Ha oúrõ ñande ári umi mbaʼe ñahaʼarõʼỹva?

OJEHÚMAPA ndéve peteĩ mbaʼe nde reimoʼãʼỹva? Péva katuetei oiko jepi ñanderehe. Upévare iporã jahechami umi káso oikovaʼekue yma oĩva la Bíbliape, jaikuaa hag̃ua mbaʼépa ikatúta ñanepytyvõ péicha jave.

Ñañepyrũ hag̃ua jahechami rréi David rembiasakue, haʼe ningo ohasa heta mbaʼe ijetuʼúva. Proféta Samuel rupive Jehová oiporavovaʼekue chupe ogoverna hag̃ua tetã Israélpe, péro upérõ David peteĩ mitãʼi guasu oñangarekóva ovecháre. Jepe David imitaiterei gueteri oho avei oñorairõ pe kuimbaʼe kakuaaiténdi, hérava Goliat (1 Sam. 17:​26-32, 42). Upe rire rréi Saúl ogueraha chupe oiko hag̃ua ipalásiope, ha omoĩ chupe omoakã hag̃ua ijehérsito. David noimoʼãichenerakaʼe sapyʼaitépe oikoha heta kámbio hekovépe ha nohaʼarõichéne avei pe oikótava hese upe rire.

Upéi Saúl ou ndaijaʼevéi hese ha oiko opersegi chupe (1 Sam. 18:​8, 9; 19:​9, 10). Upévare David odiparámante ha okañy heta áñore ani hag̃ua Saúl ojuka chupe. Tiémpo rire Davídgui oikóma rréi, péro heta vése haku jey hendive la yvy, ojapógui mbaʼe vai. Oñeno peteĩ tembireko ahénondi ha ani hag̃ua ojepilla upéi ojukauka upe kuña ménape. Péicha hembiapo vai haguére ou hiʼári heta mbaʼe vai. Itaʼýra Absalón jepeve opuʼã hese (2 Sam. 12:​10-12; 15:​1-14). Péro David upéi oñembyasy hembiapo vaikuégui, ha Jehová operdona chupe.

Koʼág̃a rupi avei oiko heta mbaʼe ñahaʼarõʼỹva. Sapyʼánte ñanderasy, japyta travahoʼỹre, ñane provléma ñande rogapýpe, térã jaʼa mbaʼe vaípe. Mbaʼépa ñanepytyvõta ñambohovái hag̃ua koʼã mbaʼe ijetuʼuetéva?

Tekotevẽ ñaneumílde

Ñaneumílderamo ñaneñeʼẽrendúta. Ha upéva ñanepytyvõta avei ñamombaʼe hag̃ua ñande rapichakuérape ha ani ñapensa ñande ñandevaletereiha. Jaikuaa ningo iñimportanteha ñande rapichakuéra ojapóva, upévare iporã  jaguerohory chupekuéra. Nañañembotuicháiramo pyaʼeve japilla mbaʼéicha rupípa ojehu ñandéve heta mbaʼe, ha mbaʼéichapa ikatu ñambohovái.

Ñapensamíntena avei Jonatán rembiasakuére, haʼe ningo peteĩ ehémplo iporãva ñandéve g̃uarã. Heta mbaʼe oiko hese ha hiʼári ndahaʼéi ni ikúlpa rehe. Pór ehémplo proféta Samuel heʼírõ g̃uare Saúlpe Jehová omboyketaha chupe, ndeʼíri Jonatán opytataha hendaguépe (1 Sam. 15:28; 16:​1, 12, 13). Davídpe ojeporavórõ guare ogoverna hag̃ua Israel, Jonatán opytareivaʼekue itúva káusare, haʼe ndojapóiramo jepe mbaʼeve ivaíva (1 Sam. 20:​30, 31). Mbaʼépa ojapo haʼe upémarõ? Opytápa ipochy ha oñamarga? Nahániri. Ijedave ha oikuaavéramo jepe heta mbaʼe Davídgui, haʼe ndaipochýi hendive ha oipytyvõ chupe (1 Sam. 23:​16-18). Iñumílde rupi ohechakuaa mávapepa Ñandejára oiporavo. Haʼe ‘noñembotuichái ha nopensái ijehénte’ (Rom. 12:3). Jonatán ontende porãiterei mbaʼépa Jehová ohaʼarõ chugui. Upévare oipytyvõ oiko hag̃ua Ñandejára odesidivaʼekue.

