Ñamombeʼúkena kyhyjeʼỹme Ñandejára Ñeʼẽ

‘Opavave henyhẽ espíritu sántogui ha omombeʼu kyhyjeʼỹme Ñandejára ñeʼẽ.’ (HECH. 4:31.)

1, 2. Mbaʼérepa ñañehaʼãvaʼerã japredika ha ñaporomboʼe katupyrýpe?

 TRES día omano mboyve Jesús heʼi hemimboʼekuérape: ‘Pe Ñandejára rréino rehegua marandu porã oñemombeʼúta oparupiete ko yvy ape ári, ojekuaa hag̃ua opa tetã rupi, ha upéi og̃uahẽta pe ára pahaite’. Upéi oñemoingove jey rire ha oho mboyvemi yvágape heʼi hemimboʼekuérape: ‘Peipytyvõ umi hénte opa tetãyguápe oiko hag̃ua chuguikuéra che remimboʼe ha pemboʼe chupekuéra ojapo hag̃ua opa mbaʼe haʼevaʼekue peẽme’. Upéi Jesús opromete: ‘Che aiméta penendive ára ha ára og̃uahẽ meve pe ára paha’ (Mat. 24:14; 26:​1, 2; 28:​19, 20, NM).

² Síglo primero guive oñeñepyrũ oñemombeʼu pe marandu porã osalvátava la héntepe, ha koʼág̃a peve testigos de Jehová ojapo upéva. Ko tembiapo ningo iñimportanteterei pórke ikatu oporosalva. Upévare ñañehaʼãvaʼerã japredika ha ñaporomboʼe katupyrýpe. Ko artíkulope jahecháta mbaʼéichapa Ñandejára espíritu sánto ñanepytyvõ ñamombeʼu hag̃ua kyhyjeʼỹme pe marandu porã. Ha umi mokõi artíkulo oúvape katu jahecháta mbaʼéichapa pe espíritu sánto ñanepytyvõ ñaporomboʼe porã ha akóinte japredika hag̃ua.

Tekotevẽ ñandepyʼaguasu

3. Mbaʼérepa ñandepyʼaguasuvaʼerã japredika hag̃ua?

³ Ñandejára ningo omeʼẽ ñandéve ñane  rembiaporã ijojahaʼỹva. Mbaʼépa hína upéva? Ñañeʼẽ ñande rapichakuérape Ñandejára Rréinore. Ko tembiapo jajapokuévo ningo jahasa heta mbaʼe ijetuʼúva. Oĩ ningo umi oguerohoryetereíva pe marandu porã, péro heta oĩ avei ojoguáva umi hénte Noé tiémpope guarépe. Umívare Jesús heʼivaʼekue ‘nopenái hague ojeʼévare chupekuéra ha upéi ou pe ama guasu ha oñehundipaite hikuái’ (Mat. 24:​38, 39, NM). Oĩ voi katu oñembohorýva ñanderehe térã ijarhélva ñandéve (2 Ped. 3:3). Ikatu avei oñemoĩ ñanderehe mburuvichakuéra, ñane kompañéro kolehiopegua térã ñandetravahohapegua ha ñanderogaygua jepe. Péro ndahaʼéi umíva añónte la ñambohovaivaʼerã, sapyʼánte ningo ñande voi ñaneʼotĩ térã jakyhyje oĩrõ g̃uarã nañanerenduséiva. Heta mbaʼére voi ningo hasy ñandéve japredika hag̃ua. Péro mbaʼépa ikatu jajapo akóinte ñañeʼẽ hag̃ua Ñandejára Ñeʼẽre ‘hekopete ha kyhyjeʼỹme’? (Efe. 6:​19, 20.)

4. a) Mbaʼépa heʼise ñañeʼẽ kyhyjeʼỹme? b) Mbaʼépa heʼi Pablo ombopyʼaguasu hague chupekuéra opredika hag̃ua umi Tesalonicayguápe?

