mbaʼe. Ha umi ansiáno ohechakuaáramo upéva ojeruréta ermanokuérape oipytyvõ hag̃ua chupekuéra hembiapópe. La Biblia ningo heʼi voi: ‘Umi oñemomirĩva iñarandu’ (Pro. 11:2). Ñaneumílderamo jahechakuaáta ñaikotevẽha ñande rapicha ñanepytyvõ. Peteĩ ansiáno haʼénte ojapopaséramo opa mbaʼe, sapyʼaitépe ikaneʼõta ha naitiempomoʼãvéima ifamíliape g̃uarã. Upéicharõ iporãvéta oheja ótro oipytyvõ chupe. Pór ehémplo, umi ansiáno coordinador ikatu ojerure ambue ansiánope orrevisa hag̃ua kuénta kongregasión rehegua. Ha umi ambue ansiáno ohechávo hembiapokue oikuaáta mbaʼéichapa oĩ la kongregasión.

Umi ansiáno ojapóramo péicha ombokatupyrýta ótrope, ha ohecháta avei mbaʼéichapa ojejapo upe tembiapo omeʼẽvaʼekue. Péicha ohechakuaáta avei hikuái peteĩ ermánopa oikóta siérvo ministerialrã (1 Tim. 3:10).

Avei umi ansiáno ohechaukáta ojeroviaha ótrore. Apóstol Pablo ombokatupyry hag̃ua Timotéope oguerahavaʼekue chupe opredika hag̃ua hendive tetã ambuére. Haʼekuéra ningo ojogueraha porãiterei vaʼekue ha upévare  Pablo heʼi Timotéope: ‘Che raʼy ahayhuetéva’ (1 Tim. 1:2). Jehová ha Jesús ojogueraha porãiterei avei ombaʼapórõ guare oñondive ojapo hag̃ua opa mbaʼe. Upéicha avei umi ansiáno ojogueraha porãta ermanokuérandi ombaʼapóramo hendivekuéra.

Mbaʼérepa oĩ ndohejaséiva oñepytyvõ chupe?

Heta ansiáno ohechakuaáramo jepe ikatuha oipytyvõ chupe ótro ermáno, ndogustái chupe oimoʼãgui haʼe nomoakãmoʼãveimaha upe tembiapo. Ikatu opensa haʼekuéramante omotenondevaʼerãha opa mbaʼe. Péro imanduʼavaʼerã hikuái Jesús oho mboyve yvágape oheja hague hemimboʼekuérape hembiaporã iñimportantetereíva. Ha ojerure chupekuéra upéva oikuaáramo jepe hetave mbaʼe ojapotaha chugui (Mat. 28:​19, 20; Juan 14:12).

Ikatu avei oĩ ansiáno omeʼẽvaʼekue ótrope hembiaporã, péro pe ermáno ndojapoporãi. Upévare opensa haʼémante ojapo porãtaha. Péro jahechamína mbaʼépa Pablo ojapovaʼekue. Haʼe ohechakuaavaʼekue iporãha oheja ótro oipytyvõ chupe, ha ohechakuaa avei hasytaha ojejapo hag̃ua chupe opa mbaʼe haʼe oipotahaichaite. Oho ypýrõ guare opredika hag̃ua tetã ambuére, ogueraha hendive Márcospe, péro upe rire Marcos oho jey hógape ha oheja rei chupe. Ha haʼe ombyasyeterei upéva (Hech. 13:13; 15:​37, 38). Upéicharõ jepe, Pablo oipytyvõ jey ótrope ikatupyry hag̃ua avei. Jahecháma haguéicha oguerahavaʼekue Timotéope hendive ha ikatupyryvémaramo oheja chupe Éfesope oñangareko hag̃ua kongregasiónre. Ha onombra hag̃ua avei ansiáno ha siérvo ministeriál upe kongregasiónpe (1 Tim. 1:3; 3:​1-10, 12, 13; 5:22).

Koʼág̃a rupi avei umi ansiáno osegivaʼerã ombokatupyry ambue ermánope, oĩramo jepe nosẽporãiva. Iporã ha iñimportánte umi ansiáno ojerovia ha oipytyvõ ótro ermánope ikatupyry hag̃ua avei. Mbaʼéichapa ikatu ojapo hikuái upéva?

Mbaʼéichapa ikatu oipytyvõ ótrope

Umi ansiáno ohechavaʼerã mbaʼépa ojapokuaa peteĩ ermáno omeʼẽ hag̃ua chupe hembiaporã. Yma Jerusalénpe oñekotevẽrõ guare orrepartivaʼerã hiʼupyrã, umi apóstol oiporavo “siete kuimbaʼe ikatupyrýva ha henyhẽva espíritu sántogui” (Hech. 6:3). Upévare, peẽ ansiáno pejeruréramo peteĩ ermáno ndaikatupyrypáivape penepytyvõ hag̃ua, hasýta voi ojapo porã hag̃ua. Upéicharõ michĩmimínte pemeʼẽvaʼerã chupe hembiaporã ha ikatupyryve vove pemeʼẽkuaáma chupe umi tembiapo iñimportánteva.

