Akóintekena peguata pe tape iporãvévare!

‘Jaikovérõ térã ñamanórõ, ñande Jehová mbaʼe hína.’ (ROM. 14:8.)

1. Mbaʼépa heʼivaʼekue Jesús jajapovaʼerãha jaikoséramo tape porãre?

 OĨRAMO jepe heta tape jaguata hag̃ua, oĩ peteĩnte iporãva ha Jehová oipota jaiporavo upéva. Péro jaguata hag̃ua upe tapére tekotevẽ jajapo la Biblia heʼíva, ha jaikuaa porãve Jesucrístope. Haʼe heʼi porã vaʼekue mbaʼépa tekotevẽ jajapo jaikoséramo tape porãre: jahejavaʼerã espíritu sánto ñanesãmbyhy ha avei jaikuaa porã Ñandejára Ñeʼẽ heʼíva. Tekotevẽ avei ñamboʼe ñande rapichápe oiko hag̃ua chugui Jesús remimboʼe (Mat. 28:​19, 20; Juan 4:24). Jajapóramo Jesús heʼivaʼekue Jehová ñandeguerohory ha ñanderovasáta.

2. Mbaʼépa ojaporakaʼe primer síglope umi ohenduvaʼekue pe marandu porã? Mbaʼérepa ojeʼevaʼekue ohoha peteĩ “Tape Pyahúre”?

² Entéro umi ‘ipyʼaporã ha oñehaʼãva ohupyty jeikove opaʼỹva’, oguerovia la Biblia heʼíva ha ojevautisa. Upévare jaguerohoryeterei umi ojevautisa ramóvape ha ñande pyʼaite guive jaʼe chupekuéra: “Akóintekena peguata pe tape iporãvévare!” (Hech. 13:48). Primer síglope hetaiterei tapicha ohendúva pe marandu porã, oguerovia ha ojapo Ñandejára Ñeʼẽ heʼíva. Upéi haʼekuéra ojevautisa ohechauka hag̃ua ijerovia Jehováre (Hech. 2:41). Koʼãvare ojeʼevaʼekue ohoha peteĩ “Tape Pyahúre” (Hech. 9:2; 19:23). Ha hendaitépe ojeʼe upéva. Mbaʼérepa? Koʼã tapicha ningo okambia hekove, ojerovia Jesús rehe ha ohaʼanga chupe (1 Ped. 2:21).

3. Mbaʼérepa heta odesidi ojevautisa? Mboýpa ojevautisa umi 10 áño ohasavaʼekuépe?

³ Ko ára pahápe pe marandu porã ojepredikahína 230 tetã rupi. Umi 10 áño ohasavaʼekuépe 2.700.000 tapicha oñemeʼẽ Jehovápe ha ojevautisa; péva heʼise 5.000 rasami káda semána. Odesidi hikuái ojapo upéva ohayhúgui Jehovápe ha oservise rupi chupe. Haʼekuéra oikuaa mbaʼépa heʼi la Biblia ha oguerovia. Añetehápe pe vautísmo tuichaiterei mbaʼe hína, upe guive Jehová haʼéma ñane amígo. Avei upéva ohechauka jajeroviaha  Ñandejára ñanepytyvõtaha jaiko hag̃ua tape porãre, oipytyvõ haguéicha hembiguaikuérape yma (Isa. 30:21).

Mbaʼérepa tekotevẽ jajevautisa?

4, 5. Mbaʼe iporãvapa jahupyty jajevautisávo?

⁴ Koʼág̃a epensami ndejehe, oiméne nde reikuaa porãma Ñandejárape ha rejapóma oñekotevẽva resẽ hag̃ua repredika. Upéva iporãiterei! Péro reñemboʼémapa Jehovápe reñemeʼẽ hag̃ua chupe ha rejevautisa? Mbaʼérepa rejapovaʼerã upéva? Nde ningo reikuaa porãma iñimportanteveha ñamombaʼeguasu Jehovápe, jaiko rangue ñameʼẽ ñandejupe gústo térã ñambyaty mbaʼerepy (jaleemína Salmo 148:​11-13; Lucas 12:15). Oiméne reñeporandu: Cherovasátapa Jehová ajevautisa haguére? Katuete ojapóta. Jahechamína mbaʼe iporãvapa jahupyty jajevautisávo.

