Jehová oipota jaikove opa ára g̃uarã

‘Ñandejára ojapovaʼekue opyta ndovaléi mbaʼeverã, péro jareko esperánsa.’ (ROM. 8:​20, BNP.)

1, 2. a) Mbaʼérepa ñamombaʼete pe esperánsa jaikovetaha opa ára g̃uarã ko yvy ape ári? b) Mbaʼérepa heta oĩ ndogueroviáiva jaikovéne hag̃ua opa ára g̃uarã?

 OIMEVAʼERÃ nemanduʼa mbaʼeichaitépa revyʼa reikuaa ypýrõ guare koʼẽrõitéma opataha ñemano, ndaiporiveimaha ig̃uaig̃ui ha itujáva, ha jaikotaha opa ára g̃uarã ko yvy ape ári (Juan 17:3; Rev. 21:​3, 4). Ha oiméne koʼág̃a peve kyreʼỹme remombeʼu nde rapichakuérape upe esperánsa porãite. Upéva ningo ñanepytyvõ ñamombaʼeve hag̃ua ñande rekove.

² Heta rrelihión oĩ ndogueroviáiva ikatutaha jaikove opa ára g̃uarã ko yvy ape ári. Ha la Biblia omboʼéramo jepe ñane alma omanoha, haʼekuéra heʼi peteĩ yvypóra omanóramo hiʼálma ohoha oiko peteĩ espírituicha (Eze. 18:20). Upéicha rupi heta oĩ ñande rapicha ndogueroviáiva jaikovéne hag̃ua opa árare ko yvy ape ári. Péro mbaʼéichapa jaikuaa la Biblia omboʼeha jaikovetaha opa ára g̃uarã ko yvy ape ári? Mbaʼe tiémpopepa Jehová omombeʼurakaʼe upéva yvyporakuérape?

‘Ñandejára ojapovaʼekue opyta ndovaléi mbaʼeverã, péro jareko esperánsa’

3. Mbaʼéichapa Jehová oikuaauka mbaʼépa oipota yvyporakuérape g̃uarã?

³ Yma Jehová omoĩ ypy guive Adán ha Évape ko yvy ape ári, heʼimavaʼekue mbaʼépa oipota yvyporakuérape g̃uarã. Heʼi voi Adánpe iñeʼẽrendúramo ikatutaha oiko opa ára g̃uarã (Gén. 2:​9, 17; 3:22). Péro Adán naiñeʼẽrendúi rupi operde pe perfeksión. Ha umi ifamília ypykue oikuaa porã upe oikovaʼekue. Ohecha avei hikuái mbaʼéichapa Jehová omboty chuguikuéra pe hardín rokẽ, ha oñepyrũmaha ituja ha omano hikuái (Gén. 3:​23, 24). Upe guive mbykyvéma oikove yvyporakuéra. Adán oikovéramo jepe 930 áño, Sem 600 áñontema oikove ha itaʼýra Arpaksad katu 438 áño. Abrahán túva, Taré oikovevaʼekue 205 áño, Abrahán 175 áño, Isaac 180 áño ha Jacob 147 áño (Gén. 5:5; 11:​10-13, 32; 25:7; 35:28; 47:28). Ha upéicha rupi umi hénte ohechakuaáne ndoikomoʼãveimaha hikuái opa ára g̃uarã. Péro mbaʼérepa jaʼe ikatu jeýne hag̃ua jaikove opa ára g̃uarã?

4. Mbaʼérepa yvyporakuéra ikatu ojerovia Jehová omeʼẽ jeytaha chupekuéra Adán operdevaʼekue?

⁴ Ñandejára Ñeʼẽ ningo heʼi: ‘Ñandejára ojapovaʼekue opyta ndovaléi mbaʼeverã, péro jareko esperánsa’ (Rom. 8:​20, BNP). Mbaʼe esperánsapa hína upéva? Pe primera profesía ningo oñeʼẽ peteĩ ‘ñemoñare opyrũtaha pe mbói akãre’ (jaleemína Génesis 3:​1-5, 15). Péicha Jehová omeʼẽ jey esperánsa yvyporakuérape oikotaha opa ára g̃uarã ko yvy ape ári. Upévare Abel ha Noé umíva ojerovia Ñandejára omeʼẽ jeytaha yvyporakuérape Adán operdevaʼekue. Ha oiméne haʼekuéra ohechakuaa pe mbói oisuʼúvo pe ñemoñarépe ipytápe heʼiseha oñeñohẽtaha tuguy (Gén. 4:4; 8:20; Heb. 11:4).

