Ñahesaʼỹijóramo la Biblia ñañemboʼe porãvéta Jehovápe
Ñahesaʼỹijóramo la Biblia ñañemboʼe porãvéta Jehovápe
‘Ñandejára ehendumína che ñemboʼe.’ (NEH. 1:11.)
1, 2. Mbaʼérepa iporã ñahesaʼỹijo umi ñemboʼe oĩva la Bíbliape?
KATUETE ningo ñañemboʼevaʼerã ha ñahesaʼỹijo la Biblia, upéicharõmante ñamombaʼeguasúta Jehovápe (1 Tes. 5:17; 2 Tim. 3:16, 17). Jaikuaa ningo la Biblia ndahaʼeiha peteĩ ñemboʼe ryru, péro umi Sálmope jajuhu heta ñemboʼe.
2 Jalee térã ñahesaʼỹijo jave la Biblia, ikatu hína jatopa umi ñemboʼe ojapovaʼekue umi ohasavaʼekue pe situasión ñande jahasavañaína. Jaiporúramo umi mbaʼe heʼivaʼekue hikuái, ñanepytyvõta ñañemboʼe porãve hag̃ua. Upévare jaikuaase mbaʼépa ñanemboʼe umi ñemboʼe ojapovaʼekue Ñandejára siervokuéra yma guare.
Jajerure Jehovápe tañanesãmbyhy
3, 4. Maʼerãpa ojokuái Abrahán hembiguáipe, ha mbaʼépa ñanemboʼe Jehová ombohovái haguére chupe iñemboʼe?
3 Ñahesaʼỹijóramo la Biblia jahechakuaáta iñimportanteha jajerure Ñandejárape ñanesãmbyhy hag̃ua. Ñañemomanduʼamína koʼág̃a Abrahán rembiguái itujavévare, upéva ningo Eliezer mbaʼéneraʼe. Chupe ningo Abrahán ojokuái oho hag̃ua Mesopotámiape oheka Isaácpe hembirekorã peteĩ oservíva Jehovápe. Ohechávo peteĩ kuñataĩme oguenohẽ y pósogui, oñemboʼe Jehovápe kóicha: ‘Pe kuñataĩ che haʼévape: “Emboguejy ne kambuchi tayʼumi”, ha heʼíva chéve: “Heyʼu katu, ha amboyʼúta avei ne kamellokuéra”, taʼupévakena upe reiporavóva ne rembiguái Isaácpe g̃uarã. Upéicha oikóramo aikuaáta rehayhuha che jára Abrahánpe’ (Gén. 24:12-14).
4 Abrahán rembiguáipe ningo Jehová ombohovái iñemboʼe Rebeca omboyʼúrõ guare chupe ikamellokuéra. Upe riremínte Rebeca ohóma hendive Canaánpe ha omenda hese Isaac. Péro, jaikuaa ningo koʼág̃a rupi ndaikatumoʼãiha ñahaʼarõ Jehová omeʼẽ ñandéve peteĩ señál peichagua. Upéicharõ jepe, Haʼe ohechaukáta ñandéve ñande raperã ñañemboʼe ha jahejáramo chupe ñanesãmbyhy ijespíritu sánto rupive (Gál. 5:18).
Ñañemboʼéramo ningo ñandepyʼaguapýta
5, 6. Mbaʼépa ohechauka ñandéve Jacob ñemboʼe?
5 Ñañemboʼéramo ikatu ñandepyʼaguapy. Jacob ningo okyhyjevaʼekue iñermáno gemélo Esaú ipochýrõ g̃uarã, upévare oñemboʼe péicha: ‘Jehová, che ningo namereséi ahupyty umi mbaʼe porãita remeʼẽva chéve ha ndepyʼaporã chendive. Aníkena reheja haʼa che rykeʼy Esaú pópe. Akyhyje ningo chugui, anítei ou ha ojukapa koʼã kuñakarai ha imembykuérape. Ha Nde voi niko erevaʼekue: “Osẽ porãta ndéve opa mbaʼe ha ameʼẽta ndéve ne ñemoñare ikatuʼỹva ojepapa hetaitereígui yvykuʼi y guasu rembeʼypeguáicha”’ (Gén. 32:9-12, ÑÑB).
