Ñandejára siervokuéra hory ha imbaʼerechakuaavaʼerã

‘Peñehaʼã pejogua Ñandejárape.’ (EFE. 5:​1, JMP.)

1, 2. a) Mbaʼérepa iporã ñanderory, ñanembaʼerechakuaa ha jaikokuaa? b) Mbaʼépa jahecháta ko artíkulope?

 PETEĨ kuñakarai iñarandúva hérava Sue Fox heʼi: “Iporã ningo akóinte ñanderory, ñanembaʼerechakuaa ha jaikokuaa. Opa árape ha tahaʼe haʼehápe jajapóramo upéicha ñasẽ porãta katuete”. Upeichagua tapicha ningo naiprovlémai voi avavéndi ha ojoavymíramo katu pyaʼe osolusiona. Péro umi ndopororrespetáiva katu mante oikovai, ipyʼaro ha oñamarga.

² Opavave ningo oikuaa Jehová siervokuéra hory ha opororrespetaha. Upéicharõ jepe ñañangarekovaʼerã ani hag̃ua ova ñanderehe ko múndo reko. Ko artíkulope jahecháta heta konsého oĩva la Bíbliape ha ñanepytyvõtava ani hag̃ua ova ñanderehe ko múndo reko  ha upéicha hetave hénte omombaʼeguasuséta Jehovápe. Jaikuaa hag̃ua mbaʼéichapa japororrespeta ha ñanembaʼeporãvaʼerã ñahesaʼỹijóta Jehová ha Itaʼýra ehémplo.

Jehová ha Jesús imbaʼeporã ha opororrespeta

3. Mbaʼérepa Jehová ehémplo ñandéve g̃uarã?

³ Jehová ningo ehémplo ñandéve g̃uarã, haʼéngo imbaʼeporã ha opororrespeta. Haʼéramo jepe Mburuvicha guasu ko univérsope, orrespeta ha otrata mborayhúpe yvyporakuérape. Pór ehémplo oñemongetárõ guare Abrahán ndive oiporu peteĩ ñeʼẽ evréo heʼiséva “por favor” (Gén. 13:14; Éxo. 4:6). Ha hembiguaikuéra ojavýramo, haʼe ohechauka ‘oporoporiahuvereko, ipyʼaporã, ndaipochykuaái, imbaʼeporã ha omombaʼeha pe añetegua’ (Sal. 86:15). Ajéiko Jehová ndojoguaiete umi hénte ipochyetereívape hapicha ndojapói jave chupe haʼe oipotáva!

4. Mbaʼe jajapóramopa jajoguavéta Jehovápe?

⁴ Jehová ohechauka avei imbaʼeporãha ohendúvo yvyporakuérape. Abrahán oporandúrõ guare chupe heta mbaʼe umi Sodomayguáre, Jehová pyʼaguapýpe porãnte ombohovái chupe la oikuaaséva (Gén. 18:​23-32). Ñandejára ningo ndeʼíri operdereiha itiémpo ohendúvo Abrahánpe. Jehová ohendu isiervokuéra ñemboʼe ha umi oñembyasývape ojapo haguére ivaíva (jaleemína Salmo 51:​11, 17). Upévare ñahenduvaʼerã avei ñande rapichakuérape oñeʼẽ jave ñandéve.

5. Mbaʼéichapa ñanepytyvõta jajapóramo Jesús ojapo haguéicha?

⁵ Jehová ningo omboʼevaʼekue avei Jesúspe imbaʼeporã hag̃ua. Jesús ningo hembiapoiterei ha ikaneʼõramo jepe hory ha ipasiénsia la héntere. Akóinte kyreʼỹme oipytyvõ umi ojeapoʼívape. Tahaʼe umi lepróso, siégo térã imboriahúvape. Toiko la oikóva haʼe ndohejareíri chupekuéra ha hembiapo hetave paʼũme oipytyvõ umi ojechavaívape. Jesús imbaʼerechakuaaiterei avei umi hese ojeroviáva ndive (Mar. 5:​30-34; Luc. 18:​35-41). Ha haʼe ojapo haguéicha ñande avei ñanderory ha ñanembaʼeporãvaʼerã ñane hentekuéra ha ñane vesínondi, ha ambue tapicha ohechakuaáta upéva. Upéicha jajapóramo ñamombaʼeguasúta Jehovápe ha javyʼavéta avei.

