Ñañomokyreʼỹ memékena

‘Pesegíkena peñomokyreʼỹ ha peñomombarete.’ (1 TES. 5:11)

1. Mbaʼe iporãvapa jahupyty ñaime haguére Jehová puévlope? Péro mbaʼeichagua provlémapa ikatu ñambohovái?

 AJÉPA hetaite mbaʼe porã jahupyty ñaime haguére Jehová puévlope. Koʼág̃a rupi heta hénte ohasa asy ndojapóigui Ñandejára Ñeʼẽ heʼíva. Ñande katu jaheja Jehová ñanesãmbyhy, upéicha rupi jajehekýi heta akãrasýgui, ha ikatu ñaime porã ñande Apoharéndi. Jareko avei heta ñane amígo ñanderayhúva ha oipotáva javyʼa. Upéicharamo jepe enterovéva ñambohovái opaichagua provléma. Pór ehémplo, oĩ ñane ermáno nontendeporãiva umi párte hypyʼũva oĩva la Bíbliape. Oĩ katu hasýva, oñedeprimíva térã odesidi vai rupi heta ohasa asy. Hiʼarive enterovépe ñandejopy ko múndo aña.

2. Mbaʼépa jajapovaʼerã hoʼa vaipárõ ñane ermánope, ha mbaʼérepa?

² Apóstol Pablo ombojojavaʼekue pe kongregasión ñande rete rehe. Upévare ‘peteĩva ohasa asýramo enterove ohasa asy hendive’ (1 Cor. 12:12, 26). Ajépa ñambyasyete jahechávo peteĩ ermáno ohasa asyha. Upéicha rupi hoʼa vaipa jave ñande rapichápe ñañehaʼãmbaitevaʼerã ñaipytyvõ chupe. Upearã iporãta jahecháramo umi ehémplo oĩva Ñandejára Ñeʼẽme, ohechaukáva mbaʼéichapa umi kristiáno ymaguare oñopytyvõ ombohovái hag̃ua iprovlemakuéra. Ñahesaʼỹijóvo umíva ñañeporandumi: “Mbaʼéichapa ikatu ajapo avei haʼekuéra ojapo haguéicha? Mbaʼéichapa aipytyvõta umi ermánope omombarete  hag̃ua ijerovia ikatu hag̃uáicha pe kongregasión oñakãrapuʼã?”.

‘Ogueraha chupe hendivekuéra’

3, 4. Mbaʼéichapa Áquila ha Priscila oipytyvõ Apólospe ontende porãve hag̃ua Ñandejára Ñeʼẽ?

³ Jahechami mbaʼépa oiko Apolos rehe. Hechos kuatiañeʼẽ omombeʼu haʼe ovárõ guare Éfesope, opredika kyreʼỹma hague pe marandu porã. Upépe heʼi: ‘Haʼe ikyreʼỹeterei ha omboʼe hekoitépe Jesús rembiasakue’. Péro Apolos ‘oikuaa pe vautísmo Juan ojapovaʼekuénte’, ha ndoikuaái vautísmo ojejapóva ‘Túva, Taʼýra ha espíritu sánto rérape’. Mbaʼérepa? Oiméne Juan Bautista remimboʼekuéra térã Jesús remimboʼekuéra opredikáraʼe chupe áño 33 mboyve. Upévare Apolos opredikáramo jepe kyreʼỹme, nontendeporãi gueteri heta mbaʼe. Péro umi ermáno ohechávo upéva oipytyvõ chupe. Jahechamína mbaʼéichapa (Hech. 1:4, 5; 18:25; Mat. 28:19).

