Umi mbaʼe rohasáva orepytyvõ rojeroviave hag̃ua Jehováre

Omombeʼu Ada Dello Stritto

Che cheréra Joel ha koʼangete akopiapa che anotadórpe pe téysto ko arapegua. Dos órape ningo ajapopa arekomáramo jepe 36 áño. Mbaʼérepa upéva? Che sy koʼág̃a omombeʼúta peẽme.

CHE ména Luigi ha che ningo rojevautisa testigos de Jehováramo 1968-pe. Roreko mokõi orefamília hesãiva, David ha Marc, péro upéi onase pe mbohapyha. Haʼe héra Joel ha onase itiempopeʼỹ upe 1973-pe peteĩ ospitál oĩvape táva Binche-pe (Belgica), opytáva 60 kilométro rupi Bruselas-gui sur gotyo. Haʼe ningo 1 kílo 700 grámonte voi oreko onasérõ guare ha upévare ahejámante chupe oñeinterna ospitálpe ojupimie peve de péso.

Péro ohasa la tiémpo ha Joel nomehorái. Upémaramo Luigi ndive rogueraha chupe peteĩ pediatra rendápe. Ha upe doktór orrevisa rire chupe heʼi: “Ambyasyeterei ningo. Amalisia ko pene família orekopaite la mbaʼasy umi ótro mokõi orekorangue entéro”. Rokirirĩete ningo ropytávo. Rohechakuaáma orefamília noĩporãiha. Upéi pe doktór omohaʼeño che ménape ha heʼi chupe: “Nde raʼy oreko trisomía 21”, térã síndrome de Down. *

Upe doktór heʼíva oréve orereja vaieterei. Upémarõ roho jey ótro doktór rendápe. Ko doktór una óra rupi orrevisa Joélpe heʼiʼỹre mbaʼevete. Luigi ha chéve katu haʼete voi ndohasáiva la óra. Upéi pe doktór omaña orerehe ha heʼi: “Ko mitã oikotevẽtereíta penderehe”. Ha upéi heʼive: “Péro oikóta vyʼápe, pórke ojekuaa peẽ pehayhuetereiha chupe”. Upéva oguapyetereígui cherehe ahupi la che memby ha ajopy chepéchore ha roho ógape. Upérõ Joel orekóma dos mése.

Oremombarete umi rreunión ha predikasión

Upe rire umi estúdio ojejapóvape Joélpe osẽ avei iprovlemaha ikorasõme ha orekoha raquitismo grave. La ikorasõ tuichaiterei ha ojopy  chugui umi ipulmón, upéicha rupi ojagarra reive chupe infeksión. Ha upévare voi orekórõ guare cuatro mése rogueraha Joélpe ospitálpe ojagarrágui chupe bronconeumonía. Upépe oñeinterna ha omoĩ chupe hikuái oĩ hag̃uáme haʼeño. Orepyʼa ningo hoʼa yvýre rohechávo mbaʼéichapa ohasa asy. Orévengo hiʼãiterei rohupi chupe orejyva ári ha romokunuʼũ, péro diez semána aja entéro ndohejái oréve hikuái ni ropoko hese. Luigi ndive mombyrymi guivénte romaña hese, ha ndaikatúimaramo rojapo mbaʼeve roñoañuã ha roñemboʼe Jehovápe.

Upe tiémpope ningo ore rosegi roho rreunionhápe David ha Marc ndive. Haʼekuéra upérõ oreko seis ha tres áño. Ha roimévo ore ermanokuéra apytépe Salón del Réinope, rohechakuaa mbaʼéichapa Jehová oñangareko orerehe. Roñandu voi ikatuha rohejapaite ipópe opa mbaʼe orejopýva ha upéva tuicha orembopyʼaguapy (Sal. 55:22). Umi enferméra oñangarekóva Joel rehe jepe ohechakuaa umi rreunión orepytyvõitereiha.

Ajerurémi avei Jehovápe tachemombarete aha hag̃ua apredika. Che ningo apytarangue ógape cherasẽ, ahaseve amombeʼu che vesinokuérape Ñandejára oprometeha peteĩ múndo ndaiporimoʼãihápe hasýva. Ha amombeʼu chupekuéra mbaʼéichapa upe esperánsa chemombarete. Upéicha asẽ jave apredika, ahechakuaa Jehová ohendu hague che ñemboʼe.

“Máva piko oimoʼãta!”

Rovyʼaiterei ningo heʼi haguére oréve hikuái ikatumaha roho jey ógape Joel reheve. Péro upe koʼẽme opa jeýma la orevyʼa. Joel hasyete jey ha roguerodipara chupe ospitálpe. Ha umi doktór oñatendéva hese heʼi oréve: “Joel seis mése rupíntema oikovéta”. Upéi dos mése haguépe la che memby oĩ vaiete jey ha haʼete voi oikótava umi doktór heʼivaʼekue. Upéi peteĩ doktór oremboguapy pe okápe ha heʼi oréve: “Ndaiporivéima mbaʼeve jajapovaʼerã. Ambyasyeterei penendive”. Ha upéi heʼive: “Koʼág̃a Jehová añoite ikatu oipytyvõ chupe”.

