Jahekákena umi mbaʼe porã ‘ipype oñeñongatúva’

“Ipype ningo oñeñongatuhína opa arandu ha mbaʼekuaa.” (COL. 2:3.)

1, 2. a) Mbaʼépa ojetopa áño 1922-pe? Ha moõpa ojeguerapa umi mbaʼe porã ojetopavaʼekue? b) Mbaʼe jajapo hag̃uápa ñanemokyreʼỹ la Biblia?

 PETEĨ arqueólogo hérava Howard Carter heta ojeporeka rire otopa pe faraón Tutankhamón sepultúra áño 1922-pe. Ha oĩ gueteri pype heta mbaʼe oñemoĩ hagueichaite, cinco mil kósa rupi voi ojetopa pype. Upérõ ningo upéva ojagarrapaite voi la notísia.

² Umi mbaʼe porã ojetopavaʼekue ningo ojeguerahapa umi muséo térã ambue lugár oñekoleksionahápe. Ha umi mbaʼe ningo yma guare rupi iñimportánte ha iporã, péro ndaideprovéchoi ñandéve ñande rekovépe. La Biblia katu ñanemokyreʼỹ pláta yvyguýicha jaheka hag̃ua umi mbaʼe añetehápe ñanepytyvõtava. Upéva ningo ojeʼe enterovépe ojapo hag̃ua, ha iporãiteve voi umi óro ha pláta yvyguýgui jepe (jaleemína Proverbios 2:​1-6).

3. Mbaʼéichapa ñanepytyvõta umi mbaʼe porãita la Biblia ñanemokyreʼỹva jaheka hag̃ua?

³ La Biblia ningo ñanemokyreʼỹ jaheka hag̃ua heta mbaʼe porã. Umíva apytépe heʼi ñandéve ‘jakyhyje hag̃ua Jehovágui’. Upéva ningo tuichaiterei ñanepytyvõta koʼã tiémpo ijetuʼuetévape (Sal. 19:9). Ñanemokyreʼỹ avei jaikuaave hag̃ua Ñandejárape. Maʼerãpa? Ikatu hag̃uáicha jareko chupe ñane amígoramo. Avei ñanearandúta, jaikuaa ha jahechakuaáta mbaʼépa jajapovaʼerã. Upéicha ningo Jehová ñanepytyvõta ñambohovái hag̃ua oimeraẽ mbaʼe vai jahasáva (Pro. 9:​10, 11). Péro moõ piko ikatu jatopa umi mbaʼe porãita ñañeʼẽ hague?

Mbaʼéichapa ikatúta jaikuaa porãve Ñandejárape

4. Mbaʼéichapa jatopáta umi mbaʼe porã Ñandejára ñanemboʼeséva?

⁴ Umi arqueólogo ha pláta yvyguy rekaha ningo ojeporekavaʼerã opa gotyo rei, péro ñande jaikuaa porã moõpa jahekavaʼerã umi mbaʼe porã Ñandejára ñanemboʼeséva. La Biblia ningo peteĩ mápaicha ohechauka moõpa jajeporekavaʼerã jaikuaa porãve hag̃ua Ñandejárape. Apóstol Pablo heʼivaʼekue voi oñeʼẽvo Jesús rehe: “Ipype ningo oñeñongatuhína opa arandu ha mbaʼekuaa” (Col. 2:3). Jaleévo koʼápe heʼíva, ikatu ñañeporandu: “Mbaʼérepa jahekavaʼerã umi mbaʼe porã Ñandejára ñanemboʼeséva? Mbaʼérepa ojeʼe Jesús rehe “ipype oñeñongatuha opa arandu ha mbaʼekuaa”? Mbaʼéichapa ikatu jajuhu upéva? Jaikuaa hag̃ua, ñahesaʼỹijóta koʼág̃a apóstol Pablo heʼivaʼekue.