⁴ Áquila ha Priscila ohendúvo mbaʼéichapa Apolos pyʼaguasúpe oñeʼẽ, ogueraha hendivekuéra omyesakã porãve hag̃ua chupe Ñandejára Ñeʼẽ (jaleemína Hechos 18:24-26). Ajépa imbaʼeporãite rakaʼe hikuái! Katuete Áquila ha Priscila oipytyvõse Apólospe ha ndoipotái oñeñandu vai. Upévare oñehaʼã oikekuaa chupe. Amo ipahápe ningo ndahetái umi mbaʼe Apolos nontendeporãiva. Haʼe ovyʼáneraʼe oñemyesakã haguére chupe umi mbaʼe iñimportánteva. Apolos oikuaa porã rire koʼã mbaʼe, ‘tuicha oipytyvõ’ umi ermáno oĩva Acáyape ha heta opredika pe marandu porã (Hech. 18:27, 28).

5. Mbaʼéichapa heta ermáno oipytyvõ iñestudiántepe, ha mbaʼéichapa oñeñandu upe haguére?

⁵ Koʼág̃a avei kongregasiónpe oĩ heta ermáno oñehaʼãmbaitéva oipytyvõ iñestudiántepe oservi porã hag̃ua Jehovápe. Upearã pe ermáno káda semána oho hógape ha heta ojesakrifika. Haʼe vyʼapópe ojapo koʼã mbaʼe oikuaágui péicha iñestudiánte ikatutaha ojesalva. Ha heta vése pe ermáno ha iñestudiánte ojepokuaaiterei ojuehe ha opyta oñoamigoite hikuái (Juan 17:3). Mbaʼeichaitépa ovyʼa umi ermáno ohechávo iñestudiánte ontendeha la Biblia heʼíva, oñehaʼã ojapo ha upéi oñemeʼẽ Jehovápe ojapo hag̃ua hembipota.

“Imanduʼa porã hese hikuái”

6, 7. a) Mbaʼérepa Pablo ogueraha hendive Timotéope? b) Mbaʼéichapa oñakãrapuʼã Timoteo omoirũ rire Páblope?

⁶ Pablo ha Silas ojapórõ guare pe segundo viáhe opredika hag̃ua, og̃uahẽ táva Lístrape. Upépe koʼã mokõi apóstol ohecha mbaʼéichapa Timoteo oñakãrapuʼã kongregasiónpe. ‘Umi ermáno oĩva Listra ha Icóniope imanduʼa porã hese’. Upérõ Timoteo orekómane 20 áño rupi. Isy Eunice ha  ijavuéla Loida oservi Jehovápe, itúva katu nahániri (2 Tim. 1:5). Oiméne Pablo oikuaáma chupekuéra oho ypýrõ guare upé pe. Péro koʼág̃a ohechakuaa Timoteo ombaʼapo kyreʼỹha kongregasiónpe. Upévare umi ansiáno ikongregasionpegua heʼi oĩ porãha Timoteo omoirũ Páblope iviáhepe (jaleemína Hechos 16:1-3).

⁷ Umi viáhe rupi katuete Timoteo ohecháneraʼe mbaʼéichapa Pablo iñakãguapy ha ikatupyry. Péva oipytyvõ chupe osegi hag̃ua iñehémplo, upévare Pablo ojerovia hese ha upe rire omondóntema chupe haʼeño ovisita hag̃ua kongregasionkuéra. Timoteo omoirũ Páblope ha ombaʼapo hendive 15 áño pukukue. Upéva oipytyvõ chupe oñakãrapuʼã hag̃ua, ha oimérire hiʼotĩrakaʼe, koʼág̃a ndaupeichavéima. Oikóma chugui peteĩ ansiáno katupyry (Fili. 2:19-22; 1 Tim. 1:3).

8, 9. Mbaʼéichapa ikatu ñaipytyvõ mitãrusukuérape?

