Mitãrusukuéra, peservíkena Jehovápe pende pyʼaite guive

‘Nemanduʼákena nde Apohare rehe, koʼág̃a nemitã aja.’ (ECL. 12:1.)

1. Mbaʼépa oipotavaʼekue Jehová ojapo umi mitã Israelgua?

 OJAPÓMA amo 3.500 áño rupi Moisés heʼi hague umi saserdóte ha karai guasukuéra Israelguápe: ‘Pembyaty opavavépe: kuimbaʼe, kuña ha mitãnguérape, ohendu ha oikuaa hag̃ua Ñandejára Ñeʼẽ, ikatu hag̃uáicha okyhyje Jehovágui, ha ojapo hekoitépe opa mbaʼe haʼe heʼíva’ (Deu. 31:12). Rehechápa máva mávapa oñembyatyvaʼerã omombaʼeguasu hag̃ua Ñandejárape? Ndahaʼéi umi kakuaa añónte omombaʼeguasuvaʼerã chupe, síno umi mitã ha mitãrusukuéra avei. Enterove ohendu, oaprende ha ojapovaʼerã Jehová heʼíva.

2. Mbaʼéichapa Jehová ohechauka ojepyʼapyha mitãrusukuérare primer síglope?

² Primer síglope Jehová ohechauka avei ojepyʼapyha mitãrusu ha mitãkuñanguérare. Pór ehémplo, apóstol Pablo ohaírõ guare umi kárta kongregasionkuérape, Jehová omoĩka avei heta konsého mitãrusukuérape g̃uarã (jaleemína Efesios 6:1 ha Colosenses 3:20). Koʼã konsého katuete oipytyvõneraʼe umi mitãrusukuérape ohayhuve hag̃ua Jehovápe, ha upévare haʼe ohovasáneraʼe chupekuéra.

3. Mbaʼe mbaʼépa ojapo heta mitãrusu ha mitãkuña?

³ Ikatúpa jaʼe koʼág̃a rupi Jehová oipotaha avei umi imitãva omombaʼeguasu chupe? Katuete oipota. Ha javyʼaiterei jahechávo ouha rreunionhápe hetaite mitãrusu ha mitãkuña. Ojekuaa ojapoha hikuái Pablo heʼivaʼekue: ‘Jaheka mbaʼéichapa ikatu ñañopytyvõ jajoayhuve hag̃ua ha hetave mbaʼe iporãva jajapo hag̃ua. Ani jafalta ñande atyhápe, oĩháicha ojapóva, ñañomokyreʼỹ guei koʼýte koʼág̃a jahechávo hiʼag̃uimaha Ñandejára ára’ (Heb. 10:24, 25). Avei oĩ heta mitãrusu osẽmava opredika ituvakuérandi pe marandu porã (Mat. 24:14). Oparupiete káda áño oĩ heta mitãrusu ha mitãkuña ojevautisáva ohayhúgui Jehovápe, ha péicha ohupyty hikuái heta mbaʼe porã (Mat. 16:24; Mar. 10:29, 30).

Mbaʼépa rehaʼarõ reservi hag̃ua Jehovápe?

4. Mboy áño guivépa ikatu remombaʼeguasu Ñandejárape?

⁴ Reikuaápa mboy áño guivépa ikatu remombaʼeguasu Jehovápe? La Biblia nomombeʼúi, péro heʼi entéro imitãvape: ‘Nemanduʼákena nde Apohare rehe, koʼág̃a nemitã aja’ (Eclesiastés 12:1). Upévare ani reimoʼã nemitãitereiha gueteri reservi hag̃ua Jehovápe. Nemitãramo jepe koʼág̃ama rejedesidivaʼerã remombaʼeguasu Chupe.

