Ñamombaʼékena opa mbaʼe jajapóva Jehová kongregasiónpe

‘Ñandejára omoĩ peteĩteĩme pe ñande rete rehegua hendag̃uáme, ha haʼe oipota haguéicha.’ (1 COR. 12:​18, BNP.)

1, 2. a) Mbaʼérepa ikatu jaʼe iñimportanteha enterove kristiáno rembiapo kongregasiónpe? b) Mbaʼépa ñambohováita ko artíkulope?

 YMAITE guive ningo Jehová ojevale ikongregasiónre oisãmbyhy ha ohekomboʼe hag̃ua isiervokuérape. Pór ehémplo Israel ojagarra rire táva Hai, Josué ‘oleepaite opa mbaʼe heʼíva Ñandejára léi, umi vendisión ha maldisión ojehupytýtava upe léipe heʼiháicha. Ha opavave ohendu upéva’ (Jos. 8:​34, 35).

² Síglo primérope katu apóstol Pablo heʼivaʼekue superintendénte Timotéope pe kongregasión haʼeha ‘Ñandejára róga’ ha “pe añetegua ojokóva ha omopyendáva” (1 Tim. 3:15). Koʼág̃a ‘Ñandejára róga’ haʼehína Jehová organisasión, kristiáno oparupigua oservihápe  chupe. Pe 1 Corintios kapítulo 12-pe Pablo ombojoja pe kongregasiónpe ñande retére. Ñandejára espíritu rupive haʼe heʼi ñande py, ñande po ha ñande resa idiferénteramo jepe enterovére ñaikotevẽha. Upéi heʼive: ‘Ñandejára omoĩ peteĩteĩme pe ñande rete rehegua hendag̃uáme, ha haʼe oipota haguéicha’. Ha ‘umi ñande rete rehegua ñamombaʼeʼỹvéva, ñamonde porãve’ (1 Cor. 12:​18, 23, BNP). Upéicha avei káda kristiáno oreko hembiapo ‘Ñandejára rógape’ ha idiferénteramo jepe ojuehegui ndahaʼéi peteĩ iñimportantevéva ambuégui. Mbaʼéichapa ikatu jaikuaa mbaʼépa jajapovaʼerã kongregasiónpe ha mbaʼéichapa jahechaukáta ñamombaʼeha? Mbaʼérepa odepende jajapo hag̃ua peteĩ tembiapo kongregasiónpe? Ha mbaʼéichapa jahechaukáta ‘jajeroviaveha jahávo’? (1 Tim. 4:15.)

Mbaʼéichapa ikatu jahechauka ñamombaʼeha ñane rembiapo kongregasiónpe?

3. Mbaʼéichapa ikatu jaikuaa mbaʼépa jajapovaʼerã kongregasiónpe ha mbaʼéichapa jahechaukáta ñamombaʼeha?

³ Mbaʼéichapa ikatu jaikuaa mbaʼépa jajapovaʼerã kongregasiónpe ha mbaʼéichapa jahechaukáta ñamombaʼeha? Upearã ñaneñeʼẽrenduvaʼerã ha kyreʼỹme ñamoirũ hembiapópe ‘pe tembiguái jeroviaha ha iñarandúvape’ ha pe Cuerpo Gobernante orrepresentávape chupe (jaleemína Mateo 24:​45-47). Upéicharõ jajepyʼamongetamivaʼerã jahecha hag̃ua jahejapañaína Jehová ñanesãmbyhy pe tembiguái jeroviaha rupive. Pór ehémplo, are guivéma pe tembiguái jeroviaha oñemoñeʼẽ ñandéve mbaʼéichapa ñañemondevaʼerã, jaiporavokuaavaʼerãha ñande vyʼarã ha ñañatendevaʼerãha jaiporúvo Internet umíva. Koʼã mbaʼépe ningo haʼekuéra oñemoñeʼẽ ñandéve ndoipotáigui ñasẽ Ñandejára rapégui. Upévare ñañehaʼãmbaitevaʼerã ñaneñeʼẽrendu. Pe tembiguái jeroviaha ningo heʼi avei ñandéve ñamoĩ hag̃ua peteĩ óra ñañembyaty hag̃ua jastudia ñande rogayguándi. Jajapopañaína upéva? Katuetépa ñañembyaty jepi peteĩ pyhare jastudia hag̃ua? Ha oiméramo ñande soltéro térã soltéra, jaiporúpa avei upe tiémpo jastudia hag̃ua la Biblia? Jehová ningo tuicha ñanevendesíta ñandéve ha ñande rogayguápe jajapóramo pe tembiguái jeroviaha heʼíva.