⁵ Péicha jaiporu porãta ñande rekove ha javyʼaitereíta jajapógui Ñandejára rembipota. Ndaipóri iporãvéva upévagui! (Rom. 12:​1, 2.) Ñandejára espíritu ñanepytyvõta ñandepyʼaporã, jajerovia ha ñandepyʼaguapy hag̃ua (Gál. 5:​22, 23). Jehová ohendúta ñane ñemboʼe ha ñanderovasáta ñañehaʼãgui jaiko Iñeʼẽ heʼiháicha. Japredikáta vyʼapópe ha péicha jajeroviavéta ikatutaha jaikove tapia g̃uarã. Ha iporãveha katu, ñañemeʼẽvo Jehovápe ha jajevautisa jahechauka jaipotaha oiko ñandehegui testígo de Jehová (Isa. 43:​10-12).

6. Mbaʼépa jahechauka jajevautisávo?

⁶ Jajevautisávo jahechauka opavave rovake ñañemeʼẽma hague Jehovápe; upe guive ñande imbaʼéma. Heʼi voi apóstol Pablo: ‘Ndajaikovéima ñandejupe g̃uarã, ha nañamanói ñandejupe g̃uarã. Jaikovéramo, jaikove Jehovápe g̃uarã, ha ñamanórõ, ñamano Jehovápe g̃uarã. Upévare jaikovérõ térã ñamanórõ, ñande Jehová mbaʼe hína’ (Rom. 14:​7, 8). Ñandejára ñanderayhúgui oheja jadesidi mbaʼépa jajapóta. Upévare jadesidíramo jaiko tape porãre, jahechauka jahayhuha Jehovápe ha avei ñambovyʼaiterei chupe (Pro. 27:11). Jajevautisávo ndahaʼéi jahechaukánteva ñañemeʼẽma hague Ñandejárape, jahechauka avei haʼeha ñande Ruvicha ha ñañemoĩha igoviérno ykére (Hech. 5:​29, 32). Ha jajapo haguére upéva Jehová oñemoĩ avei ñande ykére (jaleemína Salmo 118:6). Jajevautisárõ Jehová katuete ñanderovasáta koʼág̃a ha amo gotyove avei.

Jareko hetaiterei ermáno opárupi ko yvy ape ári

7-9. a) Mbaʼépa opromete Jesús umi ohejávape opa mbaʼe omoirũ hag̃ua chupe? b) Mbaʼéichapa oñekumplihína Jesús heʼivaʼekue Marcos 10:​29, 30-pe?

⁷ Apóstol Pedro heʼivaʼekue Jesúspe: ‘Ore ningo rohejapaite opa mbaʼe rorekomíva  ha romoirũ. Mbaʼépa rohupytýta upévare?’ (Mat. 19:​27, NM). Pedro oikuaase mbaʼépa ohaʼarõ chupe ha umi ótro apóstolpe amo gotyove. Haʼekuéra ningo heta ojesakrifika omotenonde hag̃ua predikasión (Mat. 4:​18-22). Mbaʼépa oprometéraʼe chupekuéra Jesús?

⁸ Marcos kuatiañeʼẽ omombeʼu Jesús opromete hague hemimboʼekuérape orekotaha hikuái hetaiterei ermáno oparupiete. Heʼi: ‘Entéro ohejavaʼekue hóga, ermáno, ermána, sy, túva, taʼyrakuéra, térã yvy, che rehehápe ha pe marandu porã rehehápe, hekoviavaʼerã chupe 100 vése, koʼág̃a ko tiémpo kóvape, óga, ermáno, ermána, sy, taʼýra ha yvy, ha upe rire katu tekove opaʼỹva’ (Mar. 10:​29, 30, BNP). Jesús heʼi haguéicha, primer síglope oĩvaʼekue heta kristiáno omog̃uahẽva hógape iñermanokuérape. Koʼãva apytépe oĩ Lidia, Áquila, Priscila ha Gayo. Péicha oiko chuguikuéra ‘ermáno, ermána ha sy’ iñermanokuérape g̃uarã (Hech. 16:​14, 15; 18:​2-4; 3 Juan 1, 5-8).

