Jasegíkena Jesús ehémplo ha japredika pyʼaguasúpe
Jasegíkena Jesús ehémplo ha japredika pyʼaguasúpe
‘Roñembopyʼaguasu romombeʼu hag̃ua peẽme Ñandejára marandu porã.’ (1 TES. 2:2, JMP.)
1. Mbaʼérepa ndaipóri Ñandejára Rréino marandu porã rasaharã?
AJÉPA javyʼaiterei ñahendu jave umi marandu porã! Ha ko ára peve ndaipóri gueteri Jesús marandu rasaharã. Haʼe ningo oñeʼẽvaʼekue yvyporakuérape Ñandejára Rréino rehe. Pe marandu rupive ojeʼe ñandéve opatamaha jehasa asy, mbaʼasy ha ñemano. Ha ikatuha avei jaikove opa ára g̃uarã, jaikuaa mbaʼépa Ñandejára rembipota ha ñanemboʼe mbaʼéichapa ikatu oiko ñandehegui Ñandejára amigoite. Koʼã marandu porãita rehe ningo jaʼéta voi enterovete oguerohorytaha. Péro mañei piko ohenduse la hénte, hetaiterei ningo oĩ ni ndoikuaaséiva mbaʼeve koʼã mbaʼégui.
2. Mbaʼérepa Jesús heʼivaʼekue “aju amoingo vaívo”?
2 Jesús heʼi porã vaʼekue hemimboʼekuérape: ‘Ani peimoʼã che aju hague agueru pyʼaguapy ko yvy ári. Ndajúi agueru hag̃ua pyʼaguapy, ñorairõ uvei katu. Che aju amoingo vaívo taʼýra itúva ndive, membykuña isy ndive ha tembireko iména sy ndive. Ha péicha, pende rogaygua voi opuʼãta penderehe’ (Mat. 10:34-36). Upeichaite, hetaitereive ningo oĩ nohenduséiva pe marandu porã. Oĩ voi umi hogayguáre jepe opuʼãva opredika haguére.
3. Mbaʼépa ñaikotevẽ akóinte japredika hag̃ua?
3 Ñande ningo ñamboʼe avei umi mbaʼe porã Jesús omboʼevaʼekue. Ha yma guaréicha avei la hénte ndoguerohorýi upéva. Jesús ningo heʼimavaʼekue hemimboʼekuérape upeichataha: ‘Ndaipóri tembiguái tuichavéva ijáragui. Chéve chepersegíramo hikuái, peẽme avei pendepersegivaʼerã’ (Juan 15:20, BNP). Jaikuaa ningo ndahaʼeiha oparupiete ñandepersegíva la hénte, péro heta vése oĩ ñandeapoʼíva térã nañanerenduséi ha ndoikuaaséiva ñandehegui mbaʼeve. Upévare akóinte kyreʼỹme japredika hag̃ua tekotevẽ jajerovia ha ñandepyʼaguasu (jaleemína 2 Pedro 1:5-8).
4. Mbaʼérepa Pablo tekotevẽvaʼekue ipyʼaguasu opredika hag̃ua?
4 Sapyʼánte ikatu ijetuʼu ñandéve ñasẽ hag̃ua japredika. Térã ikatu jakyhyje ha ñandepyʼapererepa voi jajapóta jave rrevisíta térã estúdio. Upévare, ñanembopyʼaguapýta jaikuaávo yma oĩ hague pyʼaguasúpe opredikáva ha oñeñandu hague avei upéicha. Pór ehémplo, apóstol Pablo ningo pyʼaguasúpe opredikámi ha oikuaa porãiterei mbaʼépa Ñandejára rembipota. Upéicharõ jepe, sapyʼánte ijetuʼuvaʼekue chupe opredika hag̃ua. Upéva jahechakuaa ohaivaʼekuére umi Tesalonicayguápe. Pablo heʼi: ‘Peikuaaháicha ramoite heta rohasa asy ha rojejaʼo Filípospe ha rojeroviágui Ñandejárare roñembopyʼaguasu romombeʼu hag̃ua peẽme Ñandejára marandu porã opaichagua ñorairõ apytépe’ (1 Tes. 2:2, JMP). Upe távape ningo umi mburuvichakuéra ogarrotéa Pablo ha Sílaspe. Upéi ogueraha chupekuéra préso ha otortura hag̃ua omoĩ mokõivégui ‘ipykuéra peteĩ yvyrakuápe’ térã cépope (Hech. 16:16-24). Péro Pablo ha Silas oñembopyʼaguasu osegi hag̃ua opredika. Mbaʼéichapa ñande avei ikatu jasegi iñehemplokuéra? Jaikuaa hag̃ua jahechami mbaʼépa ojapovaʼekue Ñandejára siérvo yma guare ha mbaʼépa oipytyvõrakaʼe chupekuéra oñeʼẽ hag̃ua pyʼaguasúpe Jehová rembipota rehe.
