Ñaipytyvõkena ñane famíliape ombohovái hag̃ua iprovlemakuéra

UMI mitãrusu ha mitãkuñáme ningo ojejopyeterei ojapo hag̃ua ivaíva. Ombohovaivaʼerã hikuái ko múndo aña oĩva Satanás poguýpe ha umi mbaʼe ‘mitãrusúpe omoakãrakúva’ (2 Tim. 2:22; 1 Juan 5:19). Haʼekuéra ningo oñehaʼãmbaite ‘imanduʼa Ijapoharére’. Upéicharõ jepe heta ndoikuaaséiva mbaʼeve Jehovágui oñembohory hesekuéra ha opersegi chupekuéra (Ecl. 12:1). Peteĩ ermáno hérava Víctor imanduʼávo oikovaʼekuére hese eskuélape, heʼi: “Katuete oĩmivaʼerã Testígo haguérente chepersegíva, ojapoukaséva chéve mbaʼe vai térã chedesafiáva. Sapyʼánte ijetuʼuetereíma la situasión ha ndahasevéima voi eskuélape”. *

Umi imitãva ningo ombohovaivaʼerã ko  múndo aña ha naidiferenteséi jepi avei hikuái hapichakuéragui. Peteĩ ermána imitãva hérava Katy heʼi: “Ndaigustói ningo ojeʼe ñanderehe ñanediferenteha”. Peteĩ ermáno imitãva hérava Alan heʼi: “Che kompañerokuéra cheinvitamivaʼerã asẽ hag̃ua hendivekuéra sábado ha domingokue, ha chéko ahasemivaʼerã avei”. Oĩ avei umi ogustaitereíva chupe depórte, péro ohóramo umi kompetensiahápe ojeheʼáta heta hembiapo vaívare ha upévare ndohóinte. Peteĩ ermána imitãva hérava Tania heʼi: “Chetavyete ningo la huégore. Che profesorkuéra oipotaireimivaʼerã ahuga che kompañerakuéra ekípope. Ha ijetuʼuetereimivaʼerã chéve añenega hag̃ua chuguikuéra”.

Mbaʼéichapa peẽ tuvakuéra ikatu peipytyvõ pene famíliape ombohovái hag̃ua hetaite provléma? Jehová voi heʼivaʼekue peẽme pehekomboʼe hag̃ua pene famíliape (Pro. 22:6; Efe. 6:4). Peẽ ningo peipytyvõvaʼerã chupekuéra iñeʼẽrenduse hag̃ua Jehovápe ipyʼaite guive (Pro. 6:​20-23). Upéicharõmante haʼekuéra ijeheguíntema ombohováita umi mbaʼe vai ojejapoukaséva chupekuéra, ha ojapóta upéva peẽ napeiméiramo jepe hendivekuéra.

Ijetuʼu ningo jahupyty hag̃ua umi mbaʼe ñaikotevẽva, ñamongakuaa hag̃ua ñane família ha jajapopa hag̃ua umi ñane rembiapo kongregasionpegua. Koʼã rresponsavilida ningo heta sy ha túva okumpli haʼeño, oĩ avei umi iména térã hembireko opuʼãva hese oservi haguére Jehovápe. Péro ndahaʼéi upéva añónte, Jehová oipota avei tuvakuéra oñemotiémpo ohekomboʼe ha oipytyvõ hag̃ua ifamiliakuérape. Upéicharõ, mbaʼéichapa peẽ tuvakuéra ikatu peipytyvõ pene famíliape ombohovái hag̃ua oĩ jave opersegi ha ojapoukaséva chupe ivaíva? Ha mbaʼéichapa ikatu ombohovái káda día ambue mbaʼe ijetuʼúva?

Mbaʼérepa orekovaʼerã Jehovápe iñamígoramo?