⁴ Péro mbaʼépa heʼise ñañeʼẽ kyhyjeʼỹme? Griégope ymave upéva heʼisevaʼekue “jaʼe opa mbaʼe jaʼeséva”, “ñanesinséro” ha “ñañeʼẽ hekopete”. Ha heʼise avei “jajerovia”, “ñandevale” ha “ñandepyʼaguasuha”. Péro ñandepyʼaguasu ndeʼiseihína nañanderorymoʼãiha (Col. 4:6). Jajedesidivaʼerã péro jaikovaʼerã avei pyʼaguapýpe opavavéndi (Rom. 12:18). Ñamombeʼu jave pe marandu porã tekotevẽ ñandepyʼaguasu péro japororrespeta ani hag̃ua ñambopochy avavépe. Upéicharõ ñañeʼẽ hag̃ua kyhyjeʼỹme ñañehaʼãmbaitevaʼerã. Ha upéva nodependéi ñanderehe ni ñandelájare. Ñapensamínte apóstol Pablo ha iñirũnguéra ohórõ guarére opredika umi Tesalonicayguápe. Apóstol Pablo heʼi: ‘Orepyʼaguasu romombeʼu hag̃ua peẽme pe marandu porã’. Mbaʼérepa haʼekuéra tekotevẽvaʼekue ipyʼaguasu? Pórke ‘Filípospe ojejaʼo ha ojerereko asy chupekuéra’. Ha mbaʼépa omokyreʼỹ chupekuéra osegi hag̃ua? Apóstol Pablo heʼi: ‘Ñandejára orepytyvõ’ (jaleemína 1 Tesalonicenses 2:2). Upeichaite ningo, Jehová ikatu ñanembopyʼaguasu ani hag̃ua jakyhyje mbaʼevégui.

5. Mbaʼéichapa Jehová ombopyʼaguasu Pedro, Juan ha ambue kristianokuérape?

⁵ Ñanemanduʼamíntena mbaʼépa heʼivaʼekue Pedro ha Juan ojagarrárõ guare chupekuéra ‘umi mburuvicha, ansianokuéra ha umi eskríva’. Umi apóstol heʼivaʼekue chupekuéra: ‘Peẽ voi pehecháta, iporãpa Ñandejára renondépe rojapo peẽ pejéva, rojaporangue haʼe heʼíva. Ore ndaikatúi roguerokirirĩvo rohecha ha rohenduvaʼekue’. Upéi umi apóstol ha ambue kristiáno noñemboʼéi Ñandejárape anivéma hag̃ua ojepersegi chupekuéra, heʼi uvei: ‘Ñandejára emaʼẽ mbaʼéichapa ipochy hikuái, ha embopyʼaguasu ne rembiguaikuérape omombeʼu hag̃ua ne ñeʼẽ kyhyjeʼỹme’ (Hech. 4:​5, 19, 20, 29). Ha mbaʼéichapa Jehová ombohovái chupekuéra iñemboʼe? (Jaleemína Hechos 4:31.) Jehová ombopyʼaguasu chupekuéra ijespíritu sánto rupive. Ha koʼág̃a avei ikatu omeʼẽ ñandéve ijespíritu sánto. Péro mbaʼépa jajapovaʼerã omeʼẽ hag̃ua ñandéve ijespíritu sánto ha ñanepytyvõ hag̃ua predikasiónpe?

Mbaʼépa ikatu jajapo ñandepyʼaguasu hag̃ua?

6, 7. Mbaʼépa jajapovaʼerã Ñandejára omeʼẽ hag̃ua ñandéve ijespíritu sánto? Emombeʼu peteĩ ehémplo.