5. Mbaʼépa Páblope oipyʼapýraʼe oñeʼẽtarõ guare umi mbaʼe porã Ñandejára ñanemboʼesévare?

⁵ Apóstol Pablo oñeʼẽ mboyve umi Colosasguápe umi mbaʼe porã Ñandejára ñanemboʼesévare, heʼi oñehaʼãmbaiteha ‘ombopyʼaguapy chupekuéra oiko hag̃ua peteĩ ñeʼẽme Ñandejára mborayhúpe’ (jaleemína Colosenses 2:​1, 2). Mbaʼérepa Pablo ojepyʼapyetevaʼekue hesekuéra? Oiméne oikuaa rupi oĩha kongregasiónpe oñeʼẽtereíva umi griégo filosofía rehe térã oipotaitereíva ojesegi ojejapo pe léi mosáika heʼíva. Ha haʼe okyhyje oimérõ g̃uarã umi ótro avei ojaposéma upéicha. Upévare heʼi chupekuéra kóicha: ‘Peñeñangarekóke, ani pehejátei pendereraha umi penembotavyséva pe  yvypóra arandu rupi. Haʼekuéra osegi umi ijypykue omboʼevaʼekue chupekuéra ha ko múndo ojapóva ha ndahaʼéi Crístope’ (Col. 2:​8, BNP).

6. Mbaʼérepa ñañatende porã vaʼerã Pablo heʼivaʼekuére?

⁶ Koʼág̃a rupi, ñande avei ñañehaʼãmbaitevaʼerã ani hag̃ua jaʼa Satanás ha imúndo ñuhãme. Pór ehémplo heta oĩ omombaʼetereíva yvypóra opensávante ha oĩ avei umi ogueroviáva yvypóra ouha kaʼígui (evolución). Upéva ningo ojekuaa voi la hénte rekovére ha umi mbaʼe ojaposévare. Ha umi festého oñemombaʼevéva ko múndope ningo umi rrelihión japúnte ojapouka. Avei umi vyʼarã oñemoĩva ko múndope ogueraha vaipa la héntepe. Ha heta mbaʼe oñemoĩva Internétpe ivai imitãva ha kakuaávape g̃uarã. Koʼã mbaʼe apytépe jaikoitereíramo ñandegueraha vaíta ha ndajajaposemoʼãvéima Ñandejára heʼíva. Ikatu avei nañemokangy ha ndajajeroviavéima jaikovetaha opa ára g̃uarã (jaleemína 1 Timoteo 6:​17-19). Upéicharõ, ani hag̃ua jaʼa Satanás ñuhãme, ñañatende porã vaʼerã Pablo heʼivaʼekuére umi Colosasguápe ha jajapo.

7. Mbaʼépa heʼivaʼekue Pablo oipytyvõ hag̃ua umi Colosasguápe?

⁷ Jahechami jeýna Pablo heʼivaʼekue umi Colosasguápe. Haʼe ningo heʼi rire ojepyʼapyha hesekuéra, heʼi chupekuéra mbaʼépa ojapovaʼerã oiko hag̃ua pyʼaguapýpe ha mborayhúpe oñondivepa. Primero heʼi ojerovia hag̃ua hikuái umi mbaʼe ‘oikuaávare ohóvo’ Ñandejára Ñeʼẽgui, ha upéicha omopyenda porãta hag̃ua ijerovia (Heb. 11:1). Segundo katu oñeʼẽ chupekuéra pe ‘Ñandejára mbaʼe ñemimby ha arandu rehe’. Péva heʼise umi kristiáno ontendevaʼerãha avei umi mbaʼe hypyʼũvéva Ñandejára omboʼéva (Heb. 5:​13, 14). Ajéiko iporãite upe heʼivaʼekue chupekuéra ha ñandéve g̃uarã avei! Ha mbaʼéiko ikatu jajapo jajeroviave hag̃ua jahávo ha jaikuaa porã hag̃ua Ñandejára Ñeʼẽ? Upearã jaikuaa porã vaʼerã Jesúspe, apóstol Pablo heʼi voi hese: “Ipype ningo oñeñongatuhína opa arandu ha mbaʼekuaa”.