4. Mbaʼépa ñamombaʼevevaʼerã jadesidíta jave mbaʼéichapa ñanemondéta térã jajedivertíta?

⁴ Oĩ ningo heʼíva ñande ñañemondeseháicha ñañemondevaʼerãha ha jajedivertiseháicha jajedivertivaʼerãha. Péro ñande ñamombaʼéva ñane rembiapo kongregasiónpe jaikuaa ndajajapoivaʼerãha upéicha. Ñande ningo jajapose Jehová heʼíva ñandéve Iñeʼẽ rupive. Ñandejára ñeʼẽ ningo ‘ñandereraha tape porãre ha ohesape ñandéve ñande raperã’ (Sal. 119:105). Ñapensavaʼerã avei mbaʼépa heʼíta ñanderehe umi hénte predikasiónpe, umi ñande rapichakuéra ñanderecháva ha ermanokuéra avei (jaleemína 2 Corintios 6:​3, 4).

5. Mbaʼérepa ñañangarekovaʼerã ani hag̃ua jaiko ñande jaikoseháichante?

⁵ Yvytúicha jahahápe ojagarrapa ‘pe espíritu aña orekóva ipoguýpe umi Ñandejárape ohenduseʼỹvape’ (Efe. 2:2). Pe espíritu aña ningo ikatu ogueroviauka ñandéve nañaikotevẽiha Jehová organisasión ñanesãmbyhy. Péro ñande ningo ndajajoguasemoʼãi asy Diótrefespe, haʼe ‘ndoapoivaʼekue mbaʼevéramo’ apóstol Juánpe (3 Juan 9, 10). Upéicharõ ñañangarekovaʼerã ani hag̃ua jaiko ñande jaikoseháichante. Arakaʼevékena ani ñañeʼẽvai térã ñañemoĩ Jehová oiporúvare ñanesãmbyhy hag̃ua koʼág̃a rupi (Núm. 16:​1-3). Javyʼavaʼerã katu ñamoirũ haguére pe tembiguái jeroviahápe. Ha ñañehaʼã  ñaneñeʼẽrendu ha jajapo heʼíva ñandéve umi ansiáno ñane kongregasionpegua (jaleemína Hebreos 13:​7, 17).

6. Mbaʼérepa jajepyʼamongetavaʼerã mbaʼe situasiónpepa ñaime?

⁶ Mbaʼépa ikatu jajapove jahechauka hag̃ua ñamombaʼeha ñane rembiapo kongregasiónpe? Jajepyʼamongetavaʼerã mbaʼe situasiónpepa ñaime ha jahecha ‘ñamombaʼepañaína ñane rembiapo’ ha ñamombaʼeguasu Jehovápe (Rom. 11:13). Oĩ ningo ikatúva oservi de prekursór, misionéro, superintendénte viahánte, betelíta térã ombaʼapo Construcción de Salónpe. Oĩ avei heta ermáno oñehaʼãmbaitéva ohekomboʼe ifamíliape Ñandejára oipotaháicha ha osẽ opredika káda semána (jaleemína Colosenses 3:​23, 24). Akóinte ningo ñaiméta Jehová rembiguaikuéra apytépe jaservíramo Chupe ñande pyʼaite guive.

Mbaʼérepa odepende jajapo hag̃ua peteĩ tembiapo kongregasiónpe?

