Emombaretékena nde jerovia reñangareko jave ne hénte hasykatúvare

PETEĨ testigo de Jehová hérava Kim oho doktórpe, ha upe doktór heʼi chupe orekoha tumór ikolúmna ypyetépe. * Upe rire katu ojeʼéma chupe orekoha kánser. Iména Steve omombeʼu: “Ñepyrũrã oipeʼa chugui hikuái pe tumór ha upe rire katu ojejapouka chupe radioterapia ha quimioterapia. Umi tratamiénto omokangyeterei chupe ha ndaikatuvéima ni opuʼã”.

Epensamíntena mbaʼeichaitépa oiméne Steve ombyasýraʼe ohechávo pe imborayhujára ohasa asy ha oñehaʼã ogueropuʼaka upe mbaʼasy. Ha nde voi ikatu ereko peteĩ ne hénte tuicha hasýva térã itujágui hasykatúmava (Ecl. 12:1-7). Oiméramo upéicha, reñangareko porã vaʼerã ndejehe ikatu hag̃uáicha reñangareko porã hesekuéra. Reñehaʼãvaʼerã akóinte remombarete nde jerovia. Upéicharõmante reñeñandu porãta ha neresãita reñangareko hag̃ua umi ne hénte oikotevẽvare. Mbaʼépa ikatu rejapo ani hag̃ua rembotapykue Ñandejárape reñangareko aja ne hénte hasývare térã ijedávare? Mbaʼéichapa umi ermáno kongregasionpegua ikatu oporopytyvõ avei upéicha jave?

Mbaʼépa tekotevẽ jajapo?

Ñañangareko jave ñane hénte hasývare, ñañatendevaʼerã ani upeichahágui ikangy ñande jerovia Jehováre ha nañañangarekoporãvéi ñandejehe. Upearã jahecha porã vaʼerã mbaʼe mbaʼépa ikatu jajapo, ha jaiporu porã avei ñanetiémpo ha ñanembaretekue. Proverbios 11:2-pe heʼi voi: ‘Oñemomirĩvape omoirũ arandu’. Upéva heʼise jahechakuaavaʼerãha moõ pevépa ikatu jajapo ha ani jahasa la rrája. Upéicharõ ani hag̃ua ñanekaneʼõ rasapa, jahechavaʼerã mbaʼe rresponsavilidápa jareko ha ñanetiémpopa japytuʼumi hag̃ua.

 Steve ojapovaʼekue upéicha ha ohechakuaa mbaʼe situasiónpepa oĩ. Haʼe ningo ombaʼapo un diaite ha oservi de coordinador del cuerpo de ancianos ha superintendente de servicio peteĩ kongregasión Irlandapeguápe. Oĩ avei pe Comité de Enlace con los Hospitales-pe. Steve heʼi: “Kim ningo arakaʼeve ndojekeháiva chehegui, ndeʼíriva nañangarekoporãiha hese che rembiapo hetágui. Upéicharõ jepe che ahechakuaa ndachepuʼakaveimaha che rembiapoitáre. Upévare heta añemboʼe rire Jehovápe adesidi ahejataha che rembiapo arekóva de coordinador, péro aservi gueteri ansiánoramo kongregasiónpe. Péicha ambovevuivévo che rembiapo, chetiempove che rembirekópe g̃uarã ha añangareko porãve hese”.

Tiémpo rire, Kim oĩ porãmie jey ha upémaramo ojepyʼamongeta hikuái isituasiónre ha Kim oipytyvõ iménape ombaʼapo jey hag̃ua de coordinador kongregasiónpe. Steve heʼi: “Kim hasykatuetérõ guare, rohechakuaákuri mbaʼe situasiónpepa roime ha heta mbaʼe ndaikatuveimaha rojapo. Péro che pyʼaite guive aagradese Jehovápe orepytyvõ haguére ha che rembirekópe avei. Haʼe ningo hasykatumíramo jepe ndojekeháiva ha akóinte chepytyvõ”.

 Jahechamína koʼág̃a mbaʼépa ohasavaʼekue peteĩ superintendente viajante hérava Jerry ha hembireko Maria. Haʼekuéra ningo ombotapykue umi mbaʼe ojaposéva oñangareko hag̃ua ituvakuéra ijedámavare. Maria heʼi: “Che ména ndive roservisevaʼekue misionéroramo, péro che ména naiñermánoi ha ituvakuéra oikotevẽma hese. Upémaramo ropytánte roiko Irlándape roñangareko hag̃ua hesekuéra. Upéicha rupi ikatuvaʼekue roiko Jerry túva reheve oĩ aja entéro ospitálpe ha upéi omano. Koʼág̃a katu káda día rohenói che suégrape ha ag̃uimínte roĩ chugui oikotevẽrõ g̃uarã. Ha umi ermáno ikongregasionpegua orepytyvõ ha oremokyreʼỹeterei. Upéicha rupi rosegi rombaʼapo kyreʼỹ Jehovápe g̃uarã.”