Umi mbaʼe porã Jesucristo ñanemboʼéva

8. Mbaʼépa heʼise Jesucristo rehe ojeʼévo ‘ipype oñeñongatuha opa arandu ha mbaʼekuaa’?

⁸ Ojeʼévo Jesucristo rehe ‘ipype oñeñongatuha opa arandu ha mbaʼekuaa’ ndeʼiséi ndaikatumoʼãiha jaikuaa. Ojehechaukánte ñandéve ñañehaʼãmbaitevaʼerãha jaikuaa umi mbaʼe ha jajesarekoravaʼerãha Jesucristo rekovekuére. Haʼe voi ningo heʼivaʼekue ijehe: “Che haʼe pe tape, ha che haʼe pe añete ha avei pe tekovete. Che rupímante ikatu oñeg̃uahẽ che Ru rendápe” (Juan 14:​6, BNP). Upéicharõ jaikuaa hag̃ua Ñandejárape, jahejavaʼerã Jesúspe ñanepytyvõ ha ñanesãmbyhy.

9. Mbaʼéichapa ñanepytyvõta jaikuaáramo mbaʼe tembiapópa oñemeʼẽ Jesúspe?

⁹ Jesús heʼi rupi ijehe ‘haʼeha pe tape’, avei ‘haʼeha pe añete ha tekovete’, ohechauka ndahaʼeiha peteĩ mediadór añónte ñandéve g̃uarã Ñandejára renondépe. Chupe ningo Ñandejára omeʼẽ hetave hembiaporã ha jaikuaáramo umi mbaʼe ñanepytyvõta ñantende hag̃ua la Biblia omboʼéva ha jahupytýta avei pe jeikove opaveʼỹva. Péicha jahecha Jesús ikatuha ñanemboʼe heta mbaʼe ndaijojaháiva. Upearã ningo jastudia kyreʼỹ vaʼerã la Biblia. Ñahesaʼỹijomína koʼág̃a umi mbaʼe ikatúva jaikuaa Jesús rupive ha ñanepytyvõtava jahupyty hag̃ua pe jeikove opaveʼỹva ha ñaime porã hag̃ua Ñandejára ndive.

10. Mbaʼépa ikatu jaikuaa Jesúsgui jaleévo Colosenses 1:19 ha 2:9?

¹⁰ ‘Oĩmbaite Crístope Ñandejára reko.’ (Col. 1:19; 2:​9, BNP.) Jesús ningo hetaiterei áño oikovaʼekue Itúvandi yvágape. Upévare haʼe oikuaa porãiterei mbaʼeichaguápa Itúva ha mbaʼépa hembipota. Upéi oĩrõ guare  ko yvy ape ári, omboʼe la héntepe umi mbaʼe haʼe oaprendevaʼekue Itúvagui, ha opa mbaʼe ojapóvare voi ohechauka upéva. Upévare heʼi: “Upe chéve cherecháva, ohecháma che Rúpe” (Juan 14:9). Opa mbaʼe ikatúva jaikuaa Ñandejáragui ningo oĩmbaite Jesucrístope. Upéicha rupi, jaikuaa hag̃ua Jehovápe, jaikuaamantevaʼerã Jesúspe.

11. Mbaʼépa jahechakuaavaʼerã ñantende hag̃ua heta profesía oĩva la Bíbliape?

¹¹ ‘Opavave profetakuéra ymaite guive oñeʼẽmavaʼekue Jesús rehe.’ (Hech. 10:​43, BNP.) Hetaiterei profesía oĩva la Bíbliape ningo oñeʼẽ hese. Ha ontendeséva umi profesía oĩva Génesis 3:15 guive Revelación peve, ogueroviavaʼerã Jesús haʼemaha Rréi Ñandejára Rréinope. Péro umi ndogueroviáiva Jesús haʼeha pe Mesías nontendéi heta profesía oĩva Génesis guive Malaquías peve. Ha heʼi hikuái Jesús haʼenteha peteĩ kuimbaʼe ikatupyrýva. Péro ñande jaservíva Ñandejárape ningo jahechakuaa Jesús ojapóva iñimportanteha. Upévarente ñantende umi profesía neʼĩrava gueteri oñekumpli (2 Cor. 1:20).

12, 13. a) Mbaʼérepa ikatu jaʼe Jesús rehe “yvypóra resapehára”? b) Mbaʼépa ojapovaʼerã umi kristiáno osẽmava pytũnguýgui?

