Ñandejára ñandesalva pe Mesías rupive
Ñandejára ñandesalva pe Mesías rupive
‘Adán rupive opavave omanoháicha, Cristo rupive opavave oikove jey vaʼerã.’ (1 COR. 15:22, BNP.)
1, 2. a) Mbaʼépa ojapo Andrés ha Felipe oikuaa porã rire Jesús haʼeha pe Mesías? b) Mbaʼérepa ikatu jaʼe koʼág̃a rupi jarekoha hetave mbaʼe jaguerovia hag̃ua Jesús haʼeha pe Mesías?
ANDRÉS oikuaa porãiterei vaʼekue Jesús de Nazaret haʼeha pe Ungido térã Ñandejára oiporavovaʼekue. Upévare heʼi iñermáno Pédrope: “Rojuhúma pe Mesíaspe”. Ha Felipe oguerovia avei upéva ha oho iñamígo Natanael rendápe heʼi hag̃ua chupe: ‘Rojuhu ningo pe kuimbaʼe Moisés ha profetakuéra imanduʼa hague Ñandejára Kuatiañeʼẽme. Ha upéva niko Jesús, José raʼy Nazaretgua’ (Juan 1:40, 41, 45, ÑÑB).
2 Ha ndépa reguerovia avei Jesús haʼeha pe Mesías ñandesalvátava? (Heb. 2:10.) Koʼág̃a rupi jareko hetave mbaʼe jaguerovia hag̃ua Jesús haʼeha pe Mesías, ndahaʼéi umi hemimboʼe ypykuéicha. Jareko la Biblia omombeʼúva Jesús onase ypy guive oñemoingove jey peve ohechauka hague haʼeha pe Mesías térã Cristo (jaleemína Juan 20:30, 31). Ñandejára Ñeʼẽ ohechauka avei Jesús osegitaha ombaʼapo Mesíasramo yvágape (Juan 6:40; jaleemína 1 Corintios 15:22). Upévare ñande ikatu avei jaʼe ‘jajuhumaha pe Mesíaspe’. Péro, jahecha raẽmína mbaʼéichapa Jesús remimboʼekuéra yma guare oikuaarakaʼe ojuhumaha pe Mesías.
Oñemyesakã mbeguekatúpe umi ‘mbaʼe ñemimby’ pe Mesías rehegua
3, 4. a) Mbaʼépa oipytyvõ Jesús remimboʼekuérape oikuaa hag̃ua mávapa pe Mesías? b) Ikatúta piko peteĩ tapicha okumplipa reínte umi profesía?
3 Mbaʼérepa Jesús remimboʼekuéra heʼi hese haʼeha pe Mesías? Jehová oikuaaukágui mbeguekatúpe iprofetakuéra rupive mbaʼe mbaʼépa ojapóta pe Mesías. Peteĩ vivlísta omyesakã hag̃ua upe mbaʼe ombojoja peteĩ estatua oñembojaʼopavaʼekue rehe. Heʼi heta kuimbaʼe ndojokuaáiva oñembyatyha peteĩ hendápe ha káda uno orekoha peteĩ estatua pehẽngue. Ha mbaʼépa jaʼéta káda pehẽngue oñemohenda porãmba ha oiko jeýramo chugui peteĩ estatua? Jaʼekuaa peteĩ tapicha ombojaʼopa hague upe estatua ha omondo káda pehẽngue umi kuimbaʼépe. Upéicha avei umi profesía oĩva Ñandejára Ñeʼẽme: káda uno oñeʼẽ michĩmi pe Mesías rehe ha ñantendepáramo jaikuaáta mávapa pe Mesías.
4 Peteĩ tapicha piko ikatúta okumplipa reínte umi profesía? Hasýta upéva. Peteĩ karai arandu heʼi hasyha oiko hag̃ua upéva. Haʼe heʼi voi “Jesús añoite” okumplipaha umi profesía oñeʼẽva pe Mesías rehe.
5, 6. a) Mbaʼépa Jehová ojapóta pe mbói ypykuére? b) Mbaʼéichapa Jehová oikuaaukavaʼekue ohóvo mávapa pe ñemoñare?
