Jahechaukákena ñande kristiáno añeteha

“Opa yvyra iporãva hiʼa porã. Umi yvyra ivaíva katu hiʼa vai.” (MAT. 7:17.)

1, 2. Mbaʼéichapa ojehechakuaa ko ára pahápe mávapa umi kristiáno añetegua?

 JESÚS heʼivaʼekue hiʼáre ojekuaataha hemimboʼekuérape. Upéva heʼisehína ojekuaataha chupekuéra umi mbaʼe ojapóvare (Mat. 7:​15-17, 20). Nañaimoʼãiramo jepe, umi mbaʼe jarekóva ñane akãme ha ñande pyʼapýpe ojekuaahína umi mbaʼe jaʼe ha jajapóvare (Mat. 15:​18, 19). Upévare umi ogueroviáva rrelihión japu omboʼéva “hiʼa vai” péro umi oikuaáva pe añetegua Ñandejáragui katu “hiʼa porã”.

² Ko ára pahápe ningo ojehechakuaavéntema tuichaiterei idiferenteha ojuehegui umi kristiáno guaʼu ha añetegua (jaleemína Daniel 12:​3, 10). Umi kristiáno guaʼúva ningo ndoikuaaporãi mbaʼeichaguápa ñande Apohare ha ojechauka hag̃uánte ohayhu guaʼu Chupe. Péro umi oikuaa porãva Ñandejárape katu omombaʼeguasu chupe ‘espíritu ha añetegua rupive’ ha oñehaʼã oiko Jesús oiko haguéicha (Juan 4:24; 2 Tim. 3:​1-5). Ha mbaʼépa ikatu jaʼe ñandejehe? Ko artíkulope jahecháta cinco mbaʼe ohechaukáva mbaʼeichaguápa Jesús remimboʼe añetetéva. Ñahesaʼỹijokuévo ñañeporandumivaʼerã: “Aikópa Jehová oipotaháicha ha amboʼe la Biblia heʼívante? Umi ipyʼaporãvapa oservise avei Ñandejárape ohechávo mbaʼéichapa che aiko?”.

Jaikókena Ñandejára Ñeʼẽ heʼiháicha

3. Mbaʼeichaguápepa Jehová oguerohory ha mbaʼépa ojapovaʼerã upévare kristianokuéra?

³ Jesús heʼi: ‘Ndahaʼéi ningo opa heʼíva: “Che jára, che jára” oikétava pe rréino yvagapeguápe. Oikéta uvei umi ojapóva che Ru yvagapegua rembipota’ (Mat. 7:​21, NM). Upéicharõ Jehová ndoguerohorýi umi heʼívapente ijehe Jesucristo remimboʼeha, haʼe ningo oguerohory umi opa mbaʼe ojapóvare ohechaukávape oserviha chupe. Umi kristiáno añetéva ningo oheja Ñandejára Ñeʼẽ oisãmbyhy chupekuéra opa mbaʼépe. Pór ehémplo, mbaʼéichapa oiporúta ipláta, ojediverti ha ombaʼapóta. Mbaʼéichapa ohechavaʼerã umi arete ha festehokuéra. Avei mbaʼéichapa otratavaʼerã umi hogayguápe ha iñamigokuérape. Umi kristiáno guaʼúva katu opensa ha oiko umi hénte aña ko mundopeguáicha, ha koʼẽ koʼẽre oho vaive hese (Sal. 92:7).

4, 5. Mbaʼépa iporã jajapo jalee rire Malaquías 3:18?

⁴ Proféta Malaquías heʼi avei: ‘Pehechakuaáta mbaʼéichapa idiferénte ojuehegui umi imarangatúva ha iñañáva, pe Ñandejárape omombaʼéva ha pe nomombaʼéiva’ (Mal. 3:18). Jajepyʼamongetamína koʼápe heʼívare ha ñañeporandumi: “Ajoguasépa umi hénte ndoservírivape Jehovápe térãpa che diferentese chuguikuéra? Añemoĩ porãsépa che kompañerokuéra eskuelapegua térã che travahohapeguándi? Térãpa ahechauka porã aserviha Jehovápe ha tekotevẽramo amombeʼu chupekuéra mbaʼépa aguerovia? (jaleemína 1 Pedro 3:16). Ndahaʼéi ningo ñañemosantuláriotava péro jaipota la hénte ohechakuaa ñande jaservíva Jehovápe tuicha ñanediferenteha.