Umi ipyahúva ningo tekotevẽ ohechakuaa Jehová añetehápe oĩha. Péro oñepytyvõvaʼerã chupekuéra ‘ohecha hag̃ua Ñandejára ojehechaʼỹvape’ (Heb. 11:27). Pe mitãrusu hérava Víctor ningo omombeʼu ituvakuéra oipytyvõ hague chupe oñemoag̃ui hag̃ua Jehováre ha oreko chupe iñamígoramo. Haʼe heʼi: “Chemboʼe hikuái tekotevẽha añemboʼe. Chemanduʼa chemichĩmi guive añemboʼe  hague káda pyhare ake mboyve. Haʼeteváicha voi ahecháva Jehovápe”. Peẽ tuvakuéra, peñemboʼépa pene familiakuéra ndive? Pehendúpa mbaʼéichapa oñemboʼe hikuái Jehovápe? Orrepetipántepa hikuái la heʼíva oñemboʼe jave? Pehechakuaápa iñemboʼére ohayhuha Jehovápe? Pehendúramo mbaʼéichapa oñemboʼe, pehechakuaáta ojeroviavépa ohóvo hikuái Jehováre.

Jaleéramo la Biblia ñaneañohápe ningo ñanepytyvõ ñañemoag̃uive hag̃ua Jehováre. Pe mitãkuña hérava Katy omombeʼu: “Aleepa rupi la Biblia chemichĩme, chepytyvõ ahechakuaa hag̃ua Jehová oĩha che ykére oĩramo jepe oñemoĩva cherehe”. Peẽ tuvakuéra, pene familiakuérapa oleehína la Biblia káda día? (Sal. 1:​1-3; 77:12.)

Jaikuaa ningo heta imitãvape ijetuʼuha iñeʼẽrendu hag̃ua isy ha itúvape. Odepende avei mboy áñopa oreko ohechauka hag̃ua ojeroviaveha ohóvo Jehováre. Péro isy ha itúva noipytyvõiramo chupekuéra, hasyvéta ohecha hag̃ua Jehovápe. Upéicharõ, peẽ tuvakuéra pehekomboʼevaʼerã pene famíliape Ñandejára rembipota ha pejapo opa mbaʼe Jehová oipotaháicha (Deu. 6:​6-9). Pene familiakuéra ningo ohechakuaavaʼerã Jehová ojepyʼapyha hesekuéra.

Mbaʼérepa peñemongetavaʼerã?

Tuicha ningo peẽ tuvakuéra peipytyvõta pene famíliape pejepokuaáramo peñemongeta oñondive. Peẽ ikatu peporandu pene famíliape peteĩ mbaʼe ha pyʼaguapýpe pehendu la heʼíva napendegustáiramo jepe. Anne ningo mokõi imembykuimbaʼe ha heʼi: “Ambaʼeporandu chupekuéra aikuaa peve mbaʼépa opensa ha mbaʼe provlémapa ohasa hikuái”. Ha pene familiakuérapa ohechakuaa pehenduha chupekuéra? Pe mitãkuña hérava Tania heʼi avei: “Che tuvakuérango ojapysaka porãmi vaʼerã cherehe ha imanduʼa hikuái la haʼevaʼekuére chupekuéra. Haʼekuéra ningo oikuaa mbaʼéichapa héra che kompañerokuéra  eskuelapegua ha oporandu jepi hesekuéra ha umi mbaʼe roñemongetavaʼekuére”. Upéicharõ peñemongeta porã hag̃ua oñondive pehendu ha penemanduʼavaʼerã pene família heʼívare.

Heta família ohechakuaa opyta porãha chupekuéra okaruha órape oñemongeta hag̃ua oñondive. Víctor heʼi: “Oréve g̃uarã ningo iñimportantetereivaʼekue rokaru oñondivepa. Ikatúma guive enterove roimevaʼerã mesápe rokaru hag̃ua oñondivepa. Rokaru aja ndaikatúi rohecha téle ni rohendu rrádio ni rolee. Heta mbaʼére roñemongeta ha pyʼaguapýpe roime. Upéva ningo tuicha chepytyvõ agueropuʼaka hag̃ua heta mbaʼe ijetuʼúva eskuélape”. Upéi heʼive: “Ajepokuaámagui voi añemongeta che tuvakuéra ndive rokaru jave, ndahasyive chéve ajerure hag̃ua chupekuéra chepytyvõmi hag̃ua cheprovléma jave”.

Peñeporandumíkena: “Mboy vésepa rokaru oñondivepa una semánape?”. Oiméne pehechakuaa pyʼỹive pekarúramo oñondivepa, peñemongeta porãveha pene familiakuéra ndive.

