Oñeporandúva jepi

Mbaʼéicha javépa peteĩ tapicha ikatu opensa tekotevẽha ojevautisa jey?

Ikatu peteĩ tapicha ohechakuaa ivautísmo ndovaleiha ha tekotevẽha ojevautisa jey. Pór ehémplo, ikatu ojevautisátarõ guare haʼe noĩporãi Ñandejára renondépe térã ojapo oikóvo ñemiháme peteĩ pekádo ivaietereíva. Ha peteĩ kristiáno ojevautisa riréma ojapóramo upeichagua pekádo oñemosẽ kongregasióngui. Péro peteĩ tapicha oikóva upéicha noñemeʼẽivaʼerã voi Ñandejárape. Upe tapicha oheja raẽ vaʼerã kuri umi mbaʼe vai ojapóva ha upéi oñemeʼẽ Ñandejárape. Péro oimérõ ojevautisarakaʼe ohejaʼỹre hembiapo vai, iporãta opensa ojevautisa jey.

Koʼág̃a jahechami ótro káso: ñamoĩ chupe ojevautisaha peteĩ puvlikadór. Péro tiémpo rire ojapo peteĩ mbaʼe ivaíva ha upévare ojejapo chupe peteĩ comité judicial. Ikatúpa haʼe heʼi ojevautisárõ guare ndoikuaaporãi hague mbaʼépa la ojapóva ha upévare ndovaleiha ivautísmo? Upéicha heʼíramo umi ansiáno ojapo jave pe comité judicial ndodudaivaʼerã pe ermáno vautísmopa ovale ha noporanduivaʼerã chupe upévare, ni nombohapeivaʼerã pe ermánope opensa hag̃ua ivautísmo ndovaleiha. Haʼekuéra ningo imanduʼavaʼerã pe ermáno ojevautisátarõ guare ohendu hague peteĩ diskúrso omyesakã porãva mbaʼépa heʼise ñañemeʼẽ Jehovápe ha jajevautisa. Ha haʼe heʼi avei “si”, ojejapórõ guare mokõi porandu umi ojevautisátavape. Upéi oho oñekambia ha ojevautisa oñemoñapymĩvo chupe ýpe. Upéicharõ pe ermáno oikuaa porã la ojapóva, ha upévare umi ansiáno otratavaʼerã chupe peteĩ kristiáno vautisádoicha.

Pe tapicha opensáramo ndovaleiha ivautísmo, umi ansiáno ikatu heʼi chupe olee ha oñehesaʼỹijo hag̃ua La Atalaya del 15 de agosto de 1960, páhina 511, ha 15 de julio de 1964, páhina 443 guive 446 peve. Péro mbaʼépa oikóta pe tapicha odesidíramo ojevautisa jeytaha heʼígui nontendeporãi hague Ñandejára Ñeʼẽ omboʼéva ojevautisárõ guare? Upéva ningo odependéma hese.

Mbaʼe mbaʼépa opensavaʼerã peteĩ kristiáno odesidi mboyve oikotaha peteĩ ógape ambue tapichándi?

Enterove ningo ñaikotevẽ peteĩ óga jaiko hag̃ua. Péro koʼág̃a rupi heta ñande rapicha ndahógai. Upévare heta ndahaʼéiva oñohénte teete oikómante oñondivepa peteĩ ógape. Ojapo hikuái upéva ivai rupi la pórte, hasýgui térã orekógui ambue provléma. Heta tetãme umi hénte oiko voi ojoʼaripa peteĩ kotýpente.

Jehová organisasión natekotevẽi ojapo peteĩ lísta puku heʼi hag̃ua mbaʼe mbaʼépa ñapensavaʼerã jadesidi mboyve moõpa térã mávandipa jaikóta. Péro ikatu heʼi ñandéve jahecha hag̃ua mbaʼépa heʼi la Biblia. Péicha jaikuaáta mbaʼépa iporã Jehovápe g̃uarã. Ha mbaʼépa heʼi Ñandejára Ñeʼẽ?