5 Umi profesía oñeʼẽva pe Mesías rehe ningo oĩ umi ‘mbaʼe ñemimby’ Jehová heʼivaʼekue apytépe (Col. 1:26, 27; Gén. 3:15). Umi mbaʼe ñemimby apytépe oĩ heta mbaʼe iñimportantetereíva. Pór ehémplo Jehová heʼivaʼekue mbaʼépa ojapóta pe ‘mbói ypykue’ rehe. Upéva ningo Satanás hína ha ikáusare yvyporakuéra oĩ pekádo ha ñemano poguýpe (Rev. 12:9). Mbaʼéichapa Jehová ojapóta upéva? Jehová heʼimavaʼekue pe kuña ñemoñare omonguʼitaha pe mbói akã. Péicha oñehundíta pe opuʼã ñepyrũ vaʼekue Jehováre, pe ogueruvaʼekue mbaʼasy ha ñemano. Péro upe mboyve Jehová ohejáta Satanáspe ‘oisuʼu ipytápe’ pe kuña ñemoñarépe.
6 Mbeguekatúpe ojekuaaukavaʼekue mávapa pe ñemoñare. Ñepyrũrã Jehová opromete Abrahánpe: ‘Opa tetã ko yvy arigua oñevendesíta ne ñemoñare rupive’ (Gén. 22:18). Tiémpo rire, Moisés heʼi avei pe ñemoñare haʼetaha ‘peteĩ proféta’ tuichavéva chugui (Deu. 18:18, 19). Upéi Davídpe ojeʼe avei pe Mesías onasetaha ifamiliarégui ha oisãmbyhytaha hendaguépe opa árare. Umi proféta ningo heʼivaʼekue avei upéicha (2 Sam. 7:12, 16; Jer. 23:5, 6).
Mbaʼérepa jaʼe Jesús haʼeha pe Mesías?
7. Moõguipa ou pe ‘ñemoñare’?
7 Pe ‘ñemoñare’ ningo ouvaʼerã pe ‘kuñágui’ térã Jehová organisasión yvagapeguágui, oĩhágui umi ánhel. Ha Ñandejára Raʼy peteĩetéva ningo oheja opa mbaʼe yvagapegua onase hag̃ua ko yvy ape ári yvypóra perféktoramo (Fili. 2:5-7; Juan 1:14). Jesúspe ningo oñehenói ‘Ñandejára Raʼy imarangatúva’ pórke isy María hyeguasuvaʼekue espíritu sánto rupive (Luc. 1:35).
8. Mbaʼe profesíapa okumpli Jesús ohórõ guare Juan rendápe ovautisa hag̃ua chupe?
8 Umi profesía ohechauka pe Mesías onasevaʼerãha Belénpe, ha upepete voi onasevaʼekue Jesús (Miq. 5:2). Ha umi profesía ohechauka avei arakaʼépa pe Mesías ojekuaaukavaʼerã. Upévare síglo primérope umi hudío ohaʼarõitereivaʼekue upe Mesíaspe, oikuaa rupi hikuái ojekuaaukapotaiteha. Ha ohechárõ guare Juan el Bautístape, oñeporandu hikuái: ‘Kóvapa haʼéne pe Cristo?’. Juan katu ombohovái: ‘Cherapykuéri ouhína pe ipuʼakavéva chehegui’ (Luc. 3:15, 16). Jesús orekórõ guare 30 áño oho Juan rendápe ovautisa hag̃ua chupe. Ojeʼevaʼekue voi ningo pe Mesías ojekuaaukavaʼerãha áño 29 opakuévoma (Dan. 9:25). Upérõ Jesús oñepyrũ opredika heʼívo: ‘Oñekumplíma upe tiémpo ojeʼevaʼekue, ha Ñandejára Rréino hiʼag̃uíma’ (Mar. 1:14, 15).
9. Mbaʼépa oikuaa porã vaʼekue Jesús remimboʼekuéra?
9 Péro naenterombaʼéi oñekumpli umi hénte ohaʼarõ haguéicha. Jesús rehe ningo ojeʼevaʼekue rreiha, péro upe riréma ojekuaa haʼe ogovernataha yvágape ha amo gotyove oikovaʼerãha upéva (Juan 12:12-16; 16:12, 13; Hech. 2:32-36). Upéicharõ jepe Jesús oporandu hemimboʼekuérape: “Ha peẽ piko mbaʼe peje, mávapa che?”. Pedro heʼi voi: ‘Nde haʼehína pe Cristo, Ñandejára Raʼy’ (Mat. 16:13-16). Upéicha ojapo jey Pedro heta tapicha ohejárõ guare Jesúspe, ombopochýgui chupekuéra umi mbaʼe haʼe omboʼevaʼekue (jaleemína Juan 6:68, 69).
