‘Pe espíritu sánto ha pe nóvia akóinte heʼi: “Eju!”’
‘Pe espíritu sánto ha pe nóvia akóinte heʼi: “Eju!”’
‘Pe Espíritu Sánto ha pe nóvia akóinte heʼi: “Eju!”. Ha opa ijyʼuhéiva, tou ha toʼu pe y oporomoingovéva, opagaʼỹre mbaʼeve.’ (REV. 22:17.)
1, 2. Mbaʼépa iñimportantevevaʼerã ñandéve g̃uarã, ha mbaʼérepa?
MBAʼÉPA iñimportantevevaʼerã ñandéve g̃uarã? Jesús heʼivaʼekue hemimboʼekuérape: ‘Pemotenonde meméke Ñandejára rréino’. Ha opromete ojapóramo hikuái upéva Ñandejára omeʼẽtaha chupekuéra hemikotevẽ (Mat. 6:25-33, NM). Jesús ohechauka avei pe rréino tuicha mbaʼeha ombojojávo peteĩ pérla iporãitereívare, ha heʼi peteĩ kuimbaʼe ‘oho hague ovendepa ikosakuéra ojogua hag̃ua’ (Mat. 13:45, 46, NM). Koʼág̃a ñandéve g̃uarã péicha avei iñimportánte ñamoherakuã pe marandu porã ha ñamboʼe ñande rapichakuérape.
2 Umi artíkulo ohasavaʼekuépe jahechákuri pe espíritu sánto ñanepytyvõha japredika hag̃ua pyʼaguasúpe ha jaiporukuaa hag̃ua la Biblia ñaporomboʼe jave. Ko artíkulope jahecháta ñanepytyvõha avei japredika meme hag̃ua ára ha ára.
Oñeinvita opavavépe
3. Mbaʼépa oñekuaveʼẽ entéro yvypórape?
3 Jehová espíritu sánto rupive ojejapo peteĩ invitasión entéro yvyporakuérape (jaleemína Revelación 22:17). Ojeʼe ñandéve jaʼu hag̃ua peteĩ y iporãitereíva. Péro kóva ndahaʼeihína pe y jajepokuaáva jepi jaʼu. Jesús oñeʼẽvaʼekue ko ýre heʼírõ guare pe samaritánape: “Pe hoyʼúva upe y che ameʼẽvagui katu, ndaijyʼuheimoʼãvéima arakaʼeve. Pe y chupe ameʼẽva ku yvúicha opupúta ipype ha omoingovéta chupe opa ára g̃uarã” (Juan 4:14). Péicha jahecha oñekuaveʼẽha ñandéve peteĩ y iporãmba jepéva, ikatúva omeʼẽ jeikove opaveʼỹva.
4. Mbaʼépa pe y oporomoingovéva, ha mbaʼérepa ñaikotevẽ?
4 Mbaʼérepa yvyporakuéra oikotevẽ pe y oporomoingovéva? Génesis kuatiañeʼẽme oñemombeʼu Adán ha Eva opuʼã hague Jehováre (Gén. 2:16, 17; 3:1-6). Upévare haʼe omosẽ chupekuéra pe hardíngui, ‘ani hag̃ua ipojái ha hoʼu pe yva oporomoingovéva ha oikove opa ára g̃uarã’ (Gén. 3:22). Adán káusare pe ñemano ñanderupyty enterovépe (Rom. 5:12). Péro Ñandejára ojapóma heta mbaʼe umi iñeʼẽrendúva ojei hag̃ua pekádo ha ñemano poguýgui, ha oikove hag̃ua opa ára g̃uarã peteĩ hardínpe ko yvy ape ári. Koʼã mbaʼe Ñandejára ojapóva Cristo omano rupi ñanderehehápe haʼe hína pe y oporomoingovéva (Mat. 20:28; Juan 3:16; 1 Juan 4:9, 10).
