Pe aty jastudia hag̃ua ñande rogayguándi ñanepytyvõta jajesalva hag̃ua

EPENSÁMAVAPA mbaʼeichaitépa ojekyhyjepáta ‘Ñandejára ipuʼakapáva ñorairõ guasu árape’? (Rev. 16:​14, BNP.) Pe proféta Miqueas katu heʼi voi upe ‘ñorairõ guasúre’: ‘Umi sérro hykupáta, ha umi ñu hykúta tatápe araitýicha, umi y osyryháicha yvy ikarapeha gotyo’ (Miq. 1:4). Mbaʼépa oikóta umi ndoservírivare Jehovápe? Oñehundíta hikuái. La Biblia heʼi voi: ‘Umi Ñandejára ojukátava upe árape, opytáta ojepyso peteĩ yvy apýra guive ambue apýra peve’ (Jer. 25:33).

Heta mbaʼéma ningo ojeʼe ñandéve. Upéicha rupi umi tuvakuéra omongakuaáva haʼeño ifamíliape oñeporanduvaʼerã: “Ohasánepa che familiakuéra pe Jehová ñorairõ guasu oikopotaitémava?”. La Bíbliape heʼi ikatuha ohasa, péro upearã ijerovia mbarete vaʼerã hikuái (Mat. 24:21).

Mbaʼérepa iñimportánte ñañemotiémpo ñamombaʼeguasu hag̃ua Jehovápe ñande rogayguándi?

Tuvakuéra peñehaʼãkena pende raʼykuéra ‘pemongakuaa ha pehekomboʼe Ñandejára oipotaháicha’ (Efe. 6:4). Akóinte iporã ñanemanduʼa ñahesaʼỹijovaʼerãha la Biblia ñane família ndive. Jaipota ningo ñane mitãnguéra ojogua umi kristiáno Filiposguápe. Chupekuéra ningo apóstol Pablo ofelisitavaʼekue kyreʼỹme iñeʼẽrendu haguére Jehovápe. Heʼi chupekuéra: ‘Che pehẽnguekuéra pohayhúva, peneñeʼẽrendu haguéicha chéve opa ára, ndahaʼéi aiméramo guare pende apytépente, koʼýtekena peneñeʼẽrendu koʼág̃a cheporeʼỹme. Ha peñehaʼã pehupyty kyhyjepópe pene salvasión’ (Fili. 2:12).

Iñeʼẽrendúpa ne familiakuéra Jehovápe nde nereiméi jave? Ojeporta porãpa hikuái eskuélape? Mbaʼéichapa ikatu rentendeka chupekuéra iporãveha ojapo Jehová heʼíva, oĩramo jepe haʼeñohápe?

Pe aty jastudia hag̃ua ñande rogayguándi tuicha oipytyvõta ne familiakuérape omombarete hag̃ua ijerovia. Jahechamína mbohapy mbaʼe ñanepytyvõtava jajapo porã hag̃ua upéva.

Ani pembohasa rei

La Biblia omombeʼu Jehová voi omoĩ hague mbaʼe árapepa oñembyatýta jepi hiʼanhelkuéra ndive (Job 1:6). Nde avei ikatu rejapo upéicha. Emoĩ mbaʼe día ha mbaʼe órapa reñembyatýta restudia hag̃ua nde rogayguándi ha ani rembohasa rei upéva. Ha peichahágui oikóramo peteĩ mbaʼe pehaʼarõʼỹva, rehechamavaʼerã ótro día pestudia hag̃ua.

Eñatendéke ani ág̃a tiémpo rire napendeatyvéima ne família ndive pestudia hag̃ua káda semána. Aníkena nderesarái ne familiakuérare reñangarekovaʼerãha ha remboʼevaʼerãha chupekuéra la Biblia. Satanás ningo oñehaʼãmbaitehína omoñuhã hag̃ua chupekuéra (1 Ped. 5:8). Mombyry ningo Satanás oganáta peñemoĩramo pehecha téle térã pejapo ambue mbaʼe pene família ndive, pende atyrangue pestudia hag̃ua (Efe. 5:​15, 16; 6:12; Fili. 1:10).