⁸ Koʼág̃a jahecha avei kongregasiónpe oĩha heta mitãrusu ha mitãkuña ikatúva ombaʼapove Jehovápe g̃uarã. Ñaipytyvõ ha ñamokyreʼỹramo umi imitãvape, ikatúta ojapo hikuái hetave mbaʼe kongregasiónpe. Ha péicha oñemeʼẽvéta chupekuéra rresponsavilida Jehová puévlope. Ñamañamíntena ñane kongregasiónpe ha katuete jahecháta oĩha mitãrusu ikyreʼỹva Timotéoicha. Umi kakuaa oipytyvõramo chupekuéra ikatúta oservi prekursór, betelita, misionéro téra superintendénteramo. Mbaʼéichapa ikatu ñaipytyvõ chupekuéra ohupyty hag̃ua koʼã mbaʼe porã?

⁹ Jahechami Martin ehémplo. Haʼe oservíma 20 áño Betélpe ha imanduʼa yma imitãme mbaʼeichaitépa oipytyvõ chupe peteĩ superintendénte. Osẽrõ guare opredika oñondive, pe ermáno vyʼápe imanduʼa chupe haʼe ombaʼapo hague Betélpe. Omokyreʼỹ chupe ombaʼapo hag̃ua avei upépe. Martin heʼi: ‘Upéva opokoiterei cherehe ha chepytyvõ adesidi porã hag̃ua’. Epensamína, nde ikatu avei reipytyvõ umi mitãrusúpe reñemongetárõ hendivekuéra umi mbaʼe porãre!

‘Peñeʼẽkena mborayhúpe umi oñembyasývape’

10. Mbaʼéichapa oñeñandurakaʼe Epafrodito, ha mbaʼérepa?

¹⁰ Pablo oĩ aja préso Rómape, ou ovisita chupe Epafrodito. Haʼe ojapo peteĩ viáhe puku táva Filíposgui og̃uahẽ hag̃ua hendápe. Pe kongregasión upepegua ojevale hese ogueraha hag̃ua platami Páblope, ha opyta hag̃ua hendive peteĩ tiémpore, ikatu  hag̃uáicha oipytyvõ chupe oikotevẽvape. Péro Epafrodito og̃uahẽvo Rómape hasyete ha ‘haimete omano’. Haʼe oñeñandu vaieterei oimoʼãgui ndojapoporãi hague hembiapo, ha upévare oñedeprimiete voi (Fili. 2:25-27).

11. a) Mbaʼérepa ndajahecharamoivaʼerã oĩramo ermáno oñedeprimíva? b) Mbaʼéichapa heʼi Pablo ojetratavaʼerãha Epafrodítope?

¹¹ Koʼág̃a rupi avei oĩ heta oñedeprimíva. Pe Organización Mundial de la Salud heʼi káda 5 tapichágui peteĩva oñedeprimi. Ha Ñandejára siervokuéra ikatu avei oñedeprimi. Oĩ vése ijetuʼu ñamantene hag̃ua ñane família, ñanderasy térã jajapo mbaʼe vai, ha upévare jaju ndajavyʼavéi. Péro ñañeporandumi, mbaʼéichapa umi Filiposgua omokyreʼỹneraʼe Epafrodítope? Apóstol Pablo ohai chupekuéra: ‘Pemog̃uahẽke chupe vyʼapópe Ñandejára rérape ha pemombaʼe opaite ermáno oikóva guive haʼe oikoháicha. Jesucristo rembiapo rehehápe ningo haʼe haimete omano, nahakateʼỹi hekove rehe chepytyvõ porã hag̃ua pene rendaguépe’ (Fili. 2:29, 30).

12. Mbaʼéichapa ikatu ñamokyreʼỹ umi oñedeprimívape?

¹² Ñande avei ñamokyreʼỹvaʼerã umi ermáno ndovyʼái ha oñedeprimívape. Pór ehémplo, ikatu ñapensa umi mbaʼe porã pe ermáno ojapóvare ha jaguerohory chupe. Oiméne heta oñehaʼãrakaʼe ikatu hag̃uáicha ojevautisa térã ojapo iprekursorádo. Ikatu jaʼe chupe ñande jaguerohoryha haʼe ojapóva ha katuete Jehová omombaʼeha avei. Oĩ ñane ermáno ndaikatuvéimava ojapo ymaguaréicha ijeda térã hasýgui. Upéicharamo jepe jaguerohory chupekuéra hetaite áñore ombaʼapo kyreʼỹ haguére Jehovápe g̃uarã. Tahaʼe haʼéva upe ohasáva ñane ermanokuéra, jasegivaʼerã ko konsého Jehová omeʼẽva: ‘Peñeʼẽkena mborayhúpe umi pende rapicha oñembyasývape, peipytyvõ umi ikangývape, ha penepasiénsia enterovére’ (1 Tes. 5:14).