⁶ Ñande ningo jaipotáramo espíritu sánto jajerurentevaʼerã. Upévare Jesús heʼivaʼekue hemimboʼekuérape: ‘Peẽ pene ñañáva pemeʼẽkuaáramo iporãva pende raʼykuérape, koʼýte pende Ru oĩva yvágape omeʼẽta espíritu sánto umi chupe ojerurévape’ (Luc. 11:13). Koʼápe heʼíva ñanemokyreʼỹ akóinte jajerure hag̃ua Ñandejárape omeʼẽmi hag̃ua ñandéve ijespíritu sánto. Koʼýte jajerurevaʼerã chupe tañanembopyʼaguasu ijetuʼu  jave ñandéve jajapo hag̃ua peteĩ mbaʼe. Pór ehémplo japredikátaramo kállere, negosioháre térã ambue hendápe (1 Tes. 5:17).

⁷ Upéicha ojapovaʼekue peteĩ ermána hérava Rosa. * Peteĩ árape oĩ jave eskuéla ombaʼapohápe ohecha peteĩ profesóra oleehína peteĩ infórme ambue eskuelapegua omombeʼúva mitãme oñemaltrata hague. Pe profesórape ombopochyeterei la oleéva ha heʼi: “Mbaʼéiko oikopáta ñandehegui péicharõ!”. Upémaramo Rosa oaprovecha upe oportunida opredika hag̃ua. Mbaʼépa ombopyʼaguasu chupe upéva ojapo hag̃ua? Haʼe heʼi: “Ajerure Jehovápe chepytyvõ hag̃ua ijespíritu rupive”. Rosa omyesakã heta mbaʼe pe profesórape, ha heʼi chupe oñemongeta jey hag̃ua hikuái upe rire. Upéicha ojapovaʼekue avei peteĩ mitãkuñaʼi hérava Milane, haʼe oreko cinco áño ha oiko táva Nueva Yórkpe. Milane heʼi: “Che sy ndive ningo akóinte roñemboʼemivaʼerã aha mboyve eskuélape”. Ha mbaʼépa ojerure pe mitãkuñaʼi sy Jehovápe? Ojerure chupe omombarete hag̃ua Milánepe ikatu hag̃uáicha pyʼaguasúpe oñeʼẽ hapichakuérape Jehováre. Milane sy heʼi: “Upéicha rupi Milane omombeʼu ikompañerokuérape mbaʼérepa ndofestehái kumpleáño ha ambue arete. Upévare haʼe nomoirũi chupekuéra umi aretépe”. Iporãite niko upéicharõ ñañemboʼe Ñandejárape ñanembopyʼaguasu hag̃ua.

8. Mbaʼépa ñanemboʼe Jeremías rembiasakue?

⁸ Jajepyʼamongetami avei mbaʼéichapa Jehová oipytyvõvaʼekue Jeremíaspe anive hag̃ua okyhyje. Jehová omondosérõ guare chupe profétaramo omomarandu hag̃ua tetãnguérape, haʼe heʼi: ‘Anína Jehová che Jára! Che niko chemitãiterei ha nañeʼẽkuaái’ (Jer. 1:​4-6). Péro upe rire Jeremías pyʼaguasúpe ha kyreʼỹme oho oporomomarandu mbaʼépa ojapóta Jehová. Upévare heta oĩ heʼíva hese ivaívante voi oanunsiaha (Jer. 38:4). Jeremías ningo sesenta y cinco áño ári ojapo kyreʼỹme pe tembiapo oñemeʼẽvaʼekue chupe. Ha opavavénte voi oikuaa chupe Israélpe ipyʼaguasueterei haguére oporomomarandu hag̃ua. Upévare seis síglo haguépe jepe la hénte oimoʼã Jeremíaspe oñemoingove jey hague ohechávo mbaʼeichaitépa Jesús ipyʼaguasu (Mat. 16:​13, 14). Mbaʼépa ojaporakaʼe proféta Jeremías anive hag̃ua okyhyje ha hiʼotĩ? Haʼe voi omombeʼu: ‘Ñandejára marandu oĩ che pyʼapýpe, peteĩ tata rendýicha che kanguekuápe; añehaʼã aguerokirirĩ ha ndaikatúi’ (Jer. 20:​9, ÑÑB). Ñandejára Ñeʼẽ ningo ipoderóso ha upévare ndaikatúi oguerokirirĩ.