Mbaʼérepa iporã peñensaja pene família ndive?

Pejapóramo káda semána pe aty pende rogayguándi penepytyvõta peñemongeta porãve ha peipytyvõ hag̃ua pene famíliape ombohovái hag̃ua iprovléma. Alan heʼi: “Roñembyaty jave rostudia hag̃ua, che tuvakuéra oaprovechamivaʼerã oikuaa hag̃ua heta mbaʼe orehegui. Oiporavo hikuái umi téma orepytyvõtava rombohovái hag̃ua umi provléma rohasáva”. Alan sy katu heʼi: “Roñembyaty jave rostudia hag̃ua roñensajamivaʼerã ore familiakuéra ndive mbaʼéichapa ikatu ombohovái hikuái heta mbaʼe. Upéva oipytyvõiterei chupekuéra odefende hag̃ua ijerovia ha omombeʼu hag̃ua mbaʼépa oguerovia. Ha ombopyʼaguasuve avei chupekuéra ombohovái hag̃ua oimeraẽ mbaʼe”.

Pene familiakuérape ojopy jave ikompañerokuéra ojapo hag̃ua ivaíva ningo heta vése haʼekuéra ndaikatumoʼãi heʼínte ndojapomoʼãiha ha osẽ oho upégui. Haʼekuéra heʼikuaavaʼerã mbaʼérepa ndojapomoʼãi peteĩ  mbaʼe, pórke ndojapokuaáiramo upéva ndaikatumoʼãi odefende ijerovia. Haʼekuéra oikuaavaʼerã avei mbaʼépa ikatu ojapo oĩ jave oñembohorýva irrelihiónre. Upévare, peñensajáramo hendivekuéra mbaʼéichapa ikatu ombohovái koʼã mbaʼe, haʼekuéra voi ipyʼaguasuvéta ha ojeroviavéta ijehe.

Pe rrekuádro páhina 18-pe oĩvape ojeʼe mbaʼe mbaʼépa ikatu peñensaja pene familiakuéra ndive pende aty jave pestudia hag̃ua pende rogayguándi. Péro ideprovechove hag̃ua chupekuéra koʼã mbaʼe peñensajáva, peporandu jey vaʼerã chupekuéra mbaʼérepa ombohovái upéicha. Iporãta avei pehesaʼỹijo oñondive mbaʼépa penemboʼe umi istória oñemombeʼúva la Bíbliape. Koʼã mbaʼe ningo katuete oipytyvõta pene familiakuérape ombohovái hag̃ua umi provléma ohasáva eskuélape térã ambue hendápe.

Oñeñandu porãpa pene familiakuéra pende rogapýpe?

Pene familiakuérapa osẽ rire eskuélagui ohose jey hógape? Pende rógape peiko porãramo, peipytyvõta pene familiakuérape ombohovái hag̃ua umi provlemaita. Peteĩ ermána koʼág̃a oservíva Betélpe, heʼi: “Ógape ningo roiko pyʼaguapýpe ha upéva tuicha chepytyvõ eskuélape aike tiémpope. Ijetuʼuvéramo jepe la situasión eskuélape, che aikuaa ag̃uahẽ vove ógape aime porãtaha”. Peikopapeína pyʼaguapýpe pende rogapýpe? Pyʼỹintépa ‘peikovai, pendepochy ha pepuʼã ojuehe’ térãpa peiko ‘joayhu, vyʼa ha pyʼaguapýpe’? (Gál. 5:​19-23.) Pehechakuaáramo ndapeikoiha pyʼaguapýpe, iporãta peñehaʼãramo pekambia ikatu hag̃uáicha pene familiakuéra oñeñandu porã pende rogapýpe.