Mbaʼéichapa umi ermáno ikatu oporopytyvõ?

Apóstol Pablo heʼírõ guare mbaʼéichapa umi kongregasionpegua oipytyvõvaʼerã umi viúda ijedávape, ohai: ‘Pe noñangarekóiva umi hogayguakuérare, omboyke ijerovia ha ivaive umi Jesús rehe ojeroviaʼỹvagui’. Péicha Pablo ohechauka porã opavave kristiáno oñangarekovaʼerãha ituvakuéra ijedámava oikotevẽvare térã ijavuelokuérare. Upéva ningo Ñandejára oguerohory (1 Tim. 5:4, 8, JMP). Péro umi ermáno oĩva kongregasiónpe ikatu avei oipytyvõ ha ojapovaʼerã voi katu upéva.

Jahechamína mbaʼépa ohasavaʼekue avei Hakan ha hembireko Inger, haʼekuéra ijedáma ha oiko Suéciape. Hakan heʼi: “Orerejavaieterei ningo roikuaárõ guare che rembireko orekoha kánser. Haʼe akóinte hesãi ha imbaretéva. Péro hasykatu rire káda día agueraha chupe ospitálpe ojapo hag̃ua itratamiénto ha umi pohã omokangyeterei chupe. Osegi aja upe tratamiénto haʼe ndaikatúi osẽ ógagui ha che katu apyta añangareko hese”. Ha mbaʼépa ojapo umi ermáno oipytyvõ hag̃ua chupekuéra?

Umi ansiáno oñenkarga Hakan ha Inger ohendu hag̃ua umi rreunión pór teléfono. Avei heta ermáno oho ovisita chupekuéra ha oĩ oguerahakáva kárta térã tarhéta. Hakan heʼi: “Ore ningo rohechakuaa mbaʼéichapa Jehová ha umi ermanokuéra orepytyvõ. Péro haʼekuéra ndojapóirire upéicha, ikangyvaʼerãmoʼã ore jerovia. Upéi Inger oĩ porãvéma ha ikatu jeýma roho rreunionhápe”. Péicha ningo umi oservíva Jehovápe oipytyvõ umi iñermáno hasykatu ha ijedávape. Ha la Biblia heʼi voi hesekuéra ‘oporohayhuha opa árape ha ñane ermanoiteha jajejopy vai jave’ (Pro. 17:17).

Jehová omombaʼeterei jajapóva

Ñanekaneʼõramo jepe ñañangareko jave ñane pariénte hasykatúvare, heta mbaʼe porã jahupytýta. Rréi David heʼivaʼekue voi ‘ovyʼaha opa oipytyvõva’ oikotevẽvape, ha umíva apytépe oĩhína umi hasykatúva (Sal. 41:1).

Péro añetehápe piko ikatu ovyʼa umi oñangarekóva ihénte hasykatúvare? Ikatu, pórke Proverbios 19:17-pe heʼi voi: ‘Upe oipytyvõva umi oikotevẽvape omeʼẽhína Ñandejárape, ha pe mbaʼe porã ojapóva, Jehová omyengovia jey vaʼerã chupe’. Ñandejára Jehová ojepyʼapy isiervokuéra hasykatúvare ha ovendesi umi oñangarekóvape hesekuéra. Pe salmísta David opurahéi voi: ‘Ñandejára Jehová oñangarekóta hesekuéra hasyete jave, ha ombovevúita chupekuéra ijehasa asy’ (Sal. 41:3, ÑÑB). Jaikuaa avei umi oñangarekóvape hasykatúvare Jehová oipytyvõtaha ohasa jave peteĩ mbaʼe ijetuʼúva ha omombaretetaha chupekuéra.

Ñanembovyʼaite ningo jaikuaávo Jehová omombaʼe ha oguerohoryha ñañangarekóramo ñane hentekuéra hasykatúvare! Ha heta ningo ñañehaʼã upearã, la Biblia heʼi voi ñandéve ‘koʼã mbaʼe Jehová oguerohoryetereiha’ (Heb. 13:16).

[Nóta]

[Nóta oĩva taʼanga ndive páhina 18]

Aníkena rembotapykue Jehovápe ha ehejákena ambuépe tanepytyvõ