¹² “Che hína yvypóra resapehára.” (Jaleemína Juan 8:12; 9:5.) Yma Jesús onase mboyve ko yvy ape ári, pe proféta Isaías heʼimavaʼekue: “Tetãygua oikóva pytũnguýpe, ohecha peteĩ mbaʼerendy tuicháva; umi pytũnguýpe oikóva ári ohesape upe mbaʼerendy’ (Isa. 9:2). Ha pe apóstol Mateo heʼi haguéicha, Jesús okumpli upe profesía oñepyrũrõ guare opredika ha heʼi: “Pembyasy pene rembiapo vaikue ha peheja. Hiʼag̃uíma hína ñesãmbyhy yvágagui oúva” (Mat. 4:​16, 17). Jesús ningo opredikávo omyesakã Ñandejára rape ha oguenohẽ umi héntepe rrelihión japu poguýgui. Jesús voi heʼivaʼekue: “Che, pe oporohesapéva aju ko yvy ári ani hag̃ua opyta pytũnguýpe umi cherehe ojeroviáva” (Juan 1:​3-5; 12:46).

¹³ Upe riréma apóstol Pablo heʼi iñermanokuérape: ‘Yma peẽ peikovaʼekue  pytũnguýpe, koʼág̃a katu Ñandejára ndive peikóma pehesape’ (Efe. 5:​8, BNP). Umi kristiáno osẽma rupi rrelihión japu poguýgui, osẽma avei pytũnguýgui ha koʼág̃a ohesapemavaʼerã avei Jesús ojapo haguéicha. Jesús voi ningo heʼivaʼekue hemimboʼekuérape pe Sermón del Móntepe: “Upéicha aveíke peñehaʼã peẽ pehesape opavave renondépe. Ha haʼekuéra ohechávo pene rembiapo porãngue, omombaʼeguasúta pende Ru yvágape oĩvape” (Mat. 5:16). Ñandépa jahechauka ñamombaʼeha umi mbaʼe porã Ñandejára ñanemboʼéva japredika ha ñanderekoporã rupi? Upéicharõmante umi ñanderecháva omombaʼeguasuséta avei Ñandejárape.

14, 15. a) Maʼerãpa yma Ñandejára siervokuéra osakrifikavaʼekue ovecha ha ambue mymba? b) Mbaʼérepa ‘Ñandejára Ovecharaʼy’ ndaijojahái?

¹⁴ Jesús haʼe ‘Ñandejára Ovecharaʼy’ (Juan 1:​29, 36). Yma ningo umi Israelgua osakrifikavaʼekue ovecha ikatu hag̃uáicha Ñandejára operdona chupekuéra ha oñemoag̃ui hese. Pór ehémplo, Abrahán osakrifikátarõ guare itaʼýra Isaácpe, Jehová heʼi chupe anínte hag̃ua ojapo upéva ha omeʼẽ chupe peteĩ ovecha mácho osakrifika hag̃ua itaʼýra rekovia (Gén. 22:​12, 13). Ha umi Israelgua osẽ mboyve Egíptogui, ojukavaʼekue avei ovecha pe paskuarã (Éxo. 12:​1-13). Upe rire oñemoĩvaʼekue voi pe Léi mosáikape ojesakrifikavaʼerãha Jehovápe umi ovecha, kavara ha ambue mymba (Éxo. 29:​38-42; Lev. 5:​6, 7).

¹⁵ Péro, ni peteĩ umi sakrifísio ni ambue ojejapóva, ndaikatúi oipeʼaite avavépe pekádo ha ñemano poguýgui (Heb. 10:​1-4). Jesús katu haʼe ‘Ñandejára Ovecharaʼy oheja reíva hembiapo vaikue opavavépe ko yvy ape ári’. Upéicha rupi ndaipóri Jesús rahasarã, ni umi pláta yvyguy iporãvéva ojetopavaʼekue jepe ndohupytýi chupe. Upévare ñahesaʼỹijo porã vaʼerã Jesús ojapovaʼekue ñandepeʼa hag̃ua pekádo ha ñemano poguýgui ha jajerovia hese. Jajapóramo upéicha ikatúta jaiko opa ára g̃uarã ko yvy ape ári. Ha umi ojeporavovaʼekue oho hag̃ua yvágape katu ikatúta oisãmbyhy Jesús ndive yvága guive (Luc. 12:32; Juan 6:​40, 47; 10:16).

16, 17. Mbaʼérepa jaʼe Jesús rehe ‘omoñepyrũ ha omongakuaaha hekopete’ ñande jerovia?

