Kuñanguéra, mbaʼérepa peñemoĩvaʼerã umi penemoakãva poguýpe?

‘Pe kuimbaʼe haʼehína pe kuña akã.’ (1 COR. 11:3)

1, 2. a) Pablo heʼi haguéicha, mávapepa Jehová omoĩ oporomoakã hag̃ua? b) Mbaʼe porandúpa ñambohováita ko artíkulope?

 APÓSTOL Pablo omombeʼuvaʼekue mávapepa Jehová omoĩ oporomoakã hag̃ua: ‘Pe kuimbaʼe akã haʼehína Cristo, ha Ñandejára hína Cristo akã’ (1 Cor. 11:3). Pe artíkulo ohasavaʼekuépe jahechákuri Jesús vyʼapópe oñemoĩ hague Jehová poguýpe, ha kuimbaʼekuéra oñemoĩvaʼerãha Jesús poguýpe. Jahecha avei Jesús imbaʼeporã ha imbaʼerechakuaa hague, enterovépe otrata porãiterei vaʼekue. Upéicha avei kuimbaʼekuéra otrata porã vaʼerã hapichakuérape ha koʼýte hembirekópe.

² Péro, mávapa omoakã kuñanguérape? Pablo heʼi avei: ‘Pe kuimbaʼe haʼehína pe kuña akã’. Mbaʼéichapa kuñanguéra ohechavaʼerã ko mbaʼe? Pe ména ndahaʼéiramo testígo, tekotevẽpa hembireko oñemoĩ ipoguýpe? Pe tembireko heʼíva ha opensáva piko ndovaléi voi mbaʼeverã? Mbaʼépa ojapovaʼerã kuñanguéra ojeguerohory hag̃ua chupekuéra?

 ‘Ajapóta peteĩ oipytyvõvaʼerã chupe’

3, 4. Mbaʼéichapa oikóta umi omendáva ojapóramo Ñandejára heʼíva?

³ Ñandejára hína pe odesidíva mávapa oporomoakãta. Ojapo rire Adánpe, Jehová heʼi: ‘Naiporãi pe kuimbaʼe oiko haʼeño. Ajapóta chupe peteĩ iñirũrã oipytyvõvaʼerã chupe’. Ha upévo ojapo Évape. Adán ovyʼaiterei oreko haguére iñirũrã, upévare heʼi: “Kóva ningo ojejapo che kangue ha che roʼógui” (Gén. 2:18-24, ÑÑB). Jehová oipotavaʼekue Adán ha Eva oiko vyʼápe ifamíliandi opa ára g̃uarã peteĩ hardín neporãvape.

⁴ Péro haʼekuéra opuʼã Ñandejárare ha oñemosẽ pe hardín porãitégui. Upévare pe kuimbaʼépe ijetuʼuvéma omoakã porã hag̃ua pe kuñáme, ha pe kuñáme hasyvéma iñeʼẽrendu hag̃ua pe kuimbaʼépe (jaleemína Romanos 5:12). Upéicharamo jepe koʼag̃aite peve Jehová oipota ména omoakã hembirekópe. Ha umi omendáva oikóta pyʼaguapy ha vyʼápe ojapóramo Ñandejára heʼíva. Ikatu oñeñandu hikuái Jesús oñeñandu haguéicha oikórõ guare yvágape Jehová poguýpe. La Biblia heʼi ‘koʼẽ koʼẽre haʼe ipyʼarory hague’ Itúva renondépe (Pro. 8:30, ÑÑB). Ñanemanduʼavaʼerã enterove jajavyha, ha upévare ndaikatúi voi ñahaʼarõ ména ha tembireko ojapo opa mbaʼe Jehová heʼihaichaite. Péro mokõivéva oñehaʼãmbaitéramo ojapo Ñandejára heʼíva ikatu ovyʼaiterei ha ojogueraha porã.

5. Mbaʼérepa umi omendáva ojapovaʼerã katuete Romanos 12:10 heʼíva?

⁵ Umi omendáva oiko porã ha ovyʼa hag̃ua ojapovaʼerã katuete apóstol Pablo heʼivaʼekue: “Pejoayhúkena oñopehẽnguéicha, peñombojerovia ha peñomombaʼe” (Rom. 12:10). Avei mokõivéva tekotevẽ osegi ko konsého: ‘Penembaʼeporãvaʼerã oñondive, avei pejoporiahuvereko ha peñoperdona’ (Efe. 4:32).

