Aníke jaʼa Satanás ñuhãme

“ANI peñembotavy. Pende Jára napendesalvamoʼãi, peñentrega katu, pórke ndapejapóirõ pejererekontemavaʼerã”. Peichalénto heʼivaʼekue pe mensáhe rréi Senaquerib oguerahaukavaʼekue umi Jerusalenguápe Rabsaqué rupive. Péro pe rréi Asiriaygua, Senaquerib ehérsito ningo oikéma voi Judápe. Upévare jaʼekuaa haʼe omondo hague pe mensáhe omongyhyje hag̃ua umi Jerusalenguápe ha oñentrega hag̃ua hikuái (2 Rey. 18:​28-35).

Opárupi ojekuaavaʼekue umi Asiriaygua iviolénto ha iñañaha. Haʼekuéra omongyhyjepa hag̃ua umi ikontrariokuérape omombeʼu voi animálcha otrataha umi tetã ojagarrávape. Pe istoriadór Philip Taylor heʼi: “Haʼekuéra ningo opárupi voi omopropaganda ojapoha heta mbaʼe ivaietereíva. Ojapo upéva oreko hag̃ua ipoguýpe umi ojagarrávape ha omongyhyje hag̃ua iñenemigokuérape. Ha oiporu hikuái umi taʼanga ivaietereíva omoangekói hag̃ua umi héntepe”. Jaʼekuaa voi pe propagánda ipoderosoitereiha pórke heʼiháicha Taylor “opoko ñane akãre” jaguerovia hag̃ua heta mbaʼe.

Koʼág̃a rupi ñande jaservíva Jehovápe ñañorairõ avei jaikóvo. Péro ‘nañañorairõiñaína ñande rapicha ndive, ñañorairõ uvei umi espíritu aña ndive’. Mávapa hína umíva? Umi ánhel aña opuʼãvaʼekue Ñandejárare (Efe. 6:12). Ha Satanás hína la ikavesillakuéra, haʼe omongyhyje avei la héntepe ha ojapo opaichagua propagánda.

Satanás heʼi enterovépe ikatuha omomombyry Ñandejáragui. Yma Job tiémpope Satanás heʼimavaʼekue Jehovápe: ‘Yvypóra oĩ omeʼẽ hag̃uáicha oimeraẽ mbaʼe oikove hag̃ua rehehápe’. Upéicha haʼe ontendeka ojejopy vaíramo yvypórape ikatuha naiñeʼẽrenduvéi Ñandejárape (Job 2:4). Péro añete piko la heʼíva? Enterovénte piko naiñeʼẽrendumoʼãi Ñandejárape ojejukáta mbaʼéramo chupe? Satanás ningo upéva la ogueroviaukaséva. Ha oiporu umi propagánda mbeguekatúpe ojapouka hag̃ua ñandéve oimeraẽ mbaʼe vai. Upévare jahechamíta koʼág̃a mbaʼe ñuhãpa Satanás oiporu ha mbaʼépa ikatu jajapo ani hag̃ua jaʼa pype.

Yvypórape ‘yvýgui ojejapopyre’

Nemanduʼápa Jóbpe oho hague ovisita mbohapy iñamígo? Umíva apytépe oĩkuri iñamígo guaʼu Elifaz. Ha hese ningo ojevalevaʼekue Satanás heʼi hag̃ua yvypóra ikangyetereiha ha noaguantamoʼãiha ojejopy vaíramo chupe. Elifaz heʼi voi yvypóra ‘ku óga tujúgui ojejapopyréicha ikangyha ha yvýpente oñemopyendaha’. Upéi katu heʼive: ‘Ku taravéicha ikatu oñembope. Pyharevégui, kaʼarúvo omanóma opa ára g̃uarã ha avavépe ndahaʼevéima mbaʼeve’ (Job 4:​19, 20).

Ñandejára Ñeʼẽ ñanembojoja avei ‘mbaʼyru yvyguiguáre’ (2 Cor. 4:​7, ÑÑB). Ha mbaʼére piko ñanekangy heta mbaʼépe? Pórke ñande tekove pekadór ha imperfékto pe ñande ru ypykue Adán káusare (Rom. 5:12). Upévare, hasýta ñandéve ñandepuʼaka hag̃ua Satanás rehe ñaiméramo ñaneaño. Péro ñande kristiáno nañanderesarairivaʼerã Jehová oĩha ñanendive ha ñandedefékto hetáramo jepe haʼe ñanemombaʼetereiha (Isa. 43:4). Jehová omeʼẽta avei ñandéve ijespíritu sánto jajeruréramo chupe (Luc. 11:13). Ijespíritu sánto ‘ñanemombarete’ hína ñambohovái hag̃ua oimeraẽ mbaʼe Satanás omoĩva ñandéve ñane renonderãme (2 Cor. 4:​7, ÑÑB; Fili. 4:13). Upéicharõ, ‘ñañemoĩramo Satanás rehe ha ñande jerovia imbaretéramo’, Jehová ñanepytyvõta jajepytaso hag̃ua ijykére (1 Ped. 5:​8-10). Upévare, aníkena jakyhyje Satanásgui!