Ohenduvaʼerã hikuái pe Mesíaspe
10. Mbaʼérepa Jehová heʼivaʼekue oñehendu hag̃ua Jesúspe?
10 Ñandejára Raʼy peteĩetéva ningo oikovaʼekue yvágape ha ipoderosoiterei. Upéi haʼe ou oñeʼẽ Itúva rérape ko yvy ape ári (Juan 16:27, 28). Upévare Jesús heʼivaʼekue: ‘Ko che pomboʼéva ndahaʼéi chembaʼe, pe chembouvaʼekue mbaʼénte’ (Juan 7:16, ÑÑB). Jesús hova oñekambiapa ha ijao morotĩ sakã ha omimbipárõ guare, Jehová heʼi: “Kóva hína che Raʼy aiporavovaʼekue, pehendúke chupe” (Luc. 9:35, NM). Upéicharõ hemimboʼekuéra ohendu térã iñeʼẽrenduvaʼerã Jesúspe. Haʼekuéra ningo ojerovia ha ojapovaʼerã iporãva, upéicharõ añoite Ñandejára oguerohorýta chupekuéra ha ohupytýta jeikove opaveʼỹva (Juan 3:16, 35, 36).
11, 12. a) Mbaʼérepa yma heta hudío ndohechakuaaséi Jesús haʼeha pe Mesías? b) Mávapa umi ohechakuaavaʼekue Jesús haʼeha pe Mesías?
11 Jesús ningo okumplipaite umi mbaʼe ojapovaʼerã pe Mesías, upéicharõ jepe heta hudío itiémpope guare ndohechakuaaséi upéva. Mbaʼérepa? Haʼekuéra ningo opensámakuri mbaʼeichaguátapa pe Mesías, oimoʼã voi haʼetaha peteĩ mburuvicha guasu ha oguenohẽtaha chupekuéra Roma poguýgui (jaleemína Juan 12:34). Péro umi profesía ohechaukavaʼekue pe Mesías oikuaavaʼerãha mbaʼépa heʼise mbaʼasy ha jehasa asy, ojeapoʼi ha ndojehayhuivaʼerãha chupe, ha amo ipahápe ojejukavaʼerãha. Umi hudío ningo arakaʼeve ndohayhumoʼãi peichaguápe! (Isa. 53:3, 5.) Jesús remimboʼekuéra apytépe jepe oĩvaʼekue ipochýva nomosãsói haguére pe tetã Israélpe. Upéicharõ jepe osegi omoirũ Jesúspe, ha upe riréma ontendepa hikuái la oikóva (Luc. 24:21).
12 Heta oĩvaʼekue avei omboykéva Jesúspe opensa rupi ijetuʼuetereimaha umi mbaʼe omboʼéva. Jesús heʼivaʼekue haʼekuéra oike hag̃ua Ñandejára Rréinope tekotevẽha ‘oñembyesarái ijehegui’, ‘hoʼu Cristo roʼo ha ruguy’, ‘onase pyahu jey’ ha ‘ndojeheʼái ko múndore’ (Mar. 8:34; Juan 3:3; 6:53; 17:14, 16). Umi irríko, oñemombaʼeguasu ha hovamokõivape ijetuʼuetereíma ojapo hag̃ua upéva. Péro umi hudío iñumíldevape ndahasýi ohechakuaa hag̃ua Jesús haʼeha pe Mesías. Umi Samariaygua ningo upéicha avei, haʼekuéra heʼi voi: ‘Roikuaa añete pe Cristo haʼeha yvyporakuéra Salvadór’ (Juan 4:25, 26, 41, 42, BNP; 7:31).
13. Mbaʼérõ guarépa oñekumpli ñepyrũ pe profesía oĩva Génesis 3:15-pe?
13 Jesús heʼivaʼekue voi umi saserdóte ojukaukataha chupe, umi ndahaʼéiva hudío omosãingotaha chupe peteĩ yvyráre ha tres día haguépe Ñandejára omoingove jeytaha chupe (Mat. 20:17-19). Jesús oĩrõ guare pe Sanedrín renondépe heʼi ijehe haʼeha “pe Cristo” ha “Ñandejára Raʼy”. Upévare heʼi hese hikuái oñeʼẽvaiha Ñandejárare (Mat. 26:63-66, BNP). Upe rire, Jesúspe ojegueraha Pilato rendápe. Upérõ Pilato ohechakuaa Jesús ‘ndojapói hague mbaʼeve ivaíva ojejuka hag̃ua chupe’. Péro umi hudío heʼi avei hese opuʼãha pe goviérnore. Upévare Pilato ontrega chupekuéra (Luc. 23:13-15, 25). Haʼekuéra omboyke pe ‘oporomoingovévape’ ha ohecha mbaʼéichapa ojukaukáta chupe, ohechakuaáramo jepe hikuái haʼeha Ñandejára remimbou (Hech. 3:13-15). Ha umi profesíape heʼiháicha Jesúspe ojejuka peteĩ yvyráre pe Pascua áño 33-pe (Dan. 9:26, 27; Hech. 2:22, 23). Upérõ oñekumpli pe profesía oĩva Génesis 3:15-pe, upépe heʼi ‘pe mbói oisuʼutaha ipytápe pe ñemoñarépe’.
