Vyʼapópe ha kyreʼỹme ñambaʼapo Jehovápe g̃uarã

JEHOVÁ ningo oipota hembiguaikuéra ovyʼa (Sal. 100:2). Upéicharõ jepe, ñambaʼapóvo Jehovápe g̃uarã hetaiterei mbaʼe jareko jajapovaʼerã. Ikatu jajevautisa mboyve voi ñaimoʼã nañanerembiapoitereiriha, péro upe rire ñambaʼapomavaʼerã Jehovápe g̃uarã ha ikatu ñanekaneʼõtereíma. Ikatu ñañeñandu vai avei ndaikatúigui jajapo hetave mbaʼe Jehovápe g̃uarã. Mbaʼépa ikatu jajapo akóinte vyʼápe jaservi hag̃ua Jehovápe? (Neh. 8:10.)

Koʼág̃a rupi ningo ijetuʼueterei la situasión ha jajejopy opáicha rei. Upévare tekotevẽ ñamohenda porã ñane rembiapokuéra. Apóstol Pablo ningo ohaivaʼekue ko konsého: ‘Pemaʼẽ porãkena mbaʼéichapa peikovaʼerã, ha ani peiko oikoháicha umi iñaranduʼỹva, peiko uvei iñarandúvaicha. Peiporukuaáke penetiémpo, koʼã ára ningo ivaieterei’ (Efe. 5:​15, 16, BNP).

Aje piko iporãite pe konsého omeʼẽvaʼekue! Upévare, iporã ñañeporandu mbaʼéichapa ikatu ñamohenda porã ñanetiémpo jastudia hag̃ua ñaneaño, ñane famíliandi, ñasẽ hag̃ua predikasiónpe, ñambaʼapo ha jajapo hag̃ua ambue mbaʼe tekotevẽva.

Katuete ñanemanduʼáne mbaʼeichaitépa javyʼa ñañemeʼẽrõ guare Jehovápe ha jajevautisa. Mbaʼérepa javyʼa? Ñaaprende rupi heta mbaʼe Jehovágui ha umi mbaʼe ojapótavagui. Oiméne heta tiémpo jastudia ñantende porã hag̃ua la Biblia omboʼéva. Ha ndajajaporeíri upéva pórke tuicha ñakambia ha jaiko vyʼápe.

Ndajastudiavéirõ la Biblia ikatu ndajavyʼavéi. Upévare, ñanerembiapoitereígui ijetuʼúramo ñandéve jalee ha jastudia hag̃ua la Biblia, tekotevẽ ñañemotiémpo upearã. Sapyʼami jepe káda día jastudia ha jajepyʼamongetáramo ñañemoag̃uivéta Jehováre ha javyʼavéta.

Heta Ñandejára siervokuéra hembiapove paʼũme oñemotiémpo ombaʼapove hag̃ua Jehovápe g̃uarã. Ha ñandépa mbaʼe jajapoñaína? Iporã ningo ñañeporandumi: “Mboy órapa che ahecha téle, ahendu músika, alee rrevísta térã diário ha ajapo umi mbaʼe chéve chegustáva?”. Igústoramo jepe jajapo umi mbaʼe, ndovaléi jahasa la rrája (1 Tim. 4:8). Jahechakuaáramo jaiporupa  reiha ñanetiémpo, tekotevẽ ñañehaʼã ñamohenda porã.

Adam ningo peteĩ ansiáno ha mbohapy ifamília, haʼe omombeʼu mbaʼéichapa oiporu itiémpo okumplipa hag̃ua irresponsavilida: “Che ningo sensillomínte voi la cherekove. Ndahekái umi vyʼarã oipeʼaitereítava chehegui chetiémpo. Ha ndarekói voi heta mbaʼe. Ndahaʼéi niko upe haguére ndavyʼáiva. Upéichango che ajapo chetiempove hag̃ua”.