6. Mbaʼéichapa Jesús ohechauka japorotratavaʼerãha?

⁶ Umi hudío rrelihión omoakãva ningo ohenói voi ‘maldíto’ umi hapicha oikuaaʼỹvape Ñandejárape ha otrata vai chupekuéra (Juan 7:49). Péro Jesús ndojoguaiete chupekuéra. Haʼe opororrespeta ha enterovépe ohenói héra rupi, pór ehémplo Marta, María, Zaqueo ha hetavépe ohenói héra rupi (Luc. 10:​41, 42; 19:5). Jaikuaa ningo káda tetã orekoha mbaʼéichapa japorotratavaʼerã, ha Jehová siervokuéra oñehaʼã voínte ojotrata mborayhúpe. a Haʼekuéra ningo peteĩchante otrata porã ha orrespeta umi ermáno ha ambue tapicha imboriahúvape (jaleemína Santiago 2:​1-4).

7. Mbaʼérepa jahejavaʼerã Ñandejára Ñeʼẽ ñanesãmbyhy?

⁷ Ñandejára ha Itaʼýra ningo imbaʼeporã opaichaguándi. Upéva omoñeñandu porã enterovépe ha heta oĩ oñembojáva oikuaa porãve hag̃ua chupekuéra. Jaikuaa ningo peteĩ mbaʼe jajapóva koʼápe ikatuha iporã enterovépe péro ambue tetãme katu ndopytaporãi. Upévare jajepyʼapyetereirangue umi kostúmbre rehe, jahejavaʼerã Ñandejára Ñeʼẽ tañanesãmbyhy. Upéicharõmante jatrata porã ha jarrespetáta enterovépe tajaiko jaikohápe. Koʼa rire jahecháta mbaʼéichapa ñanderorýramo ñanerendu porãvéta la hénte japredika jave.

Japorosaluda ha ñañemongeta

8, 9. a) Mbaʼe jajapóramopa ñanemaledukadoñaína? b) Mbaʼéichapa jatratavaʼerã ñande rapichápe jahecha rire Mateo 5:​47-pe heʼíva?

⁸ Koʼág̃a rupi ningo la hénte ojapuraháre voi oiko ha ojoasávo ni mbaʼéichapa ndeʼivéima  ojupe. Ndahaʼéiko jasaludátava opa jajuhúvape tapére péro sapyʼánte ningo iporã ha oñehaʼarõ voi japorosaludami. Ndépa rejepokuaa reporosaluda? Térãpa nderovapukúnte rehasávo? Ikatu ningo oime jajepokuaántema péicha, péro ñanemaledukádota upéicha jajapóramo.

⁹ Jesús ningo oporanduvaʼekue voi: ‘Peẽ pemomaiteíramo umi peikuaávapente, mbaʼe iporãva piko pejapo? Umi Ñandejárare ojeroviaʼỹva jepe niko péicha ojapo’ (Mat. 5:47). Enterovénte ningo oikuaa iporãha japorosaluda, upévare Donald Weiss ohai: “Avavépeko nañandegustái peteĩ ñande rapicha ohasánte ñande ypy rupi ha ni nomañái ñanderehe. Upévare ndajarekói mbaʼérepa ndajasaludáivo ñande rapichápe. Upéicharõ jasaludavaʼerã maymávape ha ñañemongeta hendivekuéra”. Péicha jahecha ñañehaʼãvaʼerãha ani ñanderovasy guasu ha nañañeʼẽi ñande rapichápe. Upéicharõmante jaiko porãta opavavéndi.

10. Mbaʼérepa jaʼe ñanderorýramo ñanerendu porãvetaha la hénte predikasiónpe? (Ehecha pe rrekuádro heʼihápe “Ñanderorýkena”