⁹ Koʼág̃a rupi oñekumpli porãvéntema Jesús oprometevaʼekue. Heta ermáno, pór ehémplo, umi misionéro, betelita térã siervo internacional vyʼapópe oheja ‘ijyvy’, térã hembiapokuéra, oho hag̃ua ombaʼapo tetã ambuépe Ñandejára rréino rehehápe. Oĩ ohejáva hóga ha oñehaʼãva oreko saʼive mbaʼerepy. Upéicharõ jepe pyʼỹi ñahendu ñane ermanokuéra omombeʼúrõ mbaʼéichapa ovyʼa oservívo Jehovápe ha mbaʼéichapa Haʼe oñangareko hesekuéra (Hech. 20:35). Enterove ojevautisáva ikatu ovyʼa ‘omotenonde memévo Ñandejára rréino ha hembipota’, ojapoháicha umi ermáno oikóva oparupiete ko yvy ape ári (Mat. 6:​33, NM).

Jehová oñangareko ñanderehe

10, 11. Mbaʼéichapa Jehová oñangareko ñanderehe ha mbaʼépa jajapovaʼerã upearã?

¹⁰ Avei jajevautisávo Jehová oñangareko ñanderehe. Haʼete ñanemoʼãva peteĩ lugárpe oĩva ñemiháme, ani hag̃ua mbaʼeve ombyai ñande jerovia. Ha ñamombaʼeterei ojapo haguére  upéva (jaleemína Salmo 91:1). Umi hénte nopensáiva Jehová opensaháicha ha ndojeroviáiva hese, ndoikuaái moõpa oĩ ko lugár, upévare ojeʼe oĩha ñemiháme. Jajapóramo Jehová rembipota ha jajerovia hese haʼete jaʼéva chupe: ‘Ne rendápe akañykuaa ha nde chemoʼã. Ñandejára, nderehe ajerovia’ (Sal. 91:​2, ÑÑB). Jajapórõ péicha Jehová oñangarekóta ñanderehe (Sal. 91:9). Ajépa javyʼaite upe haguére!

¹¹ Jehová oñangareko hag̃ua ñanderehe, ñaime porã vaʼerã hendive ha jaiko iñirũ teéramo. Jahupyty hag̃ua upéva ñañemeʼẽvaʼerã chupe ha jajevautisa. Avei tekotevẽ jastudia la Biblia, ñañemboʼe ñande pyʼaite guive ha ñañehaʼã ñaneñeʼẽrendu Ñandejárape (Sant. 4:8). Jesús hína pe oĩ ag̃uivéva Jehovágui, upévare haʼe pe ehémplo iporãvéva ñandéve g̃uarã. Haʼe ojerovia meme Itúvare (Juan 8:29). Ñande avei jajerovia meme vaʼerã Jehováre. Haʼe ñanepytyvõse ñakumpli hag̃ua ñaprometevaʼekue ñañemeʼẽrõ guare chupe (Ecl. 5:4). Jehová ñanepytyvõ ñamombarete hag̃ua ñande jerovia ha péicha ohechauka ñanderayhu ha oipotaha akóinte jajepytaso ijykére.

Jaiko pyʼaguapýpe Jehovándi ha ñane ermanokuérandi

12, 13. a) Mbaʼe iporãvapa jahupyty avei ñañemeʼẽvo Jehovápe? b) Mbaʼéichapa ikatu ñaipytyvõ umi osẽ ramóvape opredika?

¹² Ñañemeʼẽvo Jehovápe ha jajevautisa jahupyty avei ambue mbaʼe neporãmba jepéva: jaiko pyʼaguapýpe Ñandejárandi ha ñane ermanokuérandi (Sal. 29:11; Isa. 54:13). Ko múndope ndaikatumoʼãi jahupyty upéva mamove hendápe. Jahávo umi asamblea internacionálpe, jahecha ijatyha ermáno opa tetãygua oñeʼẽva opaichagua idióma, hũva ha morotĩva; ha ñamombaʼeterei mborayhu ha pyʼaguapy iñasãiva upépe.

