‘Ñande jerovia toñembohapo mbarete ha toñemopyenda’

REHECHÁMAVAPA mbaʼéichapa pe yvytu atã ombokacha umi yvyramáta? Ombovava ápe ha pégotyo, péro ndoʼái. Mbaʼérepa upéva? Pórke hapo oñakãrama hatã yvyguýpe. Ha ñande ikatu avei jajoguañaína pe yvyramátape. Mbaʼérepa? Ñandéve ningo ou jepi avei umi mbaʼe ijetuʼúva pe yvytu atãicha. Ha ikatúta ñaaguanta ‘ñande jerovia ñambohapo mbarete ha ñamopyendáramo’ (Efe. 3:​14-17, ÑÑB). Ha mbaʼérepa ñañemopyendavaʼerã?

La Biblia heʼi voi ‘Jesucristo haʼeha pe ita guasu omopyendáva’ kongregasión kristiána (Efe. 2:20; 1 Cor. 3:11). Ha ñanemokyreʼỹ ‘ñamoirũ hag̃ua chupe, ñañembohapo hag̃ua hese ha jakakuaa, ñañemopyenda hatã hag̃ua ñande jeroviáre’. Jajapóramo upéicha ñambohováita umi oñemoĩvape ñande jeroviáre, ha umi ñanembotavysévape jepe (Col. 2:​4-8).

‘Ipekue, ipukukue, ijyvatekue ha ipypukukue’

Mbaʼéichapa ikatu ‘ñande jerovia oñembohapo mbarete ha oñemopyenda’? Upéva ikatu jajapo jastudia meméramo la Biblia. Jehová ningo oipota jaikuaa porã Iñeʼẽ: ‘ipekue, ipukukue, ijyvatekue ha ipypukukue’ (Efe. 3:​18, BNP). Upévare, aníkena ñañekontenta umi mbaʼe jaikuaámavarente (Heb. 5:12; 6:1). Enterove uvei kyreʼỹme ñañehaʼãvaʼerã jaikuaave Ñandejára Ñeʼẽ heʼíva (Pro. 2:​1-5).

Péro jaikuaa porã Ñandejára Ñeʼẽ heʼíva ndeʼiseihína ‘ñande jerovia oñembohapo mbarete ha oñemopyenda hatãmaha’. Satanás jepe ningo oikuaa porã Ñandejára Ñeʼẽ heʼíva. Upéicharõ, tekotevẽ jaikuaa ‘pe Cristo mborayhu tuichavéva opaite mbaʼekuaágui’ (Efe. 3:19). Jastudiáramo jahayhúgui Jehovápe ha ñamombaʼégui Iñeʼẽ, umi mbaʼe jaikuaáva chugui omombaretéta ñande jerovia (Col. 2:2).

Rehechavaʼerã rentende porãpa

Ehechamína rentende porãpa reína umi mbaʼe omboʼéva la  Biblia. Upéva ikatu nemokyreʼỹ akóinte restudia hag̃ua la Biblia neañohápe. Pór ehémplo, ehechamína apóstol Pablo ohai ñepyrũvaʼekue umi Efesoyguápe (ehechami pe rrekuádro heʼihápe “Efesoyguápe”). Elee umi versíkulo ha ehecha reikuaápa mbaʼépa heʼise umi ñeʼẽ oĩva kursívape. Ñahesaʼỹijomi peteĩteĩ.

