“Peẽ niko che angirũ”

“Peẽ niko che angirũ pejapopaitérõ koʼã che haʼéva peẽme.” (JUAN 15:​14, JMP.)

1, 2. a) Mbaʼérepa jaʼe Jesús amigokuéra idiferénte hague ojuehegui? b) Mbaʼérepa iñimportanteterei jaiko Jesús amígoramo?

 JESÚS ofestehahína Páskua ijapostolkuérandi peteĩ ógape Jerusalénpe. Haʼekuéra ningo idiferénte ojuehegui. Pór ehémplo Pedro ha iñermáno Andrés peskadór vaʼekue. Mateo katu impuésto kovraha, peichaguáre ningo umi hudío ndochaʼeietevaʼekue. Santiago ha Juan oikuaáma Jesúspe michĩmi guive. Péro Natanael ramoiténte oikuaa hague chupe (Juan 1:​43-50). Idiferénteramo jepe hikuái, enterovénte oguerovia Jesús haʼeha pe Mesías, Ñandejára Raʼy (Juan 6:​68, 69). Ha oiméne ovyʼaite hikuái Jesús heʼívo chupekuéra: ‘Che poguereko che amígoramo, aikuaaukágui peẽme opa mbaʼe che Ru heʼivaʼekue chéve’ (Juan 15:15).

² Koʼã mbaʼe ningo Jesús ndeʼirivaʼekue ijapostolkuérapente, enterove ungídope ha ‘ambue ovechakuérape’ avei (Juan 10:16). Ñande ningo ñanediferénte avei ojuehegui, upéicharõ jepe enterove ikatu jaiko Jesús amígoramo. Ha iñimportanteterei ningo jaiko Jesús amígoramo pórke upéicharõmante jaikóta Jehová amígoramo. Péicha jahecha ndaikatumoʼãiha voi jaiko Jehová amígoramo itaʼýra ndahaʼéiramo ñane amígo (jaleemína Juan 14:​6, 21). Mbaʼépa jajapovaʼerã jaiko hag̃ua Jesús amígoramo? Ha mbaʼépa jajapovaʼerã akóinte ñane amígo hag̃ua? Ñambohovái mboyve koʼã porandu, jahechamíta mbaʼeichagua amígopa rakaʼe Jesús ha mbaʼépa ojapo hemimboʼekuéra.

Mbaʼeichagua amígopa rakaʼe Jesús

3. Mbaʼeichaguápa Jesús ohekavaʼekue iñamigorã?

³ Rréi Salomón ningo heʼivaʼekue umi irríkova iñamígo hetaha (Pro. 14:20). Ha upeichaite ningo, ñande yvypóra imperfékto jahekasemi ñane amigorã okonvenítavante ñandéve, ñapensa voi mbaʼépa ikatu ñaguenohẽ chugui. Péro Jesús ndaupeichaietevaʼekue. Haʼe ndohecharamói la héntepe ipláta heta haguére. Upéicharõ jepe Jesús imbaʼeporãiterei peteĩ kariaʼy irríkova ndive ha heʼi chupe oiko hag̃ua hemimboʼéramo. Péro heʼi avei chupe ovendepa hag̃ua opa mbaʼe orekóva ha oipytyvõ hag̃ua umi imboriahúvape (Mar. 10:​17-22; Luc. 18:​18, 23). Jesúspe ningo yma ndojekuaaivaʼekue ojeheʼa haguére umi iplátavare, ojekuaa guei chupe oikógui umi imboriahu ha ojeapoʼíva amígoramo (Mat. 11:19).

4. Mbaʼépa ojapo Jesús amigokuéra?

⁴ Umi Jesús amigokuéra ningo iñimperfékto. Pór ehémplo, peteĩ árape Pedro ojapo peteĩ mbaʼe naiporãmbáiva (Mat. 16:​21-23). Santiago ha Juan katu oñemombaʼeguasuse ha ojerure Jesúspe omoĩ hag̃ua chupekuéra ijykére Irréinope. Upéva ombopochyeterei umi ambue apóstolpe. Pyʼỹinte ningo haʼekuéra ojodiskutimivaʼerã oikoségui pe iñimportantevévaramo. Upéicharõ jepe, Jesús ndojahéiri hesekuéra ha pyʼaporãme oñemoñeʼẽ jey jey chupekuéra (Mat. 20:​20-28).