¹³ Upéi ñamaña ko múndore ha ñambyasy jey rei umi héntepe, oĩ vaietereígui hikuái (jaleemína Isaías 65:​13, 14). Japredikávo pe marandu porã ñainvita chupekuéra oĩ hag̃ua avei pyʼaguapýpe Ñandejárandi. Javyʼa avei ikatúgui ñaipytyvõ umi osẽ ramóvape opredika, ikatupyryve hag̃ua. Umi ansiáno ojeruréramo ñandéve ñaipytyvõ hag̃ua chupekuéra, jajapose Áquila ha Priscila ojapo haguéicha. Haʼekuéra ‘omyesakã porãve Ñandejára rape’ Apólospe, ha péicha haʼe ontende porãve Jehová rembipota (Hech. 18:​24-26).

Ñañehaʼã meméke jaikuaave Jesúspe

14, 15. Mbaʼérepa ñañehaʼãvaʼerã jaikuaa porãve Jesúspe?

¹⁴ Jajevautisa rire tekotevẽ gueteri ñañehaʼã jaikuaa porãve Jesúspe. Mbaʼérepa? Ou mboyve ko yvy ape ári haʼe ombaʼapovaʼekue hetaiterei áñore Itúvandi (Pro. 8:​22, 30). Upévare Jesús oikuaa porã vaʼekue, oho hag̃ua tape porãre, ojapovaʼerãha Jehová rembipota ha omoherakuã Ñandejára Ñeʼẽ (Juan 18:37). Oikuaa ojapóramo upéva heta ohasa asytaha ha upéi ojejukataha chupe (Mat. 20:​18, 19; Heb. 4:15). Péro Jesús oikuaa avei ndoikóiramo Ñandejára rapére ohechaukataha opensaha ijehénte ha nosẽporãmoʼãiha. Iñehémplo ohechauka ñandéve mbaʼéichapa ikatu ñaneñeʼẽrendu tapiaite Jehovápe.

¹⁵ Jesús ojevautisa riremi Satanás oñehaʼã omoñuhã chupe oheja hag̃ua Ñandejára rape, péro ndaikatúi oity chupe (Mat. 4:​1-11). Péva ohechauka ikatuha ñaneñeʼẽrendu meme Jehovápe, Satanás oñehaʼãramo jepe ñaneguenohẽ tape porãgui. Satanás oñehaʼãmbaite omoñuhã umi ojevautisátavape térã umi ojevautisa ramóvape (1 Ped. 5:8). Mbaʼéichapa ojapo jepi upéva? Ikatu oiporu ñane hentekuéra ndoikuaaporãiva testigos de Jehovápe. Haʼekuéra oimoʼã ojapo porãha ñanemboligáramo jaheja hag̃ua Jehovápe. Upéicha jave ikatu jaaprovecha ñambohovái hag̃ua oñeporandúva ñandéve ha japredika. Avei péicha ikatúta ñaaprende  ñañeʼẽ pyʼaguapýpe ha japorotrata porã hag̃ua (1 Ped. 3:15). Ha upéi umi ñanerendúva ikatúta avei ohupyty heta mbaʼe porã (1 Tim. 4:16).

Aníkena arakaʼeve ñasẽ pe tape porãgui!

16, 17. a) Deuteronomio 30:​19, 20 ohechauka ñandéve mbohapy mbaʼe tekotevẽva jajapo jaikove hag̃ua. Mbaʼe mbaʼépa umíva? b) Mbaʼéichapa Jesús, Juan ha Pablo imanduʼa jey Moisés heʼivaʼekuére?

¹⁶ Yma 1500 áño rupi Jesús ou mboyve ko yvy ape ári, Moisés omokyreʼỹvaʼekue umi Israelguápe oiporavo hag̃ua pe tape iporãvéva. Heʼi chupekuéra: ‘Amoĩ ne renondépe mokõi tape reiporavo hag̃ua: jeikove térã ñemano, jehovasa térã mbaʼe vai. Ha amoĩ yvága ha yvy testígoramo ohecha hag̃ua mbaʼépa reiporavo. Eiporavóke jeikove, nde ha ne ñemoñarekuéra oikove hag̃ua. Pehayhúke Ñandejárape, pehendúke iñeʼẽ ha ani pejei hapégui’ (Deu. 30:​19, 20). Jaikuaa ningo umi Israelgua omboyke hague Jehovápe, péro haʼe oipota gueteri jajapo umi mbohapy mbaʼe Moisés heʼivaʼekue. Jesús ha hemimboʼekuéra imanduʼa jey vaʼekue koʼã mbaʼére.

