Mbaʼéichapa nde reñemboʼe?
Mbaʼéichapa nde reñemboʼe?
‘Nde niko rehendu maymáva ñemboʼe, ha opavave nerendápe og̃uahẽ.’ (SAL. 65:2.)
1, 2. Mbaʼérepa ikatu jajerovia Ñandejára ohendutaha ñane ñemboʼe?
ÑANDE Apohare ningo nombotýi ijapysa ñandehegui. Ha hetaiterei testigos de Jehová oñemboʼe jojapáramo jepe chupe, haʼe katuete ohendu enterovépe.
2 Yma ningo rréi David ojeroviaiterei Ñandejára ohenduha iñemboʼe. Upévare heʼi: ‘Nde niko rehendu maymáva ñemboʼe, ha opavave nerendápe og̃uahẽ’ (Sal. 65:2). Jehová ningo ohenduvaʼekue David ñemboʼe iñeʼẽrendu rupi chupe. Upévare iporã ñande ñañeporandumi: “Añemboʼe javépa ojekuaa cherehe ajeroviaha Ñandejárare ha amombaʼeguasuseha chupe añoiténte? Mbaʼépa ojehechakuaa che ñemboʼére?”.
Ñañemomirĩkena Ñandejára ohendu hag̃ua ñane ñemboʼe
3, 4. a) Mbaʼéichapa ñañemboʼevaʼerã Jehová ñanerendu hag̃ua? b) Mbaʼépa ikatu jajapo oiméramo jajapóraʼe peteĩ mbaʼe ivaíva ha jajepyʼapy upévare?
3 Ñañemomĩrivaʼerã jaipotáramo Jehová ohendu ñane ñemboʼe (Sal. 138:6). Jajerurevaʼerã chupe ohecha hag̃ua mbaʼépa jareko ñande pyʼapýpe David ojapo haguéicha. Haʼe niko heʼi voi Ñandejárape: ‘Eipyguara che rekove ha eikuaa che pyʼapýpe oĩva. Ehechamína mbaʼépa chepyʼapy. Emañamína mbaʼe tapérepa ahaʼaína ha chemboguata pe tape tapia g̃uarãvare’ (Sal. 139:23, 24, ÑÑB). Péro ndahaʼeivaʼerã ñañemboʼénteva, jahejavaʼerã avei Ñandejárape tañanesãmbyhy ha toñemoñeʼẽ ñandéve la Biblia rupive. Haʼe ningo ikatu ‘ñanemboguata pe tape tapia g̃uarãvare’, térã ikatu ñanepytyvõ jahupyty hag̃ua pe jeikove opaveʼỹva.
4 Mbaʼépa ikatu jajapo oiméramo jajapóraʼe peteĩ mbaʼe ivaíva ha jajepyʼapy upévare? (Jaleemína Salmo 32:1-5.) Ndovaléi jaguerokirirĩ umi mbaʼe ñandejopýva pórke upéva ikatu ñanemokangy pe ára haku ombohoguekangypaháicha peteĩ yvyramáta. Davídpe ningo omyangekoieterei pe mbaʼe vai ojapovaʼekue, ha oiméne ombohasy voi rakaʼe chupe. Péro tuicha ipyʼaguapy omombeʼu rire Ñandejárape la ojapovaʼekue. Mbaʼeichaitépa oiméne ovyʼáraʼe oikuaávo Ñandejára operdona hague chupe! Upévare ñande avei ñandepyʼaguapýta ñamombeʼúramo Ñandejárape jajapo hague ivaíva. Péro ñaikotevẽ avei umi ansiáno ñanepytyvõ ñaime porã jey hag̃ua Jehová ndive (Pro. 28:13; Sant. 5:13-16).
Ñañemboʼékena Ñandejárape ha jaagradese chupe
5. Mbaʼéichapa ikatu jajapo Filipenses 4:6-pe heʼíva?
5 Oĩramo peteĩ mbaʼe ñandepyʼapy ha ñanemyangekóiva, jajapovaʼerã Apóstol Pablo heʼivaʼekue: ‘Anítei pejepyʼapy mbaʼeve rehe, pemombeʼu uvei opa mbaʼe pene ñemboʼe rupi Ñandejárape, pemombeʼu chupe peneremikotevẽ peneagradesimiénto reheve’ (Fili. 4:6, ÑÑB). Mbaʼéichapa ikatu jajapo upéva? Upearã tekotevẽ jajerure asy Ñandejárape térã ñañemomirĩ ñañemboʼévo chupe. Ha koʼýte jajerure asy vaʼerã Jehovápe ñanepytyvõ ha ñanesãmbyhy hag̃ua jajejopy vai ha jajepersegi jave.
