Jahechápa Jehovápe ñande Rúicha?

PETEĨ árape oñemboja Mboʼehára Guasu rendápe peteĩ hemimboʼe ha ojerure chupe: ‘Mboʼehára oremboʼemína mbaʼéichapa roñemboʼevaʼerã’. Ha Jesús heʼi chupe: ‘Peñemboʼe jave, pejevaʼerã kóicha: “Ore Ru, toñemomarangatu nde réra”’ (Luc. 11:​1, 2, NM). Jesús ningo ikatu vaʼekue ohenói Jehovápe “Todopoderóso”, ‘Mboʼehára Katupyry’, ‘Apohare’, ‘Ikaraietéva’ ha ‘Rréi opa ára g̃uarãva’ (Gén. 49:25; Isa. 30:20; 40:28; Dan. 7:9; 1 Tim. 1:17). Péro Jesús ohenói Jehovápe “Ore Ru”. Mbaʼérepa upéva? Oiméne oipota ñañemoag̃ui pe Ipoderosovévare ko univérsope, ku mitã oñemoag̃uirõguáicha itúva ohayhuetévare.

Upéicharõ jepe, heta ñande rapichápe hasy ohecha hag̃ua Ñandejárape Ituvarõguáicha. Peteĩ ermána hérava Atsuko * heʼi oiko hague hese upéicha: “Ajevautísamaramo jepe, heta áñore ijetuʼu chéve añemoag̃ui hag̃ua Jehováre ha añeʼẽ chupe che Tuvarõguáicha”. Ha upéi omombeʼu mbaʼérepa oñeñandu upéicha, heʼívo: “Che nachemanduʼái voi che ru chemukunuʼũ hague yma chemichĩme”.

Koʼã ára pahápe ningo heta oĩ ‘ndohayhúiva’ ifamíliape (2 Tim. 3:​1, 3). Upévare, ndajahecharamói oĩ haguére heta oñeñandúva Atsuko oñeñandu haguéicha. Upéicharõ jepe javyʼaiterei jaikuaávo ikatuha jahecha Jehovápe ñande Rúicha.

Jehová omeʼẽ ñandéve ñaikotevẽva

Jahecha hag̃ua Jehovápe ñande Ru ñanderayhúvaicha, tekotevẽ jaikuaa porã raẽ chupe. Ha mbaʼéichapa ikatu jajapo upéva? Jesús heʼi voi: ‘Pe Túva añoite oikuaa porã pe Taʼýrape ha pe Taʼýra añoite oikuaa porã pe Túvape. Ha pe Taʼýra omombeʼusévape omombeʼúne’ (Mat. 11:​27, NM). Upéicha rupi jajepyʼamongetavaʼerã Jesucristo omombeʼuvaʼekuére itúva Jehovágui jaikuaa hag̃ua mbaʼeichaguápa ñande Ru yvagapegua. Ha mbaʼépa la heʼivaʼekue Jesús?

Primero Jesús ohechakuaavaʼekue Ñandejára ojapo hague chupe, heʼívo: ‘Che Ru rupi che aikove’ (Juan 6:57). Ha ñande ningo Jehová rupínte avei jaikove (Sal. 36:9; Hech. 17:28). Péro mbaʼérepa Jehová omeʼẽvaʼekue ñandéve ñande rekove? Ñanderayhúgui. Upéicharõ katuete ñande jahayhuvaʼerã avei chupe.

Ajépa tuichaite mbaʼe Ñandejára ojapovaʼekue ñanderayhupápe. Haʼe omeʼẽ Itaʼýra Jesús ñandepeʼa hag̃ua pekádo ha ñemano poguýgui. Upéicha rupi ñande pekadór ikatu jareko Jehovápe ñane amígoramo (Rom. 5:12; 1 Juan 4:​9, 10). Upe ñande Ru yvagapegua ningo katuete okumpli iñeʼẽ. Upévare opavave ñande jahayhúva Jehovápe ha ñaneñeʼẽrendúva chupe, jajerovia jahupytytaha ‘Ñandejára raʼykuéra liverta iporãitéva’ (Rom. 8:21).

