Jaheja Jehová tombaʼeporandu ñandéve

LA Bíbliape ningo oĩ heta porandu opokóva ñane korasõitére ha Jehová oiporu upéva ñanemboʼe hag̃ua heta mbaʼe. Pór ehémplo, haʼe heta ombaʼeporanduvaʼekue Caínpe ikatu hag̃uáicha omboʼe chupe ohejavaʼerãha hape vai (Gén. 4:6, 7). Ha sapyʼánte katu peteĩ mbaʼénte oporandu ha oporomomýima ojejapo hag̃ua haʼe oipotáva. Peteĩ jey Jehová heʼi: “Mávapepa amondóta, ha mávapa ohóta orerehehápe”. Upévo proféta Isaías heʼi: ‘Péina ape che aime, chemondo chéve’ (Isa. 6:8, ÑÑB).

Jesús, pe Mboʼehára Guasu oiporu porã vaʼekue avei umi porandu. Pór ehémplo, la Bíbliape Mateo guive Juan peve jajuhu docientos ochenta rasa porandu haʼe ojapovaʼekue. Sapyʼánte ningo haʼe oiporu umi porandu ojurumboty hag̃ua umi oñeʼẽvaívape hese. Péro oiporuvevaʼekue og̃uahẽ hag̃ua umi hénte korasõme ha ikatu hag̃uáicha ojepyʼamongeta hikuái mbaʼéichapa oĩ Ñandejára ndive (Mat. 22:41-46; Juan 14:9, 10). Avei apóstol Pablo oiporuvaʼekue heta porandu og̃uahẽ hag̃ua umi hénte korasõme ha omopensa hag̃ua chupekuéra. Haʼe ningo catorce kárta voi ohaivaʼekue oĩva Escrituras Griegas Cristiánape (Rom. 10:13-15). Ha heta ehémplo jajuhu pe kárta ohaivaʼekuépe umi Romayguápe. Upépe haʼe oiporu pe porandu ikatu hag̃uáicha ñanepytyvõ ñantendeve hag̃ua ‘Ñandejára mbaʼeta, iñarandu ha ikuaapy pypukuete’ (Rom. 11:33, ÑÑB).

Oĩ umi porandu oñehaʼarõva oñembohovái ha ambue katu ojejapo ñanemboʼe hag̃ua umi mbaʼe iñimportánteva. La Bíbliape ningo Mateo guive Juan peve oĩ heta porandu upeichagua. Ñanemanduʼamínte Jesús heʼírõ guare hemimboʼekuérape: “Pemaʼẽke, ha peñeñangareko fariseokuéra ha Herodes levadúragui” (Mar. 8:15; Mat. 16:12, BNP). Upéva Jesús heʼírõ guare, haʼekuéra nontendéi omboʼesenteha chupekuéra oñeñangarekovaʼerãha umi tekove rovamokõigui ha umi japu omboʼévagui. Upévare oñepyrũ ojodiskuti hikuái hesarái haguére pángui. Ha Jesús ohechakuaágui nontendeiha hikuái, oñepyrũ oporandu chupekuéra: ‘Maʼerã piko peikovai ndaperekói haguére pán? Napenemanduʼái ha napentendéi gueteri piko? Peichaite pevéiko napentendeséi? Pende resa piko ha ndapehechái? Ha pende apysa ha napehendúi? Ndapeikuaái gueteri piko?’. Koʼã porandu haʼekuéra ikatu kuri ombohovái iñakãmente ha upéi ojepyʼamongeta mbaʼépa la Jesús omboʼeséva chupekuéra (Mar. 8:16-21, BNP).

‘Embohovái chéve chembaʼeporandu’

Jehová okorrehi hag̃ua hembiguái Jóbpe oporandu chupe heta mbaʼe ha upéicha ohechauka chupe michĩetereiha oñembojojátaramo ko univérso Apoharére (Job, kapítulo 38 guive 41 peve). Péro Jehovápa ohaʼarõraʼe Job ombohovái chupe iporandu? Jaʼekuaa nahaniriha. Jehová oporandúvo Jóbpe ‘moõpa oĩraʼe omopyendárõ guare ko yvy’, og̃uahẽséneraʼe ikorasõme ha upéicha Job ojepyʼamongeta hag̃ua ijehe. Upéicha heta mbaʼe Jehová oporandu rire chupe, Job ndoikuaavéima mbaʼépa heʼíta. Upévare heʼi Jehovápe: “Mbaʼéiko ambohováita ndéve. Che pópe amboty che juru akirirĩete hag̃ua” (Job 38:4; 40:4, ÑÑB). Oiméne ontendéraʼe Job mbaʼépa la Jehová omboʼeséva chupe ha upéicha rupi ohechakuaa ojavy hague. Péicha Jehová omboʼe chupe ndovaleiha oñemombaʼeguasu ha oipytyvõ avei chupe okambia hag̃ua.  Péro mbaʼépe piko Job tekotevẽ vaʼekue okambia?