6, 7. Mbaʼe mbaʼérepa ikatu jaagradese Jehovápe?
6 Péro mbaʼépa jahechaukáta ñañemboʼéramo ñaikotevẽ javénte? Apóstol Pablo heʼivaʼekue jajerure asy jave peteĩ mbaʼe Ñandejárape ‘jaagradesevaʼerãha’ avei chupe. Añetehápe heta mbaʼére ikatu jaagradese Jehovápe David ojapo haguéicha. Haʼe niko heʼivaʼekue voi: ‘Nde niko Jehová, ndetuicha ha ndepokatu, nde pópe oĩ opa mbaʼe ha nderekomimbipa ndaijojahái! Opa mbaʼe oĩva yvy ape ári ha yvágape nembaʼénte voi. Nde hína ore Jára, pe mburuvicha guasu ha nde tuichave opavavégui! Upévare ore Jára roʼe ndéve aguyje ha romombaʼeguasu nderéra ojekuaáva opárupi’ (1 Cró. 29:11-13).
7 Jesús ningo oagradesemivaʼekue Itúvape tembiʼúre. Ha oagradesevaʼekue avei chupe pe pán ha víno oiporúvare omoñepyrũ hag̃ua pe Cena del Señor (Mat. 15:36; Mar. 14:22, 23). Upéicha avei ñande jaagradesevaʼerã Ñandejárape tembiʼúre. Péro jaagradesevaʼerã avei chupe umi mbaʼe porãita ojapóvare yvypóra rehehápe ha ‘pe Iñeʼẽ marangatúre’ (Sal. 107:15; 119:62, 105).
Ñañemboʼékena ñande rapichakuéra rehehápe
8, 9. Mbaʼérepa ñañemboʼevaʼerã ermanokuéra rehehápe?
8 Ñande ningo ñañemboʼe jave Ñandejárape, ñañemboʼevaʼerã avei ñande rapichakuéra rehehápe. Umi ndajaikuaáiva rehehápe jepe. Yma ningo Pablo oiméne ndoikuaairakaʼe enterove kristiáno Colosasguápe. Upéicharõ jepe haʼe heʼi: ‘Ore roagradese Ñandejárape roñemboʼe jave penderehehápe, rohendúgui peẽ pejerovia porãha Jesucristo rehe ha pehayhuhapeína opa Ñandejára rembiguáipe’ (Col. 1:3, 4, ÑÑB). Apóstol Pablo ningo oñemboʼevaʼekue avei umi kristiáno Tesalonicaygua rehehápe (2 Tes. 1:11, 12). Péicha ñañemboʼéramo ningo jahechaukáta mbaʼeichaguápa ñande ha mbaʼépa ñapensa ermanokuérare.
9 Ha jahechauka hag̃ua iñimportanteha ñandéve g̃uarã Ñandejára organisasión, ñañemboʼevaʼerã opavave ermanokuéra rehehápe, tahaʼe umi ungído térã umi “ambue ovechakuéra” rehehápe (Juan 10:16). Apóstol Pablo ningo ojerure umi kristiáno Efesoyguápe oñemboʼemi hag̃ua hesehápe ikatu hag̃uáicha Jehová ‘omeʼẽ chupe umi mbaʼe heʼivaʼerã’ ha ‘oikuaauka hag̃ua umi mbaʼe ojekuaaʼỹva marandu porã rehegua’ (Efe. 6:17-20). Ha nde, rejepokuaápa reñemboʼe ermanokuéra rehehápe?