5. Mbaʼéichapa heta tuvakuéra oipytyvõ ifamíliape ojapo hag̃ua Jehová rembipota?

⁵ Heta mitãrusu oreko itúva térã isy oipytyvõva  chupe oservi hag̃ua Jehovápe. Haʼekuéra ojogua Timotéope, oikovaʼekue yma primer síglope. Isy Eunice ha ijavuéla Loida omboʼevaʼekue chupe Ñandejára Ñeʼẽ michĩete guive (2 Tim. 3:14, 15). Oiméne nde túva ha nde sy nerekomboʼe avei péicha. Upearã nemboʼe la Biblia ha oñemboʼe nendive. Avei nderaha rreunión ha aty guasuhápe ha opredika nendive. Péicha ojapo peteĩ tembiapo tuichaitereíva Jehová omeʼẽva chupekuéra: nemboʼe rejapo hag̃ua Ñandejára rembipota. Rehechakuaápa mbaʼéichapa nde sy ha nde ru nderayhu ha ojepyʼapy nderehe? (Pro. 23:22.)

6. a) Heʼiháicha Salmo 110:3, mbaʼéichapa Jehová oipota jaservi chupe? b) Mbaʼépa jahechamíta koʼág̃a?

⁶ Péro ndetuichavévo rehóvo Jehová oipota ndete rehecha mbaʼépa ‘Ñandejára rembipota, iporãva ha ombohorýva chupe’, Timoteo ojapo haguéicha (Rom. 12:2). Upéicha reservíta Jehovápe, ndahaʼéi reñemoĩ porãségui nde tuvakuérandi, síno rejaposégui nde pyʼaite guive. Ha rejapóramo vyʼapópe Ñandejára rembipota, haʼe ndeguerohorýta (Sal. 110:3). Katuete ningo nde neñeʼẽrenduse chupe ha reipota oisãmbyhy nde rekove. Mbaʼépa nepytyvõta rejapose hag̃ua nde pyʼaite guive Jehová rembipota? Iporãta restudia la Biblia ne añohápe, reñemboʼe ha rejeporta porã. Jahechamína koʼág̃a mbaʼéichapa ikatu rejapo koʼã mbaʼe.

Eñehaʼã eikuaa porã Jehovápe

7. a) Mbaʼérepa jaʼekuaa Jesús oikuaa porã hague Ñandejára Ñeʼẽ? b) Máva mávapa oipytyvõ chupe upearã?

⁷ Releéramo káda día la Biblia nekyreʼỹta reservise hag̃ua Jehovápe. Avei nepytyvõta reikuaave hag̃ua chupe ha reaprendéta heta mbaʼe neporãva (Mat. 5:3). Péicha resegíta Jesús ehémplo. Haʼe orekórõ guare 12 áño isy ha itúva otopa chupe pe témplope ‘ombaʼeporanduhína umi mboʼeharakuérape ha ojapysaka hesekuéra’ (Luc. 2:44-46, NM). Ko téysto ohechauka Jesús imitãme ovyʼáma hague oñeʼẽvo Ñandejára Ñeʼẽre ha avei ontendeha upe heʼíva. Mbaʼéicha rupi piko upéva? Katuete isy María ha itúva José omboʼéraʼe chupe Ñandejára Ñeʼẽ michĩete guive (Mat. 1:18-20; Luc. 2:41, 51).

8. a) Arakaʼe guivépa tuvakuéra omboʼevaʼerã ifamíliape ohayhu hag̃ua la Biblia? b) Emombeʼu peteĩ káso ohechaukáva iñimportanteha tuvakuéra ohekomboʼe ifamíliape onase guive.

⁸ Koʼág̃a avei umi túva ojeroviáva Jehováre oikuaa iñimportanteha onase guive omboʼe ifamíliape ohayhu hag̃ua la Biblia (Deu. 6:6-9). Upéva ojapovaʼekue peteĩ ermána hérava Rubí onasérõ guare imemby ypykue José. Káda día olee chupe, Che lívro omombeʼúva istória oĩva Ñandejára Ñeʼẽme. Tuichavévo ohóvo omboʼe chupe oikuaa hag̃ua de memória heta téysto. Ndépa ere upéva oipytyvõne hague Josépe? Oñepyrũ ramóme oñeʼẽ, haʼe omombeʼukuaáma ijeheguiete heta káso ojehaíva la Bíbliape. Ha orekórõ guare 5 áño ojapóma peteĩ diskúrso Eskuéla Jaiporukuaa Hag̃ua la Bíbliape.