Mbaʼérepa tekotevẽ rakaʼe omano pe Mesías?
14, 15. a) Mbaʼérepa Jehová oheja Itaʼýra omano? b) Mbaʼépa ojapo Jesús oñemoingove jey rire?
14 Jehová oheja Itaʼýra omano mokõi mbaʼe iñimportantetereívare. Primero oñekumpli hag̃ua pe párte iñimportantevéva pe ‘mbaʼe ñemimby’ rehegua. Upearã ningo Jesús iñeʼẽrendu Ñandejárape omano meve. Upéicha ohechauka peteĩ yvypóra perfékto ikatuha omombaʼeguasu Ñandejárape añoite ha odefende Isãmbyhy ombohasa asýramo jepe chupe Satanás (1 Tim. 3:16). Segundo katu Jesús voi heʼivaʼekue: ‘Pe Yvypóra Raʼy ou omeʼẽ hag̃ua hekove, opaga ha oguenohẽ hag̃ua yvyporakuérape pekádo poguýgui’ (Mat. 20:28, NM). Péicha jahecha Jesús omeʼẽ rupi hekove opaga hague ñandepeʼa hag̃ua pekádo poguýgui. Upéicha rupi ikatu avei jaikove opa ára g̃uarã. Upearã jagueroviavaʼerã Ñandejára omoĩ hague Jesúspe ñandesalva hag̃ua (1 Tim. 2:5, 6).
15 Jesucrístope ningo tres día haguépe oñemoingove jey ha upe guive cuarenta día pukukue ojechauka hemimboʼekuérape. Maʼerãpa upéva? Oikuaa hag̃ua hikuái haʼe oikoveha ha heʼive hag̃ua chupekuéra mbaʼépa ojapovaʼerã (Hech. 1:3-5). Upe rire Jesús oho yvágape omeʼẽ hag̃ua Jehovápe isakrifísio repykue. Upéi ohaʼarõ oñemeʼẽ peve chupe derécho ogoverna hag̃ua. Ha upe aja entéro ningo haʼe ojapo heta mbaʼe.
Pe Mesías omohuʼãmbotaitéma hembiapo
16, 17. Mbaʼépa ojapo Jesús oho guive yvágape?
16 Jesúspe oñemoingove jeyha ára guive oisãmbyhy la kongregasión ha ohechapa opa mbaʼe ojejapóva pype (Col. 1:13). Upéi og̃uahẽ pe tiémpo Jesús ogoverna hag̃ua rréiramo Ñandejára Rréinope. Umi profesía ha umi mbaʼe oikóva ko múndope ohechauka Jesús oñepyrũ hague oisãmbyhy yvága guive áño 1914-pe ha oñepyrũmaha ára paha (Mat. 24:3; Rev. 11:15). Upe riremínte, Jesús ha hiʼanhelkuéra omosẽ Satanás ha idemoniokuérape yvágagui (Rev. 12:7-10).
17 Jesús opredika ha omboʼe ñepyrũ vaʼekue áño 29-pe ha upe tembiapo ningo oñemohuʼãmbotaitéma. Ha koʼẽrõitéma haʼe ohusgáta yvyporakuérape. Umi ipyʼaporãva ojeroviavaʼekuépe hese heʼíta oho hag̃ua ‘oike pe Rréino oñembosakoʼivaʼekuépe chupekuéra g̃uarã Ñandejára ojapo ypy guive ko múndo’ (Mat. 25:31-34, 41, BNP). Péro umi omboykevaʼekuépe chupe katu, Jesús ijehérsito yvagapegua reheve ohundíta, ha upéva ojapóta ohundi vove ko múndo aña. Upévo avei Jesús oñapytĩta Satanáspe ha opoíta chupe idemoniokuérandi “pe yvykua pypukúpe” (Rev. 19:11-14; 20:1-3, BNP).
