Jehová oipota ñañeñangareko

ÁG̃A ijetuʼuve vove ohóvo la situasión, umi oĩ porãva Jehová ndive añoite ‘ojesalváta’. Ñandejára ipuʼakapáva voi oñangarekóta hesekuéra (Joel 2:32). Jehová ningo ymaite guive oñangarekose yvyporakuérare. Ha chugui ‘heñói rupi pe tekove’, Haʼe omombaʼeterei ha oñangarekose opavavére (Sal. 36:9).

Jehová siervokuéra yma guare ningo omombaʼetereivaʼekue avei pe tekove. Pór ehémplo, peteĩ jey Jacob oho mombyry ifamíliandi ha ipeligróso upe viáhe. Haʼe oikuaa Jehová oñangarekoha hese, upéicharõ jepe ojapo la ikatúva ani hag̃ua oiko mbaʼeve umi ohóvare hendive (Gén. 32:7, 8; 33:14, 15). Ha Génesis 33:18 omombeʼu haʼekuéra ‘og̃uahẽ porã’ hague pe ohohápe. Ñande avei jajapóramo Ñandejára Ñeʼẽme heʼíva ikatu ñañangareko porãve ñandejehe ha umi oĩvare ñandejerére. Jahechamína mbaʼéichapa ikatu ojapo upéva umi ombaʼapóva oñemopuʼã hag̃ua Salón del Reino, umi oipytyvõva oiko jave sarambi ha umícha.

Mbaʼéichapa umi isrraelíta oñeñangarekovaʼekue yma?

Pe léi mosáikape oĩvaʼekue voi oñeñangarekovaʼerãha umi isrraelíta. Pór ehémplo, peteĩ isrraelíta ojogapóramo omopuʼãvaʼerã peteĩ muroʼi pe iterrása ári. Upépe haʼekuéra pyʼỹi ojupimivaʼerã ha ani hag̃ua avave hoʼa upégui ojapovaʼerã upéicha (1 Sam. 9:26; Mat. 24:17). Ha peteĩ ogajára nomopuʼãiramo pe muroʼi ha oĩramo hoʼáva pe terrásagui, ojekulpáta chupe upévare (Deu. 22:8).

Pe léi mosáikape heʼi mbaʼépa ojapovaʼerã umi isrraelíta hymbakuéra oporolastimáramo. Peteĩ hymba tóro oikutúramo peteĩ tapichápe ha omanóramo, haʼe ojukavaʼerã pe hymba anive hag̃ua ojapo upéicha ótrore. Ndoʼúi ni novendeivaʼerã avei hoʼokue, upévare tuicha pérdidata chupe g̃uarã. Péro mbaʼépa oikóta ndojukáiramo hymba tóro ha upéi oporojuka jeýramo? Ojejukavaʼerã pe tóro ha pe ijárape avei. Oiméne ko léi omokyreʼỹrakaʼe umi Israelguápe oñangareko hag̃ua hymbakuérare (Éxo. 21:28, 29).

Pe léi mosáikape oñemokyreʼỹ avei umi isrraelítape oiporu porã hag̃ua iñerramiénta. Pór ehémplo haʼekuéra oiporumivaʼerã ácha ojapo hag̃ua jepeʼa. Sapyʼánte oñeñakãʼóramo chugui hiʼácha ha ojuka peteĩ hapichápe. Upe ojaposeʼỹme oporojukavaʼekue ohovaʼerã ‘peteĩ táva oñekañyháme’. Opytavaʼerã oiko upépe pe saserdóte guasu omano meve, ha ikatu voi ohasa heta tiémpo oho jey hag̃ua hógape ifamiliakuéra rendápe. Upéicha Jehová omboʼe umi Israelguápe haʼe  omombaʼetereiha tekove. Ha umi iñeʼẽrendúva guive chupe oñangareko iñerramientakuérare ha oiporu porã (Núm. 35:25; Deu. 19:4-6).

Jehová ningo omoĩ umi léi omboʼe hag̃ua isiervokuérape iñimportanteha ñañangareko ñandejehe ñande rógape ha ambue hendápe. Peteĩ olastíma térã ojukáva hapichápe ojaposeʼỹme jepe ojechavaʼerã hendive. Ha koʼag̃aite peve Jehová ohecha upéicha koʼã mbaʼe (Mal. 3:6). Haʼe oipota ñañangareko ñandejehe pono ñañelastima ñande voi ni ñande rapichápe. Ko mbaʼére ñanemanduʼavaʼerã ñamopuʼã térã ñamyatyrõta jave ñane Salón del Reino.