¹⁶ Jesús ningo ‘pe ñande jerovia omoñepyrũvaʼekue ha omongakuaáva hekopete’ (jaleemína Hebreos 12:​1, 2). Hebreos kapítulo 11-pe, apóstol Pablo ojapo peteĩ diskúrso iporãitereíva oñeʼẽvo pe jerovia rehe. Ha omombeʼu mbaʼépa heʼise pe jerovia. Oñeʼẽ avei heta kuña ha kuimbaʼe ojeroviávare Ñandejárare, umíva apytépe Noé, Abrahán, Sara ha Rahab. Hesekuéra oñeʼẽ jave ningo Pablo omokyreʼỹvaʼekue umi ermánope ojesareko porã hag̃ua Jesús rehe, ‘pe ñande jerovia omoñepyrũvaʼekue ha omongakuaáva hekopete’. Mbaʼérepa ojapo upéicha?

¹⁷ Umi kuimbaʼe ha kuña oñeʼẽ hague Pablo ningo ojeroviaitereivaʼekue Ñandejára okumplitaha oprometéva. Péro ndoikuaaporãi hikuái mbaʼéichapa okumplíta umi promésa pe Mesías ha Irréino rupive. Upéicha rupi, ijeroviakuéra naikomplétoi, iñimperfékto. Ni umi kuimbaʼe ohaivaʼekue umi profesía jepe ndoikuaaporãi mbaʼeichaitépa oñekumplipavaʼerã (1 Ped. 1:​10-12). Upévare Jesús rupive añoite ikatu ñande jerovia ikompléto ha iperfékto. Upéicharõ iñimportánte ñantende porã ha ñamombaʼe Jesús  ojapóva, ‘pe ñande jerovia omoñepyrũ ha omongakuaáva hekopete’.

Jasegíkena jaheka

18, 19. a) Mbaʼe mbaʼépa ikatu gueteri ñaaprende Jesúsgui? b) Mbaʼérepa jasegivaʼerã jaheka umi mbaʼe porã Ñandejára ñanemboʼeséva Jesús rupive?

¹⁸ Ko artíkulope ningo jahecha mbykymínte umi mbaʼe iñimportantetéva Jesús ojapóva oñekumpli hag̃ua Ñandejára rembipota yvyporakuérape g̃uarã. Péro hetaiterei mbaʼe porã gueteri ikatu ñaaprende Jesúsgui, ha jahekáramo umíva jajuhúta umi mbaʼe iporãmbajepéva. Pór ehémplo, apóstol Pedro heʼivaʼekue Jesús rehe, pe oporomoakãva ha “luséro koʼẽju” (Hech. 3:15; 5:31; 2 Ped. 1:​19, BNP). La Biblia heʼi avei Jesús rehe ‘pe Amén’ (Rev. 3:14). Reikuaa piko mbaʼérepa ojeʼe chupe upéicha? Reikuaa hag̃ua, resegíkena reheka ha rejuhúta heʼi haguéicha Jesús (Mat. 7:7).

¹⁹ Koʼág̃a peve ndaipóri gueteri ótro ombojojáva Jesúspe, haʼe niko ñanepytyvõ jahupyty hag̃ua jeikove opaveʼỹva. Umi mbaʼe porã Ñandejára ñanemboʼeséva ningo ‘ipype oñeñongatuhína’, ha entéro ohekáva ikatu ojuhu. Ha hiʼãite ningo oréve nde rejuhu avei umi mbaʼe porãita.

Ñanemanduʼápa koʼã mbaʼére?

• Mbaʼépa Jehová ñanemokyreʼỹ jaheka hag̃ua?

• Mbaʼérepa tuichaite oipytyvõraʼe umi Colosasguápe apóstol Pablo heʼivaʼekue? Ha mbaʼérepa ñandéve avei ikatu ñanepytyvõ?

• Mbaʼe mbaʼépa hína umi mbaʼe porã Ñandejára ñanemboʼéva Jesucristo rupive?

[Porandu ñahesaʼỹijóva]

[Nóta oĩva taʼanga ndive páhina 5]

La Biblia peteĩ mápaicha ñanepytyvõta jajuhu hag̃ua umi mbaʼe porã Ñandejára ñanemboʼeséva Jesucristo rupive