Jasegíkena Jesús ehémplo ñande rogapýpe

‘Cristo voi ohechaukavaʼekue peẽme mbaʼéichapa peguatavaʼerã ipyporére.’ (1 PED. 2:​21, BNP.)

1. a) Mbaʼe ojapo hag̃uápa oipytyvõrakaʼe Ñandejárape Itaʼýra ypykue? b) Mbaʼépa Jesús oñandu yvyporakuérare?

 ÑANDEJÁRA ojapórõ guare yvága ha yvy, ombaʼapo hendive Itaʼýra ypykue. Oipytyvõ chupe ojapo hag̃ua opaichagua mymba ha plantakuéra. Ojapo avei hikuái peteĩ hardín neporãmba jepéva oiko hag̃ua yvyporakuéra. Jehová ningo ojapo yvypórape ijoguaháramo. Ha Jesús ou mboyve ko yvy ape ári ‘ohayhumavaʼekue voi yvyporakuérape’ (Pro. 8:​27-31; Gén. 1:​26, 27).

2. a) Mbaʼépa Jehová ojapo yvyporakuéra rehehápe? b) Maʼerãpa ikatu ñanepytyvõ umi konsého omeʼẽva la Biblia?

² Adán ha Eva opekaha ára guive, Jehová heʼíma mbaʼéichapa oipeʼáta yvyporakuérape pekádo ha ñemano poguýgui ikatu hag̃uáicha oiko hembipota. Upévare, ombou Itaʼýrape omano hag̃ua ñanderehehápe (Rom. 5:8). Jehová omeʼẽ avei ñandéve la Biblia, upéva rupive ñanepytyvõ javyʼa hag̃ua ñaneimperféktoramo jepe (Sal. 119:105). Pór ehémplo, umi konsého omeʼẽva ñanepytyvõta jaiko porã hag̃ua ñande rogayguakuéra ndive. Génesispe ningo heʼi voi: ‘Pe kuimbaʼe ojoajuvaʼerã hembirekóndi ha mokõivégui oikovaʼerã peteĩ tekovénte’ (Gén. 2:24).

3. a) Mbaʼépa Jesús heʼivaʼekue umi omendávare? b) Mbaʼépa jahecháta ko artíkulope?

³ Jesús opredikárõ guare heʼivaʼekue umi omendáva oikovaʼerãha oñondive oikove aja entéro. Omeʼẽ avei heta konsého  ñanepytyvõtava ani hag̃ua jajapo umi mbaʼe ikatuvaʼerã ombyai ñande rogapy (Mat. 5:​27-37; 7:12). Ko artíkulope jahecháta umi konsého Jesús omeʼẽvaʼekue ména, tembireko, sy, túva ha taʼyrakuérape oiko hag̃ua vyʼápe hogapýpe.

Menakuéra ohayhu ha omombaʼevaʼerã hembirekópe

4. Mbaʼérepa menakuéra osegivaʼerã Jesús ehémplo?

⁴ Ñandejára omoĩ menakuérape omoakã hag̃ua ifamília, omoĩ haguéicha Jesúspe omoakã hag̃ua la kongregasión. Apóstol Pablo heʼi: ‘Menakuéra niko tembireko akã hína, Cristo haʼeháicha pe kongregasión akã. Pe kongregasión niko Cristo rete, haʼe osalvavaʼekue. Peẽ menakuéra, pehayhúke pene rembirekópe Cristo ohayhu haguéicha ikongregasión, ha omeʼẽ hese hekove’ (Efe. 5:​23, 25). Jesús ningo otrata porãiterei vaʼekue hemimboʼekuérape ha upéicha omoĩ ehémplo menakuérape mbaʼéichapa otratavaʼerã hembirekópe. Jahechamína mbaʼéichapa Jesús oporomoakãvaʼekue.

5. Mbaʼéichapa Jesús otratavaʼekue hemimboʼekuérape?

⁵ Jesús ningo ‘ipyʼaporã ha noñemombaʼeguasuivaʼekue’ (Mat. 11:29). Haʼe katuete ojapo heʼíva ha arakaʼeve ndoikói oñembotavyhína (Mar. 6:34; Juan 2:​14-17). Ha tekotevẽ jave pyʼaporãme oñemoñeʼẽ hemimboʼekuérape (Mat. 20:​21-28; Mar. 9:​33-37; Luc. 22:​24-27). Upéicharõ jepe arakaʼeve ndojeplageái ni ndoapoʼíri chupekuéra. Ni guaʼuhápe nontendekái avei ndohayhuiha chupekuéra térã ndaikatumoʼãiha ojapo hikuái haʼe heʼíva. Oguerohory ha omokyreʼỹ katu hemimboʼekuérape (Luc. 10:​17-21). Haʼe ningo oporotrata porã ha oporoporiahuvereko, upévare orrespeta chupe hemimboʼekuéra.