6 Jacob oñehaʼãvaʼekue oĩ porã jey iñermáno ndive, péro Jehová ombohovái rupi chupe iñemboʼénte oiko porã jey hikuái (Gén. 33:1-4). Ñahesaʼỹijo porãramo upe oikovaʼekue, jahechakuaáta Jacob ndahaʼéi hague oñemboʼénteva Jehová oipytyvõ hag̃ua chupe. Ohechauka avei ojeroviaha pe Ñemoñare oñeprometevaʼekuére ha oagradeseha Jehovápe imbaʼeporã haguére hendive. Ha ñandépa jakyhyje ha jajepyʼapy avei peteĩ mbaʼére? (2 Cor. 7:5.) Oiméramo upéicha, pe ñemboʼe Jacob ojapovaʼekue katuete ñanemokyreʼỹta. Jahechakuaáta ñañemboʼéramo ñandepyʼaguapytaha. Jacob ñemboʼe ohechauka avei ñandéve ñañemboʼe jave ojekuaavaʼerãha ñanderehe jajeroviaha Jehováre ha ndahaʼéi jajerurénteva chupe ñaneremikotevẽ.
Jajerurékena Jehovápe tañanemoarandu
7. Mbaʼérepa Moisés ojerure Jehovápe ohechaukami hag̃ua chupe haperã?
7 Ñaime porãséramo Jehovándi jajerurevaʼerã chupe tañanemoarandu. Pór ehémplo Moisés ojerurevaʼekue Jehovápe ohechaukami hag̃ua chupe haperã. Haʼe heʼi voi: ‘Nde niko ere chéve aisãmbyhy hag̃ua ko tetãme. Ha oiméramo che ne irũ, ehechaukána chéve nde rape ikatu hag̃uáicha aiko añetehápe ne irũramo’ (Éxo. 33:12, 13). Moisés ningo oikuaa porãse vaʼekue Ñandejára rape ikatu hag̃uáicha oisãmbyhy Israélpe, ha Jehová ohendu chupe.
8. Mbaʼéichapa ñanepytyvõta jajepyʼamongetáramo 1 Reyes 3:7-14-pe heʼívare?
8 David ojerurevaʼekue avei Jehovápe: ‘Ñandejára ehechaukamína chéve nde rape’ (Sal. 25:4). Salomón katu ojerure Jehovápe omoarandu hag̃ua chupe ikatu hag̃uáicha ogoverna porã. Ha Jehová oguerohory Salomón ñemboʼe, upévare omeʼẽ chupe upe ojeruréva ha hiʼarive omeʼẽ Salomónpe hetaitereive mbaʼe (jaleemína 1 Reyes 3:7-14). Ñande avei oiméramo hetaiterei ñane rembiapo kongregasiónpe, jajerurevaʼerã Jehovápe ñanemoarandu ha ñaneumílde hag̃ua. Ha haʼe katuete ñanepytyvõta ñanearandu ha ñandekatupyry hag̃ua, ha péicha jajapo porãta ñane rembiapo.
Ñañemboʼevaʼerã ñande pyʼaite guive
9, 10. Mbaʼe mbaʼépa heʼivaʼekue Salomón ñande pyʼapýre oñeinaugurárõ guare pe témplo?
9 Ñañemboʼevaʼerã ñande pyʼaite guive jaipotáramo Jehová ohendu ñane ñemboʼe. Primero de los Reyes kapítulo 8 omombeʼu mbaʼéichapa Salomón oñemboʼe ipyʼaite guive oñeinaugurárõ guare Jerusalenpegua témplo. Upéva oikovaʼekue áño 1026-pe Jesucristo ou mboyve. Salomón ningo omombaʼeguasu Ñandejárape peteĩ hénte aty renondépe, oñemoĩ rire pe arca del pacto pe Santísimope. Upérõ avei Jehová arai ojagarrapa pe témplo.
