Katupyrýpekena jaiporu ‘Ñandejára Ñeʼẽ’

‘Ku espádaicha pereko Ñandejára Ñeʼẽ pende pópe, espíritu sánto omeʼẽva peẽme.’ (EFE. 6:17.)

1, 2. Mbaʼépa jajapovaʼerã jahechágui oñekotevẽtereiha opredikavaʼerã?

 JESÚS ohechávo oĩha heta ipyʼaporãva ha tekotevẽva oikuaa Ñandejárape, heʼi hemimboʼekuérape: ‘Heta pe ñemitỹngue, omonoʼõvaʼerã katu mbovy. Upévare, pejerure pe kóga járape tombou umi omonoʼõvaʼerã’. Péro upéva ndopái upépe, ‘Jesús ohenoika umi 12 hemimboʼépe’ ha omondo chupekuéra Israel tuichakue ‘omonoʼõ’ hag̃ua umi omoirũsévape chupe (Mat. 9:​35-38; 10:​1, 5). Ha aremi rire Jesús oiporavove setenta hemimboʼe, ha omondo chupekuéra mokõi mokõi’ opredika hag̃ua (Luc. 10:​1, 2, BNP).

² Koʼág̃a rupi avei oñekotevẽterei umi opredikavaʼerã. Áño 2009-pe ningo 18.168.323 tapicha oho Conmemoracionhápe. Upéva ohechauka oĩ hague ñanendive diez millones rupi ndahaʼéiva testigos de Jehová. Upéicharõ hetaiterei oĩhína pe ñemitỹngue ñamonoʼõvaʼerã (Juan 4:​34, 35). Upévare tekotevẽ jajerure Ñandejárape ombouve hag̃ua ñanepytyvõvaʼerã ko tembiapópe. Ha jajeruréramo chupe ko mbaʼe ñande pyʼaite guive, ñañehaʼãmbaitevaʼerã ñandekatupyryve japredika ha ñaporomboʼe porã hag̃ua (Mat. 28:​19, 20; Mar. 13:10).

3. Emombeʼumína mbaʼéichapa pe espíritu sánto ñanepytyvõ predikasiónpe.

³ Jahecha haguéicha pe ótro artíkulope, Jehová espíritu sánto ñanepytyvõ ‘ñamombeʼu  hag̃ua Ñandejára marandu kyhyjeʼỹme’ (Hech. 4:31). Péro ñanepytyvõ avei katupyrýpe japredika ha ñaporomboʼe hag̃ua. Mbaʼéichapa ikatu ñandekatupyryve? Upearã tekotevẽ jaiporu porã la Biblia, pe mbaʼe ipoderosovéva Jehová omeʼẽva ñandéve (2 Tim. 3:16). Umi mbaʼe oĩva pype ningo ojehaivaʼekue espíritu sánto rupive. Upéicha rupi pe espíritu sánto ñanepytyvõ ñamombeʼu hag̃ua umi marandu porãite oĩva Ñandejára Ñeʼẽme. Péro ñepyrũrã jahechamíta mbaʼeichaitépa Ñandejára Ñeʼẽ ipoderóso. Upéi katu jahecháta mbaʼépa jajapovaʼerã ñamboʼe hag̃ua katupyrýpe ñande rapichakuérape.

‘Ñandejára ñeʼẽ ipuʼaka’

4. Mbaʼépa ikatu ojapo Ñandejára Ñeʼẽ?

⁴ Ñandejára Ñeʼẽ ningo ipoderosoiterei (Heb. 4:12). Ha haimbeve voi umi espáda yvypóra ojapovaʼekuégui. Mbaʼérepa jaʼe upéicha? Peteĩ mbaʼe haimbetereíva ningo ikatu ñanekytĩ ha oike ñande karaku peve. Upéicha avei Ñandejára Ñeʼẽ, ikatu oike ñane ánga rugua peve ha oguenohẽ umi mbaʼe jarekóva ñande pyʼapýpe. Ha ikatu ñanepytyvõ ñakambiaite hag̃ua ñande rekove (jaleemína Colosenses 3:10). Aje piko ipoderosoite la Ñandejára Ñeʼẽ!