6. a)Mbaʼépa Jesús ohechauka menakuérape? b) Mbaʼépa apóstol Pedro heʼi menakuérape?

⁶ Péicha Jesús ohechauka menakuérape ndoikoivaʼerãha heʼi hembirekópe: ‘Che la amandáva koʼápe’. Ha jaikuaa ningo ndahaʼeivaʼerãha upéicha. Menakuéra orrespeta ha ohayhuvaʼerã hembirekópe ha omotenondevaʼerã avei chupe heta mbaʼépe. Apóstol Pedro heʼivaʼekue voi menakuérape osegi hag̃ua Jesús ehémplo ha omombaʼe hikuái hembirekópe (jaleemína 1 Pedro 3:7). Péro mbaʼéichapa menakuéra ikatu omoakã porã ha omombaʼe hembirekópe?

7. Mbaʼéichapa menakuéra ikatu ohechauka omombaʼeha hembirekópe? Emoĩmi peteĩ ehémplo.

⁷ Menakuéra ohechaukáta omombaʼeha hembirekópe oñemongetáramo hendive ha oporandúramo chupe mbaʼépa opensa peteĩ mbaʼe haʼe ojaposévare. Ñamoĩ chupe haʼe okambiaseha itraváho térã ovaseha ótro hendápe hendivekuéra. Ikatu avei  oñeʼẽ hembirekóndi odesidíta jave moõpa ohóta hikuái de paséo térã mbaʼépa ikatu ojapo hikuái ogueropuʼaka hag̃ua ipoʼi jave la pióla. Koʼã mbaʼe ningo entéro hogayguápe g̃uarã ha upévare iporãta oporandu hembirekópe mbaʼépa opensa. Upéva oipytyvõta avei menakuérape ojapo hag̃ua hekopete opa mbaʼe ha ndahasyivéta hembirekópe ojepytaso hag̃ua ijykére (Pro. 15:22). Avei ohayhu ha orrespetáta chupe. Péro la iporãvéva ningo Jehová oguerohorýta umi ojapóvape upéicha (Efe. 5:​28, 29).

Tembirekokuéra orrespetavaʼerã iménape

8. Mbaʼérepa Eva ehémplo vai tembirekokuérape g̃uarã?

⁸ Jesús ningo orrespetaitereivaʼekue Itúvape, oikuaágui Haʼe omoakãha chupe. Upéicha ohechauka tembirekokuérape mbaʼéichapa orrespetavaʼerã iménape. Ajépa Jesús ndojoguaiete Évape! Eva ningo omoĩ ehémplo vai tembirekokuérape g̃uarã. Ñanemanduʼavaʼerã Jehová omoĩ hague Adánpe omoakã hag̃ua hogapy ha haʼe rupive heʼitaha chupekuéra mbaʼépa ojapovaʼerã. Péro Eva ndorrespetái upéva (Gén. 2:​16, 17; 3:3; 1 Cor. 11:3). Jaikuaa ningo Satanás ombotavy hague Évape heʼívo chupe oikuaa porãitereiha Ñandejárape. Ha Eva ohorangue omombeʼu iménape upéva, odesidíntema mbaʼépa ojapóta ha upéi heʼíma katu iménape mbaʼépa ojapovaʼerã (Gén. 3:​5, 6; 1 Tim. 2:14).

9. Mbaʼéichapa Jesús omoĩ ehémplo iporãva ñandéve g̃uarã?

⁹ Péro Jesús omoĩ ehémplo iporãva ñandéve g̃uarã, haʼe ningo akóinte orrespeta Itúvape oikuaágui omoakãha chupe. Ha heʼíva ha ojapóva rupive ohechauka ‘noñembojojáiha Ñandejárare, oñemomirĩ uvei ha ou oiko tembiguáiramo’ (Fili. 2:​5-7). Ha koʼag̃aite peve upéicha, oisãmbyhýmaramo jepe yvágape, akóinte oñemoĩ Itúva poguýpe ha ojapo Haʼe heʼihaichaite chupe (Mat. 20:23; Juan 5:30; 1 Cor. 15:28).

10. Mbaʼéichapa tembirekokuéra ohechauka ohejaha iména omoakã chupe?

¹⁰ Upévare, tembirekokuéra ojapo porãta osegíramo Jesús ehémplo ha oheja iména omoakã chupe (jaleemína 1 Pedro 2:21; 3:​1, 2). Ñamoĩ chupe peteĩ mitãrusu oikotevẽha isy ha itúva permíso ojapo hag̃ua peteĩ mbaʼe, péro haʼe ojerure isýpentema la permíso. Ha oiméramo pe kuñakarai noñemongetái gueteri iménandi upévare, iporãta oporandúrõ imembýpe oñeʼẽmapa itúvandi. Ha oiméramo ndojapói gueteri, pe kuñakarai oporandu raẽ vaʼerã iménape odesidi hag̃ua omeʼẽtapa chupe la permíso. Ha ndogustáiramo chupe la iména heʼíva  iporãvéta oho oñemongeta hikuái haʼeñohápe. Upéicha ndohejavaimoʼãi iménape imemby renondépe (Efe. 6:4).