10. Mbaʼéichapa ñanepytyvõ ñañemboʼéramo ñande rapichakuéra rehehápe?
10 Ñañemboʼéramo ñande rapichakuéra rehehápe ñanepytyvõta jaiko porã hag̃ua hendivekuéra. Oiméramo ndajaguerohorýi peteĩ ermánope, iporãta ñañemboʼe hesehápe. Upéva ñanepytyvõta ani hag̃ua jatrata vai chupe (1 Juan 4:20, 21). Peichagua ñemboʼe ningo iporãiterei ha ñanepytyvõ jaiko porãmba hag̃ua oñondive. Upéicha avei jahechaukáta japorohayhuha Jesucrístoicha (Juan 13:34, 35). Ha pe mborayhu ningo ou Ñandejára espíritu sántogui. Upévare ñañeporandumi: “Ajerurepaʼaína Jehovápe ijespíritu sánto? Ajerurépa chupe aporohayhu, avyʼa, chepyʼaguapy, chepasiénsia, chepyʼaporã, chembaʼeporã, ajerovia, chembaʼerechakuaa ha ajejokokuaa hag̃ua? (Luc. 11:13; Gál. 5:22, 23.) Upéicharõ, jaʼe ha jajapóvare jahechaukáta jahejaha Ñandejára espíritu ñanesãmbyhy (jaleemína Gálatas 5:16, 25).
11. Mbaʼérepa iporã jajerure ñande rapichakuérape oñemboʼe hag̃ua ñanderehehápe?
11 Iporã avei tuvakuéra oñemboʼe ifamiliakuéra rehehápe. Pór ehémplo, og̃uahẽramo ijapysapekuéra itaʼýra okopiaseha orrendi jave, ikatu oñemboʼe hesehápe ha oipytyvõ chupe la Biblia rupive ohechakuaa hag̃ua ndovaleiha ojapo upéicha. Apóstol Pablo heʼivaʼekue voi umi Corintoyguápe: ‘Roñemboʼe Ñandejárape ani hag̃ua pejapo mbaʼeve ivaíva’ (2 Cor. 13:7). Jehová ningo oguerohoryeterei ñaneumílderamo ha ñañemboʼe chupe ñande rapichakuéra rehehápe. Ha upéicha avei ojehechakuaáta mbaʼeichaguápa ñande (jaleemína Proverbios 15:8). Ñande avei ikatu jajerure ñande rapichakuérape oñemboʼe hag̃ua ñanderehehápe, Pablo ojapo haguéicha. Haʼe heʼi: ‘Peñemboʼékena orerehe, roikuaa añetehápe orepyʼaporãha ha hiʼãite niko oréve rojapo hekopete opa mbaʼe’ (Heb. 13:18, BNP).
Mbaʼépa ojekuaáta avei ñane ñemboʼére?
12. Mbaʼérepa akóinte ñanemanduʼavaʼerã ñañemboʼe jave?
12 Ojekuaápa ñane ñemboʼére javyʼa ha ñanekyreʼỹha jaservívo Jehovápe? Ñañemboʼe javépa ñanemanduʼa predikasiónre ha Ñandejára rembipota rehe, oñemombaʼeguasu ha oñemopotĩ hag̃ua Héra? Koʼã mbaʼére ningo ñande akóinte ñanemanduʼavaʼerã ñañemboʼe jave. Jesús heʼivaʼekue mbaʼéichapa oñeñemboʼevaʼerã: “Ore Ru yvágape reiméva, toñemombaʼe nderéra marangatu. Eju oresãmbyhy, tojejapo ne rembipota yvy ári yvagapeguáicha” (Mat. 6:9, 10).
13, 14. Mbaʼépa ojekuaa avei ñane ñemboʼére?
13 Ñane ñemboʼére ningo ojekuaa mbaʼépa ñamombaʼeve, jaipota ha jajapose. Jehová ningo oikuaa porã mbaʼeichaguápa ñande. Proverbios 17:3-pe heʼi voi: “Tatápe ojehecha mbaʼeichaguápa óro ha pláta, ha yvypóra pyʼapy katu Ñandejára oikuaa”. Upéicharõ Ñandejára oikuaa porã mbaʼépa jareko ñane korasõme (1 Sam. 16:7). Haʼe oikuaa porã voi mbaʼépa ñapensa ermanokuérare, umi rreunión ha predikasiónre. Oikuaa avei mbaʼépa ñapensa umi ungídore (Mat. 25:40). Jehová ningo oikuaa porã hína jaipotápa omeʼẽ ñandéve la jajeruréva chupe térãpa jajepokuaágui reínte jajerure ha jarrepetipa. Jesús heʼivaʼekue voi: ‘Peñemboʼe jave ani pene ñeʼẽ heta rei, ojapoháicha umi Ñandejárare ojeroviaʼỹva. Haʼekuéra niko oimoʼã oñeʼẽ heta haguére Ñandejára ohendutaha chupekuéra’ (Mat. 6:7).