5. Mávaguipa ou pe invitasión jaʼu hag̃ua pe y oporomoingovéva? Mbaʼérepa jaʼe upéva?
5 Mávaguipa ou pe invitasión jaʼu hag̃ua pe ‘y oporomoingovéva japagaʼỹre mbaʼeve’? Oñeñeʼẽ mboyve pe y rehe Revelaciónpe, oñemombeʼu Jesucristo ogovernataha mil áñore. Upe tiémpope yvyporakuéra ikatúta ohupyty perfeksión Cristo rupive. Jehová omeʼẽma hetaiterei mbaʼe ñanepytyvõva jahupyty hag̃ua jeikove opaveʼỹva, ha umívare ojeʼe haʼeha ‘peteĩ ysyry potĩ henyhẽva y oporomoingovévagui’. La Biblia heʼi upe y osẽha ‘Ñandejára ha pe Ovecharaʼy guapyhágui’ (Rev. 22:1). Mbaʼépa ohechauka upéva? Pe y oporomoingovéva ouha Jehovágui ha oñemeʼẽha ñandéve Jesucristo rupive (Sal. 36:9; Juan 1:29). Ñandejára oiporu ko y omyatyrõ hag̃ua opa mbaʼe vai oikóva Adan káusare. Péicha jahecha porãiterei pe invitasión ouha Jehovágui.
6. Arakaʼépa oñepyrũ osyry pe y oporomoingovéva?
6 Ko y oporomoingovéva oñepyrũ osyry áño 1914-pe, Jesucrístope oñemoĩrõ guare rréiramo yvágape. Upérõ oñepyrũ avei ‘Jesucristo ára’ (Rev. 1:10). Upe guive oñemeʼẽ yvyporakuérape heta mbaʼe porã oipytyvõtava chupekuéra ohupyty hag̃ua jeikove opaveʼỹva. Pór ehémplo oñemyesakãve Ñandejára Ñeʼẽ, oñembojojáva ‘y’ rehe (Efe. 5:26). Jesucristo ára aja, entéro yvypóra ikatu oguerovia pe marandu porã ha péicha oguahẽ chupekuéra pe invitasión hoʼu hag̃ua pe y oporomoingovéva. Máva mávapa umi omeʼẽva ko invitasión?
Pe ‘nóvia’ heʼi: ‘Eju!’
7. Máva raẽvépa omeʼẽ pe invitasión ha mávapepa oñeinvita?
7 Pe ‘nóvia’ ningo orrepresenta umi kristiáno ohótava yvágape. Haʼekuéra raẽve omeʼẽ pe invitasión. Péro mávapepa oinvita hikuái? Ndaikatúi ijupekuéra jey. Péicha jahecha oinvitaha hikuái ambue tapichakuérape. Koʼãva hína umi ohaʼarõva oiko ko yvy ape ári Armagedón rire (jaleemína Revelación 16:14, 16).
8. Mbaʼérepa jaʼekuaa umi ungido 1918 guive omeʼẽ hague pe invitasión oúva Jehovágui?
8 Umi ohótava yvágape omeʼẽ pe invitasión 1918 guive. Upe áñope oñemeʼẽ pe diskúrso “Heta koʼág̃a oikovéva ikatu nomanói arakaʼeve”, ha upépe oñemyesakã hetaiterei yvypóra oikotaha ko yvy ape ári Armagedón rire. Upéi 1922-pe ojejapo peteĩ asambléa Estados Unídospe (Cedar Point, Ohio), ha upépe oñemokyreʼỹ opavavépe omoherakuã meme hag̃ua pe Rréi ha Irréino. Ko asambléa omokyreʼỹ umi ungídope oinvita hag̃ua hetave tapichápe. Ha áño 1929-pe ko rrevístape osẽ peteĩ artíkulo oñeʼẽva Revelación 22:17-re, ha heʼi: “Ñandejára imbaʼeporãgui oinvita umi héntepe, ha umi ohótava yvágape omog̃uahẽ ko invitasión enterovépe heʼívo: ‘Eju!’. Ko marandu oñemog̃uahẽvaʼerã umi hénte oipotávape tekojoja ha oikuaaséva la Biblia heʼíva. Ko tembiapo ojejapovaʼerã koʼág̃a” (The Watchtower 15 de marzo de 1929, ingléspe). Pe nóvia koʼag̃aite peve omeʼẽ gueteri ko invitasión.
