Jaiko espíritu sánto poguýpe ha ñapromete haguéicha Jehovápe

‘Peikókena espíritu sánto poguýpe, upéicharamo ndapejapomoʼãi pende rete rembipota vai.’ (GÁL. 5:​16, ÑÑB.)

1. Mbaʼeichagua vautísmopa ojejapovaʼekue Pentecostés jave?

 PE Pentecostés áño 33-pe Jesús remimboʼekuéra ojevautisa espíritu sántope, upévare peteĩ milágro rupi oñeʼẽ hikuái ambue ñeʼẽme (1 Cor. 12:​4-10). Upe rire Pedro ojapo peteĩ diskúrso iporãitereíva. Ha mbaʼéichapa oñeñandu umi ohenduvaʼekue chupe? Heta rehe oguapyeterei Pedro heʼíva, upévare oñembyasy hembiapo vai haguére ha ojevautisa ýpe. Ñandejára Ñeʼẽ omombeʼu voi: ‘Umi ogueroviavaʼekue iñeʼẽ ojevautisa, ha upe árape omoirũ chupekuéra tres mil tapicha rupi’ (Hech. 2:​22, 36-41). Ha iñeʼẽrendúgui Jesúspe, ojevautisa hikuái Túva, Taʼýra ha espíritu sánto rérape (Mat. 28:19).

2, 3. a) Emombeʼumi peteĩchantepa jajevautisáramo espíritu sántope ha jajevautisáramo ‘espíritu sánto rérape’. b) Mbaʼérepa peteĩ kristiáno ojevautisamantevaʼerã ýpe?

 ² Péro peteĩchantepa jajevautisáramo espíritu sántope ha jajevautisáramo ‘espíritu sánto rérape’? Nahániri. Umi ojevautisáva espíritu sántope onase pyahu jey Ñandejára oreko hag̃ua chupekuéra itaʼýraramo (Juan 3:3). Haʼekuéra ningo ungído, Ñandejára oiporavo chupekuéra oservi hag̃ua rréi ha saserdóteramo yvágape. Ha upéicha omoirũ hikuái Jesúspe hetéicha ha haʼe omoakã chupekuéra (1 Cor. 12:13; Gál. 3:27; Rev. 20:6). Upéicharõ Jehová hína pe oporovautisáva espíritu sántope Pentecostés guive oiporavo hag̃ua umi oisãmbyhyvaʼerã Jesucristo ndive (Rom. 8:​15-17). Péro mbaʼépa jaʼekuaa pe vautísmo ojejapóvare espíritu sánto rérape testigos de Jehová aty guasuhápe?

³ Peteĩ kristiáno ojevautisávo ýpe ohechauka oñemeʼẽma hague Jehovápe. Péicha ojevautisa umi ojeporavovaʼekue oho hag̃ua yvágape ha umi oikótava opa árare ko yvy ape ári. Upéicharõ opavave oĩ porãséva Jehová ndive ojevautisavaʼerã ‘Túva, Taʼýra ha espíritu sánto rérape’. Ha upe rire jepe tekotevẽ osegi avei ‘oiko espíritu sánto poguýpe’ (jaleemína Gálatas 5:16). Upévare ñañeporandumivaʼerã: “Ahejápa espíritu sánto chesãmbyhy ha aikópa apromete haguéicha Jehovápe?”.

Mbaʼépa heʼise akóinte jaheja pe ‘espíritu sánto ñanesãmbyhy’?

4. Mbaʼépa heʼise akóinte jaheja pe ‘espíritu sánto ñanesãmbyhy’?

⁴ Akóinte jaheja pe espíritu sánto ñanesãmbyhy heʼise opa árape ñañemoĩha Ñandejára puʼaka poguýpe. Jaheja chupe ñanesãmbyhy opa mbaʼe jajapóvape. Ha Gálatas kapítulo 5-pe katu ohechauka mbaʼéichapa idiferénte ojuehegui ñañemoĩ espíritu sánto poguýpe ha jaiko ñande rete rembipota rapykuéri (jaleemína Gálatas 5:​17, 18).

