Jahayhúkena umi ermáno ohenduʼỹvape

JEHOVÁ siervokuéra apytépe ningo oĩ heta ermáno ha ermána iñeʼẽrendúva. Umíva ningo oikuaa Jehovápe umi kuimbaʼe ha kuña ymaguare iñeʼẽrenduvaʼekue rupive, pór ehémplo Samuel, David, Sansón, Rahab, Moisés, Abrahán, Sara, Noé ha Abel. Ha ñanemanduʼavaʼerã Jehová rembiguaikuéra apytépe oĩha heta ohenduʼỹva. Pór ehémplo Mongóliape peteĩ ermáno hembirekóndi la testígo ypykue ha haʼekuéra ningo sórdo. Rúsiape katu umi ermáno ohenduʼỹva ijerovia mbarete rupi oñegana peteĩ káso pe Tribunal Europeo de Derechos Humanos-pe.

Ramoite guive ningo pe “tembiguái jeroviaha ha iñarandúva” oguenohẽ puvlikasión ha omoñepyrũ kongregasión ha ojejapo aty guasu lenguaje de séñaspe (Mat. 24:45). Péicha ojejapo haguére tuichaiterei oñepytyvõ umi ohenduʼỹvape. a Ha oreko mboyve hikuái koʼã mbaʼe, ndépa reñeporandúmava mbaʼéichapa haʼekuéra oikuaa ñepyrũ Jehovápe ha omombarete ijerovia? Ndépa repensámava mbaʼépa ikatu rejapo reipytyvõ hag̃ua umi ohenduʼỹvape oikóva nde róga ypy rupi?

Oreko mboyve umi mbaʼe koʼág̃a orekóva

Mbaʼépa nde repensa heʼitaha ndéve umi ermáno ohenduʼỹva reporandúramo chupekuéra mbaʼéichapa oikuaa ypy rakaʼe Jehovápe? Ikatu heʼi ndéve mbaʼéichapa oñeñanduvaʼekue oikuaa ypýrõ guare Ñandejára réra. Ha mbaʼéichapa okambia upe guive ha heta áñore upévante omombarete ijerovia. Upéicha vaʼekue yma ojeguereko mboyve lenguaje de séñaspe umi vidéo omboʼéva umi mbaʼe hypyʼũvéva oĩva Ñandejára Ñeʼẽme. Umi ermáno ohenduʼỹva ikatu avei heʼi ndéve mbaʼéichapa oñeñandu noñeinterpretáirõ guare umi rreunión lenguaje séñaspe ha ndaipóriramo guare informasión upe idiómape. Upérõ ningo oĩnte peteĩ ermáno oguapýva ijykerekuéra ha oskrivi chupekuéra la ojeʼéva ontende hag̃ua. Peteĩ ermáno ohenduʼỹvape ningo siete áño oñemboʼe upéicha ha upéi hasype oĩ peteĩ ointerpretavaʼerã chupe la rreunión.

Umi ermáno ohenduʼỹva ha ijedavémava ningo imanduʼa mbaʼeichaitépa ijetuʼuvaʼekue chupekuéra opredika hag̃ua umi ndahaʼéivape sórdo. Haʼekuéra ningo peteĩ ipópe orekovaʼerã pe kuatia omombeʼuhápe mbykymi pe marandu porã ha ótro ipópe katu La Atalaya ha ¡Despertad! osẽ ramovéva. Chupekuéra ningo ijetuʼuetereivaʼekue omboʼe hag̃ua la Biblia ótro ohenduʼỹvape. Upéicha ningo oiko nontendeporãi rupi hikuái umi puvlikasión kuatiápente oĩva. Oiméne imanduʼa avei umi ohenduʼỹva mbaʼéichapa ojepichamivaʼekue noñentendéi jave chupekuéra. Upéicha jave ndaikatuvéima osegi oñemongeta hikuái Ñandejára Ñeʼẽ heʼívare. Haʼekuéra ningo ohayhu Jehovápe ipyʼaite guive péro oikuaa avei mbaʼéichapa ñañeñandu nañantendéi jave peteĩ mbaʼe.