14 Umi mbaʼe jaʼéva ñañemboʼe jave ningo ohechauka avei mbaʼeichaitépa jajerovia Ñandejárare. David heʼivaʼekue Jehovápe: ‘Nde niko upe chemoʼãva, óga yvate imbaretévaicha umi cherayhuʼỹva renondépe. Akóinte ngaʼúraʼe nde rógape aiko, tañemoʼã ndepepo guýpe’ (Sal. 61:3, 4). La Biblia ningo ohechauka porã Ñandejára oñangarekoha ñanderehe (Rev. 7:15). Tuichaiterei ñandepyʼaguapy ñañemboʼe jave Jehovápe jaikuaágui Haʼe oĩha ñande ykére jahasa asy jave (jaleemína Salmo 118:5-9).
15, 16. Maʼerãpa ñanepytyvõta ñañemboʼe ñande pyʼaite guive?
15 Ñañemboʼéramo ñande pyʼaite guive ñanepytyvõta jahechakuaa hag̃ua mbaʼépa añetehápe jaipota. Pór ehémplo, ñañemboʼe jave Jehovápe oiko hag̃ua ñandehegui ansiáno, jajerurepañaína ñaipytyvõségui ermanokuérape ha ñambaʼaposevégui Jehovápe g̃uarã. Térãpa jajerureñaína ñañemombaʼeguasuségui ha jarekoségui ermanokuérape ñandepoguýpe. Jehová organisasiónpe ningo ndaupeichaiete ojejapo la kósa (jaleemína 3 Juan 9, 10 ha Lucas 22:24-27). Ñañemboʼéramo ñande pyʼaite guive Ñandejárape, haʼe ñanepytyvõta jaikuaa hag̃ua ñandepyʼaporãguipa jajapose peteĩ mbaʼe térãpa tekotevẽ ñakambia ani hag̃ua oñembohapo mbaʼe vai ñane korasõme.
16 Oiméne heta ermána omendáva oipota iména oservi de siérvo ministérial ha upéi ansiánoramo. Umi ermána ikatu oñemboʼe Jehovápe upévare ha hekomarangatu rupive oipytyvõ iménape ohupyty hag̃ua umi priviléhio. Upéva ningo iñimportantehína, kongregasiónpe oñepensáva peteĩ ermánore odepende avei hembireko ha ifamiliakuéra heʼi ha ojapóvare.
Ñañemboʼe jave kongregasiónpe
17. Mbaʼérepa iporã ñañemboʼe avei ñaneañohápe?
17 Jesús ningo ohomivaʼerã mombyry umi hénte atýgui oñemboʼe hag̃ua haʼeñohápe (Mat. 14:13; Luc. 5:16; 6:12). Ha ñande avei ñaikotevẽ sapyʼánte ñaime ñaneañohápe ñañemboʼe hag̃ua. Upéicha jajapóramo ndahasyivéta jadesidi hag̃ua peteĩ mbaʼe Ñandejárape ogustaháicha ha upéva ñanepytyvõta ñamombareteve hag̃ua ñande jerovia. Péro Jesús oñemboʼevaʼekue avei hénte atýpe ha hesehapekuéra. Ha ñandépa mbaʼéicha ñañemboʼevaʼerã ñane ermanokuéra rehehápe?
18. Mbaʼéichapa oñeñemboʼevaʼerã ñane rreunionhápe enterove ermáno rérape?
18 Ñane rreunionhápe umi ermáno iñeʼẽrendúva Ñandejárape oñemboʼe enterove ermáno rérape (1 Tim. 2:8). Ha oñemboʼepávo, enterove oĩva upe atýpe heʼivaʼerã “amén” térã “taupéicha”. Péro upearã haʼekuéra oipotavaʼerã avei oiko upe ñemboʼépe ojeʼéva. Pe padrenuéstrope ningo Jesús ndeʼirivaʼekue mbaʼeve ombopochýtava avavépe (Luc. 11:2-4). Ndoikói avei omboysýi umi hénte provléma ha mbaʼe mbaʼépa oikotevẽ hikuái. Umi mbaʼe ningo jahejavaʼerã ñañemboʼéta jave ñaneañohápe ha ndahaʼéi hénte atýpe. Upéicha jave avei ndajaʼeivaʼerã umi informasión noñemombeʼuivaʼerã.