Pene família ombohovái porã hag̃ua iprovlemakuéra ikatu pehecha tojeheʼa hikuái umi oipytyvõvaʼerãre chupekuéra. Pór ehémplo ikatu peinvita ambue ermáno ijerovia mbaretévape oho hag̃ua ovyʼa penendive. Ikatu avei peinvita okaru hag̃ua penendive pe superintendénte de sirkuíto térã ambue ermáno oiporupaitévape itiémpo oservi hag̃ua Jehovápe. Peikuaáramo peteĩ misionéro térã betelita ikatu pemokyreʼỹ pene famíliape omondo hag̃ua chupekuéra kárta, mensáhe térã ohenói chupekuéra teléfonope. Ha péicha oiko hag̃ua hikuái oñoamígoramo. Upéva oipytyvõta pene famíliape oguata hag̃ua tape porãre ha oñehaʼã hag̃ua ombaʼapove Jehovápe g̃uarã. Penemanduʼamínte mbaʼeichaitépa apóstol Pablo oipytyvõvaʼekue Timotéope (2 Tim. 1:13; 3:10). Apóstol Pablo ningo Timoteo amigoite vaʼekue ha upéva oipytyvõ chupe akóinte ombaʼapove hag̃ua Jehovápe g̃uarã (1 Cor. 4:17).

Peguerohorýkena pene famíliape

Jehovápe ombopyʼarory ohechávo umi imitãva odefende la oĩ porãva oñemoĩramo jepe hesekuéra ko múndo oĩva Satanás poguýpe (Sal. 147:11; Pro. 27:11). Peẽme avei katuete penembovyʼáne pehechávo haʼekuéra odesidiha oguata pe tape porãre (Pro. 10:1). Pejékena pene famíliape pehayhu ha peguerohoryha chupekuéra. Jehová ningo omoĩ peẽme peteĩ ehémplo iporãitereíva. Jesús ojevautisárõ guare, Jehová heʼi: “Nde ningo che Raʼy ahayhúva, nde rupi chepyʼarory” (Mar. 1:​11, ÑÑB). Upérõ ningo Jesúspe heta mbaʼe vai ohaʼarõ, ha oiméne tuichaite oipytyvõ chupe Itúva heʼi haguére upéicha! Ha peẽ tuvakuéra, pejapókena avei upéicha ha peje pene famíliape pehayhu ha pevyʼaha hesevekuéra.

Peikuaáma ningo ndaikatumoʼãiha opa árape peñangareko pene famíliare ani hag̃ua ojejapouka chupekuéra ivaíva térã oñeñembohory hesekuéra ha ojepersegi. Péro ikatu pemboʼe chupekuéra mbaʼéichapa ombohovaivaʼerã umi provléma. Peipytyvõkena pene famíliape oñemoag̃uive hag̃ua Jehováre ha oreko chupe iñamigoitéramo. Peñehaʼãkena peñemongeta porã oñondive ha pejapo pende aty oipytyvõ hag̃uáicha chupekuéra. Ha peikókena avei pyʼaguapýpe oñeñandu porã hag̃ua pene família pende rogapýpe. Pejapóramo koʼã mbaʼe, pene família ikatúta ombohovái porã iprovlemakuéra.

[Nóta]

[Taʼanga ha rrekuádro oĩva páhina 18-pe]

MBAʼE MBAʼÉPA IKATU PEÑENSAJA

Koʼã mbaʼe ikatu peñensaja pende aty jave pestudia hag̃ua pende rogayguándi.

▸ Peteĩ profesóra heʼi nde rajýpe ohuga hag̃ua ikompañerakuéra ekípope.

▸ Eskuéla rapére, nde raʼýpe omboliga ikompañéro opita hag̃ua.

▸ Hapichakuéra oamenasa nde raʼýpe ombyepotitaha ohecha jeýrõ chupe opredikahína.

▸ Nde rajy og̃uahẽ peteĩ ógape opredika hag̃ua ha oñatende hese peteĩ ikompañéra eskuelapegua.

▸ Nde rajýpe ojeʼe omombeʼu hag̃ua klásepe mbaʼérepa nomombaʼeguasúi pe vandéra.

▸ Peteĩ hapicha pyʼỹinte oñembohory nde raʼýre oservi haguére Jehovápe.

[Nóta oĩva taʼanga ndive páhina 17]

Pene famíliapa oleehína la Biblia káda día?

[Nóta oĩva taʼanga ndive páhina 19]

Peinvitápa umi ermáno ijerovia mbaretévape ovyʼa hag̃ua penendive?