Ñamombaʼékena umi ijedávape

CALIFORNIA rembeʼýpe oĩ peteĩ yvyramáta hérava Ciprés Solitario ha opavavénte onohẽ chupe fóto. Ojeʼe orekomaha 250 áño. Ko yvyramáta guasu iporãitéva ojehecharamoiterei ha oñeñangareko porã hese. Pór ehémplo oñapytĩ hikuái kávlepe ojoko hag̃ua ha imátare ombojere ita.

Pe Ciprés Solitario oiméne ñanemomanduʼa umi ñane ermanokuéra ijedámavare. Umíva ningo ogueropuʼakáma heta mbaʼe ha akóinte osẽ opredika. Pór ehémplo proféta Joel heʼimavaʼekue umi ‘ijedámava’ omombeʼutaha marandu porã oĩva Ñandejára Ñeʼẽme (Joel 2:28-32; Hech. 2:16-21). Ha upeichaite oiko, koʼág̃a rupi haʼekuéra kyreʼỹme heta óra osẽ omombeʼu ‘marandu porã’ (Mat. 24:14). Umíva apytépe oĩ heta ohasa asy ha ombohovaivaʼekue heta provléma. Pe Ciprés ningo oaguantáma haguére heta mbaʼe ojeguerohory ha opyta hatã hag̃ua oñemoĩ ijerére ita ha ojejoko kávlepe. Upéicharõ ñande koʼýte jaguerohory, ñamombaʼe ha jatrata porã vaʼerã umi ñane ermáno ijedávape, oservivahína ipyʼaite guive Jehovápe.

Jehová omanda hembiguaikuéra yma guarépe: ‘Pe iñakãrague morotĩmbámava renondépe reñemboʼyvaʼerã, ha nembaʼerechakuaavaʼerã pe ijedámava ndive’ (Lev. 19:32, ÑÑB). Koʼág̃a rupi Ñandejára siervokuéra apytépe heta ijedáva omoĩ ñandéve ehémplo porã. Haʼekuéra heta áñorema oguata Jehová rapére ha oservi chupe ipyʼaite guive (Miq. 6:8). Ha akóinte iñeʼẽrendu rupi Ñandejára Ñeʼẽ  heʼívape, ikatu ojeʼe umi ijedávape ‘ombojeguaha iñakãrague morotĩ’ (Pro. 16:31, ÑÑB).

Apóstol Pablo heʼivaʼekue voi Timotéope: “Ani ne ñeʼẽ pohýi itujavévape. Upéva rangue, eñemoñeʼẽ chupe, haʼe nde ruramoguáicha”. Ha heʼi avei chupe: “Ig̃uaig̃uivévape ereko nde syramoguáicha” (1 Tim. 5:1, 2). Ha ojapóvo péicha Timoteo jaʼekuaa ‘oñemboʼyha umi iñakãrague morotĩmbámava renondépe’. Upéicharõ Jehová oipota jarrespeta ñañeʼẽ jave umi ijedávandi.

Romanos 12:10-pe heʼi: ‘Pejoayhuvaʼerã oñopehẽnguéicha, peñomotenonde ha peñombojerovia’. Jaikuaa ningo umi ansiáno raẽvete omombaʼe ha orrespetavaʼerãha umi ijedávape. Péro enterove ñañehaʼãvaʼerã jajapo pe téysto heʼíva.

Ha koʼýte ñande ru ha ñande avuelokuéra ijedámavare ñañangarekovaʼerã. Ñapensamínte mbaʼéichapa umi hénte oñehaʼã oñangareko porã pe Ciprés Solitario rehe. Upéicharõ koʼýte ñande ñañehaʼãvaʼerã ñañangareko porã ñande tuvakuéra ha ñande avuelokuérare. Upéva pór ehémplo ikatu jajapo ñahendúramo la heʼíva hikuái ha ñamotenonde chupekuéra ñamotenonderangue ñandéve ñandegustáva (Pro. 23:22; 1 Tim. 5:4).

Ñandejára Jehová ningo omombaʼeterei isiervokuéra ijedávape ha arakaʼeve ndohejareimoʼãi chupekuéra (Sal. 71:18). Haʼe oipytyvõ voi umi ijedávape osegi hag̃ua oservi chupe ipyʼaite guive. Ha ñande avei ñaipytyvõ ha jarrespetavaʼerã chupekuéra.

[Nóta oĩva taʼanga ndive páhina 7]

Pe Ciprés Solitario oikotevẽháicha oñeñangareko hese, umi ijedáva oikotevẽ jarrespeta ha ñamombaʼe chupekuéra

[Roagradese]

American Spirit Images/age fotostock