10 Ñahesaʼỹijóvo Salomón ñemboʼe, jahecháta heta hendápe oñeʼẽ hague ñande pyʼapýre. Haʼe heʼivaʼekue voi Jehová añoite ohechakuaaha ñande pyʼapýpe oĩva (1 Rey. 8:38, 39). Heʼivaʼekuére avei jahechakuaa umi hembiapo vaíva ‘ojevýramo Jehová rendápe ipyʼaite guive’, Haʼe operdonataha chupekuéra. Ha umi Israelgua hoʼa mbaʼéramo iñenemígo poguýpe, ikatu ojerovia hikuái Jehová ohendutaha chupekuéra oñemboʼe jave. Upearã ningo haʼekuéra ojeroviavaʼerã hese ipyʼaite guive (1 Rey. 8:48, 58, 61). Péicha jahecha tekotevẽha ñañemboʼe Jehovápe ñande pyʼaite guive.
Mbaʼéichapa umi Salmo ñanepytyvõta ñañemboʼe porãve hag̃ua?
11, 12. Mbaʼépa ñanemboʼe peteĩ levíta ndaikatuivaʼekue oho Jehová témplope?
11 Umi Salmo ningo ikatu ñanepytyvõ ñañemboʼe porãve hag̃ua ha ñahaʼarõkuaa hag̃ua Jehová ombohovái peve ñandéve. Ñanemanduʼamíntena peteĩ levíta ohasavaʼekuére ojeguerahárõ guare tetã ambuépe. Haʼe ningo ohose asy Jehová témplope, péro ndaikatúi. Upévare opurahéi péicha: ‘Mbaʼérepa nde che anga nekangy ha ne angekói chepype? Ejerovia Ñandejára rehe ha ehaʼarõ, amombaʼeguasu jeýta chupe. Haʼe ningo chepytyvõhára ha che Jára tee’ (Sal. 42:5, 11; 43:5, ÑÑB).
12 Mbaʼépa ñanemboʼe ko levíta? Ñanemboʼe ñahaʼarõkuaa ha jajeroviavaʼerãha Jehováre, peichahágui jajegueraháramo kárselpe jaservi haguére Jehovápe ha ndaikatuvéi ñañembyaty ñane ermanokuéra ndive (Sal. 37:5). Ñahaʼarõ aja Ñandejára osolusiona upe provléma, jajepyʼamongetavaʼerã umi mbaʼe porã jahasavaʼekuére jaservívo chupe. Jajerurevaʼerã avei Jehovápe tañanemombarete jasegi hag̃ua jagueropuʼaka upéva.
Ñañemboʼe jave ojekuaavaʼerã jajeroviaha Jehováre
13. Mbaʼérepa jajeroviavaʼerã Jehováre ha ñañemboʼe chupe heʼiháicha Santiago 1:5-8?
13 Tahaʼe haʼéva la ñane situasión, jajeroviavaʼerã Ñandejárare ha ñañemboʼe chupe. Oĩramo omokangyséva ñande jerovia, jajapovaʼerã pe disípulo Santiago heʼivaʼekue: ñañemboʼe Jehovápe ha jajerovia haʼe katuete ñanemoarandutaha ñambohovái hag̃ua umi mbaʼe ñandejopýva (jaleemína Santiago 1:5-8). Ñandejára ningo oikuaahína mbaʼépa ñanemyangekói ha ikatu ñanesãmbyhy ha ñanembopyʼaguapy ijespíritu sánto rupive. Jajeroviákena Jehováre ha ani jakyhyje ñamombeʼupaite hag̃ua chupe umi mbaʼe ñande pyʼapýpe jarekóva. Jahejákena avei ijespíritu sánto rupive tañanesãmbyhy ha ñahendu heʼíva ñandéve la Bíbliape.
14, 15. Mbaʼéichapa jaikuaa Ana ojerovia hague Jehováre ha oñemboʼe chupe?