5. Mbaʼépa ndajajapoivaʼerã jaikoséramo espíritu sánto poguýpe?

⁵ Umi oikóva espíritu sánto poguýpe oñehaʼã pono ojapo hete rembipota. Ñande ningo pekadór rupi sapyʼánte jajapose heta mbaʼe noĩporãiva, umíva apytépe: ‘jeiko mendaʼỹre, mbaʼekyʼa ha tekovai, taʼanga ñemombaʼeguasu ha espiritísmo, joayhuʼỹ, joavy, takateʼỹ ha pochyrei, haʼentese, ñorairõ, ñemomombyry ojuehegui, sékta, envídia, jeporojuka, kaʼu, ha ambue mbaʼe koʼãichagua’ (Gál. 5:​19-21). Péro kristianokuérare jaʼekuaa ‘ojukaha hete rembipota vai’. Ha upéva ningo ikatu ojapo oipytyvõ rupi chupekuéra ‘espíritu sánto’ (Rom. 8:​5, 13). Ha ndahasyive avei chupekuéra ojesareko hag̃ua Ñandejára rembipotáre ha oñemoĩ hag̃ua espíritu sánto poguýpe.

6. Mbaʼépa tekotevẽ jajapo ñamoheñói hag̃ua ñande rekovépe umi mbaʼe porã Ñandejára oguerohorýva? Emoĩ peteĩ ehémplo.

⁶ Ñandejára puʼaka ñanesãmbyhýramo ikatúta ñamoheñói ñande rekovépe umi mbaʼe porã Haʼe oguerohorýva (Gál. 5:​22, 23). Péro upearã ñande voi ñañehaʼãvaʼerã. Ha ñantende porãve hag̃ua upéva ikatu ñambojoja peteĩ chokokue rembiapo rehe. Pe chokokue ningo oikotevẽ y ha kuarahýre oñemitỹ hag̃ua, pórke umíva ndaipóriramo nosẽmoʼãi chupe hemitỹnguéra. Ha pe kuarahýicha avei ñande ñaikotevẽ Ñandejára espíritu sánto ñamoheñói hag̃ua ñande rekovépe umi mbaʼe porã oúva chugui. Péro jaikuaa avei tekotevẽha  ombaʼapo jejopy pe chokokue oipotáramo osẽ porã chupe ikogakuéra (Pro. 10:4). Upéicha avei ñambaʼapo jejopy vaʼerã ñane korasõre ikatu hag̃uáicha heñói porã pype umi mbaʼe porã oúva Ñandejára espíritugui. Upévare iporã ñañeporandumi: “Añehaʼãpaʼaína ikatu hag̃uáicha pe espíritu sánto chepytyvõ amoheñói hag̃ua che korasõme umi mbaʼe porã?”.

7. Mbaʼérepa iñimportánte jalee la Biblia ha jajepyʼamongeta hese?

⁷ Jaʼéma haguéicha pe chokokue oikotevẽ y rehe osẽ porã hag̃ua hemitỹnguéra. Ha ýicha avei ñande ñaikotevẽ Ñandejára ñanemboʼéva kongregasión rupive ikatu hag̃uáicha ñamoheñói ñande rekovépe umi mbaʼe porã (Isa. 55:1). Oiméne heta vésema voi ñamyesakã ñande rapichápe Ñandejára ohaika hague la Biblia ijespíritu sánto rupive. Ha pe tembiguái jeroviaha ha iñarandúva ñanepytyvõha heta hendáicha ñantende porã hag̃ua (Mat. 24:​45-47; 2 Tim. 3:16). Upéicharõ Ñandejára espíritu ñanesãmbyhy hag̃ua tekotevẽ jalee la Biblia ha jajepyʼamongeta hese. Péicha jajapóramo jasegiñaína Ñandejára profetakuéra iñeʼẽrendúva ehémplo. Haʼekuéra ningo ‘heta oñehaʼã ha ohesaʼỹijo’ umi informasión Ñandejára oikuaaukáva chupekuéra upe tiémpope. Ha jasegíta avei umi ánhel ehémplo, haʼekuéra oikuaaseterei mbaʼéichapa oñekumplíta Ñandejára Ñeʼẽ heʼíva pe Ñemoñare rehe ha ungidokuérare (jaleemína 1 Pedro 1:​10-12).

Mbaʼéichapa ñanepytyvõ pe espíritu sánto?