9. Mbaʼéichapa Ñandejára Ñeʼẽ ikatu ñanepytyvõ Jeremíaspe oipytyvõ haguéicha?

⁹ Apóstol Pablo ohaírõ guare umi Hebreos-pe heʼi: ‘Ñandejára Ñeʼẽ oikove, ipuʼaka ha haimbeve opa kyse puku haimbe  jováivagui. Ha oike ánga ha espíritu paʼũ meve, ombojaʼo peve kangue joajuha ha karaku, ombojovake avei ñane pensamiénto ha ñande pyʼapy rembipota jepe’ (Heb. 4:12). Ñandejára Ñeʼẽ ningo ñandéve ñanepytyvõ avei Jeremíaspe oipytyvõ haguéicha. La Biblia ningo ndahaʼéi voi yvypóra rembiapokue. Ha ohaírõ jepe yvypóra Ñandejára hína la ohaikavaʼekue. Upéicha voi heʼi ñandéve 2 Pedro 1:21: ‘Umi proféta noñeʼẽivaʼekue ijehegui reínte, espíritu sánto uvei ohaika chupekuéra’. Upévare, ñahesaʼỹijo jave la Biblia ñamyenyhẽ ñane akãme pe marandu Ñandejára ohaikavaʼekue ijespíritu sánto rupive (jaleemína 1 Corintios 2:10). Ha upe marandu ‘peteĩ tata rendýicha’ oĩ ñande pyʼapýpe ha ndaikatúi ñaguerokirirĩ.

10, 11. a) Mbaʼéichapa jastudiavaʼerã ikatu hag̃uáicha pyʼaguasúpe ñaporomomarandu? b) Emombeʼumína mbaʼépa rejapóta rehesaʼỹijo porãve hag̃ua Ñandejára Ñeʼẽ neañohápe.

¹⁰ Jaikuaa avei tuichaiterei ñanepytyvõtaha jastudiáramo Ñandejára Ñeʼẽ ñaneañohápe. Péro upearã pe jastudiáva og̃uahẽvaʼerã ñane korasõme ha jaheja tañanekambia tekotevẽhápe. Ñapensamínte Ezequiel rehe, peteĩ visión rupive Jehová ojerure chupe hoʼu hag̃ua peteĩ kuatiañeʼẽ orekóva marandu pohýi peteĩ tetã ipyʼahatãvape g̃uarã. Pe proféta oikũmby porã vaʼerã upe marandu oike peve ikorasõme, upéicharõmante oporomomaranduséta (jaleemína Ezequiel 2:8–3:​4, 7-9).

¹¹ Koʼág̃a ñande ñaime avei proféta Ezequiel situasiónpe. Hetaiterei oĩ ni nohenduséiva pe marandu ha upévare ijetuʼu ñandéve ñaporomomarandu hag̃ua. Ha jasegi hag̃ua ñaporomomarandu tekotevẽ ñahesaʼỹijo Ñandejára Ñeʼẽ ikatu hag̃uáicha ñantende porã. Ndahaʼeivaʼerã avei opyta porã vovénte ñandéve jajapóva upéva, ñamoĩvaʼerã katu peteĩ día ha óra akóinte jastudia hag̃ua. Ñande ningo jajoguase pe salmístape, haʼe heʼi: ‘Umi ñeʼẽ osẽva guive che jurúgui ha heñóiva che pyʼapýpe tahorýkena ne renondépe, che Jára Jehová, nde voi pe chemoʼã ha chesalváva’ (Sal. 19:​14, ÑÑB). Tekotevẽterei ningo jalee ha jajepyʼamongeta Ñandejára Ñeʼẽre. Upéicharõmante umi mbaʼe porã ñaaprendéva jarekóta ñane korasõme. Ha katuete enterovénte tekotevẽta ñañehaʼã ñahesaʼỹijo porãve Ñandejára Ñeʼẽ ñaneañohápe. *