14 Peteĩ levíta hérava Elqaná mokõi hembireko, peteĩva héra Ana ha ótra katu Peniná. Ana ningo ojerovia Jehováre ha oñemboʼe chupe. Haʼéngo ndaikatuivaʼekue imemby, péro Peniná imembyreta. Upévare pyʼỹinte haʼe oapoʼi Ánape. Peteĩ árape Ana oĩ jave pe tabernáculope opromete Jehovápe imembýramo omeʼẽtaha chupe upe rire. Haʼe ningo hembe sysyipa oñemboʼe jave, upévare pe saserdóte guasu Elí heʼi hese okaʼuha. Péro upéi Elí ohechakuaa ndaupeichaiha, ha heʼi Ánape: “Israel Jára tomeʼẽ ndéve pe rejerurevaʼekue”. Ana ndoikuaáiramo jepe mbaʼépa oikóta upe rire, ojerovia Jehová ohendutaha iñemboʼe. Upéicha rupi haʼe ipyʼaguapy ha “opa chugui vyʼaʼỹ” (1 Sam. 1:9-18).
15 Upe rire Ana imemby ha ombohéra Samuel. Omomboʼórõ guare katu ogueraha chupe tabernáculope omeʼẽ hag̃ua Jehovápe (1 Sam. 1:19-28). Jajepyʼamongétaramo ko kuñakarai ñemboʼére, ñanepytyvõta ñañemboʼe porãve hag̃ua. Jahechakuaáta avei ikatuha ñandepyʼaguapy ñane provléma hetáramo jepe ha upearã ñañemboʼevaʼerãha Jehovápe ha jajerovia hese ñanerendutaha (1 Sam. 2:1-10).
16, 17. Mbaʼéichapa Jehová ombohovái Nehemíaspe iñemboʼe ojerovia rupi hese?
16 Peteĩ Ñandejára rembiguái hérava Nehemías ningo oikovaʼekue síglo quíntope Jesucristo ou mboyve. Haʼe ningo ojeroviavaʼekue avei Jehováre ha oñemboʼe chupe. Nehemías ojerure voi Jehovápe: ‘Ñandejára ehendumína che ñemboʼe, ha umi ne rembiguái nemombaʼeguasuséva ñemboʼe. Ajerure avei ndéve chepytyvõmi hag̃ua ikatu hag̃uáicha imbaʼeporã chendive mburuvichaguasu Artajerjes’. Nehemías ningo ombaʼapovaʼekue de kopéro rréi Artajérjespe (Neh. 1:11).
17 Nehemíaspe oñemombeʼu umi hudío osẽvaʼekue Babilóniagui ‘vaípe ojechaha ha ndoikuaaiha mbaʼépa ojapóta hikuái, ha pe murálla Jerusalén jereregua katu ojeitypaha’. Upévare Nehemías are guivéma oñemboʼe oikóvo Jehovápe ipyʼaite guive (Neh. 1:3, 4). Ha haʼe ni noimoʼãi mbaʼeichaitépa Jehová ombohovái chupe iñemboʼe. Pe rréi Artajerjes heʼi voi Nehemíaspe ikatuha oho Jerusalénpe omopuʼã jey hag̃ua pe murrálla (Neh. 2:1-8). Ha sapyʼaitérõ g̃uarã omopuʼãmbáma hikuái. Jehová ningo ohendu Nehemías ñemboʼe, pórke haʼe ojerovia hese ha oñemboʼe oipotágui oñemombaʼeguasu Jehovápe. Ñandépa upéicha avei?
Ñamombaʼeguasúkena Jehovápe ha jaagradese chupe
18, 19. Mbaʼérepa ñamombaʼeguasuvaʼerã Jehovápe ha jaagradese chupe?
18 Ñañemboʼe jave ñamombaʼeguasuvaʼerã Jehovápe ha jaagradese chupe. Hetaiterei mbaʼére ningo ikatu jajapo upéva, pór ehémplo rréi David omombaʼeguasusevaʼekue Jehovápe ojepyʼamongeta rire umi hembiapokue porãitáre (jaleemína Salmo 145:10-13). Ha mbaʼetekópa hína ñande? Ojekuaápa ñane ñemboʼére tuicha mbaʼeha ñandéve g̃uarã ñamombeʼu pe marandu porã? Umi mbaʼe ojeʼéva umi Sálmope ningo ñanepytyvõta avei jaagradese hag̃ua Ñandejárape umi ñane rreunión ha aty guasu rehe (Sal. 27:4; 122:1).