5. Mbaʼérepa Abrahán ojeroviaitereivaʼekue Ñandejára omoingove jeytaha itaʼýrape?

 ⁵ Ñapensamíntena Abrahán ohasavaʼekuére. Haʼe ningo oĩvaʼekue ‘oikuaveʼẽ hag̃uáicha pe itaʼýra peteĩete’ (Heb. 11:17). Mbaʼérepa oĩvaʼekue omeʼẽ hag̃uáicha itaʼýra rekove? (Jaleemína Hebreos 11:19.) Ojerovia rupi Ñandejára omoingove jeytaha chupe. Péro mbaʼérepa haʼe ojeroviaitereivaʼekue Jehováre? Jehová voi oipytyvõ rupi chupe ha hembireko Sárape ifamília hag̃ua hikuái itujámaramo jepe (Gén. 18:​10-14; 21:​1-3; Rom. 4:​19-21). Ha Jehová oprometevaʼekue voi chupe pe “ñemoñare” outaha Isaac rupive (Gén. 21:12).

6, 7. a) Mbaʼe kompromísopa Jehová ojapo Abrahán ndive? b) Mbaʼépa ohupytýta yvyporakuéra Ñandejára Rréino rupive?

⁶ Jehová ohecha mbaʼeichaitépa Abrahán ojerovia hese, upévare ojapo hendive peteĩ pákto térã kompromíso okumplítava iñemoñare rupive (jaleemína Génesis 22:18). Ha pe ‘iñemoñare’ iñimportantevéva ningo Jesucristo (Gál. 3:16). Jehová heʼivaʼekue avei Abrahánpe: ‘Ambohetaitereíta ndéve ne ñemoñare’, umi estrélla yvagapegua ha yvykuʼi már rembeʼypeguáicha’. Upévare Abrahán ndoikuaái mboýpa oĩta ‘iñemoñare’ (Gén. 22:17). Ha upe riréma oñemombeʼu mboýpa oĩta, umíva hína Jesús ha 144.000 tapicha oisãmbyhýtava Ñandejára Rréino (Gál. 3:29; Rev. 7:4; 14:1). Ñandejára Rréino rupive ningo ‘oñevendesíta opa tetã ko yvy ape arigua’.

⁷ Abrahán ndoikuaaporãiramo jepe mbaʼéichapa Jehová okumplíta pe oprometevaʼekue, la Biblia heʼi hese ‘ohaʼarõ hague pe táva guasu opa ára g̃uarãva’. Upéva ningo Ñandejára Rréino (Heb. 11:10). Péro Abrahán oñemoingove jey vaʼerã ohupyty hag̃ua umi mbaʼe porã oñemeʼẽtava Ñandejára Rréino poguýpe. Ikatúta avei oikove opa ára g̃uarã. Ha opavave oñemoingove jeýva ko yvy ape ári ha umi ohasáva pe Armagedón, oikovéta avei opa ára g̃uarã (Rev. 7:​9, 14; 20:​12-14).

“Che ánga chejopy”

8, 9. Mbaʼérepa ikatu jaʼe pe lívro de Job noñeʼẽiha peteĩ kuimbaʼe ohasa asývarente?

⁸ Moisés oikoveha tiémpo rupi oikovaʼekue avei peteĩ karai hérava Job. La Bíbliape oĩ voi peteĩ lívro hérava Job ha ojeʼe Moisés ohai hague. Upépe oñemyesakã porã mbaʼérepa Jehová oheja Job hetaite ohasa asy ha mbaʼépepa opa upéva. Upéicharõ jepe, ko lívro ndahaʼéi peteĩ kuimbaʼe ohasa asývarente oñeʼẽva. Ohechauka Jehová oguerekoha derécho oisãmbyhy hag̃ua ha ojapoha hekopete. Ha ombohovái avei Satanás heʼivaʼekue hardín de Edénpe. Haʼe heʼi yvyporakuérare naiñeʼẽrendumoʼãiha Jehovápe ohasa asýramo. Péro Job ndoikuaaporãiramo jepe upéva nomboguapýi ijehe umi iñamígo guaʼu heʼíva hese (Job 27:5). Katuete ningo Job rembiasakue omombaretéta ñande jerovia ha ñanemokyreʼỹta ñaneñeʼẽrendu ha ñadefende hag̃ua Jehová sãmbyhy.

⁹ Oñeʼẽmba rire Jóbpe umi iñamígo guaʼu, ombohovái chupekuéra Elihú, Barakel el buzita raʼy. Ha mbaʼérepa ojapo upéicha? Haʼe heʼi: ‘Cherenyhẽ ñeʼẽgui, ha che ánga chejopy chepyʼapýpe’ (Job 32:​5, 6, 18, ÑÑB). Oñekumpli ningo Elihú heʼivaʼekue opávo Job rembiasa asy, ha Ñandejára ovendesi chupe. Upéva tuichaiterei avei ñanepytyvõ omeʼẽgui ñandéve esperánsa.

