Ñanekyreʼỹ ha ñanderetiaʼevéta jajapóramo Jehová rembipota

‘Peñemoĩ chendive che júgo guýpe. Upéicharõ pendepiroʼýta.’ (MAT. 11:29)

1. Mbaʼe léipa omeʼẽ Jehová umi Israelguápe, ha maʼerãpa?

 PE SÉRRO Sinaípe Jehová omeʼẽvaʼekue iléi umi Israelguápe. Upe léipe heʼi haʼekuéra omboaretevaʼerãha pe sábado. Moisés rupive Jehová heʼi umi Israelguápe: ‘Rejapovaʼerã ne rembiapo 6 árape, ha pe 7-hápe katu repytuʼuvaʼerã, nde, ne rymba tóro, ha ne rymba vúrro. Ha péicha ipiroʼymi hag̃ua ne rembiguái ha umi arrivéño oikóva penendive’ (Éxo. 23:12). Ñandejára ohayhu ha oiporiahuvereko umi Israelguápe, upévare omoĩ chupekuéra peteĩ ára opytuʼu ha ‘ipiroʼymi’ hag̃ua. Péicha ikatúta imbarete jey hikuái.

2. Mbaʼépa ojapovaʼekue umi Israelgua sabadokue, ha mbaʼéichapa oipytyvõ chupekuéra upéva?

² Heʼisépa upéva haʼekuéra opytuʼutanteha pe sábado? Nahániri. Upe árape umi Israelgua omombaʼeguasuvaʼerã Jehovápe. Pór ehémplo, pe túva ohekomboʼevaʼerã hogayguakuérape ikatu hag̃uáicha ‘oguata hikuái Jehová rapére’, ha oiko tekojojápe (Gén. 18:19). Upe árape oñembyaty hikuái ifamília ha iñamigokuérandi, ha vyʼápe imanduʼa Jehová rembiapokuére (Isa. 58:13, 14). Ha iporãveha katu pe sábado orrepresenta Jesús goviérno. Haʼe oisãmbyhýta mil áñore, ha upe tiémpope ojapóta heta mbaʼe porã ombopiroʼýtava yvyporakuérape (Rom. 8:21). Ha koʼág̃a, mbaʼéichapa ikatu ñanekyreʼỹ ha ñanderetiaʼeve, jasegi hag̃ua jaguata ‘Jehová rapére’?

Ñane ermanokuéra ñanemokyreʼỹ

3. Mbaʼépa ojaporakaʼe ermanokuéra yma primer síglope oñomokyreʼỹ hag̃ua?

³ Apóstol Pablo heʼi pe kongregasión ‘ojoko ha omopyendaha pe añetegua’ (1 Tim. 3:15). Upéicha rupi umi kristiáno ypykue ndojechaivaʼekue haʼeño. Haʼekuéra oñopytyvõ ha oñomokyreʼỹ mborayhúpe (Efe. 4:11, 12, 16). Pór ehémplo apóstol Pablo oĩ aja Éfesope, umi ermáno Corintoygua oho ovisita chupe. Mbaʼéichapa oñeñandu Pablo upe rire? Haʼe heʼi: ‘Avyʼaiterei ou haguére che rendápe Estéfanas, Fortunato ha Acaico, haʼekuéra ningo chembopiroʼy’ (1 Cor. 16:17, 18). Upéicha avei oñeñanduvaʼekue Tito oho rire Coríntope oipytyvõ ermanokuérape. Pablo omombeʼu upéva peteĩ kártape: ‘Tito ovyʼaiterei pemog̃uahẽ ha peñatende porã haguére hese’ (2 Cor. 7:13 ). Koʼág̃a avei ñandepiroʼy ha ñanekyreʼỹ ñaimévo ñane ermanokuérandi.