 Ñañangareko ñambaʼapohápe

Ñandéve g̃uarã tuichaiterei mbaʼe ñamopuʼã ha ñamyatyrõ ñane Salón del Reino, Salón de Asamblea, sukursál ha ñaipytyvõ oiko jave sarambi. Opa mbaʼe jajapóva ñañehaʼã voi jajapo hekopete michĩmíramo jepe (Ecl. 10:9). Upéicha ndajajapóiramo ikatu ñañeaksidenta térã ñalastima ñande rapichápe. Jaikuaáma upéicharõ ani hag̃ua ñañeaksidenta ñañehaʼãvaʼerãha ñañangareko ñambaʼapohápe.

La Biblia heʼi: “Mitãrusukuéra jeroviaha oĩ imbaretépe ha itujáva mombaʼeha iñakãmorotĩme” (Pro. 20:29). Opaichagua konstruksiónpe oñekotevẽ umi mitãrusu imbarete porãvare ojapo hag̃ua umi tembiapo ipohyivéva ha oñekotevẽ avei umi ijedavémavare oñemohuʼã porã hag̃ua. Ñanemanduʼavaʼerã avei umi ikatupyryvémava ombaʼapokuaa ha oiporukuaaveha erramientakuéra. Umíva ningo yma imitãrusúpe ikyreʼỹ ha ombaʼapo pohýi vaʼekue avei. Upévare, oiméramo nde peteĩ voluntário pyahu hína rejesareko porã vaʼerã hesekuéra mbaʼéichapa ombaʼapo ha rejapo heʼíva ndéve. Haʼekuéra ningo nemboʼéta katuete reaprendeséramo. Pór ehémplo mbaʼéichapa reiporu porã vaʼerã umi erramiénta ipeligrósova  ha mbaʼéichapa rehupivaʼerã umi kárga pohýi. Upéicharõ hetave mbaʼe rejapóta, reñangarekovéta ndejehe ha revyʼavéta.

Umi ombaʼapóva konstruksiónpe opa árape oñatende porã vaʼerã. Umichahápe peteĩ tesapirĩme okambia la situasión ha noñatendeporãiramo ikatu oñelastima hikuái. Pór ehémplo ajeʼi yvyrei haguépe koʼág̃a ikatu oĩ peteĩ yvykua, térã ojeguerováma peteĩ eskaléra, távla térã peteĩ pintúra ryru. Avei oĩ léi heʼíva mbaʼéichapa oñembaʼapovaʼerã konstruksiónpe ani hag̃ua oiko aksidénte. Reiporúramo kásko, lénte ha sapatón heta mbaʼégui ndeprotehéta rembaʼapo jave konstruksiónpe. Péro nemanduʼákena koʼã ekípo ideprovechotaha ndéve akóinte reiporúramo rembaʼapo jave ha oĩ porãramo.

Heta erramiénta ndahasýiramo jepe ojeporu, iporãta reiporúramo hekopete ha isegurove hag̃uáicha. Ha oiméramo ndereiporukuaái peteĩ erramiénta, remombeʼuvaʼerã pe penemoakãvape. Haʼe ohecháta mbaʼéichapa nembokatupyrýta reiporu hag̃ua. Iporã akóinte neumílde ha rehechakuaa nderejapokuaaiha opaite mbaʼe. Upéva reikotevẽta rembaʼapo porã hag̃ua konstruksiónpe ha ani hag̃ua reñeaksidenta (Pro. 11:2).

Pyʼỹi ningo umi ombaʼapóva konstruksiónpe oñeaksidéta hoʼa rupi yvatégui. Upévare rejupi mboyve peteĩ eskalérape térã peteĩ andámio ári, rehechavaʼerã oĩ porãpa ha isegúropa. Rembaʼapótaramo andámio ári térã téchope, katuete remoĩvaʼerã peteĩ yvyra rejejoko hag̃ua térã remoĩvaʼerã ndejehe peteĩ segúro (arnés). Ha reporandúkena pe penemoakãvape ndereikuaaporãiramo mbaʼéichapa rembaʼapovaʼerã yvate. *

Koʼẽ koʼẽre ningo hetave ohóvo oservíva Jehovápe ha upévare tekotevẽ ñamopuʼãve Salón del Reino ha ambue mbaʼe tekotevẽva. Umi omoakãva pe konstruksión ningo oñangareko porã vaʼerã umi ombaʼapóvare ipoguýpe (Isa. 32:1, 2). Ha oiméramo nde remoakãreína peteĩ konstruksión, aníkena nderesarái iñimportanteha reñangareko porã pono oiko aksidénte. Rehechavaʼerã ojepoi rirépa opa mbaʼe oĩ hendápe porã ha oñemopotĩmbáparaʼe. Ha oĩramo ndojapoporãiva koʼã mbaʼe, ere porã vaʼerã chupe. Animoʼãke reheja umi mitãrusu térã ipyahúvape oho ombaʼapo umi lugár ipeligrosohápe. Rehechakuaákena mbaʼe pelígropa ikatu oĩ pe pembaʼapotahápe ha mbaʼépa ikatu pejapo ani hag̃ua peñeaksidénta. Nemanduʼavaʼerã avei pemohuʼãseha pe konstruksión oikoʼỹre ni peteĩ aksidénte.