10. Mbaʼe ehémplopa ohechauka Jehová heʼíva enterovépe g̃uarãha?

¹⁰ Jehová heʼíva ningo enterovépe g̃uarã ndahaʼéi peteĩme g̃uarãnte. Pór ehémplo pe profesía de Daniel omombeʼu mbaʼépa ohecha iképe rréi Nabucodonosor Babiloniaygua.  Haʼe ohecha mbaʼéichapa ojeity peteĩ yvyra máta tuichaitereíva (Dan. 4:​10-27). Ha oñekumpli ñepyrũramo jepe upe profesía Nabucodonosor rehe, oñekumplipáta Jehová oisãmbyhy vove. Upeichaite ningo, áño 607-pe Jesús ou mboyve oñepyrũ pe tiémpo de 2.520 áño. Upe guive Jehová oisãmbyhy jeýta ko yvy ape ári peteĩ goviérno rupive oĩtava rréi David ñemoñare poguýpe. * Ha upéva oiko 1914-pe, Jesús oñepyrũrõ guare oisãmbyhy yvágape. Upéicha avei koʼẽrõitéma Ñandejára Rréino oisãmbyhýta ko yvy ha okumplipaitéta umi mbaʼe ñahaʼarõva.

‘Eipeʼána chupe ñemanógui’

11. Mbaʼépa ñanemboʼe Elihú heʼivaʼekue Ñandejárare?

¹¹ Elihú heʼivaʼekue Jóbpe ‘Ñandejára rembiguái apytégui oĩha peteĩ oñeʼẽva hese’. Ha upéva ‘hekoporã’ ha ojerure Ñandejárape ‘oiporiahuvereko hag̃ua chupe’. Mbaʼépa oiko upe rire? Elihú heʼi Ñandejára oguerohory hague chupe ha heʼi: ‘Eipeʼána chupe ñemanógui, heko repykue ningo ajuhúma, upépe hete hesãi jeýne imitãrõ guaréicha’ (Job 33:​23-26). Péicha ohechauka Ñandejára oguerohoryha ojepagáramo umi oñembyasýva rembiapo vaikuére (Job 33:24).

12. Mbaʼéichapa ñanepytyvõ Elihú heʼivaʼekue?

¹² Elihú oiméne ndoikuaaporãi avei rakaʼe mbaʼéichapa oñekumplíta umi mbaʼe Ñandejára heʼivaʼekue chupe. Upéicha ningo heta Ñandejára profétare oikovaʼekue avei (Dan. 12:8; 1 Ped. 1:​10-12). Upéicharõ jepe umi mbaʼe heʼivaʼekue ñanepytyvõ jajerovia hag̃ua Ñandejára ohejataha peteĩ árape ojepaga chupe ñane rembiapo vaikuére. Ha upéicha nañandetujamoʼãvéima ha nañamanovéima. Upéva heʼise jaikovetaha opa ára g̃uarã. Pe lívro de Job ohechauka avei oñemoingove jeytaha umi omanovaʼekuépe (Job 14:​14, 15).

13. Mbaʼérepa ñamombaʼeterei Elihú heʼivaʼekue?

¹³ Elihú heʼivaʼekue omombaʼeterei umi tapicha ohaʼarõva hína ojesalva oñehundi vove ko múndo aña. Upépe ningo umi ijedáva ha umi oñemoingove jeýva  ipyahu jeýta (Rev. 7:​9, 10, 14-17). Aje piko ñanembovyʼaite jaikuaávo koʼã mbaʼe! Péro upearã jajeroviavaʼerã upe sakrifísio Jesús ojapovaʼekuére opaga hag̃ua ñane rembiapo vaikuére. Tahaʼe umi ungído térã umi ohaʼarõva oikove opa ára g̃uarã ko yvy ape ári (Juan 10:16; Rom. 6:23).

Jehová “oipeʼáta ñemano”

14. Mbaʼérepa umi Israelgua oikotevẽvaʼekue peteĩ omosãsovaʼerã chupekuéra?

¹⁴ Abrahán familiare ningo hetaitereivaʼekue ha oiko chugui peteĩ tetã. Ha hendivekuéra Jehová ojapo peteĩ kompromíso. Upérõ Jehová heʼivaʼekue chupekuéra: ‘Ojapóva guive che rembipota ha che léi heʼíva oikovéta’ (Lev. 18:5). Péro umi Israelgua ndaikatuivaʼekue oiko upe léi heʼihaichaite ha upévare oikotevẽ peteĩ omosasõvaʼerã chupekuéra (Gál. 3:13).