5. Mbaʼéichapa ñanepytyvõ Ñandejára Ñeʼẽ ha mbaʼérepa iporã upéva?

⁵ Ñandejára Ñeʼẽ ningo ñanemoarandu ha upéva iporãiterei. Ñanerekomboʼe mbaʼéichapa jaikovaʼerã ko múndo añáme. Jaʼekuaa hese peteĩ lintérnaicha ohesapeha ñandéve ñande raperã ha omyesakã ñandéve moõ rupípa jaguatavaʼerã (Sal. 119:105). Ndaipóri ningo Ñandejára Ñeʼẽicha ñanepytyvõva ñande rekovépe. Pór ehémplo, ñanepytyvõ ñambohovái hag̃ua ñaneprovléma ha jadesidi porã hag̃ua opa mbaʼe. Tahaʼe jaiporavo porã hag̃ua ñane amigorã, vyʼarã, travahorã térã ñande aorã (Sal. 37:25; Pro. 13:20; Juan 15:14; 1 Tim. 2:9). Ñanepytyvõ avei jajogueraha porã hag̃ua enterovéndi (Mat. 7:12; Fili. 2:​3, 4). Ñandejára Ñeʼẽ ningo mombyry peve ohesape ñandéve ñande raperã. Mbaʼérepa jaʼe upéva? Ñanepytyvõ rupi jahechakuaa hag̃ua mbaʼépepa opáta hína umi mbaʼe jajapóva, tahaʼe ivaíva térã iporãva (1 Tim. 6:9). Omombeʼu avei ñandéve mbaʼépa ojapóta Ñandejára amo gotyove ha upéva ñanemokyreʼỹ jaiko hag̃ua haʼe oipotaháicha (Mat. 6:33; 1 Juan 2:​17, 18). Añetehápe ningo javyʼa ha jaiko porãve jahejáramo Ñandejára Ñeʼẽ ñanesãmbyhy.

6. Mbaʼéichapa ñanepytyvõ Ñandejára Ñeʼẽ ñañorairõ hag̃ua Satanás kóntrape?

⁶ Apóstol Pablo heʼi Ñandejára Ñeʼẽ haʼeteha ‘peteĩ espáda espíritu sánto omeʼẽva’ ñandéve. Ko espáda ipoderosoitéva ningo ñanepytyvõ ñañorairõ hag̃ua Satanás kóntrape (jaleemína Efesios 6:​12, 17). Ñandejára Ñeʼẽ rupive ikatu ñamosãso umi oĩvape  Satanás poguýpe. Ndaipóri voi ótro espáda koichagua, pórke ojeporu ojeporosalva hag̃ua, ndahaʼéi ojeporojuka hag̃ua. Upévare, ñañehaʼãkena katupyrýpe jaiporu ko espáda.

Jaiporúkena hekopete

7. Mbaʼérepa ñañehaʼãvaʼerã jaiporukuaa pe ‘espáda espíritu sánto omeʼẽva’?

⁷ Peteĩ soldádo oñorairõ hag̃ua katupyrýpe, oikuaa porã vaʼerã pe árma oiporútava ha oñensaja meme. Ñande avei jajapovaʼerã upéicha jaiporukuaa hag̃ua la Biblia, pe ‘espáda espíritu sánto omeʼẽva’. Upearã jajapovaʼerã apóstol Pablo heʼivaʼekue: ‘Eñehaʼã ikatu haguéicha reime porã Ñandejára ndive, mbaʼapohára hembiapo porã vaicha ndoguerekóiva mbaʼérepa otĩta, omboʼéva hekoitépe pe ñeʼẽ añetegua’ (2 Tim. 2:​15, BNP).

8, 9. Mbaʼépa jajapovaʼerã ñantende porã hag̃ua peteĩ téysto? Emoĩ peteĩ ehémplo.

⁸ Mbaʼépa ñanepytyvõta jaiporu hag̃ua ‘hekoitépe pe ñeʼẽ añetegua’ japredika jave? Ñande raẽ voi tekotevẽ ñantende porã la Biblia heʼíva ikatu hag̃uáicha ñamyesakã porã. Ha upearã tekotevẽ jahecha mbaʼérõ guarépa ojehairakaʼe pe téysto jaleéva, jahecha mbaʼépa heʼi upe téysto mboyve ha upe rire avei. Jajapóramo upéicha, hesakãvéta mbaʼépa pe téysto ñanemboʼese.