7. Mbaʼérepa odepende jajapo hag̃ua heta mbaʼe kongregasiónpe?

⁷ Iporã ningo jajepyʼamongetami mbaʼe situasiónpepa ñaime. Upévare tuicha odependehína umi mbaʼe ikatúva jajapo kongregasiónpe. Pór ehémplo, peteĩ ermáno rembiapo idiferénte peteĩ ermána rembiapógui. Jaikuaa avei hetave mbaʼe ikatuha jajapo Jehová servísiope ñanemitã ha ñaneresãiramo. Proverbios 20:​29-pe heʼi voi: ‘Imitãva ningo iporã imbarete rupi ha umi itujáva katu iñakã morotĩ rupi’. Ha upeichaite ningo, kongregasiónpe umi imitãva ikatu ojapo hetave mbaʼe ikyreʼỹ ha imbarete rupi. Ha umi ijedámavape katu oñemombaʼeterei iñarandu ha ohasáma rupi heta mbaʼe. Péro akóinte ñanemanduʼavaʼerã avei Jehová imbaʼeporãiterei rupínte jahupytyha opa mbaʼe iñorganisasiónpe (Hech. 14:26; Rom. 12:​6-8).

8. Mbaʼérepa odepende avei ambue mbaʼe ikatúva jajapo kongregasiónpe?

⁸ Péro odepende avei ambue mbaʼére pe ikatúva jajapo kongregasiónpe. Pór ehémplo, mokõi kristiána oñoermánava peteĩcha la isituasión hikuái. Isy ha itúva omokyreʼỹ chupekuéra omohuʼãvo ijestúdio ojapo hag̃ua precursorado regular. Péro omohuʼãvo hikuái ijestúdio orekópe 18 áño, peteĩ ojapo la iprekursorádo ha iñermána katu okonsegi itravahorã ombaʼapo hag̃ua un diaite. Mbaʼéicha rupípa oiko upéva? Káda uno ojapo rupi ojaposévante. Ha ñande ningo upéichante avei. Upévare jajepyʼamongetavaʼerã mbaʼépa jajapose Jehová servísiope. Ikatútapa ñañehaʼã ñambaʼapove Jehovápe g̃uarã tekotevẽramo jepe ñakambia heta mbaʼépe? (2 Cor. 9:7.)

9, 10. Mbaʼe piko ikatu jajapo ñandekaiguéramo ñambaʼapove hag̃ua Jehovápe g̃uarã?

⁹ Péro mbaʼe piko ikatu jajapo ñandekaiguéramo ñambaʼapove hag̃ua Jehovápe g̃uarã? Pablo ohaivaʼekue péicha umi Filiposguápe: ‘Ñandejára voi niko pendeporiahuverekógui penepytyvõ peipota hag̃ua pe iporãva ha penepytyvõva pejapo hag̃ua’. Upéicharõ Jehová ikatu ñanepytyvõ ha ñanemokyreʼỹ ñambaʼaposeve hag̃ua chupe g̃uarã (Fili. 2:13; 4:13).

¹⁰ Upévare jajerurékena Ñandejárape  ñanepytyvõ hag̃ua. Yma ningo pe rréi David ojapovaʼekue voi upéva: ‘Jehová ehechauka chéve nde rape ha chesãmbyhy. Chemboʼe umi mbaʼe añeteguáva. Ndéko che Jára ha upe cherenohẽva jejopy vaígui, nderehe ajerovia opa árape’ (Sal. 25:​4, 5). Ñande avei ikatu jajerure Jehovápe tañanemokyreʼỹ jajapose hag̃ua hembipota. Ha javyʼaiterei ningo jajepyʼamongetáramo mbaʼeichaitépa Jehová ha Itaʼýra omombaʼe jajapóva iservísiope (Mat. 26:​6-10; Luc. 21:​1-4). Upévare jajerure Jehovápe tañanepytyvõ ikatu hag̃uáicha koʼẽ koʼẽre ñañemoag̃uiseve hese. Ñañehaʼãkena avei jasegi Isaías ehémplo. Peteĩ árape ningo Jehová oporanduvaʼekue: ‘Mávapepa amondóta, ha mávapepa jajokuáita?’. Upépe Isaías heʼi: “Ape aime chejokuái chéve” (Isa. 6:8).