19 Ñande ningo jaagradese Jehovápe ikatu haguére ñañemoag̃ui hese. Upévare ñañemboʼe chupe ñande pyʼaite guive, ha pe salmísta ojapo haguéicha ñamombeʼu chupe mbaʼépa ñañandu. Upe salmísta ningo heʼi voi: ‘Opaite tetã rupi romombaʼeguasu Ñandejára, ha rogueropurahéita maymáva apytépe. Nde poriahuvereko yvágape og̃uahẽ, ha ne mborayhu ijojahaʼỹva araíre ojepyso. Ñandejára, amo yvágare tereñemombaʼeguasu ha opavave ko yvy ape ári tohechakuaa ndetuichakue’ (Sal. 57:9-11). Mbaʼeichaitépa ko salmísta oñemboʼe Jehovápe ipyʼaite guive! Péicha jahecha koʼã mbaʼe ojehaivaʼekue Sálmope ikatuha ñanepytyvõ ñañemboʼe porãve hag̃ua Jehovápe.
Ñamombaʼékena Jehovápe ñañemboʼévo
20. Mbaʼéichapa María ohechauka omombaʼeha Jehovápe?
20 Ñande ningo akóinte ñamombaʼevaʼerã Jehovápe ñañemboʼévo. Yma ningo Maríape ojeʼe imembytaha ha upéva haʼetaha pe Mesías. Ha oikuaa riremi upéva heʼi: ‘Che ánga omombaʼeguasu Ñandejárape, ha che pyʼaite guive aguerohory Ñandejára che Salvadórpe’ (Luc. 1:46, 47, BNP). Koʼã mbaʼe María heʼivaʼekue ningo ohechauka haʼe omombaʼeha Jehovápe, ha ojoguaiterei voi Ana heʼivaʼekuépe oguerahárõ guare Samuélpe tabernáculope. Ndareíriko Jehová oiporavorakaʼe Maríape Jesús syrã! Ha ñandépa ñañemboʼe jave ñamombaʼe avei Jehovápe péicha?
21. Mbaʼéichapa Jesús ohechauka ojeroviaha Jehováre ha omombaʼeha chupe oñemboʼe jave?
21 Jesús avei ojeroviavaʼekue Jehováre ha omombaʼe chupe oñemboʼe jave. Pór ehémplo, omoingove jey mboyve Lázarope, ‘Jesús ojesaupi yvága rehe ha heʼi: “Che Ru, aagradese ndéve cherendu haguére. Che niko aikuaa tapiaite cherenduha”’ (Juan 11:41, 42, BNP). Ha ñandépa jajerovia avei péicha Jehováre ha ñamombaʼe chupe ñañemboʼe jave? Ñahesaʼỹijóramo pe padrenuéstro, jahechakuaáta Jesúspe g̃uarã iñimportanteveha oñemopotĩ ha oñemombaʼeguasu Jehová réra, ou pe Irréino ha ojejapo hembipota (Mat. 6:9, 10). Koʼág̃a ñapensami mbaʼéichapa ñande ñañemboʼe jepi. Ojekuaápa ñane ñemboʼére iñimportanteveha ñandéve g̃uarã Ñandejára Rréino, hembipota ha jaipotaha oñemopotĩ héra?