Ne ména ndojeroviáiramo Jehováre

6, 7. Mbaʼépa ikatu oiko pe tembireko oñemoĩramo iména poguýpe ndahaʼéiramo jepe testígo?

⁶ Heta ogapýpe pe ména ndahaʼéi testígo. Upéicha jave, tekotevẽpa hembireko oñemoĩ ipoguýpe? La Biblia ombohovái: ‘Peẽ tembirekokuéra, peñemoĩkena pene ména poguýpe. Oimérõ pe ména ndojeroviái Ñandejára Ñeʼẽre, tohecha mbaʼéichapa hembireko hekopotĩ ha omombaʼe chupe. Ha péicha hembireko heʼiʼỹre chupe mbaʼevete, iména ikatu ojerovia Ñandejárare’ (1 Ped. 3:1, 2).

⁷ Péicha jahecha Ñandejára Ñeʼẽ omokyreʼỹha tembirekokuérape akóinte oñemoĩ hag̃ua iména poguýpe ndahaʼéiramo jepe testígo. Mbaʼépa ikatu ohupyty ojapóramo upéva? Iména ohecharamóta mbaʼéichapa hembireko hekoporã, ha ikatu upe rire oikuaaseve la Biblia heʼíva ha oiko chugui testígo.

8, 9. Mbaʼépa ojapovaʼerã pe tembireko, iména nokambiáiramo ohecha rire hekoporãha?

⁸ Péro mbaʼépa ojapovaʼerã pe tembireko,  iména nokambiáiramo? Ñandejára Ñeʼẽ heʼi pe kuña osegivaʼerãha ojapo Jehová heʼíva ha ohayhu iménape ijetuʼúramo jepe. Ñanemanduʼavaʼerã 1 Corintios 13:4 heʼívare: ‘Pe mborayhu ipasiénsia’, péva heʼise pe tembireko ogueropuʼakavaʼerãha oiméramo iména ojavy. Upévare pe ermána ‘oñemomirĩ ha ipasiensiavaʼerã’, ha avei oñehaʼãvaʼerã oiko ‘pochyʼỹre’ (Efe. 4:2). Pe espíritu sánto oipytyvõta chupe akóinte ojapo hag̃ua Ñandejára heʼíva ijetuʼúramo jepe.

⁹ Apóstol Pablo heʼivaʼekue: ‘Ñandejára chemombarete ajapo hag̃ua opa mbaʼe’ (Fili. 4:13). Upéicharõ, espíritu sánto rupive pe tembireko ikatúta ojapo upe ijehegui reínte ijetuʼútava chupe ojapo hag̃ua. Pór ehémplo, pe ména otrata vai jave hembirekópe ijetuʼúta chupe okirirĩnte hag̃ua chugui. Péro la Biblia heʼi enterovépe: ‘Ani pemyengovia ivaíva ivaívape. Ñandejára Ñeʼẽme heʼi voi péicha: “Che añevengáta ha amyengoviáta heʼi Jehová”’ (Rom. 12:17-19). Avei heʼi: ‘Aníke avave omyengovia ivaíva ivaívape; upéva rangue pejapo meme iporãva ojupekuéra ha enterovépe’ (1 Tes. 5:15, BNP). Jajerure meme vaʼerã Ñandejárape ijespíritu sánto; upéva añoite ñanepytyvõta jajapo hag̃ua umi mbaʼe ñandejehegui rei ikatuʼỹtava jajapo.

10. Mbaʼépa ojapo Jesús oĩrõ guare otrata vaíva chupe ha oñembohorýva hese?

¹⁰ Ko mbaʼépe Jesús oheja peteĩ ehémplo iporãitereíva. Jahechamína mbaʼépa ojapo oĩrõ guare otrata vaíva chupe ha oñembohorýva hese. La Biblia heʼi 1 Pedro 2:23-pe: ‘Oĩramo jepe oñeʼẽ pohýiva chupe, haʼe nombohováiri chupekuéra upéicha. Ohasa asýrõ guare haʼe noñeʼẽvaíri avavépe, oñemboʼe guei Ñandejárape oikuaágui haʼe oporohusgataha tekojojápe’. Ñandejára Ñeʼẽ ñanemokyreʼỹ ñahaʼanga hag̃ua Jesúspe ha ani ñandepochy rei. Heʼi ñandéve ‘jaiporiahuverekovaʼerãha ñande rapichápe’ ha ‘naiporãiha ñañemombaʼeguasu’. Ñanemokyreʼỹ avei ani hag̃ua ‘ñamyengovia ñeʼẽ vai ñeʼẽ vaípe’ (1 Ped. 3:8, 9).

