Oñeporandúva jepi

Oñakapytĩvaʼerãpa peteĩ ermána ointerpretáta jave peteĩ diskúrso lenguaje de séñaspe rreunionhápe térã ñande aty guasuhápe?

Enterove ermanakuéra ningo oñakãpytĩvaʼerã ojapo jave iména térã peteĩ ermáno rembiapo kongregasionpegua. Upéva ningo apóstol Pablo heʼimavaʼekue voi: ‘Opa kuña oñemboʼe térã oprofetisa jave noñakãpytĩriramo omotĩ pe omoakãvape chupe’. Ha Ñandejára Ñeʼẽme heʼi voi ‘pe kuñáme omoakãha kuimbaʼe’ (1 Cor. 11:​3-10, ÑÑB). Upévare umi ermána oñakãpytĩva térã oñakãguáva ojapo jave peteĩ ermáno rembiapo ohechauka orrespeta, omombaʼe ha oñemoĩha pe Ñandejára kongregasión omoakãva poguýpe (1 Tim. 2:​11, 12). a

Ha mbaʼépa ojapóta peteĩ ermána ointerpreta jave lenguaje de séñaspe diskúrso ojapóva peteĩ ermáno? Jaikuaa ningo haʼe ombohasanteha pe diskursánte heʼíva ha ndahaʼéi haʼe pe oporomboʼevahína. Péro koʼág̃a rupi ojehechave umi ointerpretávape, ojeporu rupi téle ha pantalla gigante ojejapo hag̃ua upéva. Ha pe diskursántepe katu ikatu voi ni ndojehechaihína. Upéicharõ iporãta peteĩ ermána ointerpretáva lenguaje de séñaspe oñakãpytĩ ohechauka  hag̃ua ndahaʼeiha haʼe la ojapóva pe diskúrso térã la oñemoñeʼẽvahína.

Upéicharõ piko peteĩ ermána otradusíva ótro idióma oñeñeʼẽvape oñakãpytĩvaʼerã avei? Nahániri, natekotevẽi. Umíva ningo ndojapói lenguaje de séñaspe ojejapoháicha. Pórke peteĩ ermána ambue ñeʼẽme otradusíva ningo noñemoĩri voi ojehechaiterei hag̃uáme chupe. Ikatu voi oguapyha guivénte otradusi ha oñemboʼýramo pe diskursánte ypýpe katu, omaña pe diskursánte rehe otradusi aja. Upévare umi ermána natekotevẽi oñakãpytĩ.

Ha oñakãpytĩvaʼerã piko koʼág̃a avei umi ermána ointerpretáva lenguaje de séñaspe umi diskúrso ojejapóva Eskuéla Jaiporukuaa Hag̃ua la Bíbliape, umi komentário oñemeʼẽva Ñandejára Ñeʼẽ Ñehesaʼỹijo jave, Aty Ñanemboʼéva Japredika Hag̃ua ha Ñemañaha Ñehesaʼỹijo jave? Natekotevẽmoʼãi ningo oñakãpytĩ ointerpreta jave komentário térã ermanakuéra ojapo jave ipárte térã demostrasión. Péro tekotevẽta oñakãpytĩ ointerpreta jave umi diskúrso ermanokuéra ojapóva, umi omoakãva pe Ñemañaha ha Ñandejára Ñeʼẽ Ñehesaʼỹijo térã ointerpreta jave kántiko. Jaikuaa ningo peteĩ ermána ikatuha ointerpreta rreunionhápe umi ermáno, ermána, mitãnguéra ha ansianokuéra heʼíva. Upévare ikuentavevaʼerã pe ermána ointerpretáva oñakãpytĩ rreunión aja entéro.

[Nóta]