Jahechákena mbaʼépa ideprovechovéta ñane famíliape

Ñande atýramo jastudia hag̃ua ñande rogayguándi ndahaʼeivaʼerã jalee hag̃uánte, jahechavaʼerã katu mbaʼépa ideprovechovéta ñane  famíliape. Mbaʼépa ikatu rejapo upearã? Sapyʼánte ikatu peñeʼẽ umi mbaʼe ombohováitavare ne família upe semána rupi. Ikatu avei peñensaja pepredika hag̃ua. Ha rehechakuaavaʼerã avei ne mitãnguéra ojaposeveha umi mbaʼe osẽ porãva chupekuéra. Upévare ne família ojeroviavéta ijehe peñensajáramo pepredika hag̃ua, pejapo hag̃ua rrevisíta, estúdio ha avei mbaʼéichapa pembohovaivaʼerã umi nohenduséivape pe marandu porã (2 Tim. 2:15).

Ikatu avei rehecha mbaʼe díapa peñensajáta ne família ndive ombohovái hag̃ua umi hapicha ojapoukasévape chupe mbaʼe vai. Pe lívro Lo que los jóvenes preguntan. Respuestas prácticas (volumen 2) kapítulo 15-pe heʼíva tuicha ikatu nepytyvõ. Pór ehémplo, pe párte heʼihápe “Estrategia contra la presión de grupo” (páhina 132 ha 133). Upépe oñemokyreʼỹ pe mitãrusúpe opensa hag̃ua mbaʼépa ojapóne ojejopy vai jave chupe. Pe páhina 133 opakuévoma heʼi: “Ensaya la escena con un familiar o con un adulto en quien confíes”. Upéicharõ, jahecha iporãtaha avei ñañensaja jepi péicha ñande aty jave ñande rogayguándi.

Pe Aty Jastudia hag̃ua ñande Rogayguándi ojejapo jave, tuvakuéra ikatu omokyreʼỹ ifamíliape ohecha hag̃ua mbaʼépa ojapovéta Jehová servísiope. Pe lívro Lo que los jóvenes preguntan (vol. 2) kapítulo 38-pe oñeʼẽhína upévare, heʼihápe “¿Qué haré con mi vida?”. Pehesaʼỹijóvo upéva eipytyvõ ne famíliape ohechakuaa hag̃ua iporãveha oservi Jehovápe. Emokyreʼỹ avei chupekuéra ojapo hag̃ua iprekursorádo, oservi hag̃ua Betélpe, oho hag̃ua Escuela de Entrenamiento Ministerial-pe térã ojapove hag̃ua ambue mbaʼe Jehovápe g̃uarã.

Oĩ ningo tuvakuéra ojopyetereíva ifamíliandi ohupyty hag̃ua umi mbaʼe ha hesarái oguerohoryvaʼerãha ifamíliape ojapóvare koʼág̃a. Iporã ningo añete ñamokyreʼỹ ñane famíliape oservi hag̃ua Betélpe, oiko hag̃ua chugui misionéro térã ojapove hag̃ua ambue mbaʼe. Péro jajopyetereíramo hendivekuéra ohupyty hag̃ua umi mbaʼe, ikatu hína ojedesahusia ha ikuerái hikuái (Col. 3:21). Rehechakuaákena umi mbaʼe porã ne família ojapóva ha eguerohory chupe. Ani rejesareko umi mbaʼe ndojapóivarente. Aníkena nderesarái haʼekuéra oservivaʼerãha Jehovápe ohayhúgui chupe, ndahaʼéi ndéve nembojerovia hag̃ua (Mat. 22:37). Eipytyvõ ne famíliape omombaʼe hag̃ua Jehová ojapovaʼekue ha ohayhúgui chupe tojapo hembipota.

Jajapókena pe estúdio ogusta hag̃uáicha ñande rogayguápe

Pe aty jajapóva jastudia hag̃ua ñande rogayguándi ningo tuicha ñanepytyvõta jajapóramo enterovépe ogusta hag̃uáicha. Ha mbaʼéichapa ikatu rejapo upearã? Pór ehémplo, ikatu rehendu peteĩ dráma ne família ndive térã pehecha peteĩ vídeo testigos de Jehová ojapovaʼekue ha peñemongeta hese upéi. Ikatu avei pelee la Biblia oñondivepa ha ere káda únope mávatapa guaʼu haʼe térã mbaʼe pártepa oleéta.

