‘Tapenekyreʼỹkena espíritu sánto rupive’

‘Aníke peneateʼỹ, tapenekyreʼỹ espíritu sánto rupive. Ha pembaʼapo Ñandejárape g̃uarã.’ (ROM. 12:11.)

1. Maʼerãpa umi isrraelíta osakrifikarakaʼe mymba ha oikuaveʼẽ ambue mbaʼe Jehovápe?

 JEHOVÁ omombaʼeterei umi sakrifísio ojapóva isiervokuéra ohayhúgui chupe ha ojapose rupi hembipota. Yma ningo pe léi mosáikape heʼíma voi umi isrraelítape osakrifika hag̃ua mymba ha oikuaveʼẽ hag̃ua ambue mbaʼe Jehovápe. Upéicha oagradese hikuái Jehovápe ha ojerure operdonamínte hag̃ua chupekuéra hembiapo vaikuére. Jaikuaa ningo koʼág̃a rupi Jehová ndojerureveimaha ñandéve jajapo hag̃ua upeichagua sakrifísio. Péro apóstol Pablo ohechauka Romanos kapítulo 12-pe mbaʼeichagua sakrifísiopa oñehaʼarõ jajapo. Jahechamína mbaʼe mbaʼépa hína umíva.

Peteĩ kuaveʼẽmby oikovéva

2. Mbaʼépa heʼi Pablo jajapovaʼerãha ha mbaʼépa tekotevẽ upearã?

² (Jaleemína Romanos 12:​1, 2.) Apóstol Pablo ohai ñepyrũvo umi kristiáno Romayguápe ohechauka porãma ojeroviavaʼerãha hikuái ikatu hag̃uáicha Ñandejára oreko chupekuéra hekojojávaramo. Ha upéva ndahaʼemoʼãi ojapo haguére iporãva ni hudío haguére (Rom. 1:16; 3:​20-24). Upéi kapítulo 12-pe, Pablo heʼi ñande kristianokuéra jajesakrifikavaʼerãha jahechauka hag̃ua jaagradeseha Jehovápe. Péro ñameʼẽ mboyve upe sakrifísio ‘ñambopyahuvaʼerã jarekóva ñane akãme’. Mbaʼérepa? Ñaneimperfékto rupi ñaiméma ‘pe pekádo ha ñemáno poguýpe’ (Rom. 8:​2, BNP). Upévare, ñande ‘ñambopyahupaitevaʼerã ñandepyʼapy ha ñane akãme jarekóva’. Upéva heʼise ñakambiavaʼerãha ñapensa lája ha ambue mbaʼe jajaposéva jepi (Efe. 4:23). Upearã tekotevẽ Ñandejára ñanepytyvõ ha omeʼẽ ñandéve ijespíritu sánto. Tekotevẽta avei ñandete ñañehaʼã ha jaiporu pe katupyry oñemeʼẽvaʼekue ñandéve jahechakuaa hag̃ua iporã térãpa ivai peteĩ mbaʼe. Ñañehaʼãmbaitevaʼerã voínte ningo ani hag̃ua ko múndo ipuʼaka ñanderehe. Ha ani hag̃ua haʼekuéraicha avei ñanderekovai, ñandegusta umi vyʼarã naiporãiva ha jaiko ñaneakãre (Efe. 2:​1-3).

3. Mbaʼérepa jajapo heta mbaʼe kristianoháicha?

³ Apóstol Pablo ñanemokyreʼỹ avei jaiporu hag̃ua pe katupyry oñemeʼẽvaʼekue ñandéve. Ha péicha ñandejeheguiete ‘jaikuaa hag̃ua mbaʼépa hína Ñandejára rembipota’. Ñande ningo kristianoháicha káda día jalee la Biblia ha jajepyʼamongeta hese. Avei ñañemboʼe, jaha rreunionhápe ha jaha ñamombeʼu ñande rapichakuérape pe marandu porã. Ha umi ansiáno ningo ñanemokyreʼỹ voi jajapo hag̃ua koʼã mbaʼe. Upévare jaagradese chupekuéra. Péro mbaʼéretepa ñande jajapo upéicha? Ndahaʼéi umi ansiáno heʼíguinte ñandéve, pe espíritu sánto ningo la ñanemomýiva jajapo hag̃ua péicha ha jahechauka jahayhuha Jehovápe. Ñandete voi jahechakuaa avei Jehová oipotaha péicha jajapo (Zac. 4:6; Efe. 5:10). Javyʼaiterei avei jaikuaávo Jehová oguerohoryha jajapóva jaservi porã hag̃ua chupe’.