¹⁰ Jahechamína mbaʼépa ojapo Tom ha hembireko Carol oikóva Norteaméricape. Haʼekuéra ningo oñehaʼã hory ha oñemongeta ivesinokuérandi ikatu hag̃uáicha upe rire ohendu porã chupe hikuái predikasiónpe. Tom imanduʼávo Santiago 3:18 rehe heʼi: “Roñehaʼã ningo orerory enterovéndi, roñemboja ha roñeʼẽ umi hóga renondépe oĩvape ha umi ore róga ypy rupi ombaʼapóvape. Ropukavy, rosaluda ha roñeʼẽ hendivekuéra umi mbaʼe iñimportántevare chupekuéra. Tahaʼe ifamília, hóga, hymba jagua ha itraváhore. Ha upe rire oretratáma hikuái iñamígoicha”. Carol heʼi avei: “Roho jeývape roʼéma ore vesinokuérape mbaʼéichapa ore réra ha roporandu avei chupekuéra hérare. Upe rire mbykymínte romombeʼu chupekuéra mbaʼépa rojapo upérupi. Ha amo gotyove ikatúma romombeʼuve ore vesinokuérape pe marandu porãre”. Péicha ojapo rupi Tom ha Carol rehe ojepokuaa heta ivesinokuéra. Ha heta umíva apytégui oheja ñane puvlikasionkuéra ha oĩ avei oikuaasevéva Jehovápe.

Sapyʼánte ijetuʼu ñanderory hag̃ua

11, 12. Mbaʼérepa ndajahecharamói oĩramo ñandetrata vaíva predikasiónpe ha mbaʼépa jajapovaʼerã upéicha jave?

¹¹ Japredika jave ningo sapyʼánte umi hénte  ñandetrata vai. Péro ñande jaikuaa upéichante vaʼerãha voi. Jesús ningo heʼivaʼekue: “Chéve chepersegíramo, peẽme avei pendepersegivaʼerã” (Juan 15:​20, BNP). Péro ñambohovái vai guasúramo peteĩ ñande rapicha ijarhélvape ñandéve nañasolusionamoʼãi mbaʼeve. Mbaʼe piko upéicharõ jajapovaʼerã? Apóstol Pedro heʼi: ‘Pemombaʼe Crístope pende pyʼaite guive. Peime tapiákena pemombeʼu hag̃uáicha oñeporandúramo peẽme mbaʼépa pe esperánsa perekóva, ha pemombeʼuvaʼerã pejejapoʼỹre ha peporoapovaʼerã mbaʼéramo’ (1 Ped. 3:​15, BNP). Añetehápe ningo ñasẽ porãta ñanembaʼeporã, jarrespeta ha ñañeʼẽramo pyʼaguapýpe porãnte umi ñandejaʼóvape (Tito 2:​7, 8).

¹² Ikatútapa ñañeʼẽ Jehová oipotaháicha ñande rapichakuéra ijarhél jave ñandéve? Ikatu. Pablo ningo heʼi voi ñandéve: ‘Pene ñeʼẽ akóinte iporã ha ijukyvaʼerã. Ha peikuaákena mbaʼéichapa peñeʼẽvaʼerã peteĩteĩme’ (Col. 4:6). Jajepokuaavaʼerã ñanderory ñande rogayguándi, ermanokuérandi, ñane vesinokuérandi, ñane irũnguéra kolehiopegua ha ñande travahohapeguándi. Upéicharõ ndahasyivéta ñandéve peteĩ kristiáno teéicha ñaaguanta hag̃ua oĩramo oñembohory térã ñandetrata vaíva (jaleemína Romanos 12:​17-21).

13. Mbaʼe ehémplopa ohechauka ñanderorýramo japredika jave ikatuha okambia la héntepe?

¹³ Jahechamína peteĩ ehémplo ohechaukáva ñanderorýramo ikatuha okambia umi oñembohorývape ñanderehe. Japónpe peteĩ karai ha ivisíta oñembohory ivesíno testígore og̃uahẽ haguére opredika chupe. Ha upe ermáno ipochyrangue ojedespedi porãnte ha osẽ oho. Upéi osegi opredika ha ohechakuaa pe ivesíno visíta omañaha hese, upémarõ pe ermáno oñemboja hendápe ha pe karai heʼi chupe: “Chediskulpamína che amígo. Chéngo ahechakuaa rotrata vaíramo jepe resegiha nderory. Mbaʼe piko che ajapovaʼerã péicha cherory hag̃ua?”. Pe karai ningo ndoikuaavéima mbaʼépa ojapóta pórke oñemosẽkuri chupe itravahohágui ha omanoramoite chugui isy. Ha pe ermáno heʼi chupe ndostudiaséipa la Biblia ha oñepyrũ ostudia. Sapyʼaitérõ g̃uarã ostudiáma dos vése pór semána.

 Mbaʼéichapa ikatu ñamboʼe ñane famíliape

14, 15. Mbaʼéichapa Ñandejára siervokuéra yma guare omboʼerakaʼe ifamiliakuérape?