Jesús ningo ehémplo iporãva sy ha túvape g̃uarã

11. Mbaʼérepa Jesús ehémplo neporãva tuvakuérape g̃uarã?

¹¹ Jesús ningo nomendái ha naifamíliairamo jepe omoĩ ehémplo neporãva tuvakuérape g̃uarã. Mbaʼérepa jaʼe upéva? Haʼe ningo pasiénsia ha mborayhúpe omboʼevaʼekue hemimboʼekuérape heʼíva ha ojapóva rupive. Avei ohechauka chupekuéra mbaʼéichapa ojapovaʼerã pe tembiapo omeʼẽvaʼekue chupekuéra (Luc. 8:1). Ha Jesús otrata porã rupi chupekuéra ohechauka mbaʼéichapa ojotratavaʼerã hikuái (jaleemína Juan 13:​14-17).

12, 13. Mbaʼépa ojapovaʼerã tuvakuéra omboʼe hag̃ua ifamíliape Ñandejára Ñeʼẽ?

¹² Umi mitã ningo ojapo ohecháva isy ha itúva ojapónte, tahaʼe iporãva térã ivaíva. Upévare tuvakuéra oñeporanduvaʼerã: “Mbaʼépa che amboʼeʼaína che familiakuérape? Mboy óra piko roguapy téle renondépe? Térã mboy tiémpopa roiporu vyʼarã? Mboy tiémpopa ropredika ha rostudia la Biblia? Mbaʼépa romotenonde ore rogapýpe? Romotenonde piko Ñandejára rembipota? Ha ojekuaa piko upéva umi mbaʼe rojapóvare?”. Tuvakuéra omboʼe porã hag̃ua ifamíliape Ñandejára Ñeʼẽ, haʼekuéra raẽ orekovaʼerã Ñandejára léi ipyʼapýpe (Deu. 6:6).

¹³ Tuvakuéra oñehaʼãramo ojapo Ñandejára rembipota ára ha ára, ifamília ohecháta upéva. Ha omokyreʼỹta avei chupekuéra iñeʼẽrendu hag̃ua. Péro ituvakuéra ndojapóiramo upe omboʼéva chupekuéra, ikatu opensa hikuái natekotevẽiha ojapo Ñandejára heʼíva ha ndaideprovechoiha voi. Upéva ningo ikatu ogueraha chupekuéra ko múndo añáme.

14, 15. Mbaʼe ojapo hag̃uápa tuvakuéra omokyreʼỹvaʼerã ifamíliape ha mbaʼéichapa ikatu ojapo upéva?

¹⁴ Tuvakuéra ningo oikuaa omongakuaa porã hag̃ua ifamília ndahaʼeiha omoĩntevaʼerã chupekuéra hembiʼurã ha ijaorã. Oikuaa avei oikotevẽha hikuái ambue mbaʼe iñimportantevéva. Upévare noĩporãmoʼãi omokyreʼỹramo chupekuéra ipláta heta hag̃ua (Ecl. 7:12). Jesús ningo omokyreʼỹvaʼekue hemimboʼekuérape omotenonde hag̃ua Ñandejára Rréino (Mat. 6:33). Upévare iporãta tuvakuéra osegíramo Jesús ehémplo ha omokyreʼỹ ifamíliape ombaʼapove hag̃ua Jehovápe g̃uarã.

¹⁵ Tuvakuéra ningo ikatu ombojeheʼa ifamíliape umi ermáno ombaʼapo kyreʼỹvare Jehovápe g̃uarã. Omokyreỹetereíta ningo chupekuéra umi prekursór térã superintendénte ha hembireko. Upéicha avei umi  misionéro, betelita ha umi ombaʼapóva construcción internacionálpe. Oimevaʼerã ningo heta mbaʼe oreko hikuái omombeʼuvaʼerã. Ha umi ermáno ningo omotenonde Jehová rembipota, upévare katuete oipytyvõta umi mitãrusúpe odesidi porã hag̃ua mbaʼépa ojapóta hekovépe. Avei ohechakuaáta hikuái iporãveha ostudia peteĩ profesión mbykymínteva ikatu hag̃uáicha ombaʼapove Jehovápe g̃uarã.

