Ndépa remoĩma peteĩ óra restudia hag̃ua la Biblia?

PE ÁÑO ohasavaʼekuépe pe Cuerpo Gobernante heʼíkuri ndajarekomoʼãveimaha estúdio de lívro de kongregasión. Ha upe tiémpo jaiporuvaʼerãha jastudia hag̃ua la Biblia ñande rogayguakuéra ndive. Upévare nde remoakãva nde rogapy, aníkena nderesarái káda semána restudiavaʼerãha ne rembireko ha ne familiakuérandi umi informasión oipytyvõtava chupekuéra. Ha nanefamíliairamo katu, reiporuvaʼerã upe tiémpo restudia hag̃ua ne rembirekóndi. Péro oiméramo nde soltéro ha nodependéi nderehe avave, reiporuvaʼerã upe tiémpo restudia hag̃ua neañohápe.

Heta ermáno oagradeseterei oñemeʼẽ haguére peteĩ kaʼaru pytũ ñande aty ha jastudia hag̃ua ñande rogayguándi. Pór ehémplo peteĩ ansiáno hérava Kevin a ohai: “Che ha umi kongregasiónpe oĩva ningo roagradeseterei upéva. Ore ansianokuéra ningo roñemongeta mbaʼéichapa rostudia jepi ore rogayguakuéra ndive pe pyhare opytavaʼekue upearã ha upéicha rojaporoína pe Cuerpo Gobernante heʼíva”.

Peteĩ ermána hérava Jenny ha iména ansiánova ohai avei: “Mbohapy mitãkuña ningo roreko: peteĩ oreko 15 áño, ótra 11 ha la michĩvéva 2 áño. Ndaʼaréi rova hague peteĩ kongregasión de lenguaje de séñaspe ha hasypeterei rojepreparapa jepi rreunionrã. Koʼág̃a katu roguerekovéma peteĩ pyhare romombaʼeguasu hag̃ua Jehovápe oñondivepa”.

John ha JoAnn ningo prekursór rregulár. Haʼekuéra ohai: “Oreve ningo yma ijetuʼueterei rostudia hag̃ua la Biblia oñondive. Hetaiterei ore rembiapo kongregasiónpe ha umíva apytépe roñemotiempovaʼerã rostudia hag̃ua. Ko kámbio pyahúngo peteĩ jopói Jehová omeʼẽva oréve oremokyreʼỹ hag̃ua. Upéicharõ jepe rosegivaʼerã roiporu porã oretiémpo”.

Peteĩ kariaʼy orekóva 25 áño ha hérava Tony ostudia haʼeñohápe káda martes. Ha ótro día katu ojeprepara rreunionrã. Haʼe heʼi: “Che ningo aipotaitereíma jepi og̃uahẽ pe martes pyhare. Iñimportanteterei ningo chéve g̃uarã upe pyhare aiporúgui amombaʼeguasu hag̃ua Jehovápe. Dos óra rupi astudia jepi umi informasión chepytyvõtava añemoag̃uive hag̃ua Jehováre. Ha chetiempove rupi ajepyʼamongeta porãve umi téysto aleévare”. Mbaʼépa ohupyty Tony ojapo haguére upéicha? Haʼete voi ombohovái: “Koʼág̃a rupi umi informasión aleéva og̃uahẽve che korasõme. Pór ehémplo, Perspicacia-pe alee mbaʼéichapa David ha Jonatán oñoamigoitevaʼekue. Heta mbaʼe chemboʼe Jonatán omotenonde haguére Davídpe. Haʼe ojapovaʼekue ohechauka chéve mbaʼépa heʼise peteĩ amigoite. Hiʼãiterei voi chéve og̃uahẽ pe martes aaprendeve hag̃ua heta mbaʼe porã peichagua”.

Upéicharõ jaʼekuaa Jehová siervokuérape tuicha oipytyvõtaha ko tiémpo oñemeʼẽvéva chupekuéra ostudia hag̃ua ha omombaʼeguasu hag̃ua Ñandejárape hogaygua ndive.

[Nóta]