9. Mbaʼérepa tekotevẽterei relee la Biblia ha rejepyʼamongeta hese?

⁹ Reñemoag̃uive hag̃ua Jehováre, iporãta rejepokuaáramo relee la Biblia koʼẽ koʼẽre reikove aja pukukue (Sal. 71:17). Mbaʼéichapa upéva nepytyvõta? Ikatúta reikuaa porãve Jehovápe, Jesús heʼi haguéicha oñemboʼérõ guare Itúvape: ‘Ha upe jeikove opaʼỹva ningo kóva: Tandekuaa ndéve, nde añoite ningo hína pe Ñandejára teete’ (Juan 17:3). Reikuaavévo Jehovápe reñemoag̃uivéta hese ha rehayhuvéta chupe (Heb. 11:27). Upévare relee jave Iñeʼẽ iporãta reñeporandu: “Mbaʼépa chemboʼe  Jehovágui ko téysto? Ohechaukápa Haʼe cherayhu ha ojepyʼapyha cherehe?”. Rejepyʼamongetáramo koʼã porandúre hesakãvéta ndéve Ñandejára opensáva, oñandúva ha mbaʼépa oipota rejapo (jaleemína Proverbios 2:1-5). Timoteo ojapo haguéicha, nde avei regueroviáta Ñandejára Ñeʼẽ heʼíva ha reserviséta Jehovápe nde pyʼaite guive (2 Tim. 3:14).

Reñemboʼevaʼerã Jehovápe rehayhuve hag̃ua chupe

10, 11. Mbaʼéichapa reñemboʼe meméramo nekyreʼỹvéta reservi hag̃ua Jehovápe?

¹⁰ Reñemboʼe meméramo nekyreʼỹvéta reservi hag̃ua Jehovápe. Salmo 65:2 heʼi: “Nde niko rehendu maymáva ñemboʼe, ha opavave ne rendápe og̃uahẽ”. Yma Israel haʼérõ guare Ñandejára puévlo, umi tetã ambuegua ikatuvaʼekue oho Jerusalén témplope oñemboʼe hag̃ua Jehovápe (1 Rey. 8:41, 42). Haʼe nomboykéi avavépe, ha heʼi ohendutaha entéro iñeʼẽrendúvape chupe (Pro. 15:8). Ha pe téysto heʼívo “opavave” ouha Jehová rendápe, heʼise nde avei ikatuha reñemoag̃ui hese.

¹¹ Entéro jaikuaa umi oñoamigoitéva manterei oñeʼẽha ojupe. Ajépa javyʼaite jarekóramo peteĩ amígo ha ikatu ñamombeʼu chupe ñapensáva, ñañandúva ha ñandepyʼapýva. Ha Jehová ningo upéva la oipotáva rejapo, reñemongeta hendive ñemboʼe rupive (Fili. 4:6, 7). Emombeʼu chupe reñandúva amo ne ñeʼã ruguaitépe, remombeʼuháicha nde ru, nde sy térã peteĩ ne amigoitépe. Ne ñemboʼe ohechauka mbaʼépa reñandu Jehováre. Rehechatahína ág̃a reñemoag̃uivévo Ñandejárare ndahasyivetaha ndéve ere chupe nde pyʼaite guive mbaʼépa reñandu.

12. a) Mbaʼépa heʼise ñañemboʼe Jehovápe ñande pyʼaite guive? b) Mbaʼéichapa rehechakuaáta Jehová nepytyvõha?