Taʼyrakuéra osegivaʼerã Jesús ehémplo

16. Mbaʼéichapa Jesús iñeʼẽrenduvaʼekue Jehovápe ha itúva José ha isy Maríape?

¹⁶ Jesús ningo ehémplo neporãva avei taʼyrakuérape g̃uarã. Haʼe ningo akóinte iñeʼẽrenduvaʼekue itúva José ha isy Maríape (jaleemína Lucas 2:51). Haʼe ningo oikuaa porã iñimperféktoramo jepe ituvakuéra, Jehová oheja hague chupekuéra omongakuaa hag̃ua chupe. Upévare Jesús omombaʼeterei isy ha itúvape (Deu. 5:16; Mat. 15:4). Ha okakuaapa rire jepe osegi ombovyʼa Itúva Jehovápe ha ndohejái avave ojapouka chupe mbaʼe vai (Mat. 4:​1-10). Ha nde mbaʼépa rejapóta oĩramo ndejopýva ani hag̃ua neñeʼẽrendu nde sy ha nde rúpe? Mbaʼéichapa ikatu resegi Jesús ehémplo?

17, 18. a) Mbaʼépa ikatu ojapoukase ndéve ne kompañerokuéra kolehiopegua? b) Mbaʼépa nepytyvõta ani hag̃ua rejapo ivaíva?

¹⁷ Ikatu ningo heta ne kompañéro kolehiopegua ndoikuaaséi mbaʼeve Ñandejára Ñeʼẽgui. Ha ikatu voi ndejopy hikuái rejapo hag̃ua peteĩ mbaʼe noĩporãiva ha nderejapóiramo katu oñembohory nderehe. Mbaʼépa rejapóta ndedesafiáramo hikuái upévare? Aníkena nderesarái rejapóramo haʼekuéra heʼíva rembopochytaha nde sy, nde rúpe ha Jehovápe. Epensamíntena mbaʼépa oikóta ndehegui reikóramo haʼekuéraicha? Ha rejeheʼáramo hesekuéra, ikatúnepa reservi de prekursór, betelita, siérvo ministeriál térã reho repredika oñekotevẽhápe?

¹⁸ Nde pyahu aja ningo ikatu oĩ ndejopýva remboyke hag̃ua nde jerovia, ha upéicha jave iporãta nemanduʼa Jesús rehe. Haʼe ningo ndohejaivaʼekue avave ojapouka chupe ivaíva, akóinte iñeʼẽrendu ha odefende Ñandejára heʼíva. Jesús ehémplo ningo nepytyvõta ere hag̃ua “nahániri” ‘ndajapomoʼãi’ umi nde rapicha ojapoukase jave ndéve ivaíva. Jesús ojapo haguéicha, epensamíntena mbaʼeichaitépa revyʼáta opa árare reservi ha neñeʼẽrendúramo Jehovápe (Heb. 12:2).

Mbaʼépa jajapovaʼerã javyʼa hag̃ua ñande rogapýpe

19. Mbaʼépa jajapovaʼerã javyʼa hag̃ua ñande rogapýpe?

¹⁹ Jehová ha Jesús ningo oipota iporãvante yvyporakuérape g̃uarã. Ha ñaneimperféktoramo jepe ikatu javyʼa (Isa. 48:​17, 18; Mat. 5:3). Jesús ningo ndahaʼéi heʼintevaʼekue hemimboʼekuérape mbaʼépa ojapovaʼerã ovyʼa hag̃ua, ohechauka voi katu chupekuéra mbaʼéichapa oikovaʼerã. Ha upéicha omoĩ chupekuéra ehémplo neporãmba jepéva. Upévare enterovékena jasegi Jesús ehémplo ñande rogapýpe, tahaʼe ména, tembireko, túva, sy ha taʼyrakuéra. Upéicharõ jaikóta tory, vyʼa ha joayhúpe oñondivepa.

Ñambohovaimína koʼã porandu

• Mbaʼéichapa menakuéra omoakãvaʼerã hogapy?

• Mbaʼéichapa tembirekokuéra ikatu osegi Jesús ehémplo?

• Mbaʼérepa Jesús ehémplo neporãva tuvakuérape g̃uarã?

• Mbaʼéichapa taʼyrakuéra ikatu osegi Jesús ehémplo?

[Porandu ñahesaʼỹijóva]

[Nóta oĩva taʼanga ndive páhina 8]

Mbaʼépa ojapovaʼerã menakuéra odesidi mboyve peteĩ mbaʼe hogapýpe?

[Nóta oĩva taʼanga ndive páhina 9]

Tembirekokuéra heta mbaʼépe ikatu ohechauka orrespetaha iménape

[Nóta oĩva taʼanga ndive páhina 10]

Taʼyrakuéra ningo osegi isy ha itúva ehémplo