‘Tekotevẽ mborayhúpe peperdona ha pekonsolami chupe’

13, 14. a) Mbaʼépa ojejapo pe kuimbaʼe hekovai vaʼekuére ha mbaʼérepa? b) Mbaʼérepa iporã pe ojejapovaʼekue?

¹³ Yma kongregasión Coríntope oĩvaʼekue peteĩ kuimbaʼe hekovaíva ha ndohejaséiva hembiapo vai. Umi ojeroviaʼỹva Jehováre jepe ohechakuaa ivaiha upe ojapóva. Upévare ani hag̃ua oñemongyʼa pe kongregasión, Pablo heʼi oñemosẽ hag̃ua pe hembiapo vaívape (1 Cor. 5:1, 7, 11-13).

¹⁴ Péicha ojejapo rupi, pe kongregasión noñemongyʼái ha pe hembiapo vai vaʼekue ohechakuaa ivaieterei hague upe ojapóva, ha upe rire ojevy hape vaígui. Upévare Pablo ohai jeývo umi Corintoyguápe heʼi chupekuéra oheja jey hag̃ua pe kuimbaʼe oike kongregasiónpe. Péro ndahaʼéi upéva añónte, heʼi avei: ‘Tekotevẽ mborayhúpe peperdona ha pekonsolami chupe, anítei oñehundi ojahoʼígui chupe mbaʼembyasy’ (jaleemína 2 Corintios 2:5-8).

15. Mbaʼépa jajapovaʼerã peteĩ oñemosẽvaʼekue ou jeýramo kongregasiónpe?

¹⁵ Mbaʼépa ñanemboʼe ko káso? Añetehápe enterove ñambyasy oĩramo oñemosẽva. Ikatu ikáusare oñeñeʼẽ vai kongregasiónre ha oñemongyʼa Ñandejára réra. Ha ikatu voi oime ojapóraʼe ivaíva ñanderehe. Péro mbaʼépa oikóta ouse jeýramo kongregasiónpe? Umi ansiáno ohecháta mbaʼépa heʼi la Biblia odesidi hag̃ua. Ha ohecháramo oñembyasy añeteha hembiapo vaikuégui ha ikatu jeymaha oiko chugui ñane ermáno, upéva ohechauka Jehová operdonamaha chupe (Mat. 18:17-20). Péicha Ñandejára oiporiahuverekóramo chupe,  mbaʼérepa ñande nañaperdonasemoʼãi ñane ermánope? Ñandepyʼahatãramo ha nañaperdonaséi, ñañemoĩñaína Jehováre. Ñande ñaipytyvõse oĩ hag̃ua pyʼaguapy kongregasiónpe ha ñaime porãse Ñandejárandi. Upévare tekotevẽ ‘jahechauka ñane mborayhu’ umi ohejávape hembiapo vaikue ha ou jeýva kongregasiónpe (Mat. 6:14, 15; Luc. 15:7).

‘Haʼe ikatúta chepytyvõ’

16. Mbaʼérepa Pablo ipochy Marcos rehe?

¹⁶ Heta vése ikatu ñande rapicha ofalla ñanendive ha japyta ñandepyʼaro. Péro Ñandejára Ñeʼẽ omombeʼu peteĩ ehémplo ohechaukáva naiporãiha upéva. Apóstol Pablo ha Bernabé ojapórõ guare iprimér viáhe opredika hag̃ua, oraha hendivekuéra Juan Márcospe. Upéi haʼe osẽ oho hógape ha oheja rei chupekuéra. Pablo ipochy opytávo, ha ojapótarõ guare isegúndo viáhe ndorahasevéima Márcospe, ha upévare oiko vai Bernabéndi. Pablo ndahesaráiri haʼe oheja rei hague chupekuéra (jaleemína Hechos 13:1-5, 13 ha 15:37, 38).