¹² Péro upéva ndeʼiseihína ikatuha reñemboʼe péicha péichante. Remombeʼuvaʼerã Ñandejárape mbaʼéichapa reñeñandu. Ere Jehovápe rehayhu ha remombaʼeha chupe nde pyʼaite guive ha rejeroviaitereiha hese. Rehechávo ombohovaiha ne ñemboʼe reikuaáta añeteha Salmo 145:18 heʼíva: ‘Jehová oñemoag̃ui umi oñemboʼévare chupe’. Haʼe nepytyvõ ha nemombaretéta reñemoĩ hag̃ua Satanásre ha redesidi porã hag̃ua rejapótava (jaleemína Santiago 4:7, 8).

13. a) Mbaʼépa oipytyvõraʼe peteĩ mitãkuñáme ombohovái hag̃ua peteĩ mbaʼe ijetuʼúva? b) Mbaʼéichapa Jehová nepytyvõ rembohovái hag̃ua ne kompañerokuéra ndejopy jave mbaʼe vairã?

¹³ Jahechamína mbaʼéichapa oñemoag̃ui rupi Jehováre, peteĩ mitãkuña ikatu ombohovái peteĩ mbaʼe ijetuʼúva. Héra Cherie, haʼe inóta porãiterei vaʼekue koléhiope. Upévare oñemeʼẽ chupe heta prémio ha avei oñekuaveʼẽ chupe peteĩ véka ostudia hag̃ua universidápe. Cherie heʼi: “Legalménte ahasetereíkuri universidápe,  ha umi mboʼehára ha che kompañerokuéra chemboliga ajagarra hag̃ua pe véka”. Péro upéi ko mitãkuña ohechakuaa oiporutaha hetaiterei itiémpo ostudia hag̃ua ha saʼi hembytaha chupe Jehovápe g̃uarã. Mbaʼépa odesidi upémarõ? Haʼe omombeʼu: “Añemboʼe rire Jehovápe haʼe chupekuéra ndaipotaiha pe véka, ha upéi añepyrũ ajapo che prekursorádo rregulár”. Ojapóma 5 áño upéva oiko hague ha koʼág̃a heʼi: “Ni vymi nambyasýi. Aikuaa pe ajapóva ombovyʼaha Jehovápe ha upéva chembovyʼaiterei. Añetehápe remotenondéramo Ñandejára rréino haʼe omeʼẽmbaitéta ndéve opa mbaʼe reikotevẽva” (Mat. 6:33).

Rejeporta porãramo rehechaukáta ‘nde pyʼapy ipotĩha’

14. Mbaʼépa rehechauka Jehovápe rejeporta porãramo?

¹⁴ Rejeporta porãramo rehechauka avei Jehovápe reserviseha chupe. Nemanduʼa haʼe ohovasaha umi mitãrusu hekopotĩvape (jaleemína Salmo 24:3-5). Nemanduʼami Samuel ehémplore; haʼe ndahekovaíri ojapo haguéicha Elí raʼykuéra. La Biblia heʼi haʼekuéra hekovai aja ‘Samuel okakuaaha ohóvo ha hembiapo porãha Jehová ha opa Israelgua renondépe’ (1 Sam. 2:26). Enterove ohechakuaa haʼe hekopotĩha.

15. Mbaʼérepa reñehaʼãvaʼerã rejeporta porã?

¹⁵ Heʼi haguéicha apóstol Pablo, ko múndope henyhẽ umi hénte ijehénte opensáva, oñemombaʼeguasúva, naiñeʼẽrendúiva ituvakuérape, imalagradesídova, itráto kyʼáva, otrata vaietereíva hapichápe, ijejapóva ha oikóva vyʼarã rapykuéri ojapo rangue Ñandejára oipotáva (2 Tim. 3:1-5). Ha jaikuaa ijetuʼuha ndéve rejeporta porã hag̃ua ko múndo vaietépe. Péro oĩ jave peteĩ mbaʼe vai ndetira léntova ha rejejoko ani hag̃ua rejapo, rehechauka reñemoĩha Jehová ykére. Avei péicha rehechauka Jehová haʼeha pe Mburuvicha tuichavéva yvága ha yvýpe, ha upévare haʼe añoite ikatuha heʼi mbaʼépa iporã ha mbaʼépa ivai (Job 2:3, 4). Hiʼarive revyʼaitereíta rejapo haguére Jehová ojeruréva ndéve. Haʼe heʼi entéro mitãrusukuérape: ‘Nearandumína che raʼy ha chembopyʼarory, péicha ikatúta ambohovái pe cherehe oñeʼẽ vaívape’ (Pro. 27:11, ÑÑB). Ha ndahaʼéi upéva añónte. Ñandejára ndeguerohorýta ha upéva nemombaretevéta reservi hag̃ua chupe.