12. Mbaʼérepa ndajafaltaivaʼerã rreunionhápe?

¹² Ikatu hag̃uáicha avei Ñandejára omeʼẽ ñandéve ijespíritu sánto jajapovaʼerã koʼápe heʼíva: ‘Jaheka mbaʼéichapa ikatu ñañopytyvõ  jajoayhuve hag̃ua ha hetave mbaʼe iporãva jajapo hag̃ua. Aníkena jaheja pe ñande aty’ (Heb. 10:​24, 25). Ñandejára ningo oiporu avei pe kongregasión ñanesãmbyhy hag̃ua ijespíritu sánto rupive. Upévare jaipotáramo Ñandejára espíritu ñanesãmbyhy ndajafaltaivaʼerã rreunionhápe, jajapysaka porã upépe ojeʼévare ha jajapo umi mbaʼe ñaaprendéva (jaleemína Revelación 3:6).

Umi mbaʼe jahupytýva ñandepyʼaguasu haguére

13. Mbaʼépa jaʼekuaa jahecha rire ojapovaʼekue umi kristiáno síglo primérope guare?

¹³ Ñandejára espíritu sánto ningo hína pe puʼaka ipoderosovéva ko univérsope. Ha upéva omombarete Jehová siervokuérape ojapo hag̃ua hembipota. Pór ehémplo umi kristiáno síglo primérope guare ojapo peteĩ tembiapo tuichaitereíva: Omombeʼu pe marandu porã ‘opa hendárupi ko yvy ape ári’ (Col. 1:23). Umi kuimbaʼe ha kuña omombeʼuvaʼekue pe marandu porã ningo ndahaʼéi tekove arandu térã ijestúdio porãva. Upévare jaʼekuaa Ñandejára ojokuái ha oipytyvõ hague chupekuéra (Hech. 4:13).

14. Mbaʼépa ñaikotevẽ ñanekyreʼỹ hag̃ua?

¹⁴ Ñande kristiáno avei jaikokuaavaʼerã Ñandejára espíritu ñanesãmbyhy hag̃ua, upéicharõmante ndajakyhyjemoʼãi ñamombeʼu hag̃ua pe marandu porã. Ñandéve ningo Ñandejára espíritu ñanemokyreʼỹ hag̃ua akóinte jajerurevaʼerã Jehovápe, jastudia ñaneañohápe, ñañemboʼe jajepyʼamongeta hag̃ua ha ndajafaltaivaʼerã rreunionhápe (Rom. 12:11). Pór ehémplo ‘peteĩ hudío hérava Apolos, Alejandriaygua ohórõ guare Éfesope’ ndokyhyjéi oñeʼẽ ha oporomboʼe hag̃ua. Mbaʼépa oipytyvõ chupe ojapo hag̃ua upéicha? Ñandejára Ñeʼẽ heʼi: ‘Espíritu sánto rupive kyreʼỹme oñeʼẽ ha oporomboʼe hekópe umi mbaʼe Jesús rehegua’ (Hech. 18:​24, 25). Ñande avei jahejáramo Ñandejára espíritu ñanemokyreʼỹ ñandepyʼaguasuvéta japredika hag̃ua ogaha rupi térã oimehápe (Rom. 12:11).

15. Mbaʼépa jahupytýta ñasẽramo kyreʼỹme japredika?

¹⁵ Heta mbaʼe porã ningo jahupytýta kyreʼỹme ñasẽramo japredika ha ñaporomboʼe. Primero, ñañeñandu porãvéta pórke jahechakuaáta mbaʼeichaitépa iporã ha iñimportánte pe tembiapo oñemeʼẽvaʼekue ñandéve. Segundo, javyʼavéta ñandekatupyryve rupi ñaporomboʼe hag̃ua. Tercero, ñanekyreʼỹvéta pórke jahechakuaáta mbykypaitemaha pe tiémpo japredika hag̃ua.