Ajépa javyʼa ha jaiko porãve jaservi rupi Jehovápe! Ha jajepyʼamongetáramo upévare koʼýte javyʼa ha ñañeñandu porãvéta. Upéva jahechakuaa peteĩ ansiáno hérava Mariusz ohasavaʼekuére. Haʼe ningo mbohapy itaʼýra ha heʼi: “Añepyrũ guive astudia la Biblia ajerovia osẽ porãtaha chéve opa mbaʼe. Péro sapyʼánte ahasa umi mbaʼe ijetuʼúva, ha Jehovánte oikuaa upéva. Ha Haʼe chepytyvõ rupi ajerovia cheraʼarõha heta mbaʼe porã”.

Jahechaháicha jajeroviáramo jepe osẽ porãtaha ñandéve jajapóva, sapyʼánte ikatu jajepyʼapy ñanerenonderãre. Péro jajeroviáramo ñañeñandu porãvéta ha ñambohovaikuaáta ñaneprovléma. La Biblia heʼi voi: ‘Ojepyʼapy asývape g̃uarã opa ára ivai, ovyʼávape g̃uarã katu arete meme’ (Pro. 15:15). Ha akóinte jajepyʼamongetáramo jahechakuaáta Ñandejára mbaʼeichaitépa ñanderayhu ha ñande avei jahayhuvéta chupe ha javyʼavéta (Mat. 22:37).

Ñamotenondéramo Jehovápe ñanepytyvõta javyʼave hag̃ua ñane famíliandi. Enterove jaikóramo la Bíbliape heʼiháicha saʼive ñaneprovlémata, jajoayhuvéta ha jaiko porãvéta oñondive. Upéicharõ jaikóta pyʼaguapýpe ha vyʼápe ñande rogapýpe (Sal. 133:1).

Iporã avei ñasẽ japredika ñane família ndive térã jajapo ambue mbaʼe oñondivepa ñamombaʼeguasu hag̃ua Jehovápe. Mariusz heʼi avei: “Chéve ningo iñimportanteterei pe tiémpo ahasáva che família ndive. Ha che rembireko ojepytaso mbarete che ykére. Roñehaʼãmbaite avei rosẽ ropredika oñondive ha ijami jave chupe chemoirũ romopotĩ hag̃ua pe lugár ojejapotaha ñande aty guasu. Chemoirũ avei aha jave ajapo diskúrso ambue kongregasiónpe. Avyʼaiterei ningo péicha chemoirũ haguére”.

La Bíbliape ningo heʼi voi menakuéra omantenevaʼerãha ifamília (1 Tim. 5:8). Péro ñambaʼapoiterei rupi ñanekaneʼõ ha nañanetiempovéiramo ikatu ñaneateʼỹma ñambaʼapo hag̃ua Jehovápe g̃uarã. Upéicha jave tekotevẽ jajerure Jehovápe ñanepytyvõ hag̃ua (Sal. 55:22). Oĩ ningo ohechakuaáva tekotevẽha okambia itraváho omotenonde hag̃ua Ñandejára Rréino. Ñande ningo ndajahejaivaʼerã ombotapykueka ñandéve Jehová servísio ñande traváho ojepaga porãvétaramo jepe ñandéve (Pro. 22:3).

Péro oiméramo upéva la ñanesituasión, iporãta jahai peteĩ kuatiáre umi mbaʼe iporã ha ivaíva oguerúva ñandéve ñande traváho. Ha ikatu voi jajapo upéicha ñakonsegíta jave ñande travahorã. Enterove ningo hiʼã ñambaʼapo porã ha ñagana porã. Péro, ñanetiémpotapa ñaipytyvõ hag̃ua ñane famíliape oservi porã hag̃ua Jehovápe? Jahecha porã vaʼerã umi mbaʼe ikatúva oiko ha jadesidívare jahechauka jahayhuha Jehovápe.

Jahechakuaáramo ñande traváho ñandejokoha ñambaʼapove hag̃ua Jehovápe g̃uarã, aníkena ñaimoʼã upéichante jasegivaʼerãha. Heta ermáno ningo okambia heta mbaʼe ombaʼapove hag̃ua Jehová servísiope. Peteĩ ermáno Poloniaygua heʼi: “Che traváho rapykuéri ningo heta aviahavaʼerã ha nachetiempovéima che famíliape g̃uarã ha ambaʼapo hag̃ua Jehovápe g̃uarã. Upévare ahejámante la che traváho”. Koʼag̃agua itraváho katu saʼietevéma oiporu chugui itiémpo ha naikaneʼõitereivéima.