Oiko jave peteĩ kámbio ñahaʼarõʼỹva, heta vése ijetuʼu. Pór ehémplo Jonatán ohayhu itúvape, péro ohayhu avei Davídpe, upévare ijetuʼúneraʼe chupe opyta porã hag̃ua mokõivéndi. Upérõ itúva Saúl haʼe gueteri rréi, péro Jehová oiporavóma Davídpe ojupi hag̃ua hendaguépe. Hasýramo jepe chupe, Jonatán oñehaʼã ojapo Jehová oipotáva. Koʼág̃a avei ñande ikatu jahasa heta provléma ñandepyʼapýva ha ñanemongyhyjéva. Péro ñañehaʼãramo ñantende porã mbaʼépa Jehová oipota, ikatúta jagueropuʼaka ivaivéramo jepe umi mbaʼe oúva ñande ári.

Ñandénte ndaikatúi jajapo porãmba opa mbaʼe

Oiméramo jepe nañañembotuichái, ikatu ndajahechakuaái ndaikatuiha ñandénte jajapo porãmba opa mbaʼe.

Ñanemanduʼami jeýna David rehe. Jepe Jehová oiporavóma chupe oisãmbyhy hag̃ua tetã Israel, haʼe ohaʼarõvaʼekue heta áño ojupi hag̃ua. Ha hiʼári noñemombeʼúi chupe mbaʼérepa hetaite áño ohaʼarõvaʼerã, ha ni upeichavérõ haʼe ndojepyʼapýi. Oikuaa Jehová orekoha opa mbaʼe ipoguýpe, upévare haʼe opytánte upe oĩháme ha ohaʼarõ oiko pe Ñandejára oipotáva. Ha oikuaáramo jepe Saúl ojukaseha chupe, haʼe noñehaʼãi ojuka Saúlpe, ha ojoko katu Abisáipe ani hag̃ua ojapo upéva (1 Sam. 26:​6-9).

Heta vése nañantendepái umi mbaʼe oikóva kongregasiónpe. Ha ikatu voi ñapensa oĩ vaiha heta mbaʼe noñemoakãporãigui pe kongregasión. Mbaʼépa jajapóta péicha jave? Ñanemanduʼáramo, ndopytaiha ñande  kárgope ñakambia umi mbaʼe, jahechakuaáta Jesús omoakãha pe kongregasión ha oiporuha umi ansiánope upearã. Ha ijetuʼúramo jepe ñandéve, ñahaʼarõta Jehová omoĩ porã opa mbaʼe, itaʼýra Jesucristo rupive. Péicha jajapóramo ha nañañembotuichái, Jehová tapiaite ñandeguerohorýta (Pro. 11:2).

Pyʼaguapy tuicha ñanepytyvõta

Ñandepyʼaguapýramo ikatúta jagueropuʼaka heta mbaʼe vai. Nañandepochyreimoʼãi ni nañandepyʼaromoʼãi avavéndi. Hasýramo jepe jaiko hag̃ua pyʼaporãme enterovéndi, ñanekyreʼỹ ñanemanduʼávo Jesucristo oprometavaʼekuére: ‘Ovyʼa umi ipyʼaguapýva, Ñandejára omeʼẽta chupekuéra ko yvy’ (Mat. 5:​5, NM). Ikatu jaʼe, pyʼaguapy, pyʼaporã, ha mbaʼeporã ohoha oñondive ojopóre, koʼã mbaʼe ñanepytyvõ ñamombarete hag̃ua ñande jerovia. Ha ñaneumílderamo katu nañañemohatãmoʼãi ñande jaʼévape ha jahejáta Jehovápe ñanemboʼe.

Mbaʼéichapa ñandepyʼaguapýrõ ñambohovaikuaáta umi mbaʼe ijetuʼúva oúva ñande ári? Jepeve ndaigustói ñandéve umi mbaʼe ñandejopýva, heta vése ñanepytyvõ ha ñanembokatupyry jajapo porãve hag̃ua Jehová rembipota. Péva ohechauka avei ñandéve Moisés rembiasakue.