Tekotevẽ ñandepyʼaguasu ñambohovái hag̃ua opuʼãvape ñanderehe
5. Mbaʼérepa ymaite guive Ñandejára siervokuéra tekotevẽvaʼekue ipyʼaguasu?
5 Jaikuaaháicha Jesús ningo ipyʼaguasuvaʼekue, upévare omoĩ ñandéve pe ehémplo iporãvéva. Ymaite guive voínte ningo Jehová siervokuéra tekotevẽvaʼekue ipyʼaguasu. Mbaʼérepa upéva? Jehová heʼi haguéicha oñepuʼãrõ guare hese Edénpe, Ñandejára siervokuéra ha Satanás irũnguéra oñokontrarioite (Gén. 3:15). Ha upévarema voi Abélpe ojukavaʼekue iñermáno Caín. Pe Diluvio mboyve avei oikovaʼekue Enoc ha ndaijaʼéi hese la hénte heʼi haguére Ñandejára outaha hetaiterei ánhel reheve okastiga hag̃ua umi mbaʼe vai apohápe (Jud. 14, 15). Upévare oiméne avave nohenduseirakaʼe chupe. Ha umi hénte ojukavaʼerãmoʼã Enócpe ‘Ñandejára ndogueraháirire’ chupe ijapyteguikuéra. Ajéiko ipyʼaguasueterakaʼe! (Gén. 5:21-24.)
6. Mbaʼérepa Moisés tekotevẽterakaʼe ipyʼaguasu oñeʼẽ hag̃ua pe faraónpe?
6 Jahechamína mbaʼeichaitépa Moisés ipyʼaguasuvaʼekue oñeʼẽ hag̃ua pe faraón ndive. Haʼe ningo pe mburuvichaguasu Egiptopegua ha ojeguereko voi chupe peteĩ ñandejáraramo, pe kuarahy jára hérava Ra raʼýramo. Ha oiméneko umi ambue faraón ojapo haguéicha, ko rréi avei omombaʼeguasurakaʼe haʼanga. Haʼe heʼíva la oikóva ha ndaipóri omandavaʼerã chupe. Pe faraón ningo oñemombaʼeguasueterei ha ipyʼahatã. Ko mburuvicha rendápe la Moisés ohovaʼekue heta vése ohenoikaʼỹre chupe. Ha mbaʼépa heʼi chupe Moisés, ko haʼe iñumílde ha iguenoitéva? Heʼi chupe oheja hag̃ua oho umi hembiguaikuéra isrraelítape, ha nomondóiramo katu Ñandejára okastigataha Egíptope omboúvo heta plága. Ajeve ningo Moisés tekotevẽterakaʼe ipyʼaguasu! (Núm. 12:3; Heb. 11:27.)
7, 8. a) Mbaʼépa ombohovairakaʼe Ñandejára siervokuéra yma guare? b) Mbaʼépa oipytyvõrakaʼe Jehová siervokuérape ojepytaso hag̃ua ijykére?
7 Upe rire, umi proféta ha ambue Ñandejára siervokuéra odefendevaʼekue avei pyʼaguasúpe Jehová rembipota, pórke ko múndo oĩ Satanás poguýpe. Hesekuéra ningo apóstol Pablo heʼivaʼekue: ‘Ojejuka chupekuéra itápe, oñepyʼaraʼã, oñemboʼi térã ojejuka kyse pukúpe. Oiko hikuái ape ha pépe ha oñemonde ovecha ha kavara pirekuépe, imboriahu, ojejopy ha ojerereko asy’ (Heb. 11:37). Mbaʼépa oipytyvõ chupekuéra osegi hag̃ua ojepytaso Jehová ykére? Apóstol Pablo omombeʼu mbaʼépa oipytyvõvaʼekue Abel, Abrahán ha Sárape: ‘Haʼekuéra omanovaʼekue ohupytyʼỹre umi mbaʼe Ñandejára heʼivaʼekue omeʼẽtaha chupekuéra. Opáichavo ojerovia rupi upévare ohecha mombyry guive, oguerovia ha oguerohoryete’ (Heb. 11:13, BNP). Umi proféta ha umi kristiáno ypykue ningo pyʼaguasúpe ojepytasovaʼekue Jehová ykére. Umíva apytépe Elías ha Jeremías, ogueropuʼakavaʼekue heta mbaʼe ojesareko rupi umi mbaʼe Ñandejára oprometévare (Tito 1:2).