Umi ermáno ohenduʼỹva ohasáramo jepe heta mbaʼe ijetuʼúva, akóinte iñeʼẽrendu Jehovápe (Job 2:3). Ojerovia hikuái Jehováre ipyʼaite guive ha ohaʼarõ okumpli hembipota  (Sal. 37:7). Ha koʼág̃a Jehová tuichaicháma ovendesi chupekuéra.

Epensamíntema mbaʼéichapa oñehaʼã peteĩ ermáno ohenduʼỹva, omenda ha ifamíliava. Yma osẽ mboyve umi vidéo lenguaje de señaspegua, haʼe akóinte oñembyatymivaʼekue ostudia hag̃ua hogaygua ndive. Itaʼýra heʼi: “Chemanduʼa ijetuʼu hague che rúpe orembostudia hag̃ua, mbaʼe piko ko haʼe orekóva umi puvlikasión kuatiapeguánte. Ha pyʼỹinte nontendeporãi la heʼíva pype, ore katu oremitãme saʼi roipytyvõ chupe pórke ojavymírõ pyaʼe voi roʼe chupe ojavy hague. Upéicharõ jepe che ru akóinte ojapo pe aty rostudia hag̃ua oñondivepa. Ha ojavymíramo jepe nontendeporãigui umi puvlikasión heʼíva, haʼe ohechakuaa iñimportanteveha roikuaa Jehovápe”.

Oĩ avei peteĩ ermáno hérava Richard, oreko 70 áño árima ha oiko Brooklyn-pe. Haʼe ningo nohendúi ha ndohecháiramo jepe ndofaltáiva rreunionhápe. Haʼeñónte voi ojupi pe trénpe ha oipapánte mboy vésepa opyta oikuaa hag̃ua moõitépa oguejyvaʼerã. Peteĩ árape roʼyeterei ha hetaiterei niéve hoʼa, upévare ojeavisa ermanokuérape ndoikomoʼãiha la rreunión. Péro Ríchardpe ndojeavisáiraʼe ha umi ermáno imanduʼávo upévare oho hekávo. Otopa hese hikuái oñemboʼy Salón renondépe ohaʼarõhína ojeavri pe okẽ. Upéi oporandu chupe hikuái maʼerãpa osẽ péicha jave hógagui. Ha Richard heʼi chupekuéra: “Ahayhúgui Jehovápe”.

Mbaʼépa nde ikatu rejapo?

Oiméramo oiko nde róga ypy rupi umi ohenduʼỹva, ndépa ikatúne reaprende lenguaje de señas? Haʼekuéra imbaʼeporã ha ipasiénsia omboʼe hag̃ua hapichápe iñidióma. Mbaʼépa rejapóta retopáramo predikasiónpe peteĩ ohenduʼỹvare? Eñehaʼãkena reñemongeta hendive. Upearã ikatu reiporu umi hésto, divúho, fóto térã rehechauka ambue mbaʼe. Ndoikuaaséiramo jepe mbaʼeve Ñandejára Ñeʼẽgui, emombeʼuvaʼerã ambue ermáno ohenduʼỹvape térã oikuaávape lenguaje de señas ohomi hag̃ua ovisita chupe. Maʼerãpa upéva? Ikatu ningo oñatende porãve hína ojepredikáramo chupe iñeʼẽtépe.

Oiméramo nde reaprendereína lenguaje de señas ha reho irreunionhapekuéra, mbaʼépa ikatu rejapo rentende ha reiporu porã hag̃ua upe idióma? Ikatu ningo oĩ upe kongregasiónpe ambue ermáno reñeʼẽ hag̃ua, péro iporãvéta peñemongeta lenguaje de séñaspe. Upéicharõmante ikatúta repensa lenguaje de séñaspe. Sapyʼánte ikatu reñeʼẽséntema ndahasyivéta rupi ndéve upéicha, péro jaikuaa ningo ñaaprende hag̃ua oimeraẽ idióma ñañehaʼãmbaitevaʼerãha.