Mbaʼéichapa ikatu jajeroviave jahávo?

11. a) Mbaʼérepa oñekotevẽterei ermanokuéra oñangarekovaʼerã kongregasiónre? b) Mbaʼépa ojapovaʼerã umi ermáno oiko hag̃ua chugui ansiáno?

¹¹ Pe áño de servísio 2008-pe ojevautisákuri 289.678 tapicha. Upéva ohechauka oñekotevẽtereiha ermanokuéra oñangarekovaʼerã kongregasiónre. Upéicharõ oñehaʼarõ umi ermáno oñehaʼãmbaite ojapo la Biblia heʼíva oiko hag̃ua chugui siérvo ministeriál térã ansiáno (1 Tim. 3:​1-10, 12, 13; Tito 1:​5-9). Upearã osẽ meme vaʼerã predikasiónpe ha ojapo porã hembiapo kongregasiónpe, oñehaʼã okomenta porã rreunionhápe ha ojepyʼapy ermanokuérare. Péicha ojapóramo ohechaukáta omombaʼeha hembiapo kongregasiónpe.

12. Mbaʼépa ojapovaʼerã umi mitãrusu oipytyvõve hag̃ua kongregasiónpe?

¹² Mbaʼépa ojapovaʼerã umi mitãrusu oipytyvõve hag̃ua kongregasiónpe? Oñehaʼãvaʼerã oikuaave Ñandejára Ñeʼẽ heʼíva ikatu hag̃uáicha iñaranduve ha oikuaa porã Jehovápe (Col. 1:9). Upearã ohesaʼỹijo porã vaʼerã Ñandejára Ñeʼẽ, oho meme rreunionhápe ha okomenta. Oñehaʼãvaʼerã avei ojapo tekotevẽva ojapo hag̃ua iprekursorádo, oservi hag̃ua de misionéro, superintendénte térã Betélpe (1 Cor. 16:9). Omotenondéramo hikuái Jehová servísio ovyʼáta ha ohupytýta heta mbaʼe porã (jaleemína Eclesiastés 12:1).

13, 14. Mbaʼéichapa ermanakuéra ohechauka omombaʼeha pe ojapóva kongregasiónpe?

¹³ Umi ermanakuéra katu ohechauka omombaʼeha umi mbaʼe ojapóva Jehovápe g̃uarã. Upéicha oñekumpli hesekuéra Salmo 68:11 heʼíva: ‘Jehová voi heʼi: heta kuña ningo oĩ omombeʼúva pe marandu porã’. Ha upéva ojapo hikuái oñehaʼãvo oipytyvõ umi héntepe oservi hag̃ua avei Jehovápe (Mat.  28:​19, 20). Umi ermána ningo heta ojesakrifika osẽ meme hag̃ua opredika ha upéicha ohechauka omombaʼeha hembiapo kongregasiónpe.

¹⁴ Apóstol Pablo ningo ohaivaʼekue voi Títope: ‘Kuñakaraikuéra tahekomarangatu ha tomboʼe kuñakarai pyahukuérape ohayhu hag̃ua iménape ha imembykuérape. Taiñakãguapy, tahekopotĩ, toñangarekokuaa hógare, taimbaʼeporã ha taiñeʼẽrendu iménape, ani hag̃ua avave oñeʼẽ vai Ñandejára Ñeʼẽre’ (Tito 2:​3-5). Péicha jahecha umi ermána ijerovia mbaretéva ikatuha oipytyvõ hapichakuérape. Upévare haʼekuéra orrespeta umi kongregasión omoakãvape, oiporavo porã ivyʼarã ha oñemonde hekópe porã. Upéicha omoĩ ehémplo porã enterovépe ha ohechauka omombaʼeha pe ojapóva kongregasiónpe.