4. Mbaʼérepa ñanekyreʼỹ jahárõ rreunionhápe?

⁴ Enterove jaikuaa mbaʼeichaitépa javyʼa jahárõ rreunionhápe. Upépe ‘ñañomokyreʼỹ’, ha ‘ñañopytyvõ imbarete hag̃ua ñande jerovia’ (Rom. 1:12). Ñane ermáno kongregasionpegua ndahaʼéi ñane konosído reínte. Haʼekuéra ñane amígo teete, jahayhu ha ñamombaʼéva. Upévare jajuechávo hendivekuéra rreunionhápe ñanekyreʼỹ ha ñañeñandu porã (File. 7).

5. Mbaʼéichapa ikatu ñañomokyreʼỹ asambléa jave?

⁵ Ñañembyatývo ñane ermanokuérandi  asambléa jave ñanekyreʼỹeterei avei. Upépe ñandepyʼarory ñahendúvo Ñandejára Ñeʼẽ, péro ndahaʼéi upévante. Jaikuaave heta ermánope ha péicha ikatu jareko hetave amígo (2 Cor. 6:12, 13). Mbaʼépa jajapovaʼerã ñaneotĩetereíramo? Ikatu ñambaʼapo de voluntário asambléa jave, upéva tuicha ñanepytyvõta jajeheʼave hag̃ua ñande rapichakuérare. Peteĩ ermána ombaʼapovaʼekue de voluntária asambléa internasionál jave heʼi: “Yma ndaikuaaguasuivaʼekue avavépe, upévare ajeheʼa che hénte ha mbovymi che amigokuérarente. Péro aipytyvõvo oñemopotĩ hag̃ua pe lokál, aikuaa hetave ermáno ha ermánape, ha péicha avyʼaiterei hendivekuéra”.

6. Mbaʼépa ikatu rejapo ne vakasiónpe, nekyreʼỹve hag̃ua Jehová servísiope?

⁶ Israélpe yma oĩvaʼekue mbohapy arete ojejapóva oñemombaʼeguasu hag̃ua Jehovápe. Ha upearã umi Israelgua oviaha 3 vése ál áño Jerusalénpe (Éxo. 34:23). Péicha jave haʼekuéra ohejapa hembiapo kokuepegua térã inegósio. Ha oviaha yvýrupi umi tape vai rehe, og̃uahẽ meve Jerusalénpe. Péro ndojaporeíri ko sakrifísio, pe témplope ‘ovyʼaiterei’ hikuái ‘omombaʼeguasúvo Jehovápe’ (2 Cró. 30:21). Upéicha avei koʼág̃a heta Jehová siervokuéra ovyʼaiterei ovisitávo Betel ifamiliakuérandi, ha upéi ikyreʼỹve Jehová servísiope. Ikatúnepa nde avei revisitami Betel ág̃a ne vakasiónpe?

7. a) Mbaʼéichapa ñanepytyvõ umi vyʼarã jajapóva ñane ermanokuérandi? b) Mbaʼe mbaʼépa jajapovaʼerã osẽ porã hag̃ua?

⁷ Sapyʼánte ikatu ñañembyaty javyʼa hag̃ua ñane família ha ñane amigokuérandi. Salomón heʼivaʼekue voi: ‘Ndaipóri iporãvéva yvypórape g̃uarã, okaru, omboyʼu, ha ovyʼa hembiapokuére’ (Ecl. 2:24). Ñañembyatýramo péicha ñane ermanokuérandi ñanderetiaʼe ha ñandepiroʼy. Avei jaikuaa porãve enterovépe ha péicha ñañemoag̃uive  hesekuéra. Osẽ porã hag̃ua koʼã vyʼarã natekotevẽi ñanderetaiterei, ha oĩvaʼerã katuete peteĩ okontroláva, koʼýte oñemoĩtarõ vevída.

Japredika memérõ ñanderetiaʼevéta

8, 9. a) Mbaʼérepa ndojoguaieterakaʼe Jesús umi fariséope? b) Mbaʼéichapa ñanepytyvõ japredikárõ pe marandu porã?