5, 6. a) Mbaʼérepa Jesús ndohejái iñamigokuérape ojavy haguére? b) Mbaʼérepa Jesús ndoipotavéima Judas Iscariótepe iñamigorã?

⁵ Mbaʼérepa Jesús ndohejái iñamigokuérape ojavy haguére? Ndahaʼéi ningo ndohechakuaáigui ojavyha hikuái ni ohejareígui chupekuéra upe ojapovaʼekue. Jesús ningo ojesarekovénte umi mbaʼe porã  ojapóvare hikuái ha ohechakuaa mbaʼérepa ojapo. Pór ehémplo, pe pyhare Jesús omano mboyvemi, Pedro, Santiago ha Juan opyta oke ojepytasorangue ijykére. Ha Jesúspe ndogustáiramo jepe, ohechakuaa ndahaʼeiha ojaposéguinte ojapóva hikuái. Upévare heʼi chupekuéra: “Aikuaa pejaposeha iporãva, pende rete katu ikangy” (Mat. 26:41).

⁶ Péro Jesús ndoipotavéima Judas Iscariótepe iñamigorã. Mbaʼérepa upéva? Pórke Judas haʼetéramo jepe iñamígo, Jesús ohechakuaa hese ndaipyʼaporãveimaha. Judas ningo oguerohorývo ko múndo reko, oikóma chugui Ñandejára enemígo (Sant. 4:4). Upévare Jesús heʼi mboyve umi once ijapóstolpe iñamigoha, heʼi Júdaspe oho hag̃ua upégui (Juan 13:​21-35).

7, 8. Mbaʼéichapa Jesús ohechauka ohayhuha iñamigokuérape?

⁷ Jesús ningo ohejarei hembiapo vaikue umi iñamígo ipyʼaporãvape ha akóinte ojapo umi mbaʼe oipytyvõtava chupekuéra. Pór ehémplo, ojerure Itúvape oñangarekomi hag̃ua hesekuéra ojejopy vai jave (jaleemína Juan 17:11). Jesús ningo imbaʼerechakuaa avei iñamigokuérandi (Mar. 6:​30-32). Haʼe heʼi voi iñamigokuérape mbaʼépa opensa peteĩ mbaʼére ha ohendu avei chupekuéra. Péicha ojapo oikuaa hag̃ua mbaʼépa opensa ha mbaʼéichapa oñeñandu hikuái (Mat. 16:​13-16; 17:​24-26).

⁸ Jesús ningo heta mbaʼe ojapo iñamigokuéra rehehápe, hekove jepe omeʼẽ hesehapekuéra. Haʼe oikuaa porã tekotevẽha omano oñekumpli hag̃ua Jehová rembipota (Mat. 26:​27, 28; Heb. 9:​22, 28). Ha ojapo avei upéva ohayhúgui yvyporakuérape. Jesús ningo heʼi voi: “Ndaipóri niko mborayhu tuichavéva kóvagui: Ñameʼẽ ñande rekove ñane angirũ rehehápe” (Juan 15:​13, JMP).

Mbaʼépa ojapo Jesús remimboʼekuéra?

9, 10. Mbaʼépa la hénte ojapo Jesús imbaʼeporãiterei rupi hendivekuéra?

⁹ Jesús ningo imbaʼeporãiterei la héntendi, oiporu itiémpo ha opa mbaʼe orekóva oipytyvõ hag̃ua chupekuéra. Upévare hetaiterei oĩ oñemoag̃uiséva hese ha ojaposéva haʼe heʼíva (Luc. 8:​1-3). Upéicha rupi Jesús ikatu vaʼekue heʼi: ‘Pemeʼẽ ambuépe ha Ñandejára omeʼẽ jeýne peẽme. Ipojeráne penendive ha omeʼẽne peẽme pende vosa renyhẽ chovi. Peẽ pemeʼẽháicha pende rapichápe, Ñandejára omeʼẽ jeýne peẽme’ (Luc. 6:38).