Ñandejára ymaite guive voi ñandeporavomavaʼekue

Apóstol Pablo ohai umi kristiáno Efesoyguápe: ‘Ñandejára ymaite guive voi ñandeporavomavaʼekue ñanderereko hag̃ua itaʼýra teéramo Jesucristo rupi’. Jehová ningo ndahetáipe oiporavovaʼekue itaʼýraramo oho hag̃ua yvágape. Ha koʼãvagui ningo oikovaʼerã saserdóte ha oisãmbyhyvaʼerã Jesucristo ndive (Rom. 8:​19-23; Rev. 5:​9, 10). Satanás opuʼã ypýrõ guare Jehová sãmbyhýre heʼi Ñandejára ndojapoporãi hague yvyporakuérape. Upévare, Jehová ojapo porã oiporavo haguére yvyporakuéra apytégui umi oipytyvõtava oñehundi hag̃ua Satanáspe ha opa oĩvape ipoguýpe. Péro Ñandejára ndeʼirivaʼekue máva mávapepa oiporavóta itaʼyrarã, haʼe heʼintevaʼekue oiporavotaha peteĩ aty oisãmbyhy hag̃ua Jesucristo ndive yvágape (Rev. 14:​3, 4).

Apóstol Pablo ningo ohai umi Efesoyguápe pe aty ojeporavóma hague ‘ojejapo mboyve ko múndo’. Ha mbaʼe múndo rehépa oñeʼẽ? Haʼe ndeʼirihína Ñandejára oiporavóma hague chupekuéra ojapo mboyve ko yvy ha yvyporakuérape. Upéicharire Adán ha Évape ojekulpa rei vaʼerãmoʼã, pórke Ñandejára ojapo mboyve  voi chupekuéra oikuaátama naiñeʼẽrendumoʼãiha hikuái. Upéicha ojapóramo ningo Ñandejára iñinhústota. Ha arakaʼe piko upéicharõ Jehová heʼivaʼekue ohunditaha Satanás, Adán ha Évape opuʼã haguére Isãmbyhýre? Upéva oiko Adán ha Eva opeka riremi ha ifamília mboyve hikuái. Upérõ nonaséi gueteri avei umi yvypóra imperfékto ikatútava oĩ porã jey Ñandejára ndive.

‘Ipyʼaporãitereígui’

Apóstol Pablo ohai ñepyrũvo pe kárta Efesoyguápe omboysýi mbaʼe mbaʼépa Ñandejára ojapo ‘ipyʼaporãitereígui’. Mbaʼérepa Pablo ojapo upéicha? Ohechauka hag̃ua ndahaʼeiha Jehová rresponsavilida oguenohẽ yvypórape pekádo poguýgui.

Ñande ningo ni peteĩ ndaikatúi ñasẽ pekádo poguýgui ñandejeheguínte. Péro Jehová ñanderayhúgui ojapo heta mbaʼe ikatu hag̃uáicha ñandesalva. Ñapensáramo mbaʼeichaitépa ñaneimperfékto ha ñandepekadór, jahechakuaáta avei Ñandejára ‘ipyʼaporãitereígui’ omoĩ hague oñekotevẽva ñandesalva hag̃ua.

Ñandejárante oikuaavaʼekue

Ñepyrũrã ningo Ñandejára ndeʼirivaʼekue mbaʼéichapa oñesolusionáta umi provléma Satanás omoñepyrũvaʼekue. Upéva ningo peteĩ mbaʼe ‘Ñandejárante oikuaavaʼekue’ (Efe. 3:​4, 5). Upéi pe kongregasión kristiána oñepyrũ riréma, Jehová omyesakãve mbaʼépa ojapóta okumpli hag̃ua haʼe oipotavaʼekue iñepyrũmby guive ko yvy ha yvyporakuérape g̃uarã. Apóstol Pablo heʼi voi Ñandejára ‘omoĩ hague pe ára og̃uahẽ hag̃ua huʼãme upe haʼe oipotáva’. Upearã haʼe omoĩ mbaʼéichapa ojejapovaʼerã opa mbaʼe ikatu hag̃uáicha oiko peteĩ ñeʼẽme opa oikóva yvágape ha yvýpe.

Upéva oñepyrũma Pentecostés áño 33-pe. Upérõ Jehová oiporavo ñepyrũ umi ogovernavaʼerã Jesucristo ndive yvágape (Hech. 1:​13-15; 2:​1-4). Upe riréma ombyaty umi oikótavape ko yvy ape ári Jesucristo goviérno poguýpe (Rev. 7:​14-17; 21:​1-5). Ojeʼévo Ñandejára omoĩ hague mbaʼéichapa ojejapovaʼerã opa mbaʼe, ndeʼiseihína omoĩma hague Irréino yvágape. Jaikuaa ningo upe Rréino oñemoĩ hague 1914-pe raẽ. Upéicharõ heʼisehína mbaʼéichapa Jehová ojapo opa mbaʼe okumpli hag̃ua hembipota ha ojeiko porãmba jey hag̃ua ko univérsope.