Jehová ohechauka avei ñanderayhuha ‘ohejávo kuarahy ojope’ opavavépe g̃uarã (Mat. 5:​45, NM). Ajépa ñande nañañemboʼéi jepi osẽ hag̃ua kuarahy, péro jaikuaa ñaikotevẽha hese ha javyʼa voi osẽramo. Pe ñande Ru yvagapegua ningo ipojera ha omeʼẽmbaite voi ñandéve ñaikotevẽmíva. Ha jajerure mboyve chupe ñaneremikotevẽ Haʼe oikuaáma upéva. Ajépa iporãitéta jajesarekóramo hembiapokuére ha jajepyʼamongeta  mbaʼéichapa oñangareko hesekuéra! (Mat. 6:​8, 26.)

Ñande Ru oñangareko ñanderehe

Proféta Isaías rupive Jehová oprometevaʼekue hembiguaikuérape: ‘Umi sérro ojeíramo hendágui ha oryryipáramo jepe, che mborayhu ndojeichéne ndehegui, ha che kompromíso pyʼaguapy rehegua ndopamoʼãi, heʼi nde Jára nderayhuetéva’ (Isa. 54:10). Pe pyhare omano mboyve, Jesús oñemboʼe ha heʼi jey jey mbaʼeichaitépa Ñandejára oñangareko porã hemimboʼekuérare. Ha ojerure Chupe hesehapekuéra: ‘Haʼekuéra niko opytáta gueteri ko yvy ári ha che aháta nerendápe. Che Ru marangatu, eñangarekomíkena hesekuéra nde réra rehehápe’ (Juan 17:​11, 14, BNP). Ha Jehová ombohovái Jesúspe iñemboʼe oñangarekóvo hemimboʼekuérare.

Koʼág̃a rupi Jehová ñanemboʼe hiʼoraitépe pe ‘tembiguái jeroviaha ha iñarandúva’ rupive ani hag̃ua jaʼa Satanás ñuhãme (Mat. 24:45). Ha jaaprovecháramo umi mbaʼe omeʼẽva ñandéve, ndahasyivéta ‘ñamonde hag̃ua pe ekípo Ñandejára omeʼẽva’. Pór ehémplo, ‘pe jerovia jareko ñande rete moʼãháramo ani hag̃ua aña huʼy rendy ojekutu ñanderehe’ (Efe. 6:​11, 16). Upéicharõ ñande jerovia ñandeprotehéta ani hag̃ua jaʼa Satanás ñuhãme ha péva ohechauka ñande Ru Jehová oñangarekoha ñanderehe.

Jahechakuaavéta ningo Jehová ñanderayhuetereiha jajepyʼamongetáramo Jesucristo ohasavaʼekuére ko yvy ape ári. Marcos 10:​13-16-pe Jesús heʼi hemimboʼekuérape: “Peheja mitãnguéra tou cherendápe”. Ha umi mitã ojerepárõ guare hese, haʼe ovendesi ha oañua chupekuéra. Oiméne piko ovyʼaiterakaʼe hikuái! Jaikuaaháicha Jesús ojoguaiterei Itúvape. Jehová oipota voi avei enterove oñemoag̃ui hese. Mbaʼérepa jaʼe upéicha? Jesús heʼi rupi: “Upe chéve cherecháva, ohecháma che Rúpe” (Juan 14:9).

Jehová ningo henyhẽ mborayhúgui ha akóinte oporohayhu. Omeʼẽ ñandéve opa mbaʼe ñaikotevẽva, oñangareko porã ñanderehe ha oipotaiterei ñañemoag̃ui hese (Sant. 4:8). Peichagua túva mamove voi ndajatopamoʼãi!