¹⁰ Oĩ ningo avei umi ohóva Jesús rendápe jahechápa nokonsegíri chugui oimeraẽ mbaʼe. Peteĩ árape umíva nontendeporãi Jesús omboʼéva, ha ojeroviarangue hese, ohejapa chupe hikuái. Péro umi apóstol  akóinte omoirũ Jesúspe. Ha oĩramo jepe omomombyryséva chupekuéra Jesúsgui, ojepytaso hikuái ijykére iporã ha ivai jave la situasión (jaleemína Juan 6:​26, 56, 60, 66-68). Jesús ohechakuaa upéva, ha pe pyhare omano mboyve heʼi chupekuéra: “Peẽ niko ndacherejáikuri, ha pehasa asy heta avei chendive” (Luc. 22:​28, JMP).

11, 12. a) Mbaʼépa Jesús ojapo ijapostolkuéra ohejárõ guare chupe? b) Ha mbaʼépa ojapo umi apóstol?

¹¹ Jesús heʼi riremi ijapostolkuéra akóinte ojepytasoha ijykére, oheja chupe hikuái. Ha mbaʼérepa ojapo hikuái upéicha? Okyhyje rupi hapicha yvypóragui. Péro Jesús operdona jey ijapostolkuérape. Ha oñemoingove jey rire chupe, haʼe ojehechauka ha heʼi jey chupekuéra iñamigoiteha. Jesús omeʼẽ voi ijapostolkuérape peteĩ tembiapo iñimportantetereíva: heʼi chupekuéra oho hag̃ua opredika ‘opa tetãyguápe ha ojapo hag̃ua chuguikuéra hemimboʼe’ (Mat. 28:19; Hech. 1:8). Ha mbaʼépa ojapo umi apóstol?

¹² Haʼekuéra ningo oñemeʼẽmbaite omombeʼu hag̃ua umi mbaʼe porã Ñandejára Rréino ojapótava. Ha Jehová espíritu sánto oipytyvõ rupi chupekuéra, sapyʼaitérõ g̃uarã opredikáma hikuái Jerusalén tuichakue (Hech. 5:​27-29). Mbaʼeve voi ndojokói umi apóstolpe, ni ojeʼérõ chupekuéra ojejukataha. Upévare tiémpo rire, apóstol Pablo heʼi: ‘Pe marandu porã niko oñemombeʼúma opavavépe ko yvy ape ári’ (Col. 1:23). Jahechaháicha umi apóstol omombaʼetereivaʼekue oreko haguére Jesúspe iñamígoramo.

13. Mbaʼéichapa Jesús remimboʼekuéra oñehaʼã ojapo opa mbaʼe Jesús omboʼevaʼekue?

¹³ Upe rire heta tapichágui oiko avei Jesús remimboʼe ha oñehaʼã ojapo opa mbaʼe Jesús omboʼevaʼekue. Umíva apytépe ningo oĩ tuichaiterei okambiáva. Oĩ umi yma ikaʼuvaʼekue, imondáva, oporomoakãratĩva ha umi kuimbaʼe oikóva kuimbaʼéndi. Haʼekuéra ningo ohejapaite koʼã mbaʼe (1 Cor. 6:​9-11). Ha okambia avei umi ndochaʼeivaʼekue tetã ambueguáre (Hech. 10:​25-28). Enterovénte voi ojapo Jesús omboʼevaʼekue, okambia ha ‘oñemboheko pyahu’ hikuái (Efe. 4:​20-24). Haʼekuéra opensáma Jesucristo opensaháicha ha oñehaʼã osegi iñehémplo (1 Cor. 2:16).