Ñañehaʼãramo ñañeʼẽ lenguaje de séñaspe, jahechaukáta jahayhu ha jarrespetaha ñane ermanokuéra ohenduʼỹvape. Epensamíntena mbaʼéichapa oiméne oñeñandu hikuái nontendéi jave chupekuéra hapicha ijeskuelapegua térã itravahohapegua. Peteĩ  ermáno ohenduʼỹva heʼi: “Koʼẽ koʼẽre ahecha la hénte oñemongetajoa chejerére. Upéicha rupi haʼete ku añeñandúva cheaño ha avavévaicha nopenái cherehe. Upévare sapyʼánte ajedesahusiáma ha chepochy. Ndaikuaái ningo mbaʼéichapa amombeʼúta peẽme mbaʼéichapa añeñandu jepi”. Upéicharõ jajapókena opa ikatúva ñane ermanokuéra omombarete hag̃ua ijerovia ñane rreunionhápe ha avei toñemongeta ha toñeñandu porã ñanendive (Juan 13:​34, 35).

Ñanemanduʼavaʼerã avei umi ermáno sórdo oñembyatývare umi kongregasión ojénte ndive. Chupekuéra ningo oñembohasavaʼerã avei lenguaje de séñaspe la ojeʼéva rreunionhápe. Haʼekuéra oguapy tenondetépe Salónpe ikatu hag̃uáicha ohecha pe diskursántepe ha avei pe ointerpretávape lenguaje de séñaspe. Ha ojehechakuaa upéicha ojejapóramo, pyaʼeterei ojepokuaaha umi ótro ermáno ha ndostorvái chupekuéra. Péichante avei ojejapo jepi aty guasuhápe. Jaagradese ningo umi ermáno oñehaʼãvape ointerpreta heta informasión lenguaje de séñaspe ontende porã hag̃uáicha umi ohenduʼỹva.

Ikatu oime ne kongregasiónpe oñembyaty avei umi ohenduʼỹva ha oñeinterpreta chupekuéra pe rreunión lenguaje de séñaspe. Mbaʼépa ikatu rejapo rehechauka hag̃ua reguerohoryha chupekuéra? Ikatu ningo reinvita chupekuéra nderógape ha eñehaʼã reaprende michĩmi jepe lenguaje de señas. Aníke nereñeʼẽkuaái haguére mbaʼe remboyke chupekuéra. Katuete ningo ikatúta reñemongeta hendivekuéra ha pehasa porã oñondivepa (1 Juan 4:8). Umi ñane ermáno ohenduʼỹva ningo imbaʼeporãiterei. Hory, ikatupyry ha ovyʼakuaa hikuái. Peteĩ ermáno ningo ituvakuéra sórdo ha haʼe heʼi: “Che ningo umi ohenduʼỹvandi voi akakuaa ha arakaʼeve ndapagapamoʼãi chupekuéra umi mbaʼe ojapóvare cherehehápe. Hetaiterei mbaʼéko ikatu ñaaprende chuguikuéra”.

Jehová ningo ohayhu hembiguaikuéra iñeʼẽrendúvape, tahaʼe ohendu térã ohenduʼỹvape. Enterovépe ningo tuicha ñanemokyreʼỹ jahechávo mbaʼéichapa ojerovia ha ogueropuʼaka heta mbaʼe umi ñane ermáno ohenduʼỹva. Upévare, jahayhúkena chupekuéra ñane ñeʼã mbytete guive!

[Nóta]

[Nóta oĩva taʼanga ndive páhina 31]

Umi sórdo oñatende porãvéta ñanderehe japredikáramo lenguaje de séñaspe

[Nóta oĩva taʼanga ndive páhina 32]

Ñane rreunionhápe ningo oñemokyreʼỹvaʼerã umi ohenduʼỹvape