⁵ Rehechakuaáramo tekotevẽha rekambia peteĩ mbaʼépe, rejerurevaʼerã Jehovápe tanepytyvõ ha tomombarete nde jerovia. Upearã ningo restudiavaʼerã la Biblia ha nderefaltái rreunionhápe. Reikuaa porãvévo Ñandejára Ñeʼẽ omboʼéva ojehechakuaavéta nderehe rejapo porãveha opa mbaʼe. Pór ehémplo, remombaʼeguasúta Ñandejára réra reñeʼẽvo hese nde rapichakuérape (Heb. 13:15).

 Ñañeʼẽkena Ñandejára Rréino rehe

6, 7. Mbaʼépepa idiferénte avei umi kristiáno añetetéva?

⁶ Jesús heʼi: “Ahavaʼerã ambue tavakuéra rupi amombeʼu hag̃ua umi mbaʼe porã Ñandejára rréino ojapótava. Upearã ningo añembouvaʼekue” (Luc. 4:​43, NM). Mbaʼérepa Jesús oñeʼẽvevaʼekue Ñandejára Rréino rehe? Jesús ningo oikuaa porã haʼe ogovernataha Ñandejára Rréinope umi ungído ndive ha ohunditaha Satanáspe ha oipeʼataha pe pekádo. Koʼã mbaʼe ningo ombohasa asy yvyporakuérape (Rom. 5:12; Rev. 20:10). Upévare Jesús heʼi hemimboʼekuérape oñeʼẽ hag̃ua avei Ñandejára Rréino rehe og̃uahẽ meve huʼãme ko ára paha (Mat. 24:14). Umi kristiáno guaʼu oĩva rrelihión japúpe ndojapói ko mbaʼe Jesús heʼivaʼekue ha nosẽi voi chupekuéra. Mbaʼérepa? Mbohapy mbaʼére. Primero, ndaikatúi oñeʼẽ hikuái peteĩ mbaʼe oikuaaʼỹvare. Segundo, oñemombaʼeguasu ha ndaipyʼaguasúi hikuái ombohovái hag̃ua oĩramo oñemoĩva ha oñembohorýva hesekuéra opredika haguére (Mat. 24:9; 1 Ped. 2:23). Tercero, Jehová nomeʼẽi chupekuéra ijespíritu sánto (Juan 14:​16, 17).

⁷ Umi kristiáno añetetéva oikuaa mbaʼépa Ñandejára Rréino ha mbaʼépa ojapóta. Upévare omotenonde Ñandejára Rréino hekovépe ha Jehová espíritu sánto rupive opárupi oñeʼẽ hapichakuérape upévare (Zac. 4:6). Ha mbaʼépa jaʼéta ñandejehe? Pyʼỹipa ñasẽ japredika? Ñañehaʼãpa japredikave ha jajapo porãve ñane rembiapo? Ha jaikuaa ningo Ñandejára Ñeʼẽ ‘oikove ha ipuʼakaha’, upévare ñañehaʼãvaʼerã jaiporu porã la Biblia ha jajapo apóstol Pablo ojapo haguéicha. Haʼe ningo katupyrýpe oiporuvaʼekue Ñandejára Ñeʼẽ ohekomboʼe hag̃ua la héntepe (Heb. 4:12; Hech. 17:​2, 3).

8, 9.  a) Mbaʼe ehémplopa ohechauka iporãha jaiporu la Biblia japredika jave? b) Mbaʼépa ikatu jajapo jaiporukuaave hag̃ua la Biblia?

⁸ Peteĩ ermáno opredika jave ogaha rupi olee peteĩ karai katólikope Daniel 2:44. Upéi omyesakã chupe Ñandejára Rréino guýpe ojeikotaha pyʼaguapy ha kyhyjeʼỹme. Ha pe karai heʼi chupe: “Aagradese ndéve relee haguére chéve la Biblia, ndahaʼéi erénteva chéve mbaʼépa omboʼe”. Ambue ermáno katu opredika jave hembirekóndi olee peteĩ téysto peteĩ kuñakarai Iglesia Ortodoxa Griegayguápe. Upe kuñakarai oporandu chupekuéra heta mbaʼe ha ñane ermanokuéra oiporu la Biblia ombohovái hag̃ua chupe la oikuaaséva. Upe rire pe kuñakarai heʼi chupekuéra: “Peikuaa piko mbaʼérepa añemongeta penendive? Pórke peẽ pereko la Biblia ha pelee voi chéve”.