8 Haʼekuéra ohechavaʼekue ohaʼarõha chupekuéra heta mbaʼe porã. Ñandejára múndo pyahúpe ohupytýta hikuái perfeksión ha ojeítama ‘tembiguái ha ñehundi poguýgui’. Ha upéva ikatúta Jesucristo ha umi 144.000 saserdóte ojapóva rupive (Rom. 8:21). Péro mbaʼépa oipytyvõrakaʼe avei Jeremías ha ambue Ñandejára siervokuérape? Oipytyvõ chupekuéra umi mbaʼe Ñandejára oprometevaʼekue. Haʼe heʼi voi Jeremíaspe: “Haʼekuéra opuʼãta nderehe ha ndaipuʼakamoʼãi nderehe, che aimétagui nendive romoʼã hag̃ua. Che, opa mbaʼe Jára, ameʼẽ che ñeʼẽ” (Jer. 1:19). Ñandéve avei ñanepytyvõta jajepyʼamongetáramo Ñandejára oprometévare ha mbaʼéichapa haʼe akóinte oñangarekóta ñanderehe (Pro. 2:7; jaleemína 2 Corintios 4:17, 18).
Jesús oporohayhu rupi ipyʼaguasu opredika hag̃ua
9, 10. Mbaʼéichapa Jesús ohechaukavaʼekue ipyʼaguasuha a) oñeʼẽrõ guare umi escriba ha fariséo ndive, b) umi soldádo ohekárõ guare chupe, c) oĩrõ guare umi saserdóte guasu renondépe ha d) ojeguerahárõ guare chupe Pilato rendápe?
9 Jesús ningo ehémplo porã hína ñandéve g̃uarã ha hetaiterei hendáicha ohechaukavaʼekue ñandéve ipyʼaguasuha. Pór ehémplo umi rrelihión omoakãva ndaijaʼéiramo jepe hese haʼe ndokyhyjeiete heʼi porã hag̃ua umívape mbaʼépa Ñandejára ojapóta hesekuéra. Jesús ningo ndokyhyjeivaʼekue heʼi hag̃ua chupekuéra enterove renondépe oñemosantularionteha hikuái ha ombotavyha la hénte. Ha Jehová voi ohusgáma chupekuéra ha Jesús ni ndojeréi heʼi hag̃ua chupekuéra upéva. Peteĩ jeýpe heʼi: ‘Aichejáranga peẽ escriba ha fariséo rovamokõi. Pejoguaite umi omanovaʼekue sepultúra morotĩ porãvape, okáguio iporãite ha hyepýpe katu henyhẽ teʼõngue ha kanguekue ha opa mbaʼe kyʼágui. Péicha avei peẽ, peiko hekopotĩvaicha ha pende ryepýpe katu penerenyhẽ tovamokõi ha tekoñañágui’ (Mat. 23:27, 28).
10 Umi soldádo oúrõ guare oheka Jesúspe hardín de Getsemanípe, haʼe pyaʼe porãnte osẽ hendapekuéra (Juan 18:3-8). Upe riremínte ojegueraha chupe Sanedrínpe, umi saserdóte guasu ombodeklara hag̃ua chupe. Ha Jesús oikuaa porãramo jepe ojukaseha chupe hikuái, haʼe pyʼaguasúpe heʼi haʼeha Ñandejára Raʼy ha pe Mesías. Heʼi avei chupekuéra koʼẽrõite ojehechataha chupe ‘oguapýramo pe ipuʼakapáva deréchape ha oúramo arai ári yvágagui’ (Mar. 14:53, 57-65). Upe rire katu ojegueraha chupe Pilato rendápe ha haʼe ikatúkuri opoi chugui. Péro Jesús okirirĩnte ha ndeʼíri haʼe ndojapoiha umi mbaʼe vai ojeʼéva hese ojapo hague (Mar. 15:1-5). Aje piko ipyʼaguasueterakaʼe Jesús!
11. Mbaʼéicha rupípa ñandepyʼaguasu japredika hag̃ua?
11 Péro Jesús heʼivaʼekue Pilátope: “Pevarã che anasevaʼekue ha aju ko yvy ape ári amombeʼu hag̃ua pe añetegua” (Juan 18:37, ÑÑB). Jehová ningo ombouvaʼekue voi itaʼýra Jesúspe omombeʼu hag̃ua pe marandu porã. Ha Jesús ohayhueterei rupi Itúvape ojapopaite heʼíva chupe (Luc. 4:18, 19). Jesús ohayhueterei avei yvyporakuérape ha oikuaa mbaʼeichaitépa ohasa asy hikuái. Ñande avei koʼág̃a rupi pyʼaguasúpe japredika jahayhúgui Jehovápe ha ñande rapichakuérape (Mat. 22:36-40).