¹⁴ Ñandejára siervokuéra yma guare ningo omboʼe porã voi ifamiliakuérape hory ha oporotrata porã hag̃ua. Jahechamíntena Génesis 22:​7-pe mbaʼéichapa Abrahán ha Isaac ojotrata porã vaʼekue. José rehe jahechakuaa avei ituvakuéra omboʼe porã hague chupe, pórke oĩrõ guare kárselpe otrata porãnte avei umi ambue karselérope (Gén. 40:​8, 14). Ha oñeʼẽrõ guare faraónpe jahechakuaa avei hese oaprende hague mbaʼéichapa otratavaʼerã umi hénte iñimportántevape (Gén. 41:​16, 33, 34).

¹⁵ Pe Diez Mandamiénto apytépe Jehová heʼi umi Israelguápe: ‘Ehayhu nde ru ha nde sýpe ipuku hag̃ua nde rekove upe yvy, che Jehová nde Jára ameʼẽvape ndéve’ (Éxo. 20:12). Umi Israelgua ningo ohechaukavaʼerã ohayhuha ituvakuérape orrespetávo chupekuéra. Pór ehémplo, Jefté rajy ohechauka orrespetaitereiha itúvape. Haʼe ningo tuicha ojesakrifikátaramo jepe ojapo pe itúva oprometevaʼekue Jehovápe (Jue. 11:​35-40).

16-18. a) Mbaʼéichapa tuvakuéra omboʼevaʼerã ifamíliape? b) Mbaʼépa oiko jepi tuvakuéra omboʼéramo ifamíliape imbaʼeporã ha opororrespeta hag̃ua?

¹⁶ Tuvakuéra ningo omboʼevaʼerã ifamíliape hory, imbaʼeporã ha opororrespeta hag̃ua. Ha okakuaapa rire oiko porã hag̃ua hapichakuérandi, imitã reheve tekotevẽma oikuaa mbaʼéichapa okontestavaʼerã teléfono, osaludavaʼerãha umi hógape og̃uahẽvape ha ojeporta porã vaʼerãha mesápe. Omboʼevaʼerã avei ifamíliape imbaʼerechakuaa ha imbaʼeporã hag̃ua umi hasykatúva ha ijedáva ndive, oipytyvõvaʼerãha umi ikárga pohýivape ha oavrivaʼerãha okẽ hapichápe ohasa hag̃ua. Tekotevẽ oikuaa avei hikuái ojerure porã vaʼerãha la oipotáva, oagradese ha ojerurevaʼerãha diskúlpa.

¹⁷ Ndahasýi ningo tuvakuéra omboʼe hag̃ua ifamíliape ojeporta porã hag̃ua. Upearã ningo haʼekuéra voi omoĩvaʼerã ehémplo. Peteĩ kariaʼy hérava Kurt ha orekóva 25 áño ningo omombeʼu mbaʼéichapa ituvakuéra ohekomboʼe porã chupe ha iñermanokuérape. Haʼe heʼi: “Ore ningo rohecha mbaʼéichapa che sy ha che ru ojotrata porã, imbaʼeporã ha imbaʼerechakuaa avei ermanokuéra ndive. Oñepyrũ mboyve ha opa rire rreunión che ru oho oñemongeta umi ermáno ijedámava ndive ha katuete chereraha hendive. Che ahecha  mbaʼéichapa haʼe osaluda ha omombaʼe chupekuéra. Upe rire che avei ajepokuaáma ajapo upeichaite. Cherory la ermanokuérandi ha ndahaʼéi ajapovaʼerãguinte”.

¹⁸ Mbaʼépa oikóta tuvakuéra omboʼéramo ifamíliape imbaʼeporã ha opororrespeta hag̃ua? Katuete ningo ojuhúta hikuái iñamigorã ha oiko porãta hapichakuéra ndive. Amo gotyove oikuaátama avei hikuái mbaʼéichapa oikovaʼerã, mbaʼéichapa otratavaʼerã ipatrónpe ha umi iñirũnguéra itravahohapeguápe. Ha jaikuaa avei sy ha túva ovyʼa ha ijaguaraha ifamiliakuéra ojeporta porã ha horýramo (jaleemína Proverbios 23:​24, 25).

Mbaʼérepa ndajajoguái umi hénte añáme?

19, 20. Mbaʼérepa ñañehaʼãvaʼerã jasegi Jehová ha Itaʼýra ehémplo?