⁹ Tuichaite ningo ikatu oporopytyvõ ñane puvlikasionkuéra, upévare ñaikuaveʼẽ la héntepe japredika jave. Upéicharõ jepe katuete jaiporuvaʼerã la Biblia japredika jave. Ha ñandépa jajepokuaañaína jaiporu la Biblia predikasiónpe? Oiméramo nahániri, iporãta ñañehaʼã koʼág̃a guive jaiporu. Ikatu jaiporavo umi téysto oñeʼẽva Ñandejára Rréinore ha mbaʼéichapa osolusionáta umi provléma oipyʼapyetéva la héntepe. Upéicharõ ijami vovéntema jaleevaʼerã la Biblia umi ogajárape.

 Javyʼákena ojeʼe haguére ñandéve testigos de Jehová

10, 11. Mbaʼéichapa Jesús ohecha Ñandejára réra? Ha mbaʼépa heʼi umi kristiáno guaʼu?

¹⁰ ‘Peẽ hína che testígo ha che haʼe pende Jára’, heʼi Jehová (Isa. 43:12). Mávapa hína pe testígo de Jehová iñimportantevéva? Upéva hína Jesucristo. Chupe g̃uarã ningo tuichaiterei mbaʼe oñeʼẽ Itúva rérape ha oikuaauka la héntepe (jaleemína Éxodo 3:​15, Juan 17:6 ha Hebreos 2:12). Upévare la Biblia heʼi hese pe ‘Testígo Jeroviaháva’ (Rev. 1:5; Mat. 6:9).

¹¹ Heta ningo oĩ heʼíva ijehe oñeʼẽha Jesús ha Itúva rérape, péro nomombaʼeiete Ñandejára réra ha oipeʼa voi hikuái ibíbliagui. Ha ramoite hína umi ovíspo katólikope ojeʼe kóicha: “Ñandejára réra, pe tetragrammaton YHWH ndojeporúi ni ndojeʼeveimavaʼerã [misahápe]”. * Aje piko ivaiete la ojapóva hikuái!

12. Mbaʼépa ojapo umi kristiáno añetetéva pe áño 1931-pe?

¹² Koʼág̃a rupi umi kristiáno añetetéva osegi Jesús ha umi kristiáno ypykue ehémplo, ha ovyʼa ojeʼe haguére chupekuéra Testigos de Jehová (Heb. 12:1). Upévare 1931-pe oñembohéra hikuái Testigos de Jehová (jaleemína Isaías 43:​10-12). Ha upéicha oiko chuguikuéra ‘peteĩ tetã Ñandejára mbaʼéva’ (Hech. 15:​14, 17).

13. Mbaʼéichapa jaikovaʼerã jahechauka hag̃ua ñamombaʼeha Ñandejára réra?

¹³ Mbaʼéichapa jaikovaʼerã jahechauka hag̃ua ñamombaʼeha Ñandejára réra? Ñepyrũrã akóinte ñañeʼẽ porã vaʼerã Ñandejárare. Apóstol Pablo heʼi: ‘“Opa oiporúva Ñandejára réra ojesalváta”. Ha mbaʼéicha piko oiporúta hikuái héra, ko ndojeroviaivaʼekue hese? Ha mbaʼéicha piko ojeroviáta hese, ko avave noñeʼẽiva chupekuéra hese? Ha mbaʼéicha piko ohendúta, ndaipóriramo peteĩ oñeʼẽva chupekuéra pe marandu porãre? Ha mbaʼéicha piko oĩta oñeʼẽva upe marandu porãre, ndaipóriramo oñemondóva upearã?’ (Rom. 10:​13-15). Péro ñande ñamombeʼu porã vaʼerã la héntepe mbaʼéichapa heta mbaʼe oñemboʼe vai chupekuéra. Pór ehémplo oñemboʼe oĩha pe infiérno ha upéva ningo oheja vaieterei Ñandejárape. Ojehecha ñande Apoharépe peteĩ Ñandejára iñaña ha ipyʼahatãvaramo Satanáicha (Jer. 7:31; 1 Juan 4:8; embojojami Marcos 9:​17-27 rehe).