Ñandejára espíritu sánto ñanembopyʼaguasu japredika hag̃ua
12. Mbaʼérepa ovyʼaitereivaʼekue Jesús remimboʼekuéra?
12 Jesús omano riremi, hemimboʼekuéra ovyʼaiterei ohechávo mbaʼéichapa Jehová oipytyvõ heta tapichápe oñemboja hag̃ua hese. Pór ehémplo 3.000 hudío ha ambue tetãyguáva ojevautisa Jerusalénpe oñembyatýrõ guare hikuái Pentecostesrã. Oimevaʼerã ningo umi hudío ohecharamoiterakaʼe upe mbaʼe oikóva. Ñandejára Ñeʼẽ ningo omombeʼu voi: ‘Oñemondyipa hikuái ha heta techapyrã oiko umi apostolkuéra rupive’ (Hech. 2:41, 43, BNP).
13. Mbaʼérepa ojerure hikuái Jehovápe ombopyʼaguasumi hag̃ua chupekuéra ha mbaʼéichapa Jehová ombohovái upe ñemboʼe?
13 Umi hudiokuéra rrelihión omoakãva ipochyeterei ha ojagarra hikuái Pedro ha Juánpe ha heʼi chupekuéra anivéma hag̃ua osẽ oñeʼẽ umi mbaʼe Jesús ojapovaʼekuére. Una nóche voi oheja chupekuéra préso ha ojepoi rire chuguikuéra oho heʼi umi ermánope mbaʼépa oiko hesekuéra. Ha enterovénte ojepyʼapy upévare ha oñemoĩ oñemboʼe hikuái Jehovápe heʼívo: ‘Embopyʼaguasu ne rembiguaikuérape omombeʼu hag̃ua ne Ñeʼẽ kyhyjeʼỹre’. Ha mbaʼépa oiko upe rire? ‘Opavave henyhẽ espíritu sántogui, ha pyʼaguasúpe omombeʼu hikuái Ñandejára Ñeʼẽ.’ (Hech. 4:24-31.)
14. Mbaʼéichapa Ñandejára espíritu sánto ñanepytyvõ ñamombeʼu hag̃ua pe marandu porã?
14 Jahechakuaa Jesús remimboʼekuéra ipyʼaguasu hague Ñandejára espíritu sánto oipytyvõ rupi chupekuéra. Ñande avei pyʼaguasúpe ñamombeʼu pe marandu porã umi ndaijaʼéivape jepe ñanderehe. Ha upéva jajapo Jehová espíritu sánto ñanepytyvõ rupínte, upévare jajerurevaʼerã chupe. Upeichaite ningo Jehová ñanepytyvõ rupínteko pyʼaguasúpe ñambohovái umi opuʼãvape ñanderehe (jaleemína Salmo 138:3).
Ñande ningo pyʼaguasúpe japredika
15. Oguerohorýpa umi hénte pe marandu porã?
15 Yma guaréicha, koʼág̃a rupi oĩ ohendúva pe marandu porã péro heta avei oĩ nohenduséiva ha nañanderrespetaietéva voi. Oĩ umi okritika, oñembohory ha ndochaʼéiva ñanderehe. Jesús heʼimavaʼekue voi oikotaha upéicha (Mat. 10:22). Heta vésema avei oñeñeʼẽ vai ñanderehe téle ha rrádio umívape (Sal. 109:1-3). Upéicharõ jepe Jehová rembiguaikuéra pyʼaguasúpe omombeʼu pe marandu porã ko yvy tuichakue.