Javyʼaiterei ningo ñaporopytyvõramo

Jesús ningo heʼi voi: “Javyʼave ñameʼẽvo, ñandéve oñemeʼẽrõguágui” (Hech. 20:35). Ha ñande ningo jaikuaa porãma upéva. Sapyʼánte ikatu ñambovyʼa ñande rapichápe ñanderorymíramo chupe: ikatu japukavymi, jaipojopy térã jaagradese ñane ermánope ojapo porã haguére hembiapo kongregasiónpe. Ha upéva katuete ñandéve avei ñanembovyʼáta.

Apóstol Pablo heʼi umi ermáno Tesalonicaguápe: ‘Pemokyreʼỹ umi ovyaʼỹvape, peipytyvõ umi ikangývape’ (1 Tes. 5:​14, JMP). Umi oñeñandu vaietereíva térã ndovyʼavéiva oimoʼã jepi ndaikatumoʼãiha ombohovái haʼeño  iprovlemakuéra. Mbaʼéichapa ikatu ñaipytyvõ chupekuéra? Ñamokyreʼỹvaʼerã ñane ermánope jahecháramo ikangyha ohóvo oservi hag̃ua Jehovápe. Upéicha jajapóramo jahechakuaáta ñande voi ñañeñandu porãveha. Jaikuaa ningo oĩha heta provléma ndaikatumoʼãiva ñande ñasolusiona. Péro ikatu jahechauka ñane ermánope ñantendeha upe ohasáva. Ñamomanduʼavaʼerã avei chupe ojerovia hag̃ua ipyʼaite guive Jehováre, pórke Haʼe ndohejamoʼãi asy chupe (Sal. 27:10; Isa. 59:1).

Ikatu avei ñainvita chupe osẽ hag̃ua ñanendive predikasiónpe. Yma ningo Jesús omondovaʼekue umi 70 hemimboʼépe “mokõi mokõi” opredika hag̃ua (Luc. 10:1). Upéicha oñomokyreʼỹ ha oñopytyvõ hikuái. Ha upeichaite avei oiko jepi ñasẽ jave japredika peteĩ ermáno ikangy ha ndovyʼavéiva ndive.

Heta provléma ha situasión ijetuʼúvare ningo jahasa. Upévare iporã jajapo apóstol Pablo heʼíva: “Pevyʼákena Ñandejára ndive opa árape; ha haʼe jey peẽme: Pevyʼákena!” (Fili. 4:​4, BNP). Ñande ningo jahayhu Jehovápe, upévare jaikuaa maʼerãpa jaikove ha javyʼa. Ñaneñeʼẽrendu ha akóinte kyreʼỹme jajapo pe tembiapo Jehová omeʼẽvaʼekue ñandéve. Péro pe iñimportantevevahína Jehová ñanepytyvõ ñambohovái porã hag̃ua umi mbaʼe ñandejopýva ha ñaneprovlemakuéra (Rom. 2:​6, 7).

Jajerovia rupi jahechakuaa hiʼag̃uimbaitemaha pe múndo pyahu Ñandejára oprometevaʼekue. Hetaite mbaʼe porã ningo jahasáta upépe! (Sal. 37:34.) Upévare, aníkena ñanekangy. Akóintekena ñanemanduʼa umi mbaʼe porã koʼág̃ama voi omeʼẽvare ñandéve ñande Ru yvagapegua. Upéicharõ ‘vyʼapópe jajapóta Jehovápe hembipota’ (Sal. 100:2).

[Nóta oĩva taʼanga ndive páhina 8]

(Emaña pe kuatiañeʼẽre rehecha hag̃ua osẽ hagueichaite ko párte)

Ñamohenda porã vaʼerã ñanetiémpo akóinte javyʼa hag̃ua

VYʼARÃ

ÑANE FAMÍLIA HA ÑANDE ROGAPY

ÑANDE TRAVÁHO

RREUNIONKUÉRA

JASTUDIA ÑANEAÑO

PREDIKASIÓN

[Nóta oĩva taʼanga ndive páhina 10]

Ikatúpa ñaipytyvõ umi ermáno ikangy ha ndovyʼavéivape?