⁹ Péicha jahecha, ñantende porã hag̃ua peteĩ téysto jahechavaʼerãha mbaʼépa heʼi upe mboyve ha upe rire. Jahechamínte pór ehémplo Pablo heʼivaʼekue Gálatas 5:​13-pe: ‘Che ermanokuéra, peẽ peñehenói penesãso hag̃ua. Aníntekena peiporu upéva peiko hag̃ua pende rete rembipota poguýpe. Peñopytyvõ uvei mborayhúpe’. Mbaʼéguipa la isãsorakaʼe umi kristiáno? Pekádo ha ñemanóguipa? Térãpa rrelihión japúgui? Jaleéramo mbaʼépa heʼi upe téysto mboyve ha upe rire, jahechakuaáta oñeʼẽha pe liverta oguerekóvare kristianokuéra Jesús omosãso rupi chupekuéra pe “Léi maldisióngui” (Gál. 3:​13, 19-24 BNP; 4:​1-5). Upéicharõ umi omombaʼéva upe liverta, oservíta mborayhúpe hapichakuérape ha ndoikomoʼãi ‘ojosuʼu ha oñomokõ hag̃uáicha’ (Gál. 5:​15, BNP).

10. Mbaʼépa jajapovaʼerã ñantende porãve hag̃ua peteĩ téysto ha mbaʼépa ñanepytyvõta upearã?

¹⁰ Upéicharõ, ñantende porãve hag̃ua peteĩ téysto oĩva la Bíbliape iporã ñainvestiga mávapa ohai, arakaʼépa, maʼerãpa ha mbaʼéicha javépa. Tuicha ñanepytyvõta avei jaikuaáramo mbaʼéichapa oikorakaʼe la hénte upe tiémpope ha mbaʼe rrelihiónpa oreko. *

11. Mbaʼéichapa jajapovaʼerã ñamboʼe hag̃ua ‘hekoitépe pe ñeʼẽ añetegua’?

¹¹ Ñamboʼe hag̃ua ‘hekoitépe pe ñeʼẽ añetegua’ ndahaʼeivaʼerã ñamyesakãnteva la Biblia  omboʼéva, jaikuaavaʼerã avei mbaʼéichapa jaʼéta. Pór ehémplo Jesús oiporu porãiterei vaʼekue la Biblia ombohovái hag̃ua Satanáspe. Ha koʼág̃a rupi avei ñande jaiporu Ñandejára Ñeʼẽ ñadefende hag̃ua pe añetegua, ndahaʼéi jaʼapoʼi térã ñamongyhyje hag̃ua la héntepe (Deu. 6:16; 8:3; 10:20; Mat. 4:​4, 7, 10). Jajapo uvei apóstol Pedro heʼi haguéicha: ‘Pemombaʼe Jesucrístope ha akóinte peñembosakoʼi pembohovái hag̃ua opa oporandúvape peẽme pende jerovia rehe. Péro pembohovái chupekuéra pyʼaguapýpe ha ñemomirĩme’ (1 Ped. 3:​15, ÑÑB).

12, 13. Mbaʼépa ikatu jajapo Ñandejára Ñeʼẽ rupive? Emombeʼumi peteĩ mbaʼe oikovaʼekue.

¹² Mbaʼépa jahupytýta jaiporúramo katupyrýpe Ñandejára Ñeʼẽ? (Jaleemína 2 Corintios 10:​4, 5.) Ñepyrũrãite voi ikatúta ‘ñamboguarara yvýre opa mbaʼe ojeʼéva hendapeʼỹ’. Upéva heʼise Ñandejára Ñeʼẽ rupive ikatutaha jahechauka japuha heta mbaʼe umi rrelihión omboʼéva. Ikatúta avei jahechauka mbaʼépa ndovaléi jajapo ha noĩporãiha heta mbaʼe yvypóra imperfékto omboʼéva pe filosofía rupive. Ñandejára Ñeʼẽ ningo ñanepytyvõ jaity hag̃ua yvýre ‘opa mbaʼe opuʼãva Ñandejára arandu rehe’. Añetehápe opa mbaʼe la Biblia omboʼéva ikatu jaiporu jaikuaauka hag̃ua ñande rapichápe pe añetegua.