⁸ Jesús opredikavaʼekue kyreʼỹme pe marandu porã, ha oipytyvõ hemimboʼekuérape ojapo hag̃ua avei upéicha. Haʼe heʼi: ‘Pe kóga oñemonoʼõvaʼerã ningo hetaiterei, omonoʼõva katu saʼi. Upévare pejerurékena pe kóga Járape tombou hetave omonoʼõvaʼerã’ (Mat. 9:37, 38). Pe ‘marandu porã’ Jesús opredikáva ombopiroʼyvaʼekue umi héntepe (Mat. 4:23; 24:14). Ajépa ndojoguaiete umi fariséope! Haʼekuéra ojopyvaʼekue hapichakuérandi omoĩvo hiʼarikuéra umi léi ijetuʼuvéva (jaleemína Mateo 23:4, 23, 24).

⁹ Japredika jave pe marandu porã ñaipytyvõ ñande rapichápe oikuaa hag̃ua Ñandejárape, péro ñandéve avei tuicha ñanepytyvõ. Mbaʼérepa? Japredikávo opytave ñane akã ha ñane korasõme umi mbaʼe porãita oĩva la Bíbliape. Upévare ikatu jaʼe añeteha pe salmísta heʼivaʼekue: ‘Pemombaʼeguasu Jehovápe, iporãiterei japurahéi Ñandejárape, péva ñanembovyʼa’ (Sal. 147:1). Ikatúnepa nde avei resẽve repredika? Péicha rejapóramo katuete revyʼavéta.

10. Mbaʼérepa javyʼakuaa oĩramo jepe nañanerenduséiva predikasiónpe?

¹⁰ Jaikuaa oĩha território igustohápe japredika, umi hénte oguerohoryve rupi pe marandu porã (jaleemína Hechos 18:1, 5-8). Péro nde territóriope oĩramo nohenduséiva, nemanduʼavaʼerã Jehová ohechaha pe rejapóva ha ovyʼaha remoherakuã haguére héra (1 Cor. 15:58). Umi hénte nopenáirõ nderehe repredika jave, ani reimoʼã rejapo vaiha reína ne rembiapo. Nemanduʼákena Jehová ohechaha mávapa umi ipyʼaporãva ha katuete omog̃uahẽtaha chupekuéra pe marandu porã (Juan 6:44).

Pe Aty Jastudia Hag̃ua Ñande Rogayguándi tuicha ñanembyetiaʼe

11. Mbaʼépa Jehová heʼi tuvakuérape ojapo hag̃ua, ha mbaʼéichapa ikatúta ojapo hikuái upéva?

¹¹ Jehová heʼi tuvakuérape omboʼevaʼerãha ifamíliape la Biblia heʼíva, péicha ojapo hag̃ua hikuái hembipota (Deu. 11:18, 19). Ha nde, remoĩmapa peteĩ óra restudia hag̃ua la Biblia umi nde rogayguándi? Jehová omoĩmbaite ndéve opa mbaʼe reikotevẽva remboʼe hag̃ua ne famíliape, ha péicha imbareteve hag̃ua pende jerovia. Omeʼẽ ndéve hetaiterei lívro, rrevísta, vidéo, ha gravasión. Koʼãva katuete penepytyvõta peñemoag̃uive hag̃ua Ñandejárare.

12, 13. a) Mbaʼéichapa ñanepytyvõ pe Aty Jastudia Hag̃ua Ñande Rogayguándi? b) Mbaʼépa ikatu ojapo tuvakuéra ko aty omokyreʼỹ hag̃ua enterovépe?

¹² Tembiguái jeroviaha ha iñarandúva omoĩ pe Aty Jastudia Hag̃ua Ñande Rogayguándi. Upévare ñamboykevaʼerã peteĩ ára káda semána jastudia hag̃ua la Biblia ñane famíliandi. Heta túva heʼi ko aty oipytyvõ hague ifamíliape ojoayhu ha oiko porãve hag̃ua oñondive, ha iporãveha katu, oñemoag̃uive hikuái Jehováre. Mbaʼéichapa jajapovaʼerã ko aty, ikatu hag̃ua ñanemokyreʼỹ?