Hetaiterei mbaʼe porã jahupytýta

Jajeroviáramo ñande Ru Jehová ñanderayhuetereiha, jahupytýta heta mbaʼe porã (Pro. 3:​5, 6). Jesús voi ohupytyvaʼekue heta mbaʼe porã ojerovia rupi Ñandejárare ipyʼaite guive. Upévare heʼivaʼekue hemimboʼekuérape: ‘Nacheañói, che Ru chembouhare oĩ chendive’ (Juan 8:16). Jesús akóinte ohechakuaa Jehová ojepytasoha ijykére. Pór ehémplo, haʼe ojevautisárõ guare ohendu Itúva heʼívo: “Kóva haʼe che Raʼy ahayhuetéva, che aiporavovaʼekue” (Mat. 3:​15-17). Ha omano mboyvemi katu heʼi: “Che Ru, nde pópe amoĩ che espíritu” (Luc. 23:46). Jesús ningo upe ohasa asyve jave jepe naikangýi la ijerovia.

Ñande upéicha vaʼerã avei jaikuaágui Jehová oĩha ñande ykére ha upévare ndajarekói mbaʼérepa jakyhyjévo (Sal. 118:6). Pór ehémplo Atsuko ojepokuaami ijeheguínte ombohovái iprovlemakuéra. Péro upéi ohesaʼỹijo Jesús rembiasakue ha mbaʼéichapa oñemoag̃uivaʼekue Jehováre. Mbaʼépa oiko upéi? Atsuko heʼi: “Koʼág̃a aikuaáma mbaʼépa heʼise jareko peteĩ ñande Ru ha jajerovia hese. Upéva ningo tuicha chembopyʼaguapy ha avyʼaiterei. Ahechakuaa ndaiporiha mbaʼeve ñandejopyetereivaʼerã”.

Mbaʼépa jahupytýta avei jahecháramo Jehovápe ñande Ru teéicha? Umi mitã ningo ohayhu ituvakuérape ha ojapose opa mbaʼe ogustaháicha chupekuéra. Jesús avei ohayhuetereivaʼekue Itúva yvagapeguápe ha upévare heʼi: ‘Che akóinte ajapo umi mbaʼe chupe ombovyʼáva’ (Juan 8:29). Ha ñande avei jahayhueterei Ñandejárape, upévare jajapose hekoitépe opa mbaʼe ha ‘ñamombaʼeguasuse chupe opavave renondépe’ (Mat. 11:25; Juan 5:19).

 ‘Rojagarra nde po deréchagui’

Ñande Ru yvagapegua ningo omeʼẽ ñandéve espíritu sánto ‘ñanepytyvõ hag̃ua’. Ha Jesús heʼi haguéicha pe espíritu sánto ‘oikuaaukáta ñandéve pe añetegua’ (Juan 14:​15-17; 16:​12, 13). Upéicha ñanepytyvõta jaikuaa porãve hag̃ua ñande Ru yvagapeguápe. Ha ñanepytyvõta avei ‘ñamboguarara hag̃ua yvýpe opa mbaʼe vai oñemombaretéva’ ñane korasõme. Térã ñanepytyvõta anive hag̃ua jaguerovia heta mbaʼe hendapeʼỹ. Ha upéicha ‘opa ñane remiandu ñamoĩ Cristo poguýpe iñeʼẽrendu hag̃ua chupe’ (2 Cor. 10:​4, 5). Upévare jajerurékena Ñandejárape ijespíritu sánto ñanepytyvõmi hag̃ua. Jesús heʼi voi ñandéve: “Pende Ru yvágape oĩva omeʼẽta espíritu sánto umi chupe ojerurévape” (Luc. 11:13). Jajerurékena avei Jehovápe tañanepytyvõ ijespíritu sánto rupive ñañemoag̃uive hag̃ua hese.

Umi mitã ningo ndokyhyjevéima voi itúva ojagarráramo chupe ipógui. Ha ñande jahecháramo Jehovápe ñande Rúicha, jajeroviaitereíta ko mbaʼe oprometevaʼekuére: ‘Che, Jehová nde Jára, rojagarráma nde po deréchagui ha haʼe ndéve: “Ani rekyhyje, Che roipytyvõta”’ (Isa. 41:13). Péicha jahecha Ñandejára ikatuha ñandejagarra ñande pógui ha jaservi chupe opa ára g̃uarã (Miq. 6:8). Jasegíramo jajapo hembipota, ñande Ru Jehová ñanderayhu ha oñangareko porãta ñanderehe, ha jaikóta vyʼa ha kyhyjeʼỹme.

[Nóta]