Upéi aha Joel rendápe ha chekaneʼõitereímaramo jepe apyta hendive upépe. Luigi katu oñangareko David ha Marc rehe, upévare heta ermána oñoturna opyta hag̃ua chendive. Upéi una semána haguépe che memby iñinfárto. Ha umi enferméra odipara oñatende hag̃ua hese, péro ndaikatuvéima ojapo mbaʼeve. Upe riremínte peteĩ oñemboja ha mbeguekatumi heʼi chéve: “Opytuʼúma”. Upépe che ndajejokovéi ha ajaheʼo. Asẽ pe kotýgui añemboʼe hag̃ua, péro ndaikuaái mbaʼéichapa haʼéta ambyasyetereiha. Upéi quince minúto haguépe peteĩ enferméra osẽ cherendápe ha heʼi chéve: “Oĩ porã jeýma hína!”. Chejagarra chejyvágui ha heʼi: “Eju jaha hendápe, ikatúma rehecha chupe”. Ha aikérõ guare hendápe la ikorasõmi ombaʼapo jeýma. Upe ospitál tuichakue ojekuaapa la oikovaʼekue. Oujoa umi doktór ha enferméra ohechávo chupe ha heʼi hikuái: “Máva piko oimoʼãta!”.

Joel oguata ñepyrũ cuatro áñope

Joel michĩme pe ipediatra heʼi jey jey oréve: “Joel oikotevẽta pehayhu chupe”. Jehová ningo hetáma oñangareko  porã Luigi rehe ha cherehe, ha koʼýte onase rire Joel. Koʼág̃a katu orehaitéma roñangarekose Joel rehe upéicha. Ha heta oportunida roreko upearã, pórke roipytyvõvaʼerã chupe opaite mbaʼépe.

Joel oreko peve siete áño pyʼỹinte hasykatuvaʼerã octubre guive marzo peve ha rogueraha jeýma vaʼerã chupe ospitálpe. Péro añehaʼãmbaite avei añemotiémpo David ha Marc rehe añangareko hag̃ua. Haʼekuéra ningo tuicha oipytyvõvaʼekue iñermánope. Pór ehémplo, heta doktór heʼivaʼekue oréve Joel ndoguatamoʼãiha. Péro peteĩ árape Joel orekórõ guare cuatro áño, Marc heʼi chupe: “Dále! Ehechauka mamáme ndevaleha”. Ha chemopirĩmba ningo ahechávo chupe oñepyrũ oguata. Upéva orembovyʼaiterei ha roagradese Jehovápe orepyʼaite guive. Ha mbeguekatúpe Joel ojapo japove ohóvo heta mbaʼe ha michĩramo jepe la ojapóva, roguerohory ha romokyreʼỹ chupe.

Tuicha oipytyvõ chupe oikuaa Jehovápe

Ikatumi jave ore roguerahávami Joélpe orendive Salón del Réinope. Ha haʼe hasyparei rupi rogueraha chupe ikarrítope ha romoʼã peteĩ úlepe. Upéicha roñangareko Joel rehe ani hag̃ua ova hese mbaʼasy. Péro upéicharõ jepe haʼe ovyʼa rreunionhápe.

Ore ermanokuéra kongregasionpegua oremokyreʼỹ ha orepytyvõ opa ikatumívape. Peteĩ ermáno pyʼỹinte oremomanduvaʼerã Isaías 59:1-pe heʼívare: ‘Pemaʼẽ porãke! Jehová po nambykýi oporopytyvõ hag̃ua, ha haʼe ndaijapysapéi nohendúi hag̃ua’. Koʼã mbaʼe ningo omombareteve ore jerovia Jehováre.

Ymaite guive ore roñehaʼã roipytyvõ Joélpe ohechakuaa hag̃ua akóinte oikotevẽha Jehováre. Upearã roaprovechapaite umi oportunida rorekóva roñeʼẽ hag̃ua chupe Ñandejárare. Ore ningo roipota Joel ohayhu Jehovápe ha ohecha chupe Itúvaicha. Rojerure avei Jehovápe ovendesimi hag̃ua umi mbaʼe rojapóva rohekomboʼe porã hag̃ua Joélpe.

Upéi ningo orembovyʼaiterei rohechávo mbaʼéichapa Joel tuichavévo omombeʼuseterei la héntepe la Biblia omboʼéva. Pór ehémplo orekópe 14 áño, ojopera rire oporandu chéve: “Mama ikatúiko ameʼẽ che doktórpe peteĩ lívro Vivir para siempre?”. Ha upéva chembovyʼaiterei. Upéi, tiémpo rire ojopera jeýtama ha ore roikuaa ipeligrosoha upe operasión. Péro upe mboyve Joel omeʼẽ idoktorkuérape peteĩ kárta roipytyvõvaʼekue chupe ohai hag̃ua ha upévape omombeʼu ndoipotaiha oñemoĩ chupe tuguy. Pe idoktór oporandu chupe: “Ndévepa ndegusta péicha ojejapo?”, ha haʼe heʼi: “Si doktór”. Ore ningo oreaguaraiterei heseve rohechávo mbaʼeichaitépa ojerovia Ñandejárare ha ombovyʼaseha chupe. Ha roagradeseterei  avei umi ombaʼapóvape upe ospitálpe heta orepytyvõ haguére.