Jajapokuaa heta mbaʼe porã

4, 5. Maʼerãpa umi ansiáno oiporuvaʼerã pe katupyry oñemeʼẽvaʼekue chupekuéra?

⁴ (Jaleemína Romanos 12:​6-8, 11.) Apóstol Pablo heʼi haguéicha ‘Ñandejára omeʼẽségui  omeʼẽvaʼekue ñandéve ñandekatupyry hag̃ua peteĩ mbaʼépe, ha koʼã meʼẽmby ojoavy ojuehegui’. Pór ehémplo Ñandejára ombokatupyry umi ansiánope oñemoñeʼẽ ha oporomoakã hag̃ua. Chupekuéra ningo ojeʼe voi kyreʼỹme oporomoakãvaʼerãha.

⁵ Apóstol Pablo heʼi avei umi ansiáno ikyreʼỹvaʼerãha oporohekomboʼévo ha ombaʼapóvo kongregasiónpe. Ha haʼe ningo ombojoja voi pe kongregasión ‘ñande retére’ (Rom. 12:​4, 5). Umi apóstol heʼivaʼekue avei Hechos 6:​4-pe: ‘Ore katu toroñemboʼe ha toromboʼe meme Ñandejára Ñeʼẽ’. Mbaʼépa upéicharõ ojapovaʼerã ansianokuéra? Haʼekuéra omombaretevaʼerã umi kongregasiónpe oĩva jerovia. Ha upéva ojapohína hikuái oiporúvo Ñandejára Ñeʼẽ oporopytyvõ ha oporomboʼe hag̃ua. Upearã haʼekuéra oñemboʼe, ohesaʼỹijo ha oipyguaravaʼerã Ñandejára Ñeʼẽ. Umi ansiáno ningo oñehaʼãmbaitevaʼerã oiporu pe katupyry oñemeʼẽvaʼekue chupekuéra oñangareko hag̃ua vyʼápe Jehová siervokuérare (Rom. 12:​7,8; 1 Ped. 5:​1-3).

6. Mbaʼéichapa ikatu jajapo Romanos 12:11 heʼíva?

⁶ Apóstol Pablo osegi heʼi Romanos 12:​11-pe: ‘Aníke peneateʼỹ, tapenekyreʼỹ espíritu sánto rupive. Ha pembaʼapo Ñandejárape g̃uarã’. Ñande ningo ikatu hína jahechakuaa nañanekyreʼỹveimaha yma guaréicha predikasiónpe. Upéicharõ iporãta jahecháramo mbaʼéichapa jastudia jepi ha ñane ñeʼã mbytete guive jajerure pyʼỹive Jehovápe ijespíritu sánto. Péicha ndajajoguamoʼãi pe y hakuvy vaívape ha ñanderetiaʼe jeýta jaservívo Jehovápe (Luc. 11:​9, 13; Rev. 2:4; 3:​14, 15, 19). Yma ningo pe espíritu sánto omombarete umi kristiáno ypykuépe oñeʼẽ hag̃ua ‘umi mbaʼeguasu Ñandejára ojapovaʼekuére’ (Hech. 2:​4, 11). Upéicha avei koʼág̃a rupi ikatu hína ‘espíritu sánto rupive’ ñanekyreʼỹve predikasiónpe.

Ñaneumíldekena

7. Mbaʼérepa ñaneumildevaʼerã?

⁷ (Jaleemína Romanos 12:​3, 16.) Ñandekatupyrýramo peteĩ mbaʼépe, upéva Jehová imbaʼeporãguinte omeʼẽ ñandéve. Apóstol Pablo ningo heʼivaʼekue umi Corintoyguápe: ‘Ndahaʼéi niko ñandejehegui jajapokuaáva opa mbaʼe, opa ikatúva jajapo niko Ñandejára rupínte’ (2 Cor. 3:​5, BNP). Upévare animoʼãkena jajejapose jahupyty haguére heta mbaʼe. Jahechakuaavaʼerã oimeraẽ mbaʼe jahupytýva jaservívo Jehovápe jahupytyha Haʼe ñanevendesíguinte ha ndahaʼéi ñandekatupyry rupi (1 Cor. 3:​6, 7). Apóstol Pablo heʼivaʼekue voi: ‘Opavavépe haʼe ani hag̃ua oñemombaʼeguasu hekopeʼỹ’. Ndaivaíri ningo añete ñañemombaʼe ha javyʼa jaservívo Ñandejárape. Péro ndovaléi jahasa la rrája, ñaneumildevaʼerã. Jahechakuaavaʼerã ningo oĩha heta mbaʼe ndajajapokuaáiva. Upéicharõmante ndoikomoʼãi ñandehegui peteĩ oñemoaranduguaʼúva  ha oñembopyʼahatãva. Upéva rangue ñañehaʼãmbaitevaʼerã ñaneakãguapy.

