Nemanduʼápa koʼã mbaʼére?

Katuete revyʼáneraʼe releévo umi rrevísta Ñemañaha ramoite osẽvaʼekue. Ehechamína ikatúpa nemanduʼa koʼã mbaʼére:

• Añetehápepa oĩ Satanás?

La Biblia heʼi añetehápe Satanás oĩha. Haʼe ningo peteĩ espíritu aña ni michĩmi ndorrespetáiva Jehová ha Jesúspe. Umi mbaʼe vaiete oikóva ko múndope ohechauka avei Satanás oĩha. Hetaiterei ñande rapicha omano ñembyahýigui, heta tetãme katu oñehundipa rei umi tembiʼu hembýva. Oreko avei hikuái umi árma ipoderósova oñorairõ hag̃ua. Jahecha avei opárupi oñemongyʼa ha oñembyaipaha ko yvy. Upévare la Biblia heʼi voi Satanás rehe haʼeha ‘umi aña ruvicha guasu’ (Mateo 12:24) (wp 10-12, páhina 15).

• Peteĩ jey ningo Jesús osalva Pédrope ani hag̃ua ojahoga, mbaʼépa ñanemboʼe upe oikovaʼekue? (Mat. 14:​28-31.)

Jahechakuaáramo peteĩ ermáno haʼeteha ndojeroviavéimava Ñandejárare, ñañehaʼãvaʼerã ñaipytyvõ ha ñamokyreʼỹ chupe (15/9, páhina 8).

• Mbaʼe sakrifísiopa ojapo Jehová ñandesalva hag̃ua?

Mbaʼeichaitépa oiméne Jehová ohasa asýraʼe ohechávo ojejahéi Itaʼýrare, oñeñembohory hese ha ojejuka chupe peteĩ mbaʼe vai apoháicha (15/9, páhina 28 ha 29).

• Mbaʼérepa iñimportanteterei pe Códice Vaticano?

Upéva ningo ojehaivaʼekue oiméne trescientos áño la Biblia ojejapopa rire. Pe códicepe oĩmbalénto pe Escrituras Hebreas ha Escrituras Griegas Cristianas. Pe Códice Vaticano ningo oipytyvõta umi traduktórpe oikuaa hag̃ua mbaʼéichapa rakaʼe pe kuatiañeʼẽ ypykue (wp 10-12, páhina 18-20).

• Mbaʼépa ñanemboʼe Proverbios 24:27?

Pe kariaʼy omendaséva ningo oĩvaʼerã okumpli hag̃uáicha irresponsavilida. Oñangarekovaʼerã hogayguakuérare. La Biblia heʼi voi pe ména omoĩvaʼerãha hogayguápe oikotevẽva, ohayhu ha ohekomboʼevaʼerãha chupekuéra Ñandejára Ñeʼẽ (15/10, páhina 12).

• Ohendúpa Ñandejára opaichagua ñemboʼe?

Opavave ikatu ñañemoag̃ui Ñandejárare. Haʼe oipota ñañemboʼe chupe ñande pyʼaite guive. Apóstol Juan ohechauka mbaʼeichagua ñemboʼépa ohendu Ñandejára: ‘Jajerovia niko Ñandejára rehe jajeruréramo chupe haʼe oipotaháicha ñanerendutaha’ (1 Juan 5:​14, JMP) (wp 01-03, páhina 30).

• Mbaʼérepa jaʼe Jehová ha Jesús imbaʼeporã ha opororrespetaha?

Jehová ningo ehémplo ñandéve g̃uarã, haʼéngo imbaʼeporã ha opororrespeta. Haʼéramo jepe Mburuvicha guasu ko univérsope, orrespeta ha otrata mborayhúpe yvyporakuérape. Pór ehémplo oñemongetárõ guare Abrahán ndive oiporu peteĩ ñeʼẽ evréo heʼiséva “por favor” (Gén. 13:14; Éxo. 4:6). Jehová ohechauka avei imbaʼeporãha ohendúvo yvyporakuérape (Gén. 18:​23-32). Jesús ningo imbaʼeporãiterei avei. Haʼe hembiapoiterei ha ikaneʼõramo jepe hory ha ipasiénsia la héntere. Haʼe opororrespeta ha enterovépe ohenói héra rupi (15/11, páhina 25).

• Mbaʼérepa Abigail ehémplo ermanakuérape g̃uarã?

La Biblia heʼi voi Abigail rehe ‘iñarandu ha ijukyha’ (1 Samuel 25:3). Haʼe ningo peteĩ kuña iñakãguapýva, iguápa ha oikuaáva ndofaltaiha mbaʼeve hógape. Jaʼekuaa voi hese ojoguaha pe kuña katupyrýpe Proverbios oñeʼẽ hague (Proverbios 31:​10-31). Abigail oikuaa omombaʼe ha iñeʼẽrenduvaʼerãha Jehovápe raẽ ha upéi iménape (wp 07-09, páhina 18-21).

• Mbaʼérepa Jesús oñemboʼe jave Jehovápe heʼi “Abba, che Ru”?

Peteĩ Enciclopedia heʼi: “Jesús tiémpope, umi mitã ohenoivaʼekue itúvape abba che ru. Péicha ohechauka hikuái ohayhu ha orrespetaha itúvape. Upévare Jesús oñemboʼe jave heʼívo Ñandejárape ‘Abba, che Ru’ ohechauka ñandéve ojogueraha porãitereiha itúva ndive ha ojoayhuha hikuái” (wp 04-06, páhina 13).