 Tekotevẽterei ñañatende ani umi oikóva ñanendive omokangy ñande jerovia. Ñañeporandumi: Mbaʼeichagua piko umi oikótava chendive? Oservi piko hikuái Jehovápe? Oikópa hikuái la Biblia heʼiháicha? Ñanemanduʼáke apóstol Pablo heʼivaʼekuére: “Aníke peñembotavy: Irũnguéra vai ombyai jepokuaa porã” (1 Cor. 15:​33, ÑÑB).

La Biblia heʼi porã avei Jehová ndoguerohoryiha umi hekovaíva ha oporomoakãratĩvape (Heb. 13:4). Haʼe ni mbaʼevéicharõ ndohechaporãmoʼãi oikóramo oñondive peteĩ ógape peteĩ kuimbaʼe ha kuña nomendáiva ojuehe. Ha ñande jaservíva Ñandejárape ndaikatúi jaiko peteĩ óga oĩháme hekovaíva.

La Biblia heʼi entéro oĩ porãséva Ñandejárandi ‘okañyvaʼerãha tekovaígui’ (1 Cor. 6:​18, ÑÑB). Upévare jadesidíta vove mávandipa jaikóta peteĩ ógape, jahechavaʼerã ani hag̃ua oĩ oportunida avave hekovai hag̃ua. Haʼéramo jepe kristiáno meme umi oikóva pe ógape, ikatúnte avei oiko upéva. Pór ehémplo, mbaʼépa oikóne peteĩ kuimbaʼe ha kuña nomendáiva ojuehe opytáramo oñondive haʼeño umi ótro osẽmba rupi? Avei ikatu ojejapo mbaʼe vai peteĩ kuimbaʼe ha peteĩ kuña ojegustáva ojuehe oikóramo peteĩ ógape. Ñanearandúramo ñañatendéta ani hag̃ua oiko koʼã mbaʼe.

Naiporãmoʼãi avei mokõi ojedivorsiavaʼekue osegi oiko oñondive peteĩ ógape. Haʼekuéra ningo omenda tiémpope oñenovaʼekue oñondive, ha upévare ndahasyiete hoʼa hag̃ua tekovaípe (Pro. 22:3).

Oĩve peteĩ mbaʼe iñimportánteva ñapensavaʼerã: mbaʼépa heʼíta ñane vesinokuéra. Ikatu ñande ñaimoʼã ndaiporimoʼãiha provléma jaikóramo oñondivepa peteĩ ógape, péro umi vesíno ikatu oñepyrũ okopi ñanderehe upévare. Ha ñande ni mbaʼevéicharõ ndajaipotái oñemoherakuã vai Jehová réra. Jajapose guei apóstol Pablo heʼivaʼekue: ‘Anítei pemoñepysanga hudíope, térã Greciayguápe, térã kongregasiónpe. Che añehaʼã ambovyʼa entéro che rapichakuérape opaite mbaʼépe, ndahekái chévente ideprovéchova, aheka guei che rapichakuérape ideprovéchova ojesalva hag̃ua hikuái’ (1 Cor. 10:​32, 33, ÑÑB).

Añetehápe ningo heta vése ijetuʼúta jatopa peteĩ lugár jaiko hag̃ua ha upekuévo ñakumpli avei Jehová heʼíva. Upéicharõ jepe, tekotevẽ entéro kristiáno ‘ñañehaʼã jaikuaa ha jajapo umi mbaʼe ombovyʼáva Ñandejárape’. Ndajahejaivaʼerã ojejapo mbaʼeve ivaíva ñande rógape (Efe. 5:​5, 10, ÑÑB). Upearã ñañemboʼevaʼerã Ñandejárape ha jajerure chupe toñangareko ñanderehe, ani hag̃ua ojehu ñandéve mbaʼeve ivaíva, ani ñambyai ñande jerovia; ni ñamongyʼa Jehová réra.