 ‘Yvypóra ýicha omboyʼúva ñañareko’

Amo gotyove ningo Elifaz oporandu: ‘Mbaʼeichagua yvy arigua piko oñembohekopotĩkuaa ha mbaʼeichagua kuña memby piko oñembohekoporãkuaa?’. Upéi haʼe jey heʼi: ‘Emaʼẽ porãmínte, hiʼanhelkuéra rehe jepe Ñandejára ndojeroviapái, ha umi yvága jepe naipotĩmbái hesa renondépe, ha koʼýte pe kuimbaʼe iñañáva ha hekovaíva, ýicha omboyʼúva ñañareko’ (Job 15:​14-16, ÑÑB). Péicha Elifaz ontendeka Jóbpe ndaiporiha Jehovápe g̃uarã yvypóra hekojojáva. Ha Satanás ohechávo ndajajeroviapaiha ñandejehe ojevalénte avei upévare. Haʼe oipota akóinte ñaneangekói umi mbaʼe jajapo vai vaʼekuére ha jaʼe voi ñandejehe ndajavaleiha mbaʼeverã térã nañanepohãveimaha. Satanás oipota avei ñapensa Jehová ojopyetereiha ñanendive, ipyʼahatã, naimbaʼeporãi, nañandeporiahuverekói ha nañanepytyvõseiha.

Jaikuaa ningo ñande yvypóra ‘ñaimeha pekádo poguýpe ha ñanemombyryha Ñandejára rekomimbipágui’. Ha ñaneimperfékto rupi ndaikatúi ñakumplipa Ñandejára léi perféktova (Rom. 3:23; 7:​21-23). Péro upéva ndeʼiséi ndajavaleiha mbaʼeverã Ñandejárape g̃uarã. Ñande Ru Jehová ningo oikuaa porã “yvynteha voi ñande”. Upévare haʼe akóinte imbaʼerechakuaáta ñanendive ha ndoikomoʼãi ohekýi ñandéve jajapo vaíva guive (Sal. 103:​8, 9, 14). Jehová ningo oikuaa Satanás ojeprovechaseha ñanesituasiónre (Rev. 12:​9, 10).

Jehová ningo oiporiahuvereko ha operdonáta peteĩ hembiapo vaívape. Upearã pe hembiapo vaíva ohejavaʼerã umi mbaʼe ojapóva, oñembyasy ha oñemomirĩ oñemboja hag̃ua Ñandejára rendápe (Isa. 55:7; Sal. 51:17). La Biblia ningo heʼi voi: ‘Pene rembiapo vaikue pytãvéramo jepe, ahejáta morotĩ asy mandyjúicha’ (Isa. 1:18). Aje piko ñanemokyreʼỹete ko téysto akóinte jajapo hag̃ua ñande Ru Jehová rembipota!

Ñande ningo pekadór rupi ndaikatúi ñandejehegui reínte jaiko Ñandejára amígoramo. Mbaʼérepa upéva? Adán ha Eva operdégui pe perfeksión ha jeikove opaveʼỹva ha upéva ñandéve avei ñanderupyty (Rom. 6:23). Péro Jehová ñanderayhuetereígui ojapo tekotevẽva oñeperdona hag̃ua ñande pekádo jajeroviáramo Itaʼýra sakrifísiore (Mat. 20:28; Juan 3:16). Aje piko ‘imbaʼeporãite’ ñanendive! (Tito 2:11.) Péicha jahecha jarekoha gueteri solusión! Ha ndaipóri mbaʼérepa jahejávo Satanáspe ogueroviauka ñandéve umi japuita heʼíva!

‘Repokóramo hese’

Satanás heʼivaʼekue Job ohejataha Ñandejárape ombohasy vaíramo chupe. Ha odesafia voi katu Jehovápe heʼívo: ‘Repokóramo hese, ehecháne mbaʼéichapa ojahéi nderehe’ (Job 2:5). Koʼág̃a rupi avei Satanás oiporu umi mbaʼe ñanembohasa asýva ñanemoñeñandu vai hag̃ua ku ndajavaleirõguáicha mbaʼeverã.

Jehová ningo arakaʼeve nañanemboykemoʼãi ndaikatuvéigui yma guaréicha ñambaʼapo chupe g̃uarã. Ñapensamíntena mbaʼépa jajapóta peteĩ ñane amígope oñembyepoti  vaipaite ha oñelastimambáramo. Ñamboykéta piko chupe ndaikatuvéima haguére ojapo heta mbaʼe yma guaréicha? Ndajajapomoʼãi ningo upéicha, ajépa? Jasegíta katu jahayhu chupe ha ñañangareko hese, koʼýte oiméramo oikóraʼe hese upéva ñanepytyvõseha rupi. Ha oiméramo ñande upéichata, Jehováma katu mbaʼeichaite ojapóta upéva! La Biblia heʼi voi: ‘Ñandejára hekojojahína ha ndahesaraimoʼãi umi mbaʼe pejapovaʼekuégui ha pe mborayhu pehechaukavaʼekuégui héra rehehápe’ (Heb. 6:10).