Umi rrevísta Ñemañaha ha ¡Despertad! ningo oreko jepi informasión iporãva ñahesaʼỹijo hag̃ua ñane família ndive. Pór ehémplo, ¡Despertad! Páhina 31-pe jatopa heʼiha “¿Qué respondería usted?”. Oĩ avei pe Ñemañaha  osẽva opavavépe g̃uarã. Upévape osẽ jepi avei umi “Imitãvape g̃uarã”, ko párte ningo omokyreʼỹ chupekuéra ohesaʼỹijove hag̃ua. Osẽ jepi avei “Tuvakuéra omboʼe hag̃ua ifamíliape”, ko párte ojejapo oñepytyvõ hag̃ua mitãnguérape.

Ha oiméramo ne família mitãrusu térã mitãkuñáva katuete nepytyvõta pe ¡Despertad! heʼihápe “Los jóvenes preguntan” ha pe lívro Lo que los jóvenes preguntan (vol. 2). Rehesaʼỹijóvo ko lívro ne família ndive aníke nderesarái pe rrekuádro heʼívagui “Y tú, ¿qué piensas?”. Upéva oĩhína káda kapítulo opakuévo ha oñemoĩ ikatu hag̃uáicha reñemongeta ne família ndive.

Reñatendevaʼerã avei ani rembaʼeporandueterei ne famíliape pestudia jave. Ani avei rejerure chupe olee hag̃ua ndéve haʼe oskrivivaʼekue ni umi párte heʼihápe “Tus reflexiones”. Ha pe páhina 3-pe oĩ voi peteĩ párte heʼihápe tuvakuérape: “Peipotáramo pene família ohai ilívrope umi mbaʼe opensáva, peprometevaʼerã chupekuéra ndapeleemoʼãiha. Pejapóramo upéicha haʼekuéra voi ikatu omombeʼu peẽme umi mbaʼe ohaivaʼekue”.

Jehová ningo katuete nevendesíta akóinte restudia haguére ne familia ndive ha reñehaʼã haguére rejapo enterovépe ogusta hag̃uáicha. Ñande aty jave ñande rogayguándi ñamombaʼeguasu hag̃ua Jehovápe ñanepytyvõta enterovépe akóinte ñande jerovia imbarete hag̃ua.

[Rrekuádro oĩva páhina 31-pe]

Rehechakuaavaʼerã mbaʼéichapa oaprende porãvéta ne família

Peteĩ ermána Estados Unidosgua (J. M.) heʼi: “Che ménandi rostudia jave che membykuñaʼikuéra ndive rojerure chupekuéra odivuha hag̃ua umi mbaʼe oaprendevaʼekue rreunionhápe. Sapyʼánte rohaʼanga Ñandejára siervokuéra yma guare ojapovaʼekue térã roñensaja ropredika hag̃ua. Ropensávo michĩ gueteriha hikuái roñehaʼã rojapo omokyreʼỹ, ombovyʼa ha ogusta hag̃uáicha chupekuéra”.

Y. T., Japongua heʼi: “Peteĩ ore estudiánte memby kuimbaʼeʼípe ningo rontendekase mbaʼeichaguápa pe Ñandejára Ñeʼẽ ojeporuvaʼekue yma. Upémaramo roimprimi pe lívro de Isaías oĩva la Bíbliape, roipeʼapaite chugui umi número ohechaukáva kapítulo ha versíkulo. Upéi rombojoapypaite umi kuatia ojuehe ha káda ijapýrape romoĩ peteĩ túvo, ha roñemoĩ rolia umívare pe kuatia. Romeʼẽ pe mitãʼípe ha rojerure chupe ojapo hag̃ua Jesús ojapo haguéicha oĩrõ guare témplope Nazarétpe. Lucas 4:​16-21 peve ningo omombeʼu oñemeʼẽ hague Jesúspe ‘proféta Isaías kuatiañeʼẽ ha oavrívo ojuhúma hague pe ohekáva’ (Isa. 61:​1, 2). Ha pe mitãʼi oñehaʼã avei oheka upe téysto ha ndojuhúi. Ipukueterei voi ningo upe kuatiañeʼẽ. Upépe ohechakuaa mbaʼeichaitépa Jesús oiporukuaavaʼekue Ñandejára Ñeʼẽ yma guare. Oponderaiterei voi ha heʼi: ‘Nde ivaletéiko la Jesús rakaʼe’.”

[Nóta oĩva taʼanga ndive páhina 30]

Peñensajavaʼerã pene família ndive ombohovái hag̃ua umi hapicha ojapokasévape chupe mbaʼe vai

[Nóta oĩva taʼanga ndive páhina 31]

Reñehaʼãkena restudia nde rogayguándi enterovépe ogusta hag̃uáicha