‘Umi ohendúva teʼi: “Eju!”’
9, 10. Mbaʼéichapa oñemokyreʼỹ umi ndahaʼéivape ungido omeʼẽ hag̃ua avei pe invitasión oúva Ñandejáragui?
9 Mbaʼépa ojapovaʼerã umi ohendúva pe invitasión omeʼẽva umi ohótava yvágape? Chupekuéra oñemokyreʼỹ avei omeʼẽ hag̃ua ko invitasión ambue hapichápe. Upévare pe rrevísta La Torre del Vigía noviembre de 1932 (páhina 174), heʼivaʼekue: “Umi kristiáno ohótava yvágape omokyreʼỹvaʼerã enterovépe omoherakuã hag̃ua pe marandu porã. Umi ndahaʼéiva ungido ikatu avei ojapo ko tembiapo. Entéro testígo de Jehová ovyʼa ikatu haguére ogueraha pe y oporomoingovéva umi oikótavape ko yvy ape ári. Péicha ikatúta ojesalva hikuái Armagedónpe ha oikove opa ára g̃uarã ko yvy ape ári”.
10 Áño 1934-pe rrevísta The Watchtower heʼi Jehonadab orrepresenta hague umi ndahaʼéivape ungido, ha heʼi koʼãva oinvitaha avei hapichakuérape hoʼu hag̃ua pe y. Pe rrevísta heʼi “haʼekuéra omoirũvaʼerãha umi ohótava yvágape omoherakuã hag̃ua pe marandu porã Ñandejára rréino rehegua”. (Ko artíkulo osẽvaʼekue españólpe La Torre del Vigía enero de 1935, páhina 12-pe.) Ha 1935-pe oñemyesakã umi ndahaʼéiva ungido haʼeha avei pe ‘aty guasu’ oĩva Revelación 7:9-17-pe. Ojekuaávo ko mbaʼe umi testígo ikyreʼỹvéntema omeʼẽ hag̃ua pe invitasión oúva Ñandejáragui. Upe guive hetaiterei hénte ohendu porã ko invitasión ha upévare koʼág̃a pe aty guasúpe oĩma 7 millón rasa. Haʼekuéra oguerovia pe marandu porã, upéi oñemeʼẽ Ñandejárape ha ojevautisa. Péicha omoirũ pe nóviape oinvita hag̃ua opavavépe ‘hoʼu hag̃ua pe y oporomoingovéva opagaʼỹre mbaʼeve’.
‘Pe espíritu sánto heʼi: “Eju!”’
11. Mbaʼéichapa espíritu sánto oipytyvõ oñemoherakuã hag̃ua pe marandu porã síglo primérope?
11 Síglo primérope pe espíritu sánto tuichaiterei oipytyvõ oñemoherakuã hag̃ua pe marandu porã. Pór ehémplo, peteĩ jey Jesús oho opredika peteĩ sinagógape oĩva Nazarétpe, upépe oavri proféta Isaías kuatiañeʼẽ ha olee: ‘Jehová espíritu oĩ chendive, haʼe cheporavo amombeʼu hag̃ua marandu porã imboriahúvape, amomarandu hag̃ua isãsotaha umi oikóva iñapytĩmby, ohechaʼỹva ohecha jeytaha, ha umi ojepyʼapýva ipyʼaguapytaha. Avei amoherakuã hag̃ua pe ára Jehová ñandeporiahuverekotaha’. Upéi heʼi: ‘Ko árape oñekumpli ko aleéva angete’ (Luc. 4:17-21, NM). Oho mboyvemi yvágape Jesús opromete avei hemimboʼekuérape: “Ág̃a pe espíritu sánto ou vove pende ári, penemombaretéta ha pemoherakuãta che réra Judea ha Samáriape ha opaichagua tetã oĩva yvy ári” (Hech. 1:8, JMP).