15. Mbaʼépa ikatu ojapo umi ermána soltérava ani hag̃ua oñeñandu haʼeño?

¹⁵ Sapyʼánte ningo umi ermána soltérava ndoikuaái mbaʼéichapa oipytyvõta kongregasiónpe. Peteĩ ermána heʼi voi: “Sapyʼánte ningo añeñandu cheañoiteha”. Ha oñeporandúrõ guare chupe mbaʼépa ojapo ogueropuʼaka hag̃ua upéva, haʼe heʼi: “Añemboʼe ha astudia rupi ahechakuaa jey mbaʼéichapa ikatu aipytyvõ kongregasiónpe. Aheka umi informasión ohechaukátava chéve Jehová cherayhuha ha upéi añehaʼã aipytyvõ ermanokuérape. Upéicha ajapo rupi napensaitereíri chejehe”. Salmo 32:​8-pe ningo Jehová heʼi Davídpe: ‘Che rohekomboʼéta ha nderehe ajesarekóta opa árape’. Jehová ningo ojepyʼapy opavave isiervokuérare ha umíva apytépe oĩhína umi ermána soltérava. Haʼe ningo ñanepytyvõta jaikuaa hag̃ua mbaʼéichapa ñambaʼapovaʼerã kongregasiónpe.

Aníkena jaheja ñane rembiapo kongregasionpegua

16, 17. a) Mbaʼérepa iporãite jadesidi jaservi Jehovápe? b) Mbaʼépa jajapovaʼerã ani hag̃ua jaheja ñane rembiapo porãite kongregasionpegua?

¹⁶ Jehová ñanderayhuetereígui oheja ñandéve ñañemoag̃ui hese ha jaiko iñamígoramo. Jesús ningo heʼivaʼekue: ‘Avave ndaikatúi ou cherendápe ndoguerúiramo chupe che Ru’ (Juan 6:44). Hetaiterei tapicha ningo oiko ko yvy ape ári ha Ñandejára ñandéve ñaneinvita jaservi hag̃ua chupe. Ha jadesidi rupi jaservi Ñandejárape, jaikuaa mbaʼépa ñaneraʼarõ. Ajépa javyʼaite ñaime haguére Jehová kongregasiónpe!

¹⁷ Pe salmísta ningo heʼivaʼekue: ‘Jehová ahayhu nde róga reikoha’. Upéi heʼive: “Tape porãme hatã añemboʼy, Ñandejárape amombaʼéta umi hese ojeroviáva apytépe” (Sal. 26:​8, 12). Jehová ningo káda únope omeʼẽ hendag̃ua ikongregasiónpe. Jahejákena chupe tañanesãmbyhy iñorganisasión rupive ha ñambaʼapo kyreʼỹ chupe g̃uarã. Upéicha jajapóramo arakaʼeve ndajahejamoʼãi ñane rembiapo porãite kongregasionpegua.

Nemanduʼápa koʼã mbaʼére?

• Mbaʼérepa ikatu jaʼe káda uno jarekoha ñane rembiapo ongregasiónpe?

• Mbaʼéichapa jahechaukáta ñamombaʼeha ñane rembiapo kongregasiónpe?

• Mbaʼérepa odepende jajapo hag̃ua peteĩ tembiapo kongregasiónpe?

• Mbaʼéichapa umi mitãrusu ha avei umi ijedámava ikatu ohechauka omombaʼeha hembiapo kongregasiónpe?

[Porandu ñahesaʼỹijóva]

[Nóta oĩva taʼanga ndive páhina 16]

Mbaʼépa ojapovaʼerã ermanokuéra ombaʼapove hag̃ua kongregasiónpe?

[Nóta oĩva taʼanga ndive páhina 17]

Mbaʼéichapa ermanakuéra ikatu ohechauka omombaʼeha ojapóva kongregasiónpe?