8. Mbaʼérepa jajerurevaʼerã Jehovápe ijespíritu sánto?

⁸ Ndahaʼeivaʼerã jaleénteva la Biblia ha jajepyʼamongeta hese, tekotevẽ avei ñañemboʼe Ñandejárape ñanepytyvõ hag̃ua. Haʼe ningo ikatu ojapo ‘hetaiteve mbaʼe ñande ñaimoʼã térã jajerurévagui’ (Efe. 3:20; Luc. 11:13). Péro mbaʼérepa jasegivaʼerã jajerure Ñandejárape la jaipotáva ko haʼe ‘oikuaámava voi ñane remikotevẽ jajerure mboyve chupe’ (Mat. 6:8). Iporã ningo jajapo upéicha pórke jajerurévo Ñandejárape ijespíritu sánto jahechaukañaína jajeroviaha hese. Pór ehémplo, mbaʼérepa ñande ñaipytyvõ jepi ñande rapichápe? Ajépa ñaipytyvõ chupe ojeroviágui ñanderehe ha ojerurégui ñandéve ñaipytyvõmi hag̃ua chupe (embojoja Proverbios 3:27 heʼívare). Ha Jehová upeichaiténte avei, oipota jajerure chupe ijespíritu sánto ha haʼe katuete omeʼẽta ñandéve (Pro. 15:8).

9. Mbaʼéichapa ñane rreunionkuéra rupive Ñandejára espíritu sánto ikatu ñanepytyvõ?

⁹ Ñandejára omeʼẽta avei ñandéve ijespíritu sánto rreunionhápe ha ñande aty guasuhápe. Upévare iñimportánte ndajafaltái umichahápe ha jajapysaka porã pe ojeʼévare. Upéicharõmante ñantende porãta ‘umi mbaʼe hypyʼũvéva oĩva Ñandejára Ñeʼẽme’ (1 Cor. 2:10). Iporã avei jajepokuaa ñakomenta rreunionhápe. Upévare iporãta ñañeporandumi: “Mboy vésepa amopuʼã che po akomenta hag̃ua umi cuatro semána ohasavaʼekuépe ha upéicha ahechauka che jerovia? Tekotevẽpa añehaʼãve ko mbaʼépe?”. Oiméramo upéicha, ñañehaʼãkena jajapo upéva umi semána oúvape. Jehová ningo ohecháta ñakomentaseha ha ijespíritu sánto rupive ñanepytyvõta ideprovechove hag̃ua ñandéve umi rreunionkuéra.

10. Mbaʼe invitasiónpa omeʼẽ umi ohejáva Ñandejára espíritu sánto oisãmbyhy chupekuéra?

¹⁰ Ikatu hag̃uáicha Ñandejára espíritu ñanesãmbyhy, ñahenduvaʼerã pe invitasión oñemeʼẽva ñandéve Revelación 22:​17-pe: ‘Pe espíritu  sánto ha pe nóvia akóinte heʼi: “Eju!”. Ha opa ijyʼuhéiva, tou ha toʼu pe y oporomoingovéva opagaʼỹre mbaʼeve’. Pe espíritu ningo enterovetépe oinvita hoʼu hag̃ua pe y oporomoingovéva. Upéva ojapo pe ‘nóvia’ térã umi ungidokuéra rupive. Ndépa rehendúma upe invitasión ha remombeʼúma avei nde rapichakuérape? Ajéiko javyʼaite ikatu haguére ñaipytyvõ ko tembiapópe ojesalva hag̃ua ñande rapichakuéra!

11, 12. Mbaʼéichapa Jehová ijespíritu sánto rupive oisãmbyhy predikasión?

¹¹ Yma guaréicha avei koʼág̃a Ñandejára espíritu sánto oisãmbyhyhína ojejapo hag̃ua ko tembiapo iñimportantetéva. Yma ningo Ñandejára espíritu sánto oporopytyvõ ojepredika hag̃ua ambue lugár ojepredikaʼỹhárupi. Pór ehémplo la Biblia omombeʼu ‘pe espíritu sánto ndohejái hague Pablo ha iñirũnguérape omombeʼu Ñandejára Ñeʼẽ Ásiape’ ha ndohejái avei chupekuéra oike Bitíniape. Ndajaikuaáiramo jepe mbaʼéichapa ojokóraʼe chupekuéra, jaikuaa pe espíritu sánto oisãmbyhy hague apóstol Páblope oho hag̃ua opredika Európape. Péro mbaʼéichapa heʼíraʼe chupe oho hag̃ua upépe? ‘Peteĩ visión rupive ohecha peteĩ kuimbaʼe Macedoniaygua heʼíva chupe: “Ehasána Macedóniape ha orepytyvõ”.’ (Hech. 16:​6-10.)