8. Mbaʼépa ikatu jajapo ani hag̃ua ñande voi ñapensa ñandejehe ñanearanduha?

⁸ Noĩporãmoʼãiete ningo ñañemombaʼeguasúramo jahupyty haguére heta mbaʼe Jehová servísiope. Ñande jaikuaa porã Ñandejaraha “pe ñemitỹ omongakuaáva” (1 Cor. 3:7). Apóstol Pablo heʼi voi ‘Jehová omeʼẽ hague peteĩteĩme ijerovia’. Upéicharõ ñañemombaʼeguasurangue ñande rapichakuérape, jahechakuaavaʼerã haʼekuéra ohupytyha avei heta mbaʼe ijerovia rupive. Upéi Pablo heʼive: ‘Peiko peteĩ ñeʼẽme oñondive’. Ha ambue ikuatiañeʼẽme katu heʼi ñandéve: “Anítei pejapo mbaʼeve peñembotuichase térã peñorairõségui, peteĩteĩ toñemomirĩ uvei, ha peguereko ambuekuérape mbaʼeguasuvérõ pendehegui” (Fili. 2:​3, ÑÑB). Añetehápe ningo ñaneumílde ha ñañehaʼãmbaitevaʼerã jahechakuaa hag̃ua káda ermáno ikatupyryveha ñandehegui peteĩ mbaʼépe jepe. Ha ñaneumílderamo añoite nañapensamoʼãi ñandejehe ñanearanduha. Ikatu voi avei oñemombaʼevehína umi orekóvape tuicha rresponsavilida kongregasiónpe. Péro opavave javyʼavaʼerã jajapóramo umi mbaʼe avave ndojehechamoʼãiva jepe (1 Ped. 5:5).

Jaiko peteĩ ñeʼẽme kongregasiónpe

9. Mbaʼépa heʼi Pablo umi ungído rehe?

⁹ (Jaleemína Romanos 12:​4, 5, 9, 10). Apóstol Pablo ningo heʼi Jesucristo omoakãha umi ungídope, ha haʼekuéra Jesucristo reteha (Col. 1:18). Ha pe ñane akã omombaʼapo porãháicha ñande rete, upéicha avei opavave umi ungído ombaʼapo porã Jesucristo poguýpe, pe omoakãva chupekuéra. Ha apóstol Pablo ningo heʼivaʼekue avei umi Efesoyguápe: ‘Jaiko mborayhúpe jakakuaapa hag̃ua hekopete Cristo ndive. Haʼe hína pe akã. Ha pe hete niko oĩmba porã ha ojuajupa ojuehe ha káda párte heseguáva ojapóramo hembiapo, okakuaa porãta ohóvo mborayhúpe’ (Efe. 4:​15, 16, BNP).

10. Mbaʼépa ohechakuaavaʼerã umi ohaʼarõva oiko opa ára g̃uarã ko yvy ape ári?

¹⁰ Umi ‘ambue ovechakuéra’ ningo ikatu oaprende heta mbaʼe Jesucristo omoakã haguére umi ungídope (Juan 10:16). Apóstol Pablo heʼi voi Jehová ‘omoĩ hague opaite mbaʼe Cristo poguýpe, ha omoĩ voi chupe kongregasión akãramo’ (Efe. 1:22). Ha umi mbaʼe Ñandejára omoĩvaʼekue Itaʼýra poguýpe ningo oĩ avei umi “ambue ovechakuéra”. Chupekuéra ningo Jesucristo ohejavaʼekue avei pe “tembiguái jeroviaha ha iñarandúva” poguýpe (Mat. 24:​45-47). Upéicharõ umi ohaʼarõva oiko opa ára g̃uarã ko yvy ape ári, ohechakuaavaʼerã Jesús omoakãha opa mbaʼe. Iñeʼẽrenduvaʼerã avei pe tembiguái jeroviaha ha iñarandúvape, pe Cuerpo Gobernántepe ha umi ermáno omoakãvape kongregasión (Heb. 13:​7, 17). Opa koʼã mbaʼe ningo ñanepytyvõ jaiko hag̃ua peteĩ ñeʼẽme kongregasiónpe.