Ndovaléipa mbaʼeverã pe kuña opensáva térã heʼíva?

11. Mbaʼe tembiapo iñimportántevapa omeʼẽ Jehová heta kuñáme?

¹¹ Ñandejára ningo heʼi pe ména omoakãvaʼerãha hembirekópe. Heʼisépa upéva pe kuña ndaikatuiha odesidi mbaʼeve térã heʼi opensáva? Ndaupeichaiete katu! Jehová omeʼẽ heta tembiapo iñimportánteva kuimbaʼe ha kuñáme. Pór ehémplo oiporavo 144.000 yvypórape oho hag̃ua yvágape oisãmbyhy Jesús ndive. Koʼãva apytépe oĩ heta kuña (Gál. 3:26-29). Péicha jahecha Jehová omombaʼetereiha kuñanguérape ha oiporuha chupekuéra ojapo hag̃ua heta mbaʼe iñorganisasiónpe.

12, 13. Mbaʼérepa jaʼekuaa yma oĩ hague kuña oñeʼẽva Ñandejára rérape?

¹² Ñanemanduʼavaʼerã avei yma oĩ hague kuña oñeʼẽva Ñandejára rérape. Jehová heʼivaʼekue Joel 2:28, 29-pe: ‘Añohẽta che espíritu sánto opaichagua yvypóra ári, ha pende raʼy ha pende rajykuéra oprofetisáta. Añohẽta che espíritu umi che rembiguái ári, kuña ha kuimbaʼéva’.

¹³ Pentecostés 33-pe Jesús remimboʼekuéra oñembyatyvaʼekue 120 rupi peteĩ ógape Jerusalénpe. Upérõ Jehová oñohẽ ijespíritu sánto opavave ári, tahaʼe kuimbaʼe térã kuña. Apóstol Pedro heʼi proféta Joel ohaivaʼekue oñekumpli hague umi 120 rehe. Haʼe heʼi: ‘Péicha ojeʼe proféta Joel rupive: “Ñandejára heʼi, pe ára pahápe añohẽta che espíritu opaichagua yvypóra rehe, ha pende raʼy ha pende rajykuéra oprofetisavaʼerã [...] ha umi che rembiguái  kuimbaʼe ha kuñáva ári añohẽta che espíritu ha oprofetisáta hikuái”’ (Hech. 2:16-18).

14. Mbaʼépa ojapovaʼekue kuñanguéra primer síglope?

¹⁴ Yma primer síglope umi kuña tuichaiterei oipytyvõ oñemoherakuã hag̃ua pe marandu porã. Haʼekuéra opredika ha oñatende hapichakuéra remikotevẽre (Luc. 8:1-3). Pór ehémplo Romanos kuatiañeʼẽme Pablo imanduʼa Febe rehe, ha heʼi ‘oservi porãha kongregasión Cencréaspe’. Ha omomaiteívo iñirũnguérape imanduʼa avei ‘Trifena ha Trifosa rehe, kuñanguéra ombaʼapo kyreʼỹva Ñandejárape g̃uarã’. Ha upéi heʼi: ‘Pemomaitei Pérsidape, ñane reindy jahayhuetéva, hetaite mbaʼe haʼe ojapovaʼekue oservívo Ñandejárape’ (Rom. 16:1, 12, ÑÑB).

15. Mbaʼéichapa ombaʼapo kyreʼỹ koʼág̃a kuñanguéra?

¹⁵ Koʼág̃a oĩ siete millón rupi opredikáva pe marandu porã, ha umíva apytépe oĩ hetaiterei kuña imitãva ha ijedáva (Mat. 24:14). Heta oĩ prekursóra, misionéra ha betelita. Añetehápe oñekumplihína rréi David heʼivaʼekue: ‘Jehová voi heʼi: heta oĩ umi kuña omoherakuãva pe marandu porã’ (Sal. 68:11). Jahecha Ñandejára omombaʼetereiha kuñanguéra ojapóva oñemoherakuã hag̃ua pe marandu porã ha oiko hag̃ua hembipota. Tekotevẽramo jepe umi kuña oñemoĩ kuimbaʼekuéra poguýpe, upéva ndeʼiséi ndovaleiha mbaʼeverã opensáva térã heʼíva.