Joel ombaʼapove Jehovápe g̃uarã

Joel orekópe 17 áño oñemeʼẽ Jehovápe ha ojevautisa. Rovyʼaiterei ningo upe díape! Orepyʼarory rohechávo mbaʼéichapa oñakãrapuʼã Jehová servísiope. Haʼe akóinte ikyreʼỹ ha ohayhu Jehovápe ha ijerovia katu imbareteve ohóvo. Haʼe entéro otopávape heʼi: “Chéko aikove Jehovápe aservi hag̃uánte”.

Upe tiémpope haʼe olee ha oskrivikuaáma péro heta oñehaʼãvaʼerã upearã. Káda ñeʼẽ oskrivíva, mbykýramo jepe tuichaiterei mbaʼéma chupe g̃uarã. Upe guive, káda pyhareve olee pe téysto káda diagua, upéi mbeguekatu okopia iñanotadórpe ha upéichape hétama oreko koʼág̃a g̃uarã.

Rreunión díape ningo Joel oremboapuramivaʼerã roho hag̃ua voi Salón del Réinope pórke haʼe omomaiteise entéro og̃uahẽvape. Haʼéngo vyʼápe voi okomenta ha ojapo umi demostrasión rreunionhápe. Ombohasa avei mikrófono ha oipytyvõ ambue mbaʼépe. Haʼe ningo hesãima guive oremoirũ katuete predikasiónpe káda semána. Upe áño 2007-pe katu oñeanunsia kongregasiónpe oñenombramaha Joélpe siérvo ministeriál. Orerasẽ ningo vyʼágui. Iporãiterei ko jopói omeʼẽva oréve Jehová!

Rohecha Jehová oĩha orendive

Áño 1999-pe rohasa peteĩ mbaʼe ijetuʼuetereíva. Peteĩ chofér desaténto ochoka orekóchere ha Luigi oñeaksidenta vaieterei. Upevakuére umi doktór oikytĩmante chugui hetyma ha ojopera heta vése ikolúmnape. Upérõ roñemboʼe jeýma Jehovápe ha haʼe oremombarete rogueropuʼaka hag̃ua upéva (Fili. 4:13). Che ména opytáramo jepe paralítiko, roñehaʼã ani hag̃ua upéva oremokangy. Haʼe ningo ndaikatuvéima ombaʼapo, péro itiempove oñangareko hag̃ua Joel rehe. Upéicha rupi che avei ikatu ambaʼapove Jehovápe g̃uarã. Luigi itiempove avei koʼág̃a ohekomboʼe porã hag̃ua ore famíliape Ñandejára ñeʼẽ ha avei kongregasiónpe. Upépe ningo Luigi koʼág̃a peve haʼe coordinador del cuerpo de ancianos.

Koʼã mbaʼe rohasa rupi, hetave tiémpo roime oñondive. Ore ningo rohechakuaa mbaʼe situasiónpepa roime ha norohaʼarõi mbaʼeve ikatuʼỹvaʼerã rohupyty. Ha orekangy jave katu roñemboja Jehová rendápe ha romombeʼu chupe mbaʼéichapa roñeñandu. Péro la rombyasyetereíva David ha Marc oñemomombyhy hague Jehovágui. Haʼekuéra ningo okakuaapa rire oho ógagui ha mbeguekatúpe oñemomombyry Jehová organisasióngui. Hiʼãiténgo oréve peteĩ árape ou jey hikuái! (Luc. 15:17-24.)

Ore rohechakuaa Jehová oĩha orendive koʼã mbaʼe rohasávape ha rojerovia hese akóinte orepytyvõtaha. Oremanduʼa Isaías 41:14-pe heʼívare: ‘Che Jehová nde Jára rojágarra nde po deréchagui ha haʼe ndéve: “Ani rekyhyje, che aju roipytyvõvo”’. Roikuaa ningo Jehová oñakaramaha ore póre ha upéva tuicha orembopyʼaguapy. Roʼekuaa voi umi mbaʼe rohasáva omombareteveha ore jerovia ore Ru Jehováre.

[Nóta]

[Nóta oĩva taʼanga ndive páhina 16 ha 17]

Joel isy Ada ndive

[Nóta oĩva taʼanga ndive páhina 18]

Ada, Joel ha Luigi

[Nóta oĩva taʼanga ndive páhina 19]

Joel omomaiteise entéro og̃uahẽvape Salón del Réinope