Nemanduʼápa koʼã mbaʼére?

Katuete revyʼáneraʼe releévo umi rrevísta Ñemañaha ramoite osẽvaʼekue. Ehechamína ikatúpa nemanduʼa koʼã mbaʼére:

• Mbaʼérepa tekotevẽ rakaʼe omano pe Mesías?

Ohechauka hag̃ua peteĩ yvypóra perfékto ikatuha iñeʼẽrendu Ñandejárape ohasa asyvéramo jepe. Ha ñandepeʼa hag̃ua pe pekádo Adán ombohasavaʼekue ñandéve poguýgui ha ikatu hag̃uáicha jaikove opa ára g̃uarã (15/12, páhina 22 ha 23).

• Mbaʼépa nepytyvõta ani hag̃ua reʼu rasa vevída?

Tekotevẽ reñemboʼe, restudia la Biblia, rejejokokuaa, reñehaʼãmbaite rekumpli rejedesidíramo nderehasamoʼãiha la rrája ha reiporavo porã ne amigorã. Ha umi odesidíva hoʼu vevída, ojejokokuaavaʼerã ha notĩrivaʼerã heʼi hag̃ua no (1/1, páhina 7 guive 9 peve).

• Mbaʼérepa ñañemongetavaʼerã ñane família ndive?

Ndahaʼéi ñañemongetantevaʼerã ñane família ndive. Ñaporandu ha pyʼaguapýpe ñahenduvaʼerã avei chupekuéra la heʼíva. Heta família ohechakuaa opyta porãha chupekuéra okaruha órape oñemongeta hag̃ua oñondive (15/1, páhina 18 ha 19).

• Mbaʼépa ñanepytyvõta ñaneñeʼẽrendu hag̃ua Jehovápe ñande pyʼaite guive?

Deuteronomio 10:12-pe heʼi: ‘Pekyhyje Ñandejáragui’. Koʼápe Moisés ndeʼirihína jakyhyjevaʼerãha Jehovágui ñandekastigárõ g̃uarã jajavy haguére. Heʼisentehína jarrespetavaʼerãha Jehovápe ha ndajajapoivaʼerãha mbaʼeve ombopochýtava chupe’. Upéicharõ jepe, jahayhúgui Jehovápe ñaneñeʼẽrenduvaʼerã chupe (10-12, páhina 10).

• Mbaʼéicha javépa peteĩ tapicha ikatu opensa tekotevẽha ojevautisa jey?

Ikatu ojevautisátarõ guare haʼe noĩporãi Ñandejára renondépe térã ojapo oikóvo ñemiháme peteĩ pekádo ivaietereíva. Ha peteĩ kristiáno ojevautisa riréma ojapóramo upeichagua pekádo oñemosẽ kongregasióngui (15/2, páhina 22).

• Mbaʼéichapa oĩ umi omanovaʼekue?

La Biblia omyesakã porãiterei mbaʼéichapa oĩ umi omanovaʼekue. Eclesiastés 9:5 heʼi: ‘Umi oikovéva oikuaa omanovaʼerãha, omanóva katu ndoikuaavéima mbaʼeve’. Ha pe versíkulo 6 katu omombeʼu noñanduveimaha mbaʼevete umi omanovaʼekue. Pe versíkulo 10-pe katu heʼi: ‘Pe omanovaʼekue oĩháme ningo ndaipóri tembiaporã, ndaipóri jepyʼamongeta, ndaipóri mbaʼekuaa ha arandu’ (1/1, páhina 19).

• Mbaʼépa orrepresenta pe semílla iporãitéva oñeñotỹvaʼekue pe ehémplo oñeʼẽvape trígo ha ñana vaíre?

Jesús, pe ‘Yvypóra Raʼy’ ningo tres áño ha seis mése pukukue opreparavaʼekue la yvy. Ha áño 33-pe Pentecostés jave oñepyrũ oñotỹ pe semílla iporãitéva oiporavóvo hemimboʼekuérape Ñandejára raʼýramo. Ha ohenói chupekuéra ‘pe rréino yvagapegua raʼykuéra’ (15/3, páhina 20).

• Mbaʼéicha piko oñembyatýraʼe oikóvo Jehová ‘galpónpe’ umi kristiáno oñembojojáva trígore? (Mat. 13:30.)

Upéva ojejapo ko múndo aña ára pahápe. Upéicharõ ‘pe Rréino yvagapegua raʼykuéra’ omanovaʼekue ohóvo yvágape, ha ambue katu osegívo kongregasiónpe. Upépe haʼekuéra omombaʼeguasuhína Jehovápe hekopete ha Haʼe katu oñangareko hesekuéra (15/3, páhina 22).

• Mávapa odesidi mbaʼe kuatiañeʼẽpa ou Ñandejáragui?

Upéva ndodesidíri peteĩ tapichánte ni umi paʼikuéra. Ñandejára ombokatupyry heta kristiáno síglo primeroguápe ohechakuaa hag̃ua mbaʼépepa idiferénte umi kutiañeʼẽ ojehaíva ipytu marangatu rupive ha umi ijapúva. Jahechakuaa upéicharõ umi kristiáno tee odesidi hague mbaʼe kuatiañeʼẽpa ou Ñandejáragui (1 Cor. 12:4, 10; 1/4, páhina 28).