¹² Koʼág̃a avei Jehová ijespíritu sánto rupive oisãmbyhy predikasión opárupi. Ndohechaukavéimaramo jepe ñandéve mbaʼeve peteĩ visión rupive, osegi oiporu ijespíritu sánto oisãmbyhy hag̃ua umi ungídope. Ha oiporu avei omomýi hag̃ua ermanokuérape kyreʼỹme opredika ha oporomboʼe hag̃ua. Ha oiméramo jepe jajapóma voi jaikóvo ko tembiapo, ikatu ija ñandéve ñambaʼapove hag̃ua Ñandejára servísiope.

13. Mbaʼéichapa jahechaukáta avei ñañemoĩha espíritu sánto poguýpe? Emoĩ peteĩ ehémplo.

¹³ Jahechaukáta avei ñañemoĩha espíritu sánto poguýpe jajapóvo opa mbaʼe Jehová heʼiháicha ñandéve. Jahechamína peteĩ ermána Japongua hérava Mihoko rembiasakue. Oñepyrũrõ guare iprekursorádo haʼe okyhyje ovisita jey hag̃ua umi oikuaasevévape. Mbaʼérepa? Haʼe oimoʼã ndaikatumoʼãiha ojapo porã ha oho jey jeýpe ovisita ikueraitaha chugui hikuái. Péro upe rire Ñane Rembiapo Rréino reheguápe ojuhu heta konsého iporãva ha ojapo upépe heʼiháicha. Upéi osẽ pe folléto Cómo lograr una vida llena de satisfacción, upéva ningo iporãiterei ojepredika hag̃ua umi Japonguápe. Pe Ñane Rembiapo Rréino reheguápe ningo osẽkuri mbaʼéichapa ikatu oñekuaveʼẽ upe folléto ha mbaʼéichapa ikatu ojevisita jey sapyʼaitemimi umi oikuaasevévape. Mihoko ojapo upéicha ha umi nohenduseivaʼekue chupe jepe oñepyrũ ostudia hendive la Biblia. Haʼe heʼi: “Hetaiterei areko ostudiáva chendive, doce ha mbaʼe areko ha hetápe ambotapykue pórke ndachepuʼakapavéima”. Ha ñande avei jajapóramo Jehová heʼihaichaite, jahechaukañaína jahejaha ijespíritu sánto ñanesãmbyhy ha hetaiterei mbaʼe porã jahupytýta upévare.

Jahejákena pe espíritu sánto tañanepytyvõ

14, 15. a) Mbaʼépa ñanepytyvõta jaiko hag̃ua ñapromete haguéicha Jehovápe ñañemeʼẽrõ guare chupe? b) Mbaʼépa jajapovaʼerã jareko hag̃ua umi amígo añetetéva?

¹⁴ Ñandejára ningo omeʼẽ ñandéve ñane rembiaporã ha ñañehaʼãvaʼerã jajapo upéva (Rom. 10:14). Ikatu ñapensa ndaikatumoʼãiha  jajapo porã, péro ñande ungído térã ndahaʼéiramo jepe Jehová ñanembokatupyrýta upearã (jaleemína 2 Corintios 3:5). Ñañehaʼãramo jajapo la ikatumíva ha jahejáramo espíritu sánto ñanepytyvõ, ikatúta jaiko ñapromete haguéicha Jehovápe ñañemeʼẽrõ guare chupe.

¹⁵ Jaikuaa ningo ñaneimperfékto rupi ijetuʼuha ñandéve ñakumplipa hag̃ua pe kompromíso jajapovaʼekue Jehová ndive pórke haʼe ningo perfékto. Ikatu voi umi ñane irũnguerakue ipochy ñanendive ohechávo mbaʼeichaitépa ñakambia ha upévare ‘oñeʼẽvai ñanderehe’ (1 Ped. 4:4). Péro aníkena ñanderesarái koʼág̃a jarekomaha ñane amígo pyahu iñimportánteva: Jehová ha Jesucristo (jaleemína Santiago 2:​21-23). Iporã avei jajepokuaa ñane ermanokuéra kongregasionpeguáre, haʼekuéra ningo oservi Jehovápe ñandeʼykére (1 Ped. 2:17; Pro. 17:17). Ha Jehová katu ijespíritu sánto rupive ñanepytyvõta jajuhu hag̃ua ñane amigorã ñanemombarete ha ñanemokyreʼỹtava.