‘Ñapensa okakuaapamavaʼekuéicha’

Jarekóramo peteĩ día ha óra jastudia hag̃ua ñaneañohápe ñanepytyvõta jaikuaa porã hag̃ua Ñandejára Ñeʼẽ: ‘ipekue, ipukukue, ijyvatekue ha ipypukukue’. Jaikuaa ningo koʼág̃a rupi ñane rembiapoitereiha ha upéva Satanás ikatu oaprovecha ani hag̃ua ñañemotiémpo jastudia hag̃ua. Ani angamoʼãkena jaheja chupe osẽ la igústope. Jaiporúkena pe ‘katupyry Ñandejára omeʼẽvaʼekue’ ñandéve ‘ñapensa hag̃ua okakuaapamavaʼekuéicha’ (1 Juan 5:20; 1 Cor. 14:20). Jaikuaa porã vaʼerã mbaʼérepa jaguerovia peteĩ mbaʼe ikatu hag̃uáicha ‘ñambohovái opa oporandúvape ñandéve ñande jeroviáre’ (1 Ped. 3:​15, ÑÑB).

Epensamíntena nde reimeha Éfesope ojeleérõ guare pe kárta Pablo ohaivaʼekue. Ajépa nemokyreʼỹvaʼerãmoʼã reikuaa porãve hag̃ua Ñandejára Raʼýpe (Efe. 4:​13, 14). Upévare, koʼág̃a rupi nde rehesaʼỹijóramo pe kárta apóstol Pablo ohaivaʼekue katuete nemokyreʼỹta. Rehayhúramo nde pyʼaite guive Jehovápe ha reikuaa porãramo Iñeʼẽ, nepytyvõta ‘reñembohapo ha reñemopyenda hatã hag̃ua nde jeroviáre’. Upéicharõ ikatúta regueropuʼaka opa mbaʼe vai Satanás omboúva ndéve ko ára pahápe (Sal. 1:​1-3; Jer. 17:​7, 8).

[Taʼanga ha rrekuádro oĩva páhina 27-pe]

“Efesoyguápe”

‘Ñamombaʼeguasúkena Jesucristo Ru, Ñandejárape. Haʼe niko ñanderovasavaʼekue opaichagua jopói reheve Cristo rupi. Ñandejára niko ñandeporavovaʼekue Cristo rupi ojapo mboyve ko múndo, ñanemarangatu ha ñanderekopotĩ hag̃ua henondépe. Ñanderayhúgui ñandeporavomavaʼekue ymaite guive ñanderereko hag̃ua itaʼýra teerã Jesucristo rupi. Haʼe oipota haguéicha oiko ha hembipota rupi. Upévare ñamombaʼeguasu tapia vaʼerã Ñandejárape imborayhu tuichaitére, ha ñanderovasa haguére Itaʼýra ohayhuetéva rupive. Haʼe niko ñandesalvavaʼekue itaʼýra ruguy rupi ha operdona ñande pekadokuéra ipyʼaporãitereígui. Ñandejára ñanemyenyhẽ imborayhúpe, pe iñarandu ha imbaʼekuaa tuichaite rupi ha oikuaauka ñandéve upe haʼe ojapótava ha avave oikuaaʼỹva. Haʼe voi omoĩ mbaʼéichapa ojejapovaʼerã opa mbaʼe. Ha omoĩ ára og̃uahẽ hag̃ua huʼãme upe haʼe oipotáva ha ombyatypa jey Cristo poguýpe opa mbaʼe oĩva yvágape ha yvy ape ári.’ (Efesios 1:​3-10, BNP.)