¹⁹ Apóstol Pablo ohaivaʼekue: ‘Peñehaʼãkena pejogua Ñandejárape itaʼýra teéicha’ (Efe. 5:​1, JMP). Jasegiséramo Jehová ha Itaʼýra ehémplo jajapovaʼerã la Biblia heʼíva. Pór ehémplo ko artíkulope ñahesaʼỹijo heta téysto ñanepytyvõtava ani hag̃ua ñanerovamokõi ha ñanderory guaʼu okonveníta javénte ñandéve. Pór ehémplo ndovaléi ñanderory ñañemoĩ porãséguinte umi ñanemoakãvandi térã ñakonsegi hag̃uánte peteĩ mbaʼe ñande jaipotáva (Jud. 16).

²⁰ Ko ára pahápe ningo Satanás oreko ipoguýpe la héntepe ha ndoipotái avave hory, imbaʼeporã ha opororrespeta Jehová oipotaháicha. Péro arakaʼeve ndaipuʼakamoʼãi umi mbaʼe porã Jehová siervokuéra ojapóvare. Upévare ñañehaʼãkena jasegi Jehová ha Itaʼýra ehémplo ha ñanembaʼeporã haʼekuéraicha. Upéicharõmante umi mbaʼe jaʼe ha jajapóvare ojekuaáta ndajajoguaiha umi hénte añáme. Avei ñanderekoporã rupi ñamombaʼeguasúta Jehovápe ha heta ñande rapicha oserviséta avei chupe upévare.

[Nóta]

Nemanduʼápa koʼã mbaʼére?

• Mbaʼéichapa Jehová ha Jesús ohechauka ñanembaʼeporã ha japororrespetavaʼerãha?

• Mbaʼérepa iporã japorosaluda?

• Mbaʼéichapa ñanderorýramo ñanerendu porãvéta la hénte japredika jave?

• Mbaʼéichapa tuvakuéra ikatu omboʼe ifamíliape hory ha opororrespeta hag̃ua?

[Porandu ñahesaʼỹijóva]

[Rrekuádro oĩva páhina 27-pe]

Ñanderorýkena

Heta ningo oĩ noñeʼẽséiva voi umi oikuaaʼỹvape, péro ñande jahayhúgui Jehovápe ha ñande rapichakuérape ñañehaʼã ñañemongeta opavavéndi. Ñande ningo ñamboʼese chupekuéra Ñandejára Ñeʼẽ. Mbaʼépa ñanepytyvõta ñandekatupyryve hag̃ua upearã?

Filipenses 2:​4-pe heʼíva tuichaiterei ñanepytyvõta, upépe heʼi voi ñandéve: ‘Ani peheka iporãva peẽme g̃uarãnte, peheka uvei pe iporãva pende rapichakuérape g̃uarã’. Ñapensamíntena sapyʼaite umi ñanerendúvare, haʼekuéra ningo ni nañandekuaaihína ha ikatu voi okyhyje mbaʼe ñandehegui. Mbaʼépa ikatu jajapo ñambopyʼaguapy hag̃ua chupekuéra? Iporã ningo ñamomaitei ha ñanderory chupekuéra, péro ndahaʼéi upévante.

Ikatu ningo pe óga jára opensahínaraʼe peteĩ mbaʼére ha upe jave ñande ñag̃uahẽ. Ha nañañemongetáiramo hendive umi mbaʼe oipyʼapývare chupe, ikatu nañanerendúi. Upévare, jahechakuaáramo mbaʼérepa opensahínaraʼe, ñañehaʼãvaʼerã ñañemongeta hendive upévare. Jesús ningo ojapovaʼekue upéicha ojotopárõ guare peteĩ kuñakarai Samariayguándi peteĩ póso mátape (Juan 4:​7-26). Upe kuñakarai opensahínakuri oguenohẽvo y ha Jesús ohechakuaa upéva. Upéicha rupi Jesús oñeʼẽ chupe upévare ha sapyʼaitérõ g̃uarã oñemongeta kyreʼỹma hikuái Ñandejára rembipotáre.

[Nóta oĩva taʼanga ndive páhina 26]

Ñanderorýramo ñanerendu porãvéta ñande rapichakuéra predikasiónpe

[Nóta oĩva taʼanga ndive páhina 28]

Akóinte ñanderory ha ñanembaʼerechakuaavaʼerã