Mokõi kuña ndokyhyjéiva heʼi hag̃ua opensáva

16, 17. Mbaʼéichapa Sara ehémplo ohechauka tembirekokuéra ikatuha heʼi opensáva?

¹⁶ Jahecha Jehová omeʼẽha heta tembiapo tuicháva kuñanguérape. Upéicharõ, pe ména odesidíta jave peteĩ mbaʼe iñimportánteva, naiporãmoʼãipa oporandu hembirekópe mbaʼépa opensa? Katuete iporãta. La Biblia omombeʼu yma oĩ hague kuña ndokyhyjéiva heʼi hag̃ua opensáva, ha imbaʼerechakuaáva ojapo hag̃ua ijeheguieténte upe oñekotevẽva. Jahechami mokõi ehémplo.

¹⁷ Sara ohechávo Agar ha imemby ndopororrespetaiha, joʼa joʼa ojerure iména Abrahánpe omosẽ hag̃ua chupekuéra hógagui. ‘Abrahánpe ndogustaiete upéva’, Jehová katu heʼi chupe: ‘Ani rejepyʼapy pe mitãʼíre térã ne rembiguái rehe. Ejapo katu heʼiháicha Sara’ (Gén. 21:8-12). Upémarõ Abrahán iñeʼẽrendu Jehovápe ha ojapo Sara oipotáva.

18. Mbaʼépa ojaporakaʼe Abigail oporanduʼỹre iménape?

¹⁸ Koʼág̃a jahechami mbaʼépa ojapovaʼekue Abigail. Iména Nabal ipláta ha hymba heta. Peteĩ jey David ha iñirũnguéra okañýrõ guare pe rréi Saúl iñañaitévagui, oho opyta ñúre, Nabal rymbakuéra oĩha ypýpe. Haʼekuéra nomondái ni peteĩ  mymba, oñangareko guei hesekuéra. Upéi David ojerureka hoʼuvaʼerã Nabálpe, péro haʼe ‘ipyʼahatã ha ijarhél’, upévare ‘osapukái ha ojaʼo chupekuéra’. Añetehápe Nabal haʼevaʼekue ‘peteĩ kuimbaʼe ndovaléiva mbaʼeverã’ ha ‘pe tavy ningo ojejapete voi hese’. Mbaʼépa ojapo Abigail oikuaávo upe oikovaʼekue? Heʼiʼỹre mbaʼeve iménape ‘pyaʼe porã ojagarra 200 pán, mokõi víno ryru, 5 ovecha kaʼẽ, 50 kílo trígo oñemaimbe pyréva, 100 tórta ojejapóva parrál ajúgui, 200 tórta ojejapóva ígogui’, ha ogueraha omeʼẽ David ha iñirũnguérape. Oĩ porãpa raʼe Abigail ojapóva? Oĩ porã, upévare la Biblia heʼi upe rire ‘Jehová ombohasyete hague Nabálpe ha omano’. Upéi Abigail omenda David rehe (1 Sam. 25:3, 14-19, 23-25, 38-42).

‘Pe kuña ojeguerohorývaʼ

19, 20. Mbaʼépa ojapovaʼerã peteĩ kuña ojeguerohory hag̃ua chupe?

¹⁹ La Bíbliape ojeguerohory umi tembireko ojapóva Jehová heʼíva. Proverbios kuatiañeʼẽme oñeñeʼẽ porã pe ‘tembireko iguápavare’. Upépe heʼi: ‘Ovaleve óro kuʼígui. Iména ojerovia hese ipyʼaite guive, ha noikotevẽi mbaʼeve. Haʼe ojapo chupe g̃uarã iporãva memete ha oikove aja pukukue ndojapói ivaíva. Ijurúgui hendypu arandu, torýpe oñeʼẽ ha imbaʼeporã. Oñangareko porã hogapýre, ha ndoʼúi pe iñateʼỹva rembiʼu. Imembykuéra ovyʼa hendive, iména oguerohory chupe’ (Pro. 31:10-12, 26-28).