¹³ Pór ehémplo, peteĩ kuñakarai Indiagua orekóva 93 áño oñepyrũ ostudia la Biblia pór kárta. Ha ombostudia chupe peteĩ imemby kariaʼy oikóva tetã ambuépe. Ko kuñakaraípe ogustaiterei voi opa mbaʼe oikuaáva ohóvo Jehovágui ha umi mbaʼe oprometévagui. Péro haʼe michĩmi guive oguerovia pe reencarnación. Upévare, imemby kariaʼy ohaírõ guare chupe mbaʼéichapa oĩ umi omanovaʼekue, haʼe ojeplagea ha heʼi: ‘Hasy chéve aguerovia hag̃ua la nde Biblia omboʼéva. Entéro rrelihión ningo omboʼe ñamano vove ñane álma osegiha oikove. Ha che michĩmi guive aguerovia ñamano rire ñande espíritu oñembohete pyahu jeyha 8.400.000 vése. Mbaʼéicha piko ko mbaʼe ndajagueroviamoʼãi? Nde piko ere upéicharõ enterove rrelihiónte ojavyha?”. Oiméneko pe kuñakarai ojeroviaitereirakaʼe umi mbaʼe oñemboʼevaʼekuére chupe. Péro ikatúne piko Ñandejára Ñeʼẽ okambia chupe? Heta árare ohesaʼỹijo rire heta téysto haʼe ohai imembýpe: ‘Koʼág̃a ramo añepyrũ antende mbaʼépa añetehápe oiko umi omanovaʼekuégui. Avyʼaitereíko aikuaávo oñemoingove jey vove umi omanóvape, ahecha jeytaha umi ahayhúva omanovaʼekuépe. Hiʼãitereímako chéve ou Ñandejára Rréino”.

Ñamboʼevaʼerã ojeguerovia hag̃uáicha

14. Mbaʼépa jajapovaʼerã umi ñande rapicha oguerovia hag̃ua la ñamboʼéva?

¹⁴ Jaiporu hag̃ua katupyrýpe Ñandejára Ñeʼẽ predikasiónpe, ndahaʼeivaʼerã jaleénteva umi téysto. Jajapovaʼerã katu apóstol Pablo ojapo haguéicha, haʼe ningo omboʼevaʼekue ojeguerovia hag̃uáicha (jaleemína Hechos 19:​8, 9 ha 28:23). Ñande avei ñañehaʼãvaʼerã jagueroviauka ñande rapichápe pe ñamboʼéva Ñandejára Ñeʼẽgui. Péro mbaʼéichapa ikatu jajapo upéva? Ñag̃uahẽvaʼerã ikorasõme ha jahechauka añeteha la ñamboʼéva chupe. Mbaʼépa nde rejapóta reporomboʼe  hag̃ua avei upéicha?

15. Mbaʼéichapa jahechaukáta ñamombaʼeha la Biblia?

¹⁵ Jahechaukavaʼerã ñamombaʼeha la Biblia. Ñañeʼẽ jave peteĩ témare, jalee mboyve peteĩ téysto iporã jaʼe iñimportanteha jaikuaa mbaʼépa Jehová opensa upe mbaʼére. Pór ehémplo, ikatu ñaporandu pe ñanerendúvape peteĩ mbaʼére ha ñahendu rire la heʼíva jaʼekuaa chupe: “Jahechamína mbaʼépa Ñandejára heʼi ko mbaʼére”. Jaʼéramo péicha jalee mboyve peteĩ téysto jahechaukañaína la Biblia ouha Ñandejáragui. Ha upéicha umi ñanerendúva omombaʼevéta pe ñamboʼéva chupekuéra. Koʼýte jajapovaʼerã upéicha japredika jave umi hénte ojeroviávape Ñandejárare péro nontendeporãiva la Biblia omboʼéva (Sal. 19:​7-10).

16. Mbaʼépa ikatu jajapo ñamyesakã porã hag̃ua peteĩ téysto?

¹⁶ Ñamyesakã porã vaʼerã umi téysto jaleéva. Jajapovaʼerã apóstol Pablo ojapo haguéicha, haʼe oñehaʼãvaʼekue omyesakã porã umi téysto, ndahaʼéi oleénteva (Hech. 17:3). Jaikuaa ningo peteĩ téysto ikatuha jaiporu ñamyesakã hag̃ua heta téma. Péro ñañehaʼãvaʼerã ñamyesakãve pe párte oñeʼẽhápe pe téma ñahesaʼỹijóvare. Upearã ikatu jarrepeti jey pe párte oñeʼẽhápe ñane témare térã ñaporanduve ñande rapichápe upe téysto heʼívare ikatu hag̃uáicha haʼete voi ontende. Ha upéi katu ñamyesakã porã chupe mbaʼépa ñanemboʼe upe téysto ha mbaʼéichapa oipytyvõta chupe.