Ñambaʼapo japorohayhúgui

Umi Salón del Reino ñemopuʼã ha ambue konstuksión ningo jaikuaa haʼeha peteĩ traváho peligróso. Upévare umi ombaʼapóva upépe oñatende porã vaʼerã. Ha enterove iñeʼẽrendúramo la Biblia heʼívape, ojapo ojeʼéva ani hag̃ua oiko aksidénte ha oñatendéramo, oñembaʼapo porãta ha ndoikomoʼãi ivaíva hesekuera ni hapichakuéra rehe.

Péro mbaʼépa ñanemomýi jajapo hag̃ua upéicha? Ñande ningo japorohayhu ha upévare ñañangareko ani hag̃ua oiko aksidénte. Jehová voi omombaʼeterei pe tekove ha ñande avei ñamombaʼe upéva. Ha jahayhu rupi ñande rapichakuérape ñañatendéta ani hag̃ua ñanedesaténtogui ñalastima chupekuéra (Mat. 22:37-39). Upévare, ñañehaʼãmbaitékena ñañangareko opavavére ani hag̃ua oñeaksidenta konstrunksionhápe.

[Nóta]

[Nóta oĩva taʼanga ndive páhina 30]

Mbaʼéichapa jaiporuvaʼerã peteĩ eskaléra

Ndaʼareihína un áñope Estados Unídospe oĩkuri 160.000 tapicha oñeaksisentáva hoʼa rupi eskaléragui ha umíva apytégui 150 omano. Jahechamína koʼág̃a mbaʼépa ikatu jajapo ani hag̃ua oiko ñanderehe upéva ñande rógape térã ñande travahohápe.

◇ Ani reiporu umi eskaléra okuʼepáva térã oñembyaímava. Ani avei remyatyrõse: Emombóntema.

◇ Peteĩ eskaléra ningo oreko mboy kílo pevépa ogueropuʼaka. Upévare rehechavaʼerã ipuʼakátapa nderehe, ne erramientakuéra ha ambue mbaʼe reiporútavare ha ani rehasa upéva.

◇ Emoñemboʼy nde eskaléra yvy hatã ha iplajovehápe. Ani remoñemboʼy andámio ári, káha, válde térã ambue mbaʼe ndopytahatãmoʼãiva ári.

◇ Aníkena remaña ótro ládo rejupi ha reguejykuévo eskaléragui.

◇ Aníkena reñemboʼy térã reguapy pe eskaléra púntape.

◇ Eiporútaramo peteĩ eskaléra ikatúva oñembopukuve (extensible), pe ipúnta osẽvaʼerã un métro jepe rembojekoha ári. Ha pono osyryry ikatu reñapytĩ peteĩ párte opyta hatã hag̃uáme térã rembojepytaso peteĩ távla ojeklavávare yvýre. Péro ndaikatúiramo rejapo upéicha, ejerure nde rapichápe ojoko hag̃ua ndéve rejupi aja. Ha eñapytĩ avei pe nde eskaléra púnta ani hag̃ua okuʼe.

◇ Ani reiporu nde eskaléra rejoko hag̃ua peteĩ andámio.

◇ Reime jave nde eskalérape reñehaʼãramo rehupyty peteĩ mbaʼe nde po térã nde pýpe, ikatu remonguʼe nde eskaléra ha reʼa. Upéicha rejaporangue, reguerovantevaʼerã jepi la nde eskaléra rejapojapa peve ne rembiapo.

◇ Reiporútaramo nde eskaléra peteĩ okẽ renondépe, remoĩvaʼerã peteĩ letréro heʼíva oñembaʼapohahína upépe ha rellavea pe okẽ. Ha ndaikatúiramo rellavea katu, ejerure peteĩ nde rapichápe toñatende ndéve upépe.

◇ Pe eskalérape ningo peteĩnte ojupivaʼerã ombaʼapo hag̃ua, ha ojupítaramo mokõi katu ojejapovaʼerã upeicharãicha voi. *

[Nóta]

[Nóta oĩva taʼanga ndive páhina 29]

Pe léi mosáikape ojeʼe umi isrraelíta omoĩ hag̃ua peteĩ muroʼi iterrása ári