¹³ La Biblia heʼi Jehová, haʼeha ‘Ñandejára ovyʼáva’, ha oipotaha enterove jaservi chupe vyʼapópe. Upévare pe Aty Jastudia Hag̃ua Ñande Rogayguándi jajapovaʼerã kyreʼỹme, ha igústo hag̃uáicha (1 Tim. 1:11; Fili. 4:4). Ajépa javyʼaite jaguerekove haguére peteĩ pyhare ñahesaʼỹijo hag̃ua la Biblia. Tuvakuéra okalkulavaʼerã mbaʼe mbaʼépa ikatu ojapo oipytyvõ porãve hag̃ua ifamíliape. Iporãta avei ohejáramo taʼyrakuérape tomombeʼu mbaʼépa haʼekuéra opensa. Pór ehémplo Brandon, peteĩ mitãʼi orekóva 10  áño, oheka informasión oñeʼẽva ko témare: “Mbaʼérepa la Bíbliape oñembojoja Satanáspe peteĩ mbói rehe?”. Upéva are guivéma oipyʼapy chupe, haʼe ningo ohecharamoiterei umi mbói, ha upévare ndogustapái chupe Satanáspe oñembojojaha peteĩ mbói rehe. Oĩ avei família ojopyrúva olee hag̃ua umi téysto térã ohaʼanga hag̃ua umi káso oñemombeʼúva la Bíbliape. Péicha jajapóramo ñande estúdio igustoitereíta, ha oipytyvõta mitãnguérape imanduʼa ha opyta hag̃ua ikorasõme umi konsého oĩva la Bíbliape. *

Ani jajepyʼapyeterei

14, 15. a) Mbaʼérepa hetaite oĩ ojepyʼapýva ko ára pahápe? b) Mbaʼe provlémapa jahasa avei jajapo haguére Jehová rembipota?

¹⁴ Ko ára pahápe heta mbaʼe ojopy ñande rapichakuérape, ha upévare oiko ojepyʼapy opa mbaʼére. Hetaiterei hénte imboriahu ha ndaitraváhoi, ha oĩramo jepe umi ombaʼapóva, ohechakuaa pe pláta ndovaleveieteha. Pe oganamíva haʼete voi ohóva chugui yvytúre, ha apenaite ohupyty omantene hag̃ua ifamíliape (embojoja Ageo 1:4-6 rehe). Umi polítiko ha mburuvichakuéra ndoikuaái mbaʼépa ojapóta ombohovái hag̃ua umi terrorísta, térã osolusiona hag̃ua ambue provlemakuéra. Heta avei oĩ ohasa asýva ndojapói haguére Ñandejára heʼíva (Sal. 38:4).

¹⁵ Jaservíramo jepe Jehovápe jahasa avei heta mbaʼe vaíre, ha hiʼarive ko múndo oĩva Satanás poguýpe ñandejopy (1 Juan 5:19). Oĩ vése katu ijetuʼuveha ñanendive oĩgui opuʼãva ñanderehe jajapo haguére Jehová rembipota. Péicha oñekumpli Jesús heʼivaʼekue: “Haʼekuéra chepersegíramo, katuete pendepersegivaʼerã avei” (Juan 15:20, ÑÑB). Péro ‘oñemoĩramo jepe hikuái ñanderehe, ndajapytái ñaneaño’ (2 Cor. 4:9). Mbaʼérepa jaʼe péicha?

16. Mbaʼépa ñanepytyvõ jaiko hag̃ua vyʼápe?

¹⁶ Jesús heʼi ñandéve: ‘Peju che rendápe peẽ penekaneʼõ ha pehasa asýva, ha che pombopiroʼýta’ (Mat. 11:28, NM). Jajeroviáramo Jesús sakrifísiore, ñañemoĩñaína Jehová pópe, ha haʼe ñanemombaretéta jagueropuʼaka hag̃ua opa mbaʼe (2 Cor. 4:7). Ha ijespíritu sánto omombarete ñande jerovia, upévare vyʼapópe ikatu jagueropuʼaka umi jehasa asy (Juan 14:26; Sant. 1:2-4).