22. Mbaʼérepa jajerovia Jehová ñanembopyʼaguasutaha ñamombeʼu hag̃ua pe marandu porã?
22 Jehová siervokuéra ohasa asy ha ojepersegi jave, ojerure Jehovápe ombopyʼaguasu hag̃ua chupekuéra. Yma ningo síglo primérope, pe Sanedrín heʼi Pedro ha Juánpe ‘anivéma hag̃ua mbaʼevéicharamo oñeʼẽ térã oporomboʼe Jesús rérape’, péro haʼekuéra naiñeʼẽrendúi umívape (Hech. 4:18-20). Upéi ojepoi rire chuguikuéra, oho omombeʼu hikuái ambue kristianokuérape upe oikovaʼekue. Upémaramo, enterove ojerure Ñandejárape pyʼaguasu omombeʼu hag̃ua pe marandu porã. Upe ñemboʼe ningo Ñandejára upepete voi ombohovái chupekuéra, pórke ‘opavave henyhẽ espíritu sántogui ha omombeʼu kyhyjeʼỹre Ñandejára heʼíva’. Oiménepa ovyʼaitéraʼe hikuái! (Jaleemína Hechos 4:24-31.) Upéicha rupi, hetaiterei oĩ oñepyrũva ojerovia Jesucristo rehe. Ha ñande avei ñañemboʼéramo ñandepyʼaguasúta ñamombeʼu hag̃ua pe marandu porã.
Akóintekena ñañemboʼe porãve
23, 24. a) Máva máva ehémplopa ohechauka jalee ha ñahesaʼỹijóramo la Biblia ñañemboʼe porãveha? b) Mbaʼépa nde repensa rajapóvo reñemboʼe porãve hag̃ua?
23 Oĩ ningo heta ehémplo ohechaukáva jalee ha ñahesaʼỹijóramo la Biblia ñañemboʼe porãveha. Jonás ojapo haguéicha, ñande avei jahechakuaavaʼerã ‘Jehová añoite ikatuha ñandesalva’ (Jon. 2:1-10). Oiméramo jajapóraʼe peteĩ mbaʼe ivaietereíva, jajerurevaʼerã ansianokuéra ñanepytyvõ hag̃ua. Ha jajapo rire upéva tuichaiterei ñanepytyvõta David ñemboʼe jaʼe hag̃ua Ñandejárape ñambyasyetereiha ñane rembiapo vai hague (Sal. 51:1-12). Ikatu avei ñamombaʼeguasu Jehovápe ojapo haguéicha Jeremías (Jer. 32:16-19). Ha oiméramo nde reheka reikóvo ne ména térã ne rembirekorã, iporãta rejepyʼamongeta pe ñemboʼe oĩvare Esdras kapítulo 9-pe ha ere Ñandejárape mbaʼéichapa reñeñandu. Upéva nepytyvõta rejepytaso mbarete ha neñeʼẽrendu hag̃ua Jehovápe ha remenda hag̃ua ‘peteĩ hese ojeroviávarente’ (1 Cor. 7:39; Esd. 9:6, 10-15).
24 Upévare, akóintekena relee ha rehesaʼỹijo la Biblia. Ehechákena mbaʼépa ikatu ereve ne ñemboʼépe, tahaʼe rejerure asy hag̃ua Jehovápe, remombaʼeguasu ha reagradese hag̃ua chupe. Ha reñehaʼãramo avei reñemboʼe porãve, koʼẽ koʼẽre reñemoag̃uivéta Jehováre.
Mbaʼépa rembohováita?
• Mbaʼérepa jajerure ha jahejavaʼerã Ñandejárape tañanesãmbyhy?
• Maʼerãpa jajerurevaʼerã Jehovápe ñanemoarandu hag̃ua?
• Mbaʼéichapa umi Salmo ñanepytyvõta ñañemboʼe porãve hag̃ua?
• Mbaʼérepa jajeroviavaʼerã Jehováre ha ñamombaʼe chupe ñañemboʼe jave?
[Porandu ñahesaʼỹijóva]
[Nóta oĩva taʼanga ndive páhina 8]
Abrahán rembiguái ojerurevaʼekue Jehovápe oipytyvõmi hag̃ua chupe. Ha ndépa rejapo avei upéicha?
[Nóta oĩva taʼanga ndive páhina 10]
Pe aty jastudia hag̃ua ñande rogayguándi ñanepytyvõta ñañemboʼe porãve hag̃ua