¹⁷ Primero ‘jahayhuvaʼerã’ Jehovápe. Upearã ñakumplivaʼerã umi léi porãite omeʼẽva ñandéve (Mat. 22:37). Segundo, tekotevẽ ‘ñahendu iñeʼẽ’, jajapo upéva jastudiávo la Biblia ha ñakumpli heʼíva (1 Juan 5:3). Avei iporã jaha meme umi rreunionhápe upépe oñemyesakã rupi Ñandejára Ñeʼẽ (Heb. 10:​23-25). Ha tercero katu ñañehaʼãvaʼerã ‘ani jajei’ Jehová rapégui, upéva heʼise jajepytaso mbarete vaʼerãha ijykére. Toiko la oikóva, jajeroviavaʼerã Jehováre ha ñamoirũ meme Jesúspe (2 Cor. 4:​16-18).

18. a) Mbaʼépa heʼíraʼe ko rrevísta 1914-pe tape porãre? b) Mbaʼéichapa ñañeñandu Ñandejára omyesakã haguére ñandéve Iñeʼẽ?

¹⁸ Javyʼaite ningo jaikóramo Ñandejára Ñeʼẽ heʼiháicha! Áño 1914-pe ko rrevísta heʼivaʼekue: “Ajépa javyʼa ha ñanerenyhẽ mbaʼe porãgui. Ha ajépa Ñandejára okumpli oprometéva ñandéve. Oĩramo otopáva peteĩ tape iporãvéva kóvagui, tomombeʼu ñandéve ha toho upe tape rupi. Ñande ndajatopái gueteri mbaʼeve ikatúva ñambojoja Ñandejára Ñeʼẽre. [...] Ndajaikuaái ni mbaʼéichapa ñamombeʼupáta umi mbaʼe porãita jahupytýva ha mbaʼéicha ñandepyʼarory jaikuaa porãgui Ñandejára teépe. Jahechávo mbaʼéichapa haʼe iñarandu, hekojoja, tuicha ipuʼaka ha ñanderayhu, upéva og̃uahẽ ñane ánga ruguaite peve. Natekotevẽvéima jaheka mamove hendápe mbaʼeve iporãvéva kóvagui. Ñañehaʼãtantema jaikuaa porãve Jehovápe koʼẽ koʼẽre” (The Watch Tower 15 de diciembre 1914, páhina 337, 338, ingléspe). Koʼag̃aite peve jaagradeseterei Jehovápe omyesakã haguére ñandéve Iñeʼẽ; ha javyʼaiterei ‘ohesapégui ñandéve ñande raperã’ ára ha ára (Isa. 2:5; Sal. 43:3; Pro. 4:18).

19. Mbaʼérepa reñehaʼãvaʼerã rekumpli la Biblia heʼíva, rejevautisáma hag̃ua?

¹⁹ Oimérõ nde reipota avei ‘Jehová ohesape ndéve nde raperã’ péro neʼĩra rejevautisa, anivéma rehaʼarõ rejedesidi hag̃ua. Eñehaʼãmbaite ekumpli la Biblia heʼíva rejevautisa hag̃ua. Rejapóvo upéva reagradesehína Jehová ha Jesúspe opa mbaʼe ojapóvare nderehehápe. Emeʼẽ Jehovápe pe mbaʼe iporãvéva rerekóva: nde rekove. Ehechauka chupe rejaposeha hembipota ha remoirũseha Itaʼýrape (2 Cor. 5:​14, 15). Nderetopaichéne peteĩ tape iporãvéva kóvagui!

Mbaʼépa ere chupe?

• Mbaʼérepa jaikuaa porã vaʼerã Jesúspe?

• Mbaʼépa jahechauka jajevautisávo?

• Mbaʼe iporãvapa ohupyty umi ojevautisáva?

• Mbaʼépa ñanepytyvõta ani hag̃ua ñasẽ tape porãgui?

[Porandu ñahesaʼỹijóva]

[Nóta oĩva taʼanga ndive páhina 25]

Jajevautisávo jaiporavo pe tape iporãvéva

[Nóta oĩva taʼanga ndive páhina 26]

Reipotápa Ñandejára oñangareko nderehe?