14. Mbaʼépa ojapo heta ñande rapicha oikuaávo mbaʼéichapa héra Ñandejára?

¹⁴ Tuicha mbaʼépa ndéve g̃uarã rejekuaa testigos de Jehováramo ha reñeʼẽpa hérape? Aréma hína, Paríspe peteĩ kuñakaraípe ojeʼe testigos de Jehová oikuaaha mbaʼéichapa héra Ñandejára. Ha otopávo peteĩ Testígore, pe kuñakarai ojerure ohechaukami hag̃ua chupe la Bíbliape upéva. Ha oleévo Salmo 83:18 ovyʼaiterei ha oñepyrũ ostudia la Biblia. Koʼág̃a g̃uarã ko kuñakarai haʼéma ñane ermána ha oservi tetã ambuépe. Upéicha avei peteĩ kuñakarai katólika Australiagua hasẽ vyʼágui ojehechaukávo chupe la Bíbliape mbaʼéichapa héra Ñandejára. Ostudia la Biblia ha heta áñorema oservihína de precursora regular. Ha ndaʼaréi katu ñane ermanokuéra Jamaicagua ohechauka peteĩ kuñakaraípe ibibliaitépe voi Jehová réra, ha pe kuñakarai hasẽ vyʼágui. Péicha jahecha tuicha mbaʼeha ojeʼe ñandéve testigos de Jehová, ha Jesús ojapo haguéicha ñañeʼẽse voi Ñandejára rehe opárupi.

“Ani pehayhu ko múndo”

15, 16. a) Ohayhúpa ko múndo reko umi kristiáno añetetéva? b) Mbaʼépa iporã ñañeporandumi?

¹⁵ La Biblia heʼi porã ñandéve: ‘Ani pehayhu ko múndo, térã umi mbaʼe ipype oĩva. Oiméramo ohayhúva ko múndo, ndohayhúi Ñandejára ñande Rúpe’ (1 Juan 2:​15, BNP). Ko múndope ningo la hénte ojapo heta mbaʼe vai ha oiko iñakãrente. Péicha haʼekuéra opuʼã Jehováre ha ijespíritu sántore. Umi kristiáno añetetéva ningo ndojapói umi mbaʼe vai ko múndope ojejapóva ha ombojeguaru voi chupekuéra. Haʼekuéra oikuaa porã Santiago heʼivaʼekue: ‘Umi ohayhúva ko múndo reko, oiko Ñandejára enemígoramo’ (Sant. 4:4).

 ¹⁶ Koʼág̃a ningo hetaiterei mbaʼe ojejapo ko múndope ha sapyʼánte ñande avei jajapose, upévare ijetuʼu jajapo hag̃ua Santiago heʼivaʼekue (2 Tim. 4:10). Upéicha rupi Jesús oñemboʼevaʼekue hemimboʼekuéra rehehápe ha heʼi: ‘Ndajeruréi ndéve reipeʼa hag̃ua chupekuéra ko múndogui, ajerurénte uvei ndéve reñangareko hag̃ua hesekuéra mbaʼe añágui. Haʼekuéra niko ndahaʼéi ko mundopegua, che ndahaʼeiháicha avei ko mundopegua’ (Juan 17:​15, 16, JMP). Iporã ningo ñañeporandumi: “Añehaʼãpa ani hag̃ua ajapo umi mbaʼe vai ko múndope ojejapóva? Oikuaápa che konosidokuéra mbaʼérepa ndafestehái umi fiésta ha arete omoñepyrũvaʼekue rrelihión japu térã ko múndo aña?” (2 Cor. 6:17; 1 Ped. 4:​3, 4).

17. Mbaʼépa ojapo heta ipyʼaporãva?

¹⁷ Heta ningo oĩ nañanderayhúiva ñane diferénte haguére péro heta ipyʼaporãva oikuaase avei mbaʼérepa upéicha. Haʼekuéra ohecha ñande jajeroviaha la Biblia heʼívare ha jahejaha upéva ñanesãmbyhy opa mbaʼe jajapóvape. Upévare oikuaase hikuái mbaʼépa omboʼe umi ungído. Haʼete voi heʼíva hikuái: ‘Rohose penendive rohendúgui Ñandejára oĩha penendive’ (Zac. 8:23).

Jahechaukákena jajoayhuha oñoermánoicha

18. Mbaʼeichagua mborayhúpa jahechaukavaʼerã?

¹⁸ Jesús heʼivaʼekue: ‘Ehayhu Ñandejárape nde pyʼaite guive, ne ánga rugua guive ha ne arandukue reheve’. Ha upéi heʼi avei: “Ehayhu nde rapichápe rejehayhuháicha ndejupe voi” (Mat. 22:​37, 39). Peichagua mborayhúpe ojeʼe griégope agápe. Ha upe mborayhu jahechauka jaikóvo Ñandejára Ñeʼẽme heʼiháicha, jajapóvo umi mbaʼe oñehaʼarõva ñandehegui ha hekopeguáva. Upéicharõ jepe ko mborayhu rupive jahechauka avei umi mbaʼe ñañandúva ñande pyʼapýpe ha mbaʼeichaitépa jajoayhu (1 Ped. 1:22). Ndahaʼeihína ñapensáva ñandejehénte, jahechauka uvei jaʼe ha jajapóvare ñamotenondeha ñande rapichápe (jaleemína 1 Corintios 13:​4-7).