17, 18. Mbaʼéichapa jaikuaa Pablo ha Marcos oiko porã jey hague oñondive? Ha mbaʼépa ñanemboʼe upéva?

¹⁷ Upéicharamo jepe Marcos nomboguapýi ijehe upe oikóva, haʼe osegi opredika Bernabéndi ótro hendápe (Hech. 15:39). Heta áño rire Pablo oguerohory chupe, ha upéva ohechauka Marcos opredika kyreʼỹ hague. Oĩrõ guare préso Rómape Pablo ohai peteĩ kárta Timotéope, ojerure chupe oho hag̃ua hendápe ha heʼi avei: “Eru nendive Marcos, haʼe ningo ikatúta chepytyvõ che rembiapópe” (2 Tim. 4:11). Péicha jahecha upe rire Pablo omombaʼeterei hague Márcospe ha ojeroviaha hese.

¹⁸ Ko káso ñanemboʼe peteĩ mbaʼe iñimportánteva. Marcos oheja rangue oguapy hese pe ojapovaʼekue Pablo, oñehaʼã oñembokatupyry oiko hag̃ua chugui peteĩ misionéro vale. Jahecha mokõivéva ojerovia mbarete hague Jehováre, upévare ndopytái ipyʼaro hikuái. Upéi Pablo ohechakuaa Marcos iguápo hague. Koʼág̃a ñapensami jajoavyha peteĩ ermánondi ha upéi jaiko porã jey hendive, mbaʼépa jajapovaʼerã avei? Ñanderesaraimavaʼerã upe oikovaʼekuégui ha ñaipytyvõ meme ñande rapichápe oñemoag̃ui hag̃ua Jehováre. Péicha jajesarekóramo umi mbaʼe porã ojapóvare ñane ermáno, katuete ñamombaretéta pe kongregasión.

Emombaʼékena pe kongregasión

19. Mbaʼéichapa ñañopytyvõ kongregasiónpe?

¹⁹ Ko ára pahápe ‘hetaiterei mbaʼe vai oiko’ ha ‘ijetuʼu jagueropuʼaka hag̃ua’, upévare ñaikotevẽterei ñane ermanokuérare (2 Tim. 3:1). Sapyʼánte ndajaikuaái ni mbaʼéichapa ñasolusionáta ñane provléma, péro Jehová katuete oikuaa. Haʼe ojevalekuaa ermanokuérare ñanepytyvõ hag̃ua, ha ikatu avei ojevale ñanderehe ñamokyreʼỹ hag̃ua ótrope (Isa. 30:20, 21; 32:1, 2). Upévare enterovéva ñañehaʼãmbaitevaʼerã jajapo Pablo heʼivaʼekue: ‘Pesegíkena peñomokyreʼỹ ha peñomombarete, pejapohaichapeína’ (1 Tes. 5:11).

Mbaʼépa ikatu rembohovái?

• Mbaʼérepa enterove ñañomokyreʼỹvaʼerã kongregasiónpe?

• Mbaʼe provlémapa ohasa jepi ñane ermanokuéra? Ha mbaʼéichapa ikatu ñaipytyvõ chupekuéra?

• Mbaʼérepa ñaikotevẽ ñane ermanokuéra ñanepytyvõ?

[Porandu ñahesaʼỹijóva]

[Nóta oĩva taʼanga ndive páhina 11]

Ñaipytyvõkena ñane ermanokuéra ohasa asývape

[Nóta oĩva taʼanga ndive páhina 12]

Oĩ heta imitãva ikatúva ombaʼapove Jehovápe g̃uarã