La Biblia oñeʼẽ ‘peteĩ viudami imboriahúvare’, haʼe ningo oiméne áñorema oipytyvõrakaʼe oñemombaʼeguasu hag̃ua Jehovápe. Upéi Jesús ohecha upe viúda ‘omoĩ mokõi monéda michĩetereíva’ pe káha templopeguápe. Mbaʼépa heʼi Jesús ohechávo upéva? Heʼípa pe viúda ha pe plataʼimi omeʼẽva ndovaleiha mbaʼeverã? Ndeʼiriete katu! Oguerohoryeterei uvei chupe ojapo haguére opa ikatumíva Jehovápe oñemombaʼeguasu hag̃ua (Luc. 21:​1-4, ÑÑB).

Ñande avei ñaneñeʼẽrendúramo Ñandejárape katuete akóinte ñaime porãta hendive. Tahaʼe ñanderasy, ñandetuja térã ñaneprovléma hetáramo jepe ñaneimperfékto rupi. Jehová ningo arakaʼeve nañanderejareimoʼãi ndaikatuvéima haguére jajapo heta mbaʼe chupe g̃uarã (Sal. 71:​9, 17, 18).

‘Pereko pe salvasión pene akãmoʼãháramo’

Mbaʼépa ikatu jajapo ani hag̃ua Satanás propagánda oike ñane akãme? Upearã ñahenduvaʼerã ko konsého apóstol Pablo omeʼẽvaʼekue: ‘Tapenembaretéke Ñandejára puʼaka rupive. Pemoĩ pendejehe opa mbaʼe Ñandejára omeʼẽva peẽme peñorairõ hag̃ua Satanás kóntrape, péicharõ hatã peiméta ani hag̃ua pe Aña penembotavy’. Pe mbaʼe iñimportantevéva Jehová omeʼẽva ñandéve ñañorairõ hag̃ua ningo haʼe pe esperánsa jarekóva ‘ñane akãmoʼãháramo’ (Efe. 6:​10, 11, 17, BNP). Ha ani hag̃ua Satanás propagánda oike ñane akãme ñamoĩvaʼerã pe ñane akãmoʼãha ha akóinte jaiporu. Pe akãmoʼãha oproteheháicha peteĩ soldádo akã ‘pe esperánsa jarekóva’ ñandeprotehe ani hag̃ua oike ñane akãme umi japu heʼíva Satanás. Upévare jajerovia Ñandejára okumplitaha oprometevaʼekue omoĩvo peteĩ múndo pyahu neporãmba jepéva (1 Tes. 5:8). Upearã tekotevẽ ñahesaʼỹijo porã Ñandejára Ñeʼẽ akóinte jareko hag̃ua ñane akãme upe esperánsa.

Mbaʼépa oipytyvõ Jóbpe ogueropuʼaka hag̃ua umi mbaʼe vaieta ojapovaʼekue hese Satanás? Haʼe ningo ojeroviaiterei pe ñemoingove jeýre. Upéicha rupi, ni omanótaramo noñemomombyrýi Jehovágui. Job ningo heʼi voi Jehovápe: ‘Nde cherenóita ha che rombohováita, ha reguerohorýta ne rembiapokue’ (Job 14:15). Job ojerovia omanóramo iñeʼẽrendúgui Ñandejárape, Haʼe omoingove jeytaha chupe. Jehová ningo ohayhueterei voi isiervokuéra iñeʼẽrendúvape.

Enterove jajeroviavaʼerã avei upéicha Ñandejára añeteguáre. Haʼe ikatu osolusiona oimeraẽ mbaʼe vai jahasáva Satanás ha iñirũnguéra káusare. Aníkena ñanderesarái avei apóstol Pablo heʼivaʼekuégui: ‘Pejeroviakuaa Ñandejárare, haʼe ndohejamoʼãi ojehu peẽme mbaʼeve ikatuʼỹvaʼerã peropuʼaka. Upéva rangue, pehasa jave peteĩ mbaʼe ijetuʼúva Ñandejára omeʼẽvaʼerã peẽme mbaʼéichapa pesẽta upévagui peropuʼaka hag̃ua’ (1 Cor. 10:​13, BNP).

[Nóta oĩva taʼanga ndive páhina 20]

Jehová omombaʼeterei jajapóva iservísiope

[Nóta oĩva taʼanga ndive páhina 21]

Ñamoĩkena ñane akãmoʼãháramo pe esperánsa jarekóva ha akóintekena jaiporu