²⁰ Mbaʼépa ojapovaʼerã peteĩ kuña ojeguerohory hag̃ua chupe? Proverbios 31:30 ombohovái: ‘Pe kuña ijukyetéva ikatu ñanembotavy, pe iporãngue ikatu opa rei, péro pe kuña okyhyjéva Jehovágui, péva ojeguerohoryvaʼẽra’. Pe kuña okyhyjéva Ñandejáragui torypápe oñemoĩ umi omoakãva poguýpe. Haʼe oikuaa ‘Cristo haʼeha pe kuimbaʼe akã, pe kuimbaʼe katu pe kuña akã ha Ñandejára hína Cristo akã’ (1 Cor. 11:3).

Ñamombaʼékena pe jopói omeʼẽva Ñandejára

21, 22. a) Mbaʼérepa umi omendáva oagradesevaʼerã Ñandejárape? b) Mbaʼérepa ñañemoĩvaʼerã umi ñanemoakãva poguýpe? (Ehecha rrekuádro páhina 17-pe.)

²¹ Ména ha tembireko oservíva Jehovápe, oagradesevaʼerã omeʼẽ haguére chupe iñirũrã, oĩtava hendive oikove aja pukukue. Ha iporãveha katu, oñondive ikatu omombaʼeguasu hikuái Jehovápe (Rut 1:9; Miq. 6:8). Ñandejára omoñepyrũvaʼekue ñemenda, ha oikuaa mbaʼépa ojapovaʼerã ména ha tembireko osẽ porã hag̃ua. Upévare iporã ojapo hikuái opa mbaʼe Jehová oipotaháicha. Ha oikóramo jepe ko múndope henyhẽva provlémagui, ‘pe vyʼa Jehová omeʼẽva omombaretéta chupekuéra’ (Neh. 8:10).

²² Pe ména imbaʼeporãva ohayhu hembirekópe haʼe ojehayhuháicha, upévare omoakã chupe pyʼaporãme ha imbaʼerechakuaa hendive. Pe tembireko oservíva Jehovápe katu oipytyvõ ha omombaʼe iménape, upévare haʼe ohayhuve chupe. Ha iporãveha katu, mokõivéva ojogueraha porãramo omombaʼeguasúta Jehovápe.

Nemanduʼápa?

• Mávapepa Jehová omoĩ oporomoakã hag̃ua?

• Mbaʼérepa ména ha tembireko ojapovaʼerã Ñandejára heʼíva?

• Pe ména ndahaʼéiramo testígo, tekotevẽpa hembireko oñemoĩ ipoguýpe?

• Pe ména odesidítarõ peteĩ mbaʼe iñimportánteva, mbaʼérepa iporãta oporandu hembirekópe?

[Porandu ñahesaʼỹijóva]

 [Rrekuádro oĩva páhina 17-pe]

Mbaʼérepa ñañemoĩvaʼerã umi ñanemoakãva poguýpe?

Jehová ningo odesidíma mávapa omoakãta ánhel ha yvyporakuérape. Ha oheja káda uno jadesidi ñañemoĩtapa ipoguýpe. Jajapóramo upéva ikatúta jaservi ha ñamombaʼeguasu Jehovápe oñondivepa iñorganisasión ndive (Sal. 133:1).

Umi kristiáno ohótava yvágape vyʼápe oñemoĩ Jesucristo poguýpe (Efe. 1:22, 23). Ha Jesús jepe ovyʼavaʼekue Itúva omoakã haguére chupe, upévare haʼe ‘oñemoĩ jeýta Itúva poguýpe, haʼégui upe omoĩmbavaʼekue opa mbaʼe ipoguýpe. Péicha Ñandejára omoakã jeýta opa mbaʼe’ (1 Cor. 15:27, 28). Upéicha rupi Ñandejára siervokuéra oñehaʼãvaʼerã iñeʼẽrendu umi omoakãvape tahaʼe kongregasiónpe térã hogapýpe (1 Cor. 11:3; Heb. 13:17). Ojapóramo hikuái upéva, Jehová oguerohory ha ohovasáta chupekuéra (Isa. 48:17).

[Nóta oĩva taʼanga ndive páhina 13]

Pe ñemboʼe oipytyvõ tembirekópe imbaʼeporãve hag̃ua

[Nóta oĩva taʼanga ndive páhina 15]

Jehová omombaʼeterei kuñanguéra ojapóva