17. Mbaʼépa ikatu jajapo ojeguerovia hag̃ua pe ñamboʼéva?

¹⁷ Jahekavaʼerã informasión ñamyesakãve hag̃ua la Biblia omboʼéva. Apóstol Pablo ningo ‘oiporúmi Ñandejára Ñeʼẽ’ omyesakãve hag̃ua umi mbaʼe omboʼéva. Upéicha umi hénte ojepyʼamongeta upe heʼívare ha ohechakuaa añeteha (Hech. 17:​2, 4). Ñande avei ikatu jajapo upéicha. Péro upearã ñambaʼeporanduvaʼerã ñande rapichakuérape ha jahechauka jajepyʼapyha hesekuéra. Upéicharõmante omombeʼúta ñandéve mbaʼépa opensa ha jaikuaáta pe ipyʼapýpe oĩva (Pro. 20:5). Avei jaʼenterangue peteĩ mbaʼe, iporãvéta jaiporu peteĩ téysto ndahasýiva ha omyesakãtava pe ñamboʼeséva. Iporãve ningo jaiporu peteĩ téystonte ha ñamyesakã porã, jalee reínte rangue mokõi térã mbohapy téysto. Jahekavéramo avei informasión oñeʼẽva pe téma ñamboʼévare, ndahasyivéta oguerovia hag̃ua umi hénte (Pro. 16:23). Sapyʼánte ningo tekotevẽta voínte jajapo upéva. Pór ehémplo, pe kuñakarai ñañeʼẽ hague ningo ñepyrũrã nontendéikuri mbaʼérepa hetaiterei oĩ ogueroviáva ñane álma térã espíritu nomanoiha. Upévare tekotevẽ vaʼekue oñemyesakã chupe umi mbaʼe. Ha oikuaa rire mbaʼéichapa la hénte oñepyrũrakaʼe oguerovia upéva ha mbaʼéicha rupípa heta rrelihión oñepyrũ omboʼe, pe kuñakarai oguerovia la Biblia omboʼéva. *

Jasegíkena jaiporu katupyrýpe la Biblia

18, 19. Mbaʼérepa ñañehaʼãvaʼerã katupyrýpe jaiporu pe ‘espáda espíritu sánto omeʼẽva’?

¹⁸ Ñandejára Ñeʼẽ heʼiháicha heta mbaʼe okambia ohóvo ko múndope ha ivai vaivéva oiko (1 Cor. 7:31; 2 Tim. 3:13). Upévare iñimportanteterei jasegi ‘ñamboguarara yvýre opa mbaʼe ojeʼéva’ ha noĩporãiva. Upearã jaiporuvaʼerã pe ‘espáda espíritu sánto omeʼẽva’, térã “Ñandejára Ñeʼẽ”.

¹⁹ Ajéiko javyʼaite jareko haguére Ñandejára Ñeʼẽ! Upéva rupive ikatu ñaipytyvõ ñande rapicha ipyʼaporãvape ha jaity yvýre opa japu ojegueroviáva. Ndaipóri voi mbaʼeve ipoderosovéva Ñandejára Ñeʼẽ heʼívagui. Upévare, ñañehaʼãkena katupyrýpe jaiporu predikasiónpe ko ‘espáda espíritu sánto omeʼẽva’.

[Nóta]

Mbaʼépa ñaaprende?

• Mbaʼépa ikatu ojapo Ñandejára Ñeʼẽ?

• Mbaʼépa ñanepytyvõta ñamboʼe hag̃ua ‘hekoitépe pe ñeʼẽ añetegua’?

• Mbaʼéichapa la Biblia ‘omboguarara yvýre opa mbaʼe ojeʼéva’ ha noĩporãiva?

• Mbaʼépa ikatu jajapo ojeguerovia hag̃ua pe ñamboʼéva?

[Porandu ñahesaʼỹijóva]

[Taʼanga ha rrekuádro oĩva páhina 12-pe]

La Biblia heʼíva ojeguerovia hag̃ua:

▪ Jahechaukavaʼerã ñamombaʼeha la Biblia

▪ Ñamyesakã porã vaʼerã umi téysto jaleéva

▪ Jahekavaʼerã informasión ñamyesakãve hag̃ua la Biblia omboʼéva

[Nóta oĩva taʼanga ndive páhina 11]

Ñañehaʼãvaʼerã jaiporu katupyrýpe ko ‘espáda espíritu sánto omeʼẽva’