Job ningo peteĩ kuimbaʼe ‘imarangatu ha ijoheipyréva’. Upéicharõ jepe tuicha ojavýkuri heʼírõ guare ‘haʼe hekopotĩetereiha ha omboja Ñandejárare iñañaha’ (Job 1:8; 32:2; 33:8-12). Péro umi porandu rupive Jehová oipytyvõ Jóbpe ontende porã hag̃ua mbaʼépa la oikóva. Peteĩ yvytu atã paʼũme heʼi chupe: ‘Máva piko nde, reñeʼẽrei hag̃ua che ajapóvare? Ehechauka chéve koʼág̃a ndepyʼaguasuha, ha embohovái chéve che mbaʼeporandu’ (Job 38:1-3). Umi mbaʼe Jehová oporanduvaʼekue oipytyvõ Jóbpe ohechakuaa hag̃ua Ñandejára iñarandu ha ipoderosoitereiha. Ha upéva Job ohechakuaa Jehová rembiapokuére. Upéicha rupi avei Job ojeroviave Jehováre hekojojaha ha ojapoha opa mbaʼe hekopete. Ajépa tuichaite mbaʼe Job ohasavaʼekue! Jehová voi ombaʼeporandu chupe!

Jahejákena Jehová tombaʼeporandu avei ñandéve

Ha ñandévepa ikatúta ñanepytyvõ umi porandu jajuhúva la Bíbliape? Katuete ningo. Jajepyʼamongetáramo umi porandúre hetaiterei mbaʼe jaikuaáta Ñandejáragui. Umíva ningo opoko voi ñane korasõitére ha upéicha rupi tuichaiterei ñanepytyvõ. Añetehápe ‘Ñandejára Ñeʼẽ oikove, ipuʼaka ha ohechauka ñandéve umi ñandepyʼapýpe oĩva’ (Heb. 4:12, ÑÑB). Péro ñanepytyvõve hag̃ua umi porandu, jaleevaʼerã Jehová voi oporandurõguáicha ñandéve (Rom. 15:4). Jahechamína koʼág̃a cuatro porandu jajuhúva la Bíbliape.

‘Ko yvy ombojovakéva piko ombojovakéta hekopeʼỹ?’ (Gén. 18:25.) Kóva ningo Abrahán oporanduvaʼekue Jehovápe oikuaárõ guare okastigataha Sodoma ha Gomórrape. Abrahán nopensaivaʼekue Ñandejára ojukáne hag̃ua enterovépe, tahaʼe hekojojáva térã hembiapo vaívape. Ko mbaʼe oporandúva rupive ningo haʼe ohechaukantehína ojeroviaitereiha Ñandejárare, haʼe ojapotaha tekojojápe opa mbaʼe.

Oĩ ningo umi oikuaasetereíva mbaʼéichapa Jehová ojapotahína opa mbaʼe amo gotyove. Pór ehémplo, mávapa umi nomanomoʼãiva Armagedónpe térã mávapepa oñemoingove jeýta. Ñandéko ndajajepyʼapyivaʼerã koʼã mbaʼére, iporãvéta uvei ñanemanduʼa mbaʼeichaitépa Abrahán ojeroviavaʼekue Ñandejárare. Ha haʼéicha avei jajeroviavaʼerã ñande Ru yvagapegua ivuéno, hekojoja ha imbaʼeporãha. Jajapóramo upéicha ndajaikomoʼãi japerde ñanetiémpo ha ndajajepyʼapymoʼãi umi mbaʼe ndajaikuaaporãivare.

‘Peẽ piko peimoʼã pejepyʼapyetereírõ pendejehe ikatutaha peikove pukumie?’ (Mat.  6:27, NM.) Jesús heʼíkuri kóva peteĩ hénte atýpe, ha umíva apytépe oĩvaʼekue avei hemimboʼekuéra. Péicha ohechauka iñimportanteha jajerovia Jehováre oñangarekotaha ñanderehe ñande rúicha. Jaikuaa ningo koʼág̃a rupi ijetuʼuetereiha jaiko ko múndo añáme ha upéicha rupi heta mbaʼe ñandepyʼapy. Péro naiporãi ningo jajepyʼapyeterei pórke upéva nañanepytyvõmoʼãi mbaʼevépe, ni nañambopukuvemoʼãi ñande rekove upe haguére.

Upévare, jajepyʼapy jave ñane situasiónre térã ñane hentekuérare ñanemanduʼavaʼerã Jesús heʼivaʼekuére. Upéva ñanepytyvõta jagueropuʼakakuaa hag̃ua opa mbaʼe. Avei ani hag̃ua jajepyʼapy rasa ha ñanembohasy upéva. Jesucristo heʼi voi ñande Ru yvagapegua omongarúva guyrakuéra ha ombojeguáva umi yvoty ojesarekotaha ñanderehe ohecha hag̃ua mbaʼépa ñaikotevẽ (Mat. 6:26-34).