16. Mbaʼépa ikatu jajapo nañanekyreʼỹvéiramo japredika hag̃ua?

¹⁶ Mbaʼépa ikatu jajapo nañanekyreʼỹvéiramo japredika hag̃ua? Ñepyrũrã jajapovaʼerã apóstol Pablo heʼivaʼekue: ‘Pejepyʼamongetána jahecha peime porãpa térã nahániri pende jeroviápe, pemaʼẽ pendejehe pehecha hag̃ua mbaʼéichapa peime’ (2 Cor. 13:5). Iporãta avei ñañeporandu: “Añehaʼãpa akóinte ahupyty Ñandejára espíritu sánto? Ajerurépa Jehovápe omeʼẽ hag̃ua chéve ijespíritu sánto? Ojekuaápa che ñemboʼére ajeroviaha Ñandejárare chepytyvõtaha ajapo hag̃ua hembipota? Aagradesépa chupe chejokuái haguére apredika hag̃ua? Ajepokuaápa ahesaʼỹijo Ñandejára Ñeʼẽ? Aiporupaʼaína chetiémpo ajepyʼamongeta hag̃ua umi mbaʼe ahendu ha aleévare? Aha memépa  rreunionhápe ha añehaʼã akomenta?”. Ñañeporandúramo koʼã mbaʼe ñanepytyvõta jahecha hag̃ua mbaʼépepa tekotevẽ ñakambia ha ñañehaʼãmbaite jajapo upéicha.

Jaheja Ñandejára espíritu sánto tañanembopyʼaguasu

17, 18. a) Mbaʼéichapa osegi pe tembiapo oñemoñepyrũvaʼekue síglo primérope? b) Mbaʼépa ñanepytyvõta ani hag̃ua avave ñandejoko japredika hag̃ua?

¹⁷ Jesús oñemoingove jey rire heʼi hemimboʼekuérape: ‘Ág̃a pe espíritu sánto ou vove pende ári penemombaretéta ha peikuaaukáta che réra Judea ha Samáriape ha opa tetã oĩvape ko yvy ári’ (Hech. 1:​8, JMP). Upe tembiapo omoñepyrũvaʼekue hikuái upérõ ojejapo japove ohóvo. Koʼág̃a oĩma siete millones testigos de Jehová oikuaaukáva Ñandejára sãmbyhy doscientos treinta tetã ha lugárpe rupi. Ha káda áño opredika hikuái mil quinientos millones de óra rupi. Ajépa javyʼaite jajapo haguére ko tembiapo arakaʼeve ndojerrepetimoʼãiva!

¹⁸ Síglo primérope guaréicha, Ñandejára espíritu sánto ñanesãmbyhy ñamombeʼu hag̃ua marandu porã. Ha jahejáramo espíritu sánto ñanepytyvõ ‘avave nañandejokomoʼãi’ japredika hag̃ua (Hech. 28:31). Jahejákena upéicharõ Ñandejára espíritu sánto tohechauka ñandéve jajapovaʼerã ha jasegi ñamombeʼu pe marandu porã.

[Nóta]

Embohovaimína koʼã porandu

• Mbaʼérepa ñandepyʼaguasuvaʼerã ñamombeʼu hag̃ua Ñandejára marandu?

• Mbaʼépa oipytyvõrakaʼe umi kristiáno ypykuépe oñeʼẽ hag̃ua kyhyjeʼỹme?

• Mbaʼépa ñanepytyvõta ñandepyʼaguasuve hag̃ua?

• Mbaʼépa jahupyty ñandepyʼaguasu haguére?

[Porandu ñahesaʼỹijóva]

[Nóta oĩva taʼanga ndive páhina 7]

Mbaʼéichapa ñaipytyvõkuaa ñane famíliape ipyʼaguasuve hag̃ua?

[Nóta oĩva taʼanga ndive páhina 8]

Peteĩ ñemboʼe mbykymi ñanembopyʼaguasúta japredika hag̃ua