Mbaʼépa jajapovaʼerã Jesús ñane amígo hag̃ua

14. Mbaʼépa Jesús oprometevaʼekue ojapotaha ‘ára pahápe’?

¹⁴ Hetaiterei umi kristiáno ypykue oikuaavaʼekue Jesúspe opredikárõ guare oikóvo ha oñemoingove jey rire. Péro koʼág̃a rupi ñande ndajarekói upe priviléhio. Upéicharõ, mbaʼéichapa ikatu oiko ñandehegui Jesús amígo? Ikatu hína jajapóramo pe ‘tembiguái jeroviaha ha iñarandúva’ heʼíva. ‘Pe tembiguái jeroviaha’ ningo Jesucristo ermáno oikóva gueteri ko yvy ape ári. Ha Jesús voi oprometevaʼekue ‘ára pahápe omoĩtaha pe tembiguái poguýpe opa mbaʼe oguerekóva’ (Mat. 24:​3, 45-47). Péro koʼág̃a rupi heta oĩ ndahaʼéiva ungído ha oñehaʼãva oiko Jesús amígoramo. Ha mbaʼérepa jajapovaʼerã pe ‘tembiguái jeroviaha’ heʼíva?

15. Mbaʼéichapa ojehecháta ñandépa ovecha térã kavara?

¹⁵ (Jaleemína Mateo 25:​31-40.) Jesús heʼi pe ‘tembiguái jeroviahápe’: ‘Che ermáno’. Jesús oñeʼẽrõ guare umi ojoguávare ovecha  ha kavarápe, ohechauka porã oimeraẽ mbaʼe jajapóva umi iñermáno rehehápe haʼeteha chupe jajapóva. Ha heʼi voi opa mbaʼe jajapóvare umi ‘iñermáno michĩvéva’ rehehápe, ojehechataha ñandépa ovecha térã kavara. Upéicharõ ñande ñahaʼarõva jaiko opa árare ko yvy ape ári ha jaipotáva Jesúspe ñane amigorã, katuete jajepytasovaʼerã pe ‘tembiguái jeroviaha’ ykére.

16, 17. Mbaʼéichapa ikatu jahechauka ñane amigoha Jesucristo ermanokuéra?

¹⁶ Ñande ñahaʼarõramo jaiko opa ára g̃uarã ko yvy ape ári, mbaʼéichapa ikatu jahechauka ñane amigoha Jesucristo ermanokuéra? Mbohapy hendáicha ikatu jahechauka upéva. Primero, ñañemeʼẽmbaitevaʼerã ñamombeʼu hag̃ua marandu porã. Ha Jesús heʼivaʼekue voi iñermanokuérape ojapo hag̃ua upéva oparupiete (Mat. 24:14). Jesús ermanokuéra saʼipaitéma ko yvy ape ári, upévare oikotevẽ ambue ovechakuérare omombeʼu hag̃ua pe marandu porã oparupiete. Ha umi ‘ambue ovecha’ osẽva guive opredika oipytyvõhína umi ungídope ojapo hag̃ua hembiapo. Upéva ningo omombaʼeterei pe ‘tembiguái jeroviaha’ ha Jesucristo.

¹⁷ Segundo, jahechaukáta ñane amigoha Jesucristo ermanokuéra ñameʼẽvo ñane kontrivusión oñemombeʼu hag̃ua pe marandu porã. Jesús heʼi voi hemimboʼekuérape: ‘Peiporu pe pirapire peñemoangirũ hag̃ua’ (Luc. 16:​9, JMP). Upéva ndeʼiseihína ikatuha jajogua plátare Jesúspe térã Jehovápe ñane amigorã. Jesús ningo heʼisénte jaiporuvaʼerãha opa mbaʼe jarekomíva ikatu hag̃uáicha ñaipytyvõ oñemombeʼu hag̃ua pe marandu porã. Upéicha jajapóramo jahechaukatañaína japorohayhuha tahaʼe ‘jaʼe ha jajapóva rupive’ (1 Juan 3:​16-18). Tuicha ningo ñaporopytyvõñaína ñamombeʼúvo pe marandu porã. Avei ñameʼẽvo ñane kontrivusión ojepredikave hag̃ua, oñemopuʼã ha oñemyatyrõ hag̃ua umi lugár ñañembyatyha. Michĩramo jepe ñane kontrivusión, Jehová ha Jesús oguerohoryetereíta ñameʼẽramo ñande pyʼaite guive (2 Cor. 9:7).