‘Ikatu piko oime ogueraháva tata ijyvaʼári okaiʼỹre ijao?’ (Pro. 6:27.) Proverbios kapítulo uno guive nueve peve jajuhu heta konsého porã omeʼẽva peteĩ túva itaʼýrape. Umíva apytépe omombeʼu mbaʼépa ohupytýta umi oporomoakãratĩva (Pro. 6:29). Ha ñande jahechakuaáramo ñandegustaha umi mbaʼe noĩporãiva térã ñapensaitereíramo hese, ñanemanduʼavaʼerã pe porandu jahechavaʼekuére. Ko Provérbiospe heʼiháicha avei heʼi ko téystope: “Pe máva oñotỹva, upéva omonoʼõvaʼerã” (Gál. 6:7, BNP).

‘Máva piko nde reñeʼẽ hag̃ua tembiguái ahénore?’ (Rom. 14:4.) Pablo ohaírõ guare umi Romaguápe oñeʼẽ heta mbaʼe ohasávare umi kristiáno ypykue. Oĩ ningo umi ndohayhúiva tetã ambueguápe ha okritikáva hapicha odesidi ha ojapóvare. Upévare apóstol Pablo, pe porandu rupive omomanduʼa chupekuéra hory ha imbaʼeporãvaʼerãha hikuái oñondive. Ha ohejavaʼerãha Jehovápe oporohusga.

Koʼág̃a rupi avei ñande testigos de Jehová ñaime opa tetãyguáva. Péro Jehová ñanepytyvõ rupi jaiko peteĩ ñeʼẽme oñondivepa. Ha ñandépa akóinte ñañehaʼãñaína jaiko porãmba oñondive? Oiméramo jajepokuaa jakritika ñande rapichakuéra ojapóvare, iporãta ñanemanduʼa pe apóstol Pablo heʼivaʼekuére.

Porandu ñanemoag̃uítava Jehováre

Umi porandu ñahesaʼỹijovaʼekue ohechauka mbaʼéichapa ñanepytyvõ ha opoko ñane korasõre umi porandu oĩva Ñandejára Ñeʼẽme. Ñanepytyvõvéta avei jahecháramo mbaʼéicha javépa umi porandu ojehairakaʼe. Péicha ningo jajapovaʼerã jalee jave la Biblia juhúramo peteĩ porandu (ehecha pe rrekuádro oĩva páhina 14-pe).

Jahejákena Ñandejára Ñeʼẽ tog̃uahẽ ñane ñeʼã ruguaite peve, upéicharõmante ñapensa ha jajapóta opa mbaʼe Jehová oipotaháicha. Ha Ñandejára ombaʼeporandu rire Jóbpe, haʼe heʼi: “Ahendúgui reínte raʼe roikuaáva. Koʼág̃a katu rohecha che resa tee rupi” (Job 42:5). Péro mbaʼéicha piko Job ohecharakaʼe Jehovápe? Chupe g̃uarã ningo haʼete ohecháva Jehovápe ojerovia rupi añetehápe oĩha. Ha tiémpo rire Santiago heʼi avei: ‘Peñemoag̃ui Ñandejárare ha haʼe oñemoag̃uíta penderehe’ (Sant. 4:8). Jaiporu porãramo Ñandejára Ñeʼẽ ha umi porandu oĩva pype, jajeroviavéta ha koʼã koʼẽre jahecha porãvéta ñande Ru yvagapeguápe.

[Rrekuádro oĩva páhina 14-pe]

Mbaʼéichapa ñanepytyvõta koʼã porandu ñapensa hag̃ua Jehová opensaháicha?

▪ ‘Ombovyʼánepa Jehovápe kuaveʼẽmby ojehapýva ha mymba ojejukavaʼekue, ku ombovyʼarõguáicha chupe ojejapóramo iñeʼẽ?’ (1 Sam. 15:22, ÑÑB.)

▪ ‘Upe tesa ojapo ypy vaʼekue piko ndohechamoʼãingaʼu?’ (Sal. 94:9.)

▪ “Nde neateʼỹva, arakaʼe piko repáyta? Arakaʼe piko repuʼãta?” (Pro. 6:9.)

▪ “Mbaʼe rehe piko péicha ndepochy?” (Jon. 4:4.)

▪ ‘Mbaʼépepa ideprovéchota peteĩ kuimbaʼépe orekopárõ ko múndope oĩva, ha upéi omano?’ (Mat. 16:26, NM.)

▪ “Máva piko ikatúta ñandepeʼa Jesucristo mborayhúgui?” (Rom. 8:35.)

▪ ‘Mbaʼe piko rereko Ñandejára nomeʼẽivaʼekue ndéve’? (1 Cor. 4:7.)

▪ “Mbaʼéicha piko ojogueraha porãta pe hekopeguáva pe hekopeguaʼỹva? Térã pe tesapeha ha pytũ?” (2 Cor. 6:14, BNP.)

[Nóta oĩva taʼanga ndive páhina 15]

Mbaʼépa Job ohechakuaa Jehová ombaʼeporandu rupi chupe?