16. Mbaʼérepa ikatu jaʼe Pablo heʼi haguéicha: ‘Avyʼa chekangy haguére’?

¹⁶ Koʼág̃a rupi ijetuʼu ñambohovái hag̃ua ñaneprovlemakuéra ñanepytyvõramo jepe ermanokuéra. Sapyʼánte ningo ñanekaneʼõma ha ndajaikuaavéima mbaʼépa jajapóta. Haʼete voi ku ndaipóriva solusión. Ha péicha javépe koʼýte ñañembojavaʼerã Jehováre ha jajerure chupe ijespíritu sánto. Ñapensamíntena apóstol Pablo heʼivaʼekuére: ‘Chekangýramo chembareteve’ (jaleemína 2 Corintios 4:​7-10 ha 12:10). Haʼe oikuaa porã Ñandejára espíritu sánto ñanemombareteha ñanekangy jave ha ñanepytyvõtaha ñaikotevẽhápe. Péro mbaʼérepa upéicharõ heʼi: ‘Avyʼa chekangy haguére’? Haʼe ningo heʼi upéicha pórke ikangy jave ohechakuaave mbaʼéichapa Ñandejára espíritu omombarete chupe. Ha ñande avei ikatu ñañeñandu apóstol Pablo oñeñandu haguéicha (Rom. 15:13).

17. Mbaʼéichapa Ñandejára espíritu sánto ñanepytyvõ ñag̃uahẽ hag̃ua pe oríllape?

¹⁷ Jahecháma haguéicha, ñaikotevẽ Ñandejára espíritu sánto akóinte ñakumpli hag̃ua ñaprometevaʼekue Jehovápe ñañemeʼẽrõ guare chupe. Ñande ningo haʼete hína ñamaneháva peteĩ várko ha ñag̃uahẽse pe oríllape jareko hag̃ua jeikove opaveʼỹva ha upéicha jaservi Jehovápe opa árare. Ha pe yvytu ñanepytyvõtava ñag̃uahẽ porã hag̃ua pe oríllape haʼehína espíritu sánto. Upearã jahechavaʼerã moõ gotyópa oipeju ko yvytu ha ñañemeʼẽ chupe. Péro ndajaipotaiete ningo ñaneguenohẽ ñande rapégui pe yvytu opoíva Satanás múndo (1 Cor. 2:12). Ha ani hag̃ua oiko ñanderehe upéva ñanepytyvõta Ñandejára Ñeʼẽ ha iñorganisasión ñag̃uahẽ meve pe oríllape.

18. Mbaʼépa rejapovaʼerã ha mbaʼérepa?

¹⁸ Ndépa aréma restudia reikóvo testígo de Jehová ndive ha reimoirũramo jepe chupekuéra neʼĩra gueteri reñemeʼẽ Jehovápe ha rejevautisa? Oiméramo upéicha, iporã reñeporandu: “Mbaʼépa chejoko ajapo hag̃ua?”. Nde ningo oiméne rehechakuaáma mbaʼéichapa Jehová oiporu ijespíritu sánto ojejapo hag̃ua hembipota ha reagradese chupe upévare. Upéicharõ nde reikuaáma tekotevẽha reñemeʼẽ Jehovápe ha rejevautisa. Ha rejapóramo upéicha Jehová katuete tuicha nevendesíta ha ipo renyhẽ omeʼẽta ndéve ijespíritu sánto. Péro oiméramo nde aréma rejevautisa hague, katuete rehechakuaáne mbaʼeichaitépa pe espíritu sánto nepytyvõ nde rekovépe. Rehecha ha reñandu mbaʼéichapa nemombarete. Pe espíritu sánto ningo ikatu voi nepytyvõ opa árare. Upévare, akóintekena eheja pe espíritu sánto toisãmbyhy nde rekove.

Ñantendépa koʼã mbaʼe?

• Mbaʼépa heʼise akóinte jaheja ‘espíritu sánto ñanesãmbyhy’?

• Mbaʼépa jajapovaʼerã akóinte ñanesãmbyhy hag̃ua pe espíritu sánto?

• Mbaʼépa ñanepytyvõta ñakumpli hag̃ua ñaprometevaʼekue Jehovápe ñañemeʼẽrõ guare chupe?

[Porandu ñahesaʼỹijóva]

[Nóta oĩva taʼanga ndive páhina 15]

Ñambaʼapo jejopy vaʼerã ñane korasõre heñói porã hag̃ua pype mbaʼe porã

[Nóta oĩva taʼanga ndive páhina 17]

Jahejápa Jehová espíritu sánto oisãmbyhy ñande rekove?