18. Mbaʼérepa jajapovaʼerã umi ansiáno heʼíva?

¹⁸ Tercero, jahechaukáta Jesucristo ñane amigoha kyreʼỹme jajapóramo umi ansiáno heʼíva. Chupekuéra ningo Ñandejára ijespíritu sánto rupive omoĩ ñanemoakã hag̃ua. Haʼekuéra ningo oĩ Jesucristo poguýpe (Efe. 5:23). Apóstol Pablo ohaivaʼekue: ‘Peneñeʼẽrendúkena penemoakãvape ha peñemoĩ ipoguypekuéra’ (Heb. 13:17). Sapyʼánte ningo ikatu ijetuʼu ñandéve jajapo hag̃ua umi ansiáno heʼíva, oiporúramo jepe la Biblia oñemoñeʼẽ hag̃ua. Upéva ikatu oiko jahechakuaa rupi ojavyha hikuái. Péro Jesucristo hína la  omoakãva kongregasión ha haʼe voi ojokuái umi ansiánope ha oguerohory hembiapokuéra. Upévare Jesús ñane amigoitéta, ñañemoĩramo umi ansiáno poguýpe ha ñaneñeʼẽrendu chupekuéra. Ha jahechaukáta avei jahayhuha Jesúspe jajapóramo kyreʼỹme upéicha ha ndajaikóiramo ñamañañaína mbaʼépepa ojavy hikuái.

Moõpa ikatu jajuhu ñane amigoiterã?

19, 20. a) Mbaʼépa jajuhu kongregasiónpe? b) Mbaʼépa ñambohováita pe artíkulo oúvape?

¹⁹ Jesús ningo omoĩ umi ansiáno ñanepytyvõ hag̃ua. Ha omeʼẽ avei ñandéve ñande sy, ñane ermáno ha ñane ermanarã kongregasiónpe (jaleemína Marcos 10:​29, 30). Mbaʼépa heʼirakaʼe ne hentekuéra restudia ñepyrũrõ guare la Biblia? Oiméne ovyʼarakaʼe hikuái. Péro Jesús heʼivaʼekue ‘oĩvaʼerãha ñande rogaygua voi opuʼãva ñanderehe’ (Mat. 10:​36, BNP). Upévare javyʼaiterei jajuhu haguére kongregasiónpe ñane amigorã jahayhuvéva ñane ermáno teégui jepe (Pro. 18:24).

²⁰ Apóstol Pablo omohuʼãvo heʼíva pe kongregasión Romayguápe ohechauka oreko hague upépe heta iñamígo (Rom. 16:​8-16). Ha apóstol Juan katu omohuʼãvo ikárta mbohapyha heʼi: “Emomaitei avei ñane angirũnguéra peteĩteĩme héra rupi” (3 Juan 15, JMP [14, NM]). Jahechaháicha apóstol Juan heta iñamígo vaʼekue avei. Mbaʼéichapa ikatu jasegi Jesús ha umi kristiáno ypykue ehémplo? Mbaʼéichapa ikatu jatopa ñane amigorã kongregasiónpe ha mbaʼépa jajapovaʼerã akóinte ñane amígo hag̃ua hikuái? Pe artíkulo oúvape ñambohováita koʼã porandu.

Ñambohovaimína koʼã porandu

• Mbaʼeichagua amígopa rakaʼe Jesús?

• Mbaʼépa ojapo Jesús remimboʼekuéra?

• Mbaʼéichapa ikatu oiko ñandehegui Jesús amígo?

[Porandu ñahesaʼỹijóva]

[Nóta oĩva taʼanga ndive páhina 14]

Jesús oikuaasevaʼekue mbaʼépa opensa ha mbaʼéichapa oñeñandu iñamigokuéra

[Nóta oĩva taʼanga ndive páhina 16]

Mbaʼépa jajapovaʼerã Jesús ñane amígo hag̃ua?