Orekórõ guare 40 áño, Moisés ivaletereimavaʼekue. Ohechakuaa Ñandejára siervokuéra oikotevẽva ha oñehaʼãmbaite oipytyvõ chupekuéra (Heb. 11:​24-26). Upéicharõ jepe, Jehová oiporavo mboyve chupe oguenohẽ hag̃ua umi Israelguápe Egíptogui, heta ohekomboʼe chupe ipyʼaguapykuaa hag̃ua. Moiséspe ojejukasevaʼekue Egíptope, upévare haʼe oho Madiánpe, ha upépe 40 áño oiko oñangareko ovecháre. Mbaʼéichapa oipytyvõ chupe koʼã jehasa asy? Haʼe imbaʼeporãve upe rire (Núm. 12:3). Ohechakuaa omoĩvaʼerãha tenondete Jehová servísio.

Moisés ohechauka imbaʼeporãha, Jehová heʼíro guare chupe iñemoñarégui ojapotaha peteĩ tetã guasu ha omboyketaha umi Israelguápe (Núm. 14:​11-20). Haʼe nopensái ijehénte, upévare ojerure Jehovápe operdonami hag̃ua umi Israelguápe. Péicha haʼe ohechauka, chupe g̃uarã iñimportanteveha oñemombaʼeguasu Ñandejárape, ha ojepyʼapyha avei iñermanokuérare. Upérõ oñekotevẽvaʼekue peteĩ kuimbaʼe ipyʼaguapýva omoakã hag̃ua tetã Israel. Ha la Bíbliape heʼi ‘ndaiporiha ótro kuimbaʼe haʼéicha ipyʼaporãva’. Upéicharamo jepe peteĩ jey Míriam ha Aarón oñeʼẽ vai Moisés rehe (Núm. 12:​1-3, 9-15). Péro haʼe ndaipochýi ha oñeʼẽ pyʼaguapýpe hendivekuéra. Mbaʼéichapa opavaʼerãmoʼã upéva Moisés ndaipyʼaguapýirire?

Peteĩ jey, heta kuimbaʼe Israelgua oñepyrũ oprofetisa espíritu sánto rupive. Josué (Moisés ajudánte) ipochy oimoʼãgui naiporãiha koʼã kuimbaʼe ojapóva. Moisés katu opensa Ñandejára opensaháicha, ha upévare  ndaipochýi (Núm. 11:​26-29). Ndaipyʼaguapýirire, ijetuʼuvaʼerãmoʼã chupe iñeʼẽrendu hag̃ua Jehovápe.

Ipyʼaguapy rupi Moisés ikatuvaʼekue ojapopaite pe tembiapo Ñandejára omeʼẽvaʼekue chupe. Pór ehémplo ojupírõ guare pe sérro Horébpe Jehová ojevale peteĩ ánhel rehe oñeʼẽ hag̃ua hendive, ha Moisés rupive ojapo peteĩ kompromíso umi Israelguándi. Ha omanda guasúramo jepe Israélpe haʼe ipyʼaguapy, upévare ojapo porã hembiapo, ha Jehová oguerohory chupe.

Ñande avei koʼág̃a ñaikotevẽ pyʼaguapy ñamombarete hag̃ua ñande jerovia. Ha oimérõ oñemeʼẽ ñandéve tembiapo iñimportánteva kongregasiónpe, jajapovaʼerã pyʼaguapýpe. Péicharõ nañañemombaʼeguasumoʼãi, ha oikóramo peteĩ mbaʼe ñahaʼarõʼỹva ikatúta ñambohovái porã. Ñanemanduʼákena, umi mbaʼe oikóva ñahaʼarõʼỹre ikatuha ñanepytyvõ ñandekatupyry ha ñandepyʼaguapy hag̃ua.

Jaikove aja pukukue ikatu oiko heta mbaʼe ñahaʼarõʼỹva, ha heta vése ndajaikuaái mbaʼérepa oiko. Ñaneimperfékto rupi oĩ vése jajepyʼapyeterei ha upévare ijetuʼu ñandéve jahecha hag̃ua umi mbaʼe Jehová ohechaháicha. Jahechakuaavaʼerã ndaikatuiha jajapo porãmba opa mbaʼe. Upévare ñaneumílderamo ha ñañehaʼãramo jaiko pyʼaguapýpe ñambohovái porãta umi mbaʼe ijetuʼúva oúva ñande ári, ha péicha Ñandejára akóinte ñandeguerohorýta.

[Komentário oĩva páhina 4-pe]

Ñaneumílderamo nañapensamoʼãi ñandevaletereiha

[Nóta oĩva taʼanga ndive páhina 5]

Umi mbaʼe ijetuʼúva ohasavaʼekue Moisés, oipytyvõ chupe ipyʼaguapy hag̃ua