12. Mbaʼéichapa pe espíritu sánto koʼág̃a oipytyvõ oñeinvita hag̃ua umi héntepe?
12 Mbaʼéichapa pe espíritu sánto koʼág̃a oipytyvõ oñeinvita hag̃ua umi héntepe? Jehová oiporu ijespíritu sánto ohesapeʼa hag̃ua umi ungídope ikatu hag̃uáicha ontende hikuái Iñeʼẽ. Avei ko espíritu omomýi chupekuéra omeʼẽ hag̃ua pe invitasión ha omyesakã hag̃ua la Biblia heʼíva umi hénte oikosévape peteĩ hardínpe. Upéi koʼã tapicha oservi Ñandejárape ha pe espíritu sánto oipytyvõ chupekuéra omeʼẽ hag̃ua avei pe invitasión. Ha ‘ojevautisa rupi espíritu sánto rérape’, oheja upe espíritu oisãmbyhy chupekuéra (Mat. 28:19, NM). Avei pe marandu omoherakuãva entéro oservíva Jehovápe oĩ la Bíbliape, ha upéva ojehaivaʼekue espíritu sánto rupive. Péicha jahecha ko invitasión oñemeʼẽha Ñandejára espíritu rupive. Añetehápe pe espíritu ñanemomýi ñamoherakuã hag̃ua pe marandu porã. Ajépa ñanemokyreʼỹete ko mbaʼe japredikave hag̃ua!
‘Akóinte heʼi hikuái: “Eju!”’
13. Mbaʼépa heʼise ‘pe espíritu ha pe nóvia akóinte heʼiha: “Eju!”’?
13 ‘Pe espíritu ha pe nóvia’ ndahaʼéi sapyʼapyʼánte omeʼẽva ko invitasión. Pe téysto heʼi voi haʼekuéra ‘akóinte heʼiha: “Eju!”’. Upéva heʼise opa árape omeʼẽha hikuái ko invitasión. Ha jahecha haguéicha, umi ohendúva ko invitasión heʼi meme avei hapichakuérape: “Eju!”. La Biblia heʼi voi umi oĩva pe aty guasúpe ‘ára ha pyhare oserviha Ñandejára témplope’ (Rev. 7:9, 15, ÑÑB). Mbaʼépa heʼise ‘oserviha ára ha pyhare’? Oñehaʼãha ombaʼapo meme Ñandejárape g̃uarã ojapo haguéicha Ana ha apóstol Pablo (jaleemína Lucas 2:36, 37, Hechos 20:31 ha 2 Tesalonicenses 3:8).
14, 15. Mbaʼéichapa Daniel ohechauka iñimportantereiha jaservi meme Jehovápe ára ha ára?
14 Proféta Daniel oservi meme vaʼekue avei Jehovápe (jaleemína Daniel 6:4-10, 16). Haʼe ojepokuaáva jepi oñemboʼe Ñandejárape ‘mbohapy jey ára ha ára’. Ha oĩrõ guare peteĩ léi oproivíva upéva un més aja, haʼe osegínte ojapo jepiveguáicha oikuaáramo jepe ojepoitaha chupe leonkuéra raitýpe. Péicha ohechauka iñimportantereiha jaservi meme Jehovápe ára ha ára (Mat. 5:16).
15 Daniel oĩ rire peteĩ pyhare umi león apytépe, pe rréi oho hendápe ha heʼi chupe: ‘Daniel, Ñandejára oikovéva rembiguái, nde Jára piko ikatúraʼe ndesalva umi leóngui?’. Daniel ombohovái chupe: ‘Che ruvicha tereikovéke tapiaite, che Jára ombou hiʼánhel omboty hag̃ua umi león juru, ani hag̃ua ojapo mbaʼeve cherehe, ndajapóigui ivaíva ne renondépe ni Ñandejára renondépe’. Jehová ohovasavaʼekue Daniélpe ‘oservi meme rupi chupe ára ha ára’ (Dan. 6:19-22, ÑÑB).