16. Mbaʼéichapa peteĩ mitãkuña ombovyʼa Jehovápe?

¹⁶ Carol imitãrõ guare akóinte ojapo ikonsiénsia heʼíva ha okumpli Jehová léi. Ikompañerokuéra kolehiopegua ohechakuaa upéva, péro oĩ umi oñembohorýva hese ndofestehái haguére umi arete ojejapóva oñemombaʼe guasu hag̃ua hetã ha ambue fiésta. Upéicharamo jepe ija vove chupe, haʼe omombeʼu chupekuéra mbaʼérepa ndojapói upéva. Heta áño rire peteĩ ikompañerakue omondo chupe peteĩ kárta heʼíva: “Aréma rotopase ameʼẽ hag̃ua ndéve che aguyje. Che ahechakuaavaʼekue mbaʼéichapa nderekoporã ha pyʼaguasúpe remombeʼu mbaʼérepa nderefestehái umi arete. Nde rupi aikuaa ypy testigos de Jehovápe”. Pe ikompañerakue ohecharamoitereivaʼekue  Carol ojapóva ha upévare upe rire oñepyrũ ostudia la Biblia. Ohaírõ guare pe kárta ohasáma 40 áño ojevautisa hague. Carol ojapo haguéicha, nderekyhyjéiramo remombeʼu hag̃ua mbaʼépa reguerovia, ikatu ne ehémplo omokyreʼỹ nde rapicha ipyʼaporãvape oikuaa hag̃ua Jehovápe.

Nde ikatu remombaʼeguasu Jehovápe

17, 18. a) Mbaʼépa ñapensa umi mitãrusukuéra oĩvare ñane kongregasiónpe? b) Mbaʼépa ohupytýta umi mitãrusu ha mitãkuña oikóva tape porãre?

¹⁷ Javyʼaiterei jahechávo hetaite mitãrusu ha mitãkuña oparupigua omombaʼeguasuha Ñandejárape ipyʼaite guive. Mbaʼépa oipytyvõ chupekuéra upearã? Olee hikuái la Biblia káda día, oñemboʼe, ha ovyʼa ikatu haguére ombopyʼarory Jehovápe ojeporta porã rupi. Koʼã mitãrusu ombovyʼa ituvakuéra ha ambue ermánope (Pro. 23:24, 25).

¹⁸ Mitãrusu ha mitãkuña, akóinte peikóramo tape porãre ikatúta peike Ñandejára múndo pyahúpe (Rev. 7:9, 14). Upépe hetaiterei mbaʼe porã pehupytýta, koʼẽ koʼẽre peikuaavéta Jehovápe ha pemombaʼeguasúta chupe opa ára g̃uarã (Sal. 148:12, 13).

Emyesakãmína

• Mbaʼe mbaʼépa ikatu ojapo mitãrusukuéra Jehová servísiope?

• Mbaʼérepa iñimportánte jajepyʼamongeta jaleévare Ñandejára Ñeʼẽme?

• Mbaʼéichapa pe ñemboʼe ñanemoag̃uive Jehováre?

• Mbaʼépa ohupyty mitãrusukuéra ojeporta porã rupi?

[Porandu ñahesaʼỹijóva]

[Nóta oĩva taʼanga ndive páhina 5]

Releépa jepi la Biblia káda día?