11. a) Mbaʼérepa jaiko peteĩ ñeʼẽme? b) Mbaʼépa heʼi avei apóstol Pablo?

¹¹ Jaiko ningo peteĩ ñeʼẽme jajoayhu rupi, ha ‘pe mborayhúko oporomboaju porã hína’ (Col. 3:​14, JMP). Romanos kapítulo 12-pe apóstol Pablo heʼi porã voi ndovaleiha ñanerovamokõi. Heʼi porã avei jajoayhuvaʼerãha oñoermánoicha. Upéicha jajapóramo jajorrespetáta katuete. Upévare Pablo heʼi: ‘Pejoayhuvaʼerã oñoermánoicha, peñomotenonde ha peñombojerovia’. Péro ani ñaimoʼã ñaporombyasyguaʼu jave japorohayhumaha. Ñañehaʼãmbaitevaʼerã katu akóinte ipotĩ hag̃ua kongregasión. Upévare Pablo heʼivaʼekue avei: ‘Pejeguarúkena mbaʼe ivaívagui, ha pejapo mbaʼe porã’.

Ñanembaʼeporãkena

12. Mbaʼépa ñanemboʼe umi kristiáno Macedoniaygua?

¹² (Jaleemína Romanos 12:13.) Jahayhúgui ñane ermanokuérape ikatumiháicha ‘ñaipytyvõta chupekuéra hemikotevẽme’. Ha ñanemboriahúramo jepe, iporãta jaiporu pe jarekomíva ñaporopytyvõ hag̃ua. Apóstol Pablo heʼivaʼekue umi kristiáno  Macedoniayguáre: ‘Haʼekuéra ohasa asýramo jepe ha imboriahúramo jepe ohechauka ipojeraha ha oporoporiahuverekoha. Haʼekuéra omeʼẽ ipuʼakaháicha ha oĩ avei ijapytepekuéra omeʼẽvéva upe ikatúvagui, che voi ahechavaʼekue upéva. Ha ojerure asy hikuái oipytyvõ hag̃ua ambue Jesucristo reheguávape, umi Judeayguápe’ (2 Cor. 8:​2-4, ÑÑB). Umi kristiáno Macedoniaygua ningo ipojeraiterei imboriahúramo jepe. Chupekuéra g̃uarã tuichaiterei mbaʼe voi oipytyvõ iñermanokuéra Judeaygua oikotevẽvape.

13. Mbaʼéichapa ikatu jahechauka Pablo heʼivaʼekue ‘perohorýkena ha penembaʼeporã umi pende rógape og̃uahẽva ndive’?

¹³ Apóstol Pablo heʼi voi: ‘Perohorýkena ha penembaʼeporã umi pende rógape og̃uahẽva ndive’. Péva heʼi hag̃ua griégope oiporu umi ñeʼẽ ohechaukáva ñandejehegui jajapovaʼerã upéva. Jesucristo Marandu Porã otradusi ko téysto kóicha: “Torypápekena pemog̃uahẽ pende rógape umi pende rapicha”. Jajapo hag̃ua ko konsého heʼíva ikatu ñainvita ñande rapichápe okaru hag̃ua ñanendive. Upéicha jahechaukatamañaína japorohayhuha. Ha ñañatende porãramo katu jahechakuaáta ikatuha heta mbaʼe jajapo ñanembaʼeporã hag̃ua. Pór ehémplo ndajarekói térã ndaikatumoʼãirõ ñainvita ñande rapichápe okaru hag̃ua, ikatúnte avei ñainvita chupe jaʼu hag̃ua oimeraẽ sonserami. Upéicha jajapóramo ñanembaʼeporãitereínte avei.

14. a) Mbaʼe mokõi ñeʼẽpa ojeporu griégope ojeʼe hag̃ua ‘perohorýkena ha penembaʼeporã umi pende rógape og̃uahẽva ndive’? b) Mbaʼépa ikatu jajapo ñanembaʼeporã hag̃ua umi tetã ambuegua ndive?