16. Jahecha rire Daniel ehémplo, mbaʼépa tekotevẽ ñañeporandu enterovéva?
16 Daniel oikuaáramo jepe ikatuha ojejuka chupe, nomboykéi Jehovápe. Ñandépa upéicha avei? Mbaʼe sakrifísiopa jajapo ñamoherakuã meme hag̃ua pe marandu porã? Toiko la oikóva ndajahejaivaʼerã ohasa ni un més jepe ñañeʼẽʼỹre Jehováre. Ikatúma guive ñasẽvaʼerã japredika káda semána. Ha oimérõ ñanderasyete ha 15 minútonte ikatu japredika un méspe, ñameʼẽvaʼerã katuete ñane infórme. Mbaʼérepa? Ñaipytyvõségui pe espíritu ha pe nóviape oinvita hag̃ua umi héntepe. Jajapókena ikatúva entéro ani hag̃ua ohasa ni un més japredikaʼỹre.
17. Mbaʼéicha javépa jaaprovechavaʼerã ñameʼẽ hag̃ua pe invitasión oúva Jehovágui?
17 Javyʼaite ningo ikatu haguére ñainvita umi ijyʼuhéivape ‘ou ha hoʼu hag̃ua pe y oporomoingovéva opagaʼỹre mbaʼeve’. Jajapo upéva ñasẽ jave japredika, péro jaaprovechavaʼerã ñameʼẽ hag̃ua ko invitasión opa ijahápe ñandéve, ñasẽvo ñambaʼejogua, javiahávo, ñande travahohápe térã eskuélape. Ha umi mburuvicha heʼíramo jepe ndovaleiha ñasẽ japredika, ñande jahekavaʼerã ládo jasegi hag̃ua ñamoherakuã pe marandu porã. Pór ehémplo jahechakuaánte mbaʼe ógapepa opyta porãvéta ñag̃uahẽ térã ñañehaʼã japredikave pe jaikohárupi.
Akóintekena jaʼe: “Eju!”
18, 19. Mbaʼéichapa jahechauka ñamombaʼeha ikatu haguére ñaipytyvõ Ñandejárape?
18 Ojapóma 90 áño rasa pe espíritu ha pe nóvia heʼi hague hikóni entéro ijyʼuhéivape: “Eju!”. Ha nde, reʼúmapa upe y oporomoingovéva? Oimérõ upéicha, einvitákena nde rapichakuérape hoʼu hag̃ua avei.
19 Ndajaikuaái ningo arakaʼe pevépa ñainvitáta ñande rapichakuérape. Péro jaikuaa porã ñameʼẽvo ko invitasión ñaipytyvõha Ñandejárape (1 Cor. 3:6, 9). Jahechaukákena ñamombaʼeha ko tembiapo, japredika memévo opa árape ñamombaʼeguasu hag̃ua Ñandejárape (Heb. 3:15). Oiméramo ñande jaháta yvágape térã japytáta ko yvy ape ári, ñainvitákena tapiaite ñande rapichápe ‘ou ha hoʼu hag̃ua pe y oporomoingovéva, opagaʼỹre mbaʼeve’.
Mbaʼépa ñaaprendéraʼe?
• Máva mávapepa oñeinvita hoʼu hag̃ua pe y?
• Mbaʼérepa jaʼekuaa pe invitasión ouha Jehovágui?
• Mbaʼéichapa pe espíritu sánto ñanepytyvõ ñameʼẽ hag̃ua pe invitasión?
• Mbaʼérepa ñañehaʼavaʼerã japredika káda més?
[Porandu ñahesaʼỹijóva]
[Taʼanga ha informasión oĩva páhina 16-pe]
(Emaña pe kuatiañeʼẽre rehecha hag̃ua osẽ hagueichaite ko párte)
‘Akóinte heʼi hikuái: “Eju!”’
1914
5.100 puvlikadór
1918
Hetaiterei tapicha oikóta opa ára g̃uarã peteĩ handínpe
1922
“Pemoherakuã meméke pe Rréi ha irréino”
1929
Umi ohótava yvágape heʼi: “Eju!”
1932
Ndahaʼéi umi ungido añónte omeʼẽva pe invitasión
1934
Oñeinvita umi oikótavape ko yvy ape ári opredika hag̃ua
1935
Ojekuaa mávapa pe ‘aty guasu’
2009
7.313.173 puvlikadór