19. Mbaʼépa ndovaléi jajapo oñeñemboʼe jave rreunionhápe?
19 Rreunionhápe oĩ jave oñemboʼéva ñanderérape, jahechaukavaʼerã ‘ñamombaʼeguasuha Ñandejárape’ (1 Ped. 2:17). Oĩ ningo umi mbaʼe ndaivaíriva jajapo ambue hendápe péro noĩporãmoʼãi jajapóramo rreunionhápe (Ecl. 3:1). Pór ehémplo, oĩramo umi ermáno oñakãramambáva ojopóre oñeñemboʼe jave, ikatu umi ouramóvape ndogustái térã oñemaña hesekuérante. Umi omendáva ningo ikatu ojagarra hembirekópe ipógui, péro noĩporãmoʼãi oañuãramo chupe oñeñemboʼe jave, ikatúgui omoñepysãnga ambuépe. Ikatu ojeʼe hesekuéra opensaha ojuehénte opensarangue Jehováre. Upévare ñañehaʼãkena ñaneakãguapy ha jarrespeta enterovépe ha ‘jajapo opa mbaʼe oñemombaʼeguasu hag̃ua Jehovápe’. Ha aníkena jajapo mbaʼeve ndogustamoʼãiva ha ombopochýtava ambuépe (1 Cor. 10:31, 32; 2 Cor. 6:3).
Mbaʼépa ikatu jajerure ñañemboʼe jave?
20. Emyesakãmína Romanos 8:26, 27-pe heʼíva.
20 Sapyʼánte ikatu ndajaikuaái mbaʼépa jajeruréta ñañemboʼe jave ñaneañohápe. Apóstol Pablo ningo heʼivaʼekue: ‘Ñande ndajajerukuaái pe jajerureséva. Ha katu, pe espirituete voi ojerure ñanderehe pyahẽ reheve ikatuʼỹva jaʼe. Ha Ñandejára ohecháva ñande pyʼapy oikuaa pe espíritu heʼiséva’ (Rom. 8:26, 27, JMP). Jehová omoĩka la Bíbliape mbaʼéichapa oñemboʼevaʼekue isiervokuéra yma guare. Haʼe voi ohaika rupi la Biblia oikuaa porã mbaʼépa heʼise umi kuimbaʼe ohaivaʼekue Ñandejára Ñeʼẽ. Jehová ningo ñandekuaa porãiterei. Upévare haʼe ohendu umi ñemboʼe ojehaivaʼekue Iñeʼẽme ñane ñemboʼerõguáicha ha okumpli. Upéicha avei Jehová ombohovái ñane ñemboʼe pe espíritu sánto ojeruréramo ñanderehehápe. Ha jaikuaavévo la Biblia heʼíva, jaikuaa porãvéta mbaʼépa jajerurevaʼerã Jehovápe.
21. Mbaʼépa jahecháta pe artíkulo oúvape?
21 Péicha jahecha ñane ñemboʼére ojekuaaha mbaʼeichaguápa ñande. Pór ehémplo ojekuaa ñanderehe Jehovápa ñaneamigoitehína ha jaikuaa porãpa Iñeʼẽ heʼíva (Sant. 4:8). Pe artíkulo oúvape jahecháta umi ñemboʼe oĩva la Bíbliape ha mbaʼe ñeʼẽpa ojeporu ojehechauka hag̃ua oñemombaʼeha Ñandejárape. Upéva ñanepytyvõta jajepyʼamongeta hag̃ua mbaʼéichapa ñande ñañemboʼeñaína.
Embohovaimína koʼã porandu
• Mbaʼéichapa ñañemboʼevaʼerã Jehová ñanerendu hag̃ua?
• Mbaʼérepa ñañemboʼevaʼerã ñane ermanokuéra rehehápe?
• Mbaʼérepa ñane ñemboʼe ohechauka mbaʼeichaguápa ñande ha mbaʼépa jajapose?
• Mbaʼépa ndovaléi jajapo oñeñemboʼe jave rreunionhápe?
[Porandu ñahesaʼỹijóva]
[Nóta oĩva taʼanga ndive páhina 4]
Ndépa rejepokuaa remombaʼeguasu Jehovápe ha reagradese chupe?
[Nóta oĩva taʼanga ndive páhina 6]
Oñeñemboʼe aja rreunionhápe jahechaukavaʼerã ñamombaʼeguasuha Jehovápe