16. Mbaʼérepa jaʼe ñandepyʼaguasu rupi umi hénte ikatuha okambia ha ohendu pe marandu porã?
16 Ñandepyʼaguasu rupi umi hénte ikatu avei okambia ha ohendu pe marandu porã. Peteĩ ermána Kirguistangua omombeʼu: “Predikasiónpe peteĩ karai heʼi chéve: ‘Che ajerovia Ñandejárare, péro ndajeroviái umi kristianokuéra ojeroviaháre. Ha reg̃uahẽ jeýramo koʼápe katu, amboʼéta nderehe che rymbajagua!’. Heʼívo chéve upéva ahecha amo ikupe gotyo peteĩ jagua guasu oñeñapytĩva kadénape. Péro upe riremínte romeʼẽ roikóni la héntepe pe Noticias del Reino núm. 37, ‘Koʼẽrõitéma oñehundíta rrelihión japu!’. Ha ag̃uahẽ jey upe karai rógape, chéngo aimoʼãkuri ajuhutamaha ótrore, péro upe karai jeýko osẽ oñatende cherehe. Upepete voi añemboʼe Jehovápe ha haʼe pe karaípe: ‘Mbaʼéichapa. Chemanduʼa kokuehete ñañemongeta hague ha chemanduʼa avei la ne rymbajaguáre. Ag̃uahẽnte ningo sapyʼaitemi pórke ndéicha avei che aguerovia peteĩnte oĩha pe Ñandejára añeteguáva. Ndépa reikuaa koʼẽrõitéma Haʼe ohunditaha umi rrelihión japu omongyʼáva héra? Ko tratádo oñeʼẽve hína upévare’. Che ningo ni naimoʼãi pe karai ojagarraha chehegui la che tratádo. Ajedespedi chugui ha ahasa ótro ógape. Upe riremínte pe karai odipara oúvo la itratádo ipópe ha og̃uahẽvo cherendápe heʼi chéve: ‘Aleepáma ningo, mbaʼe piko che ajapovaʼerã ani hag̃ua Ñandejára cherundi avei?’”. Upéi pe karai oñepyrũ ostudia la Biblia ha oho meme rreunionhápe.
17. Mbaʼéichapa peteĩ ermána ipyʼaguasu rupi oipytyvõ iñestudiántepe?
17 Ñandepyʼaguasúramo ikatu avei ñambopyʼaguasu ambue ñande rapichápe. Peteĩ ermána Rusiaygua oho jave kolektívope oikuaveʼẽ irrevísta peteĩ kuñakaraípe ha upévo peteĩ karai opo opuʼã iñasiéntogui, oipeʼa chugui irrevísta, omondoropa ha omombo. Upe rire oñemoĩ ojaʼo vaipa pe ermánape ha heʼi chupe anivéma hag̃ua opredika upérupi. Upéi oipota katuete omombeʼu chupe moõpa oiko. Upe ermána oñemboʼe Jehovápe ha imanduʼa Jesús heʼivaʼekuére: “Ani pekyhyje umi pende reténte ojukávagui” (Mat. 10:28). Pyʼaguasúpe pe ermána opuʼã ha heʼi upe karaípe: “Ndaʼemoʼãi ndéve moõpa opyta che róga ha asegíta katu apredika koʼárupi”, upe rire oguejy pe kolektívogui. Ha oho avei ningo raʼe upe kolektívope peteĩ iñestudiánte, okyhyjégui ndohóiva rreunionhápe. Péro ohecha rire mbaʼéichapa pe ermána ipyʼaguasu oñepyrũ avei haʼe oho la rreunionhápe.
18. Mbaʼépa ñanepytyvõta japredika hag̃ua pyʼaguasúpe Jesús ojapo haguéicha?
18 Jaiko rupi ko múndo añáme, tekotevẽ ñandepyʼaguasu jasegi hag̃ua Jesús ehémplo ha japredika. Mbaʼépa ñanepytyvõta upearã? Jahechakuaavaʼerã ñaneraʼarõha heta mbaʼe porã. Jahayhu hayhuvevaʼerã Jehovápe ha ñande rapichakuérape. Jajerurevaʼerã Jehovápe ñanembopyʼaguasumi hag̃ua. Ha aníketi ñanderesarái Jesús akóinte oĩtaha ñande ykére (Mat. 28:20). Jehová ñanderovasáta ha ñanepytyvõta, avei ñanemombaretéta ijespíritu sánto rupive. Upéicha rupi enterovénte ikatu ñandepyʼaguasu ha jaʼe: “Ñandejára chepytyvõhára, ndakyhyjeichéne. Mbaʼe piko ojapóta cherehe yvypóra” (Heb. 13:6).
Embohovaimína koʼã porandu
• Mbaʼérepa Ñandejára siervokuéra tekotevẽ ipyʼaguasu?
• Mbaʼépa ñanemboʼe...
... Ñandejára siervokuéra yma guare?
... Jesucristo?
... umi kristiáno ypykue?
... ñane ermanokuéra koʼag̃agua?
[Porandu ñahesaʼỹijóva]
[Nóta oĩva taʼanga ndive páhina 21]
Jesús ndokyhyjéi heʼi hag̃ua umi rrelihión omoakãva ijapuha
[Nóta oĩva taʼanga ndive páhina 23]
Jehová ñanembopyʼaguasu japredika hag̃ua