18, 19. Mbaʼépa ojapóta pe Mesías ha mbaʼépa ohaʼarõ umi iñeʼẽrendúvape?
18 Jesús ogoverna aja mil áño pukukue ohechaukáta oĩ porãha oñehenói chupe ‘Mboʼehára Ikatupyrýva, Jára Ipoderósova, Túva Opa Ára Oikovéva ha Mburuvicha Guasu Pyʼaguapy Reruha’ (Isa. 9:6, 7). Igoviérno poguýpe yvyporakuéra ohupytýta perfeksión, umi oñemoingove jey vaʼekue entéro (Juan 5:26-29). Pe Mesías oisãmbyhýta umi iñeʼẽrendúvape ha oguerahata chupekuéra ‘y oporomoingovéva oĩhápe’. Upéicha rupi ikatúta oĩ porã hikuái Jehovándi (jaleemína Revelación 7:16, 17). Péro upéi ojepoi jeýta Satanás ha idemoniokuéragui oipyʼaraʼã hag̃ua Jehová siervokuérape. Ha ipahaitépe umi naiñeʼẽrendúiva ndive Satanás ha idemoniokuérape ‘ojeitýta pe lágo hendyhápe tata ha asúfre’. Upéicha oñemonguʼíta pe ‘mbói’ akã ha oñehundietéta chupe (Rev. 20:10).
19 Jesús ningo ojapo hekoitépe umi hembiapo pe Mesíasramo. Upéicha rupi ko yvýgui oikóta peteĩ hardín neporãmba jepéva ha oikóta pype yvyporakuéra ojesalvavaʼekue. Haʼekuéra hesãita ha oikóta vyʼápe. Ha Jehová réra oñemopotĩta opa mbaʼe vai ojeʼevaʼekuégui hese ha ojehecháta haʼeñoite orekoha derécho oisãmbyhývo ko univérso. Aje piko hetaite mbaʼe porã ohaʼarõ umi iñeʼẽrendúva Jehová oiporavovaʼekuépe!
Ñandépa jajuhúma pe Mesíaspe?
20, 21. Mbaʼérepa ñañeʼẽvaʼerã la héntepe Mesías rehe?
20 Áño 1914 guive jaiko pe tiémpo oñehenóivape parousía térã Jesucristo ogovernaha tiémpope Ñandejára Rréinope. Ha ndajahecháiramo jepe upéva, umi profesía oñekumplíva ohechauka ñaimemaha upe tiémpope (Rev. 6:2-8). Péro heta oĩ ndohechakuaaséiva upéva yma umi hudío ojapo haguéicha. Koʼág̃a rupi la hénte ohaʼarõ avei peteĩ mesías polítiko térã peteĩ oporopytyvõtava umi goviérno koʼag̃agua rupive. Péro ñande jahechakuaa Jesús ogovernamaha yvágape. Mbaʼéichapa ñañeñandu jaikuaa rire ko mbaʼe? Oiméne jaʼe voi Jesús remimboʼekuéra heʼi haguéicha: “Rojuhúma pe Mesíaspe”.
21 Koʼýte koʼág̃a rupi tekotevẽ jaikuaauka la héntepe Jesús haʼeha pe Mesías ha mbaʼépa ojapohína. Jajapóramo upéicha ñamombaʼevéta umi mbaʼe haʼe ojapovaʼekue ha ojapótava koʼẽrõite ñanderehehápe. Ñande oimevaʼerã ñañemongetáma ñane amigokuéra ha ñane hentekuéra ndive Jesús rehe, ojapo haguéicha Andrés ha Felipe. Péicha jahecha ko artíkulo ñanepytyvõha jajeroviave hag̃ua jahávo Ñandejára ñandesalvataha Jesús pe Mesías rupive.
Ñambohovaimína koʼã porandu
• Mbaʼéichapa Jesús remimboʼekuéra ojuhurakaʼe pe Mesíaspe?
• Mbaʼérepa Jehová oheja Itaʼýra omano?
• Mbaʼépa ojapóta koʼẽrõitéma pe Mesías?
[Pornadu ñahesaʼỹijóva]
[Nóta oĩva taʼanga ndive páhina 21]
Mbaʼéicha rupípa umi hudío ikatu vaʼekue ohechakuaa Jesús haʼeha pe Mesías?
[Nóta oĩva taʼanga ndive páhina 23]
Ndépa remombeʼu la héntepe Jesús haʼeha pe Mesías ha mbaʼépa ojapo?