¹⁴ Ñanderehe ningo odepende ñanembaʼeporã hag̃ua. Ha pe griégope ojeporu mokõi ñeʼẽ ojeʼe hag̃ua ‘perohorýkena ha penembaʼeporã umi pende rógape og̃uahẽva ndive’. Ha umi ñeʼẽ heʼise “mborayhu” ha umi “ndajaikuaáiva”. Mbaʼépa ikatu jajapo ñanembaʼeporã hag̃ua umi ndajaikuaáiva ndive térã umi tetã ambueguándi? Oĩ ningo umi ermáno oñehaʼãva oaprende ótro idióma opredika hag̃ua umi tetã ambuegua oikóvape hóga ypýrupi. Péicha haʼekuéra imbaʼeporãhína hapichakuéra ndive. Péro heta ningo ñaime ndaikatumoʼãiva jajapo upéva. Upévare ñaipytyvõ hag̃ua umi tetã ambueguápe ikatu jaiporu pe folléto Notísia porã opavave tapichakuérape g̃uarã. Ko folléto ningo oreko pe marandu  porã heta idiómape. Reiporúmavapa ko folléto predikasiónpe?

Ñañemoĩkéna ñande rapicha lugárpe

15. Mbaʼéichapa Jesús oñemoĩ hemimboʼekuéra lugárpe?

¹⁵ (Jaleemína Romanos 12:15.) Apóstol Pablo heʼíva ko téystope ningo heʼise ñañemoĩvaʼerãha ñande rapicha lugárpe. Ñañehaʼãvaʼerã ñanembaʼerechakuaa ha ñaime ñande rapichakuéra ndive ovyʼa térã oñembyasy jave. Ha ñanekyreʼỹramo espíritu sánto rupive, ñande rapichakuéra ohechakuaáta javyʼaha hendivekuéra umi mbaʼe porã ohasávare ha ñambyasyha chupekuéra ohasa asy haguére. Jesús ningo upéicha vaʼekue. Haʼe ovyʼa umi 70 hemimboʼe ndive ou jeýrõ guare hikuái opredika haguégui. Haʼekuéra omombeʼúrõ guare chupe umi mbaʼe porã ohasavaʼekue, ‘haʼe ovyʼaiterei espíritu sánto rupive’ (Luc. 10:​17-21). Ha omanórõ guare iñamígo Lázaro katu, hasẽ umi hasẽva ndive (Juan 11:​32-35).

16. Mbaʼéichapa ikatu ñañemoĩ ñane ermanokuéra lugárpe, ha mávapa koʼýte ojapovaʼerã upéicha?

¹⁶ Jasegivaʼerã Jesús ehémplo. Javyʼavaʼerã ñane ermanokuéra ndive ovyʼa jave hikuái, péro ñambyasyvaʼerã chupekuéra ohasa asy jave. Ñaipytyvõ hag̃ua peteĩ ermáno oñeñandu vaietereívape ikatu ñahendu porãnte chupe ha ñañemoĩ ilugárpe. Sapyʼánte ikatu voi osyry ñanderesay opokoitereígui ñanderehe ñane ermanomi ohasáva (1 Ped. 1:22). Ha koʼýte umi ansiáno oñehaʼãvaʼerã ojapo apóstol Pablo heʼivaʼekue ha oñemoĩ ermanokuéra lugárpe.

17. Mbaʼépa ñanemboʼe Romanos kapítulo 12, ha mbaʼépa ñahesaʼỹijóta pe artíkulo oúvape?

¹⁷ Koʼã mbaʼe ñahesaʼỹijóva Romanos kapítulo 12-pe ñanemboʼe heta mbaʼe ñanepytyvõtava ñande rekovépe ha avei jaiko porã hag̃ua ñane ermanokuéra ndive. Pe artíkulo oúvape ñahesaʼỹijopáta Romanos kapítulo 12. Ñanemboʼéta mbaʼéichapa jahecha ha jatratavaʼerã ñande rapichakuéra noĩrivape kongregasiónpe ha umi oñemoĩ térã opuʼãvape ñanderehe.

Ñañemomanduʼamína koʼã mbaʼére

• Mbaʼéichapa ikatu jahechauka ñanekyreʼỹha espíritu sánto rupive?

• Mbaʼérepa ñaneumildevaʼerã jaservívo Ñandejárape?

• Mbaʼéichapa ikatu ñañemoĩ ñane ermanokuéra lugárpe?

[Porandu ñahesaʼỹijóva]

[Nóta oĩva taʼanga ndive páhina 4]

Mbaʼépa ikatu jajapo ñanekyreʼỹve hag̃ua?

[Nóta oĩva taʼanga ndive páhina 6]

Mbaʼéichapa ikatu ñamog̃uahẽ pe marandu porã umi tetã ambueguápe?