Umi ansiáno ohechakuaavaʼerã avei hetave mbaʼe omeʼẽ hag̃ua ermanokuérape hembiaporã. Pór ehémplo umi horývape ikatu omoĩ de akomodadór. Ha peteĩ iñordenádovape omoĩkuaa oipytyvõ hag̃ua pe sekretáriope. Ikatu avei ojerure peteĩ ermána ikatupyrývape ombojegua hag̃ua Salón Conmemoraciónrã.

Péro umi ansiáno heʼi porã vaʼerã umi ermánope mbaʼépa la oipotáva ojapo. Pór ehémplo Juan el Bautísta omondótarõ guare hemimboʼekuéra Jesús rendápe, heʼi porã chupekuéra mbaʼépa la oikuaaséva ha mbaʼéichapa oporanduvaʼerã (Luc. 7:​18-20). Ha Jesús ojerurérõ guare hemimboʼekuérape ombyaty hag̃ua umi tembiʼu rembyre haʼe ojapovaʼekue milágro rupive, ohejántema ikargopekuéra  (Juan 6:​12, 13). Upéicharõ ojehechakuaavaʼerã mbaʼe tembiapópa ojejapóta ha mávapepa oñemeʼẽta. Umi ansiáno heʼi porã vaʼerã umi ermánope mbaʼéichapa oipota ojapo pe tembiapo ha mboy vésepa omombeʼuvaʼerã chupekuéra mbaʼetekópa oho hese. Avei heʼivaʼerã pe ermánope mbaʼe mbaʼépa ikatu ojapo haʼe ogustaháicha. Ha ikatu avei oporandu pe ermánope arakaʼépa ikatu ojapopa. Upéva omokyreʼỹvéta chupe ojapo porã hag̃ua hembiapo.

Umi ansiáno omeʼẽvaʼerã avei pe ermánope opa mbaʼe oikotevẽtava ojapo porã hag̃ua hembiapo. Iporãta ningo oñemombeʼúramo kongregasiónpe haʼe ojapotaha upe tembiapo. Pór ehémplo Jesús omeʼẽrõ guare Pédrope “pe yvága rokẽ lláve”, ojapo umi hemimboʼekuéra rovake (Mat. 16:​13-19, ÑÑB). Upéicharõ oñemombeʼuvaʼerã kongregasiónpe mávapepa oñemeʼẽ peteĩ tembiapo.

Umi ansiáno ningo oñatende porã vaʼerã heʼi ha ojapótavare. Pór ehémplo okontrolaitereíramo mbaʼéichapa pe ermáno ojapohína hembiapo, ikatu ohechauka ndojeroviaiha hese. Ha ikatu voi ningo ndojapói pe ansiánope ogustahaichaite. Péro oimérõ ojeʼéraʼe pe ermánope ikatuha ojapo heta mbaʼe haʼe ogustaháicha, oipytyvõta katuete chupe ikatupyryve hag̃ua. Upéva ndeʼiséi umi ansiáno ohejataha chupe ojapo haʼe oikuaaháichante ha ndojepyʼapyveimaha hese. Jehová jepe omeʼẽrõ guare Itaʼýrape ojapo hag̃ua heta mbaʼe, haʼe osegi ombaʼapo hendive. Haʼe heʼi voi Jesúspe: ‘Jajapo yvypórape ñandejoguaháramo’ (Gén. 1:26). Upévare peẽ ansiáno pejepytasókena umi ermáno penepytyvõva ykére ha peguerohory chupekuéra umi mbaʼe ojapóvare. Peipytyvõta avei chupekuéra pehecháramo mbaʼéichapa oho hese hembiapo. Ha oiméramo ndojapoporãihína peipytyvõ ha peñemoñeʼẽ chupe. Aníkena penderesarái peẽha la pemoakãva upe tembiapo ha ndahaʼeiha umi ermáno penepytyvõva (Luc. 12:48).

Umi ansiáno ningo heta ermánopema oipytyvõ omeʼẽvo chupekuéra hembiaporã kongregasiónpe. Péicha ohechauka ojeroviaha hesekuéra. Enterove ansiáno ningo ohechakuaavaʼerã iñimportanteha oheja umi ermáno oipytyvõ chupekuéra, ha upéicha osegíta hikuái Jehová ehémplo.

[Rrekuádro oĩva páhina 29-pe]

JAHEJÁRAMO ÑANDE RAPICHA ÑANEPYTYVÕ,

• ovyʼáta avei ñanendive

• hetave mbaʼe jajapóta

• jahechaukáta ñanearandu ha ñaneumildeha

• ñambokatupyrýta avei chupe

• jahechaukáta jajeroviaha hese

[Rrekuádro oĩva páhina 30-pe]

MBAʼÉICHAPA IKATU JAJAPO:

• Jaiporavovaʼerã peteĩ ojapokuaátava pe tembiapo

• Ñamombeʼu porã vaʼerã chupe mbaʼéichapa jaipota ojapo

• Jaʼe porã mbaʼe mbaʼépa la ojapovaʼerã

• Ñameʼẽvaʼerã chupe opa mbaʼe oikotevẽtava ojapo hag̃ua upe tembiapo

• Ñaporanduvaʼerã mbaʼéichapa oho pe hembiapo ha jahechauka jajeroviaha pe ermánore

• Ñanemanduʼavaʼerã ñandeha la ñamoakãva pe tembiapo

[Nóta oĩva taʼanga ndive páhina 31]

Jahejavaʼerã umi ermánope ñanepytyvõ ha jahecha mbaʼéichapa oho hese