17, 18. a) Mbaʼépa ndovaléi jajapo? b) Mbaʼépa oikóta jaikóramo vyʼarã rapykuérinte?

¹⁷ Ko múndope umi hénte oiko vyʼarã rapykuérinte, péro ñande ndajaikoivaʼerã péicha (jaleemína Efesios 2:2-5). Nañañatendéiramo ikatu jajapo ‘ñande rete ha ñande resa oipotávante’ ha ‘jajechaukase umi mbaʼe jarekóvare’ (1 Juan 2:16). Ha amo ipahápe ikatu voi ñapensa javyʼavetaha jajapóramo umi mbaʼe Ñandejárape ndogustáiva (Rom. 8:6). Koʼág̃a rupi heta oĩ oiporúva dróga, hoʼu rasáva vevída, ohecháva taʼanga tieʼỹ, ohugáva umi depórte ipeligrósova ha ojapo hetave mbaʼe ojediverti hag̃ua. Koʼã mbaʼe Satanás oiporu ‘ñanemoñuhãségui’. Haʼe oipota jaguerovia umi mbaʼe vai ñanembovyʼavetaha (Efe. 6:11).

 ¹⁸ Ndaivaíri añetehápe jakaru, jaʼu vevída, térã jajediverti jajapóma guive hendápe porã. Péro ndovaléi jaiko vyʼarã rapykuérinte, tekotevẽ jajejokokuaa ha ñamoĩ hendaitépe koʼã mbaʼe, koʼýte jaikuaágui ko múndo aña oñehundipotaitemaha. Jaikóramo jaheka ñande jaipotávante, ñanekaneʼõta ha amo ipahápe ‘ndajajapomoʼãi mbaʼeve Ñandejárape g̃uarã, ha ndajaikuaaporãmoʼãi Jesucrístope’ (2 Ped. 1:8).

19, 20. Mbaʼépa jajapovaʼerã ñanekyreʼỹ hag̃ua?

¹⁹ Ñapensáramo Jehová opensaháicha jahechakuaáta ndovaleiha mbaʼeverã umi vyʼarã ko múndo oikuaveʼẽva. Moisés ohechakuaavaʼekue upéva ha ñande avei ikatu jajapo upéicha (Heb. 11:25). Añetehápe ñanekyreʼỹ ha javyʼa hag̃ua: Jajapovaʼerã ñande Ru yvagapegua oipotáva (Mat. 5:6).

²⁰ Jajapóramo Jehová rembipota ñanekyreʼỹ ha ñanderetiaʼevéta. Upéva ñanepytyvõta ‘ñamboyke hag̃ua umi mbaʼe vai oĩva ko múndope, torypápe ñahaʼarõ aja oñekumpli umi mbaʼe tuichaitéva ojapótava Ñandejára ha itaʼýra Jesucristo’ (Tito 2:12, 13). Ñañemoĩkena Jesúsndi ijúgo guýpe. Péva heʼise ñaneñeʼẽrenduvaʼerãha chupe ha jasegi iñehémplo. Upéva añoite ñanemokyreʼỹ ha ñanembovyʼáta.

[Nóta]

Ikatúpa rembohovái?

• Mbaʼépa omombarete ha omokyreʼỹ Jehová siervokuérape koʼág̃a?

• Mbaʼérepa japredikáramo ñañeñandu porã ñande ha umi ñanerendúva avei?

• Mbaʼéichapa ojapovaʼerã tuvakuéra pe Aty Jastudia Hag̃ua Ñande Rogayguándi?

• Mbaʼe mbaʼépa Satanás oiporu ñanemoñuhã hag̃ua?

[Porandu ñahesaʼỹijóva]

[Nóta oĩva taʼanga ndive páhina 26]

Ñañemoĩkena Jesúsndi ijúgo guýpe ñandepiroʼy hag̃ua