19, 20. Emombeʼu umi mbaʼe oikovaʼekue ha ohechaukáva mbaʼépa ikatu ojapo pe mborayhu.

¹⁹ Pe mborayhu ningo ou Ñandejára espíritu sántogui. Upéicha rupi umi kristiáno añetetéva ojapo umi mbaʼe heta tapicha ndaikatúiva ojapo. Pór ehémplo umi kristiáno añetetéva naiprovlémai oñondive hũ térã morotĩ haguére, ikostúmbre diferénte haguére térã tetã ambuegua haguére (jaleemína Juan 13:​34, 35; Gál. 5:22). Umi tapicha ipyʼaporãva ohecharamoiterei mbaʼeichaitépa jajoayhu. Pór ehémplo, Israélpe peteĩ mitãkariaʼy oho rreunionhápe ha omombaʼeterei ohechávo mbaʼéichapa umi hudío ha árave oñoermánoicha omombaʼeguasu oñondive Jehovápe. Upévare haʼe oñepyrũ ostudia la Biblia ha ndofaltái rreunionhápe. Ha ñandépa jahechauka  avei jahayhuha ermanokuérape? Ñanderorýpa umi ou ramóvape rreunionhápe tahaʼe tetã ambuegua, ipláta térã imboriahúva, hũ térã morotĩvape?

²⁰ Ñande kristianoitéva ningo ñañehaʼã jatrata mborayhúpe enterovépe. El Salvadórpe peteĩ kuñakarai katólika orekóva 87 áño ostudia la Biblia peteĩ ermánandi, péro haʼe nokambiaséi la irrelihión. Peteĩ árape ou hasyete ha ojegueraha chupe ospitálpe. Ha osẽ rire upégui ñane ermanokuéra pyʼỹinte ohenói chupe un més aja entéro oikuaa hag̃ua mbaʼéichapa oĩ ha ndofaltáipa chupe hoʼumivaʼerã. Péro umi itupãopegua ndohói ni oñandumi chupe, upévare haʼe omombopa itaʼangakuéra, oheja irrelihión ha osegi jey ostudia la Biblia. Ajépa tuichaite mbaʼe la ikatúva ojapo pe mborayhu! Mbaʼeve jaʼéva ningo nombojojamoʼãi upévape.

21. Mbaʼépa jajapovaʼerã jahupyty hag̃ua umi mbaʼe porã ñahaʼarõva?

²¹ Koʼẽrõitéma Jesús heʼíta umi kristiáno guaʼúpe: “Che ndapoikuaái! Tapeho koʼágui peẽ mbaʼe vai apoha” (Mat. 7:​23, NM). Ñande kristiáno añetetéva katu jajapose umi mbaʼe porã omombaʼétava Ñandejára ha Itaʼýrape. Ñanemanduʼa voi Jesús heʼivaʼekuére: “Pe cherendúva ha ojapóva haʼéva ojogua peteĩ kuimbaʼe iñarandúvape, omopuʼãva hóga ita ári” (Mat. 7:​24, NM). Ñande jaikóramo kristiáno añetetéicha, Ñandejára ñandeguerohorýta ha oñekumplíta katuete umi mbaʼe porã ñahaʼarõva.

[Nóta]

Nemanduʼápa koʼã mbaʼére?

• Mbaʼe mbaʼépepa idiferénte umi kristiáno añetetéva umi kristiáno guaʼúgui?

• Mbaʼépa ojapovaʼerã umi kristiáno añetetéva?

• Mbaʼépepa tekotevẽ ñambaʼapove jaiko hag̃ua kristiáno añetetéicha?

[Porandu ñahesaʼỹijóva]

[Nóta oĩva taʼanga ndive páhina 13]

Jajepokuaápa jaiporu la Biblia predikasiónpe?

[Nóta oĩva taʼanga ndive páhina 15]

Oikuaápa che rapichakuéra ndafestehaiha umi arete oúva rrelihión japúgui?