15. Mbaʼépa ohaivaʼekue David?

¹⁵ Jehová ningo ndahaʼeivaʼekue Moisés rupive añónte omombeʼúva ñandéve ikatuha jaikove opa ára g̃uarã. Haʼe omombeʼuvaʼekue avei ambue hembiguái rupive (Sal. 21:4; 37:29). Umíva apytépe oĩ pe salmísta David. Peteĩ sálmope ningo haʼe ohai Jehová rembiguaikuéra oikotaha peteĩ ñeʼẽme oñondivepa ha omohuʼãvo heʼi: “Upépe Ñandejára oporohovasa omeʼẽvo jeikove puku” (Sal. 133:3).

16. Mbaʼépa Jehová omombeʼu yvyporakuérape Isaías rupive?

¹⁶ Jehová ningo Isaías rupive omombeʼu avei ñandéve jaikovetaha opa ára g̃uarã ko yvy ape ári (jaleemína Isaías 25:​7, 8). Pe pekádo ha ñemano ningo haʼete ‘peteĩ ahoja pohýi ojahoʼíva yvyporakuérape’ ombopytupa hag̃uáicha. Ha Isaías rupive Jehová omombeʼu avei “oipeʼataha” pekádo ha ñemano ko yvy ape árigui.

17. Mbaʼépa ojapo pe Mesías ikatu hag̃uáicha jaikove opa ára g̃uarã?

¹⁷ Jahechamína mbaʼépa heʼi Léi mosáika pe kavara mácho oñekuaveʼẽvare Azazélpe. Káda áño, Día de Expiación jave, pe saserdóte guasu ‘omoĩvaʼerã mokõive ipo kavara mácho akã ári ha omombeʼu opaite Israelgua ñemoñare rembiapo vai’. Upéicha pe kavara mácho ‘oguerahapaitevaʼerã ijehe hembiapo vaikuéra’ desiértope (Lev.  16:​7-10, 21, 22). Proféta Isaías katu heʼivaʼekue outaha peteĩ Mesías oñekuaveʼẽtava pe kavara mácho rekovia. Ha oguerahataha yvyporakuéra ‘mbaʼasy, jehasa asy ha pekádo’. Upéicha rupi ñande avei ikatúta jaikove opa ára g̃uarã (jaleemína Isaías 53:​4-6, 12).

18, 19. Mbaʼe esperánsa rehépa oñeʼẽ Isaías 26:19 ha Daniel 12:13?

¹⁸ Isaías rupive Jehová heʼi Israélpe: ‘Omanovaʼekue oikove jeýta, hetekue opuʼã jeýta, yvyguýpe okéva opáy jeýta ha osapukái rorýta. Nde ysapy niko oporomoingove, ha umi omanovaʼekue heñói jeýta yvýgui” (Isa. 26:19). Escrituras Hebréaspe ningo ohechauka porã Ñandejára omoingove jeytaha umi omanovaʼekuépe ha enterove jaikovetaha opa ára g̃uarã. Pór ehémplo, Daniel orekórõ guare 100 áño rupi, Jehová heʼi chupe: “Tereho epytuʼu og̃uahẽ meve pe ára paha, upe ára upévape nde repuʼã jeýta oñemeʼẽ hag̃ua ndéve nembaʼerã” (Dan. 12:13).

¹⁹ Marta oguerovia Ñandejára omoingove jeytaha umi omanovaʼekuépe. Upévare heʼi Jesúspe: ‘Che niko aikuaa ág̃a ára pahápe, che ermáno oikove jeytaha opa omanóva oikove jeývo’ (Juan 11:24). Okambiaparakaʼe Jesús upe esperánsa? Mbaʼépa ohairakaʼe hemimboʼekuéra upévare? Ha Jehovápa oipota gueteri jaikove opa ára g̃uarã ko yvy ape ári? Pe artíkulo oúvape ñambohováita koʼã porandu.

[Nóta]

Ikatúpa remyesãkami?

• Mbaʼe esperánsapa jareko Ñandejára ojapovaʼekue opytáramo jepe ndovaléi mbaʼeverã?

• Mbaʼérepa Abrahán ojeroviaitereivaʼekue Ñandejára omoingove jeytaha omanovaʼekuépe?

• Mbaʼéichapa ñanepytyvõ Elihú heʼivaʼekue Jóbpe?

• Mbaʼéichapa Escrituras Hebreas ohechauka porã Ñandejára omoingove jeytaha umi omanovaʼekuépe ha jaikovetaha opa ára g̃uarã?

[Porandu ñahesaʼỹijóva]

[Nóta oĩva taʼanga ndive páhina 5]

Elihú heʼivaʼekue Jóbpe ohechauka yvypórape oñeguenohẽtaha ñemano poguýgui ha ndaitujaveimaha

[Nóta oĩva taʼanga ndive páhina 6]

Jehová heʼi Daniélpe: “Tereho epytuʼu og̃uahẽ meve pe ára paha, upe ára upévape nde repuʼã jeýta oñemeʼẽ hag̃ua ndéve nembaʼerã”