Oñeporandúva jepi

Mbaʼépa ñanemboʼe Proverbios 24:27?

Pe lívro de Proverbios heʼi peteĩ mitãrusúpe: ‘Emohenda ne rembiapo okapegua, embosakoʼi nde kokue, ha upéi emopuʼã nde róga’. Mbaʼépa heʼise ko téysto? Peteĩ kuimbaʼe ohechakuaavaʼerãha mbaʼépa oñehaʼarõ chugui peteĩ ogapýpe ha ojepreparavaʼerãha omenda mboyve.

Heta vésema ningo ko téystore ojeʼe heʼiseha pe kuimbaʼe omoakãva hogapy omantene ha ‘omopuʼãvaʼerãha hóga’. Upéva heʼise avei omombarete ha ohekomboʼevaʼerãha hogayguápe Ñandejára rapére. Ha upéva voi ningo la Biblia ojerure umi omoakãvape hogapy. Upéicharõ jepe ko téysto ñahesaʼỹijóva ndeʼiséi upéva. Mbaʼérepa? Jahechamíta mokõi mbaʼe omyesakãtava ñandéve upéva.

Ñantende ningo ko téystope ‘emopuʼã nde róga’ heʼiseha ‘ejogapo’. Upévare, ko proverbio ndeʼiséi ñamopuʼã térã ñamombaretevaʼerã pe família jarekómava voi. Heʼise uvei ñamoñepyrũ peteĩ família térã ñamenda ha ñande raʼy.

Jahechakuaa avei ko téysto heʼiseha ñandéve jajapo raẽ vaʼerãha peteĩ mbaʼe ha upéi ambue mbaʼe. Haʼete heʼíva: “Ejapo raẽ kóva ha upéi katu amóva”. Ikatu piko jaʼe upéicharõ iñimportanteveha ñamantene ñane famíliape ñamboʼerangue chupekuéra Ñandejára Ñeʼẽ? Nahaniriete katu.

Yma ningo peteĩ kuimbaʼe ‘omopuʼãsérõ hóga’, térã omoñepyrũséramo peteĩ família oñeporanduvaʼerã oĩmapa oñangareko ha omantene hag̃uáicha hembireko ha ifamiliakuérape. Omenda mboyve ombaʼapomavaʼerã ikokuépe. Upévare, ambue Bíbliape ko téysto ojetradusi kóicha: ‘Ejogapo mboyve, ejapo raẽ ne rembiapo okapegua, ha embosakoʼi nde kokue’ (Ñande Ruete Ñeʼẽ Biblia). Koʼág̃a pevépa jajapovaʼerã upéicha?

Koʼág̃a peve ningo jajapovaʼerã. Pe kariaʼy omendaséva ningo oĩvaʼerã okumpli hag̃uáicha irresponsavilida. Ha hesãima guive ombaʼapovaʼerã. Oñangarekovaʼerã avei hogayguakuérare. La Biblia heʼi voi pe ména omoĩvaʼerãha hogayguápe oikotevẽva, ohayhu ha ohekomboʼevaʼerãha chupekuéra Ñandejára Ñeʼẽ. Péro ndojapóiramo upéicha ivaive la isituasión peteĩ ndojeroviáivagui Ñandejárare (1 Tim. 5:8). Upévare, umi kariaʼy omendasémava oñeporanduvaʼerã: “Che piko ikatúma amantene peteĩ família? Che piko aiméma amoakã hag̃uáicha peteĩ ogapy? Akóintepa astudiáne la Biblia che rogayguakuérandi?”. La Biblia ohechauka porã koʼã rresponsavilida iñimportantetereiha (Deu. 6:​6-8; Efe. 6:4).

Upéicharõ, umi kariaʼy omendaséva guive ojepyʼamongeta porã vaʼerã Proverbios 24:​27-pe heʼívare. Péro umi kuñataĩ oñeporanduvaʼerã avei ikatútapa okumpli umi rresponsavilida orekóva peteĩ tembireko ha peteĩ sy. Upéicha avei umi omendáva ifamiliaséramo opensa porã vaʼerã oĩpa hikuái okumpli hag̃uáicha upe rresponsavilida (Luc. 14:28). Jajapóramo koʼã mbaʼe Ñandejára heʼíva ñandéve jajeíta heta provlémagui ha ikatúta jaiko vyʼápe ñande rogapýpe.

[Komentário oĩva páhina 12-pe]

Mbaʼe mbaʼépa oñeporanduvaʼerã pe kariaʼy omendasémava?