Jehová ojevale ipuévlore oñangareko hag̃ua ñanderehe

‘Romombaʼeguasúta hekopotĩva aty guasúpe.’ (SAL. 35:18)

1-3. a) Mbaʼe jajapóramopa jaikéta pe y ipeligrosohápe? b) Mbaʼéichapa Jehová oñangareko ñanderehe?

 PETEĨ árape hakueterei ha mokõi mitãrusu oho ojahu rríope. Upe lugár iporãiterei, pe yvykuʼi morotĩ ha pe y katu hesakã asy. Kuarahy ohesapévo pe y rehe, umi piraveraʼi haʼete voi ku omimbipáva. Haʼekuéra vyʼapópe ojepoi ojahu hag̃ua upépe, ha mbeguekatúpe oike ohóvo hypyvehápe. Upéi pe mitãrusu imitãvéva heʼi iñirũme osẽnte hag̃ua hikuái upégui. Pe ótro katu heʼi chupe: “Ani rejepyʼapy chamígo, ñaime porã ñaína”. Upeichahágui ohecha peteĩ javevýi tuichaitereíva ouha chupekuéra. Tuicha oñemondýi ha pyaʼeterei osẽ jey hikuái pe y ipererĩhápe.

² Ko múndo oĩva Satanás poguýpe haʼete avei omimbipáva. Oikuaveʼẽ ñandéve opaichagua vyʼarã, traváho ñagana porã hag̃ua, ha heta mbaʼerepy. Nañañatendéirõ ha jaha koʼã mbaʼe rapykuéri, ñañanduʼỹre jaikéta pe y ipeligrosohápe. Kongregasiónpe katu Jehová oñangareko ñanderehe. Haʼete ñaiméva y hesakã ha ipererĩvehápe. Péro peichahágui ñañemomombyrýramo Jehová puévlogui ha ñanejúnta vai, japytáta ñaneaño ha ikangýta ñande jerovia. Péicha oikóramo ñanderehe, pyaʼe jajevyvaʼerã upégui, cháke ndajajapóiramo upéva, Satanás ku javevýicha ikatu ñandekutu rasy ha ñandejuka voi.

³ Ko múndo ipeligrosoiterei kristianokuérape g̃uarã (2 Tim. 3:1-5). Satanás oikuaa porã saʼipaitemaha itiémpo, upévare opeska umi oñemomombyrývare ohundi hag̃ua chupekuéra (1 Ped. 5:8; Rev. 12:12, 17). Haʼetépe Jehová oñangareko ñanderehe ikongregasión rupive, ani hag̃ua jaha tape vaíre ha ikangy ñande jerovia.

4, 5. Mbaʼérepa oĩ heta oikóva ojepyʼapyháre?

⁴ Koʼág̃a rupi oimehápe rei ikatu oiko ivaíva ñanderehe. Oĩ atyraite mondaha, oiko ñorairõ ápe ha pépe, ndovalevéi pe pláta ha pyʼỹive oiko sarambi, torménta térã yvyryrýi káusare. Hiʼarive ñanderasypa ha upéi ñandetuja. Ha oĩramo jepe itraváho porãva, oganáva pláta, hógava ha hesãiva, oikónte avei ojepyʼapyháre ndoikuaáigui arakaʼe pevépa orekóta umi mbaʼe.

⁵ Avei oĩ hetave ndovyʼái ha oñedeprimíva. Pór ehémplo, heta ñande rapicha omenda oimoʼãgui péicha oiko porã ha ovyʼataha. Péro upéi ndahaʼeiete haʼekuéra ohaʼãrõ haguéicha. Heta hénte oñemoag̃uise Ñandejárare péro ndoikuaái ni moõ gotyopa ojapíta. Ohecha hikuái mbaʼéichapa umi rrelihión omoakãva hekovai ha nomboʼéi la Biblia heʼíva. Upévare umi hénte nopenavéi hesekuéra, ojeroviántema umi sientífikore, ha oimoʼã yvyporakuéra ijehegui reínte omyatyrõtaha umi provléma oĩva ko múndope. Ndareíri ñande rapichakuéra oiko ojepyʼapyháre ha ndoikuaái  anga mbaʼépa oikóta chuguikuéra amo gotyove.

6, 7. a) Mbaʼérepa Ñandejára siervokuéra ndojepyʼapýi umi ótro hénteicha? b) Mbaʼépa ñahesaʼỹijóta koʼág̃a?

⁶ Ñande jaservíva Jehovápe katu nañapensaiete upéicha (jaleemína Isaías 65:13, 14 ha Malaquías 3:18). Ñambohováiramo jepe heta provléma, ndajaikói jajepyʼapy umi ótro hénteicha. Mbaʼérepa? Ñandejára Ñeʼẽ omombeʼúgui ñandéve mbaʼérepa yvyporakuéra ohasa asy ha mbaʼépa jajapokuaa ñambohovái hag̃ua ñane provlemakuéra. Upévare ndajajepyʼapýi ñane renonderãre. Ñaime rupi Jehová puévlope, nañanembotavýi umi rrelihión japu, nañanderekovaíri, ha jajehekýi heta akãrasýgui. Upévare jaiko pyʼaguapýpe, ndahaʼeiete ko múndope ojeikoháicha (Isa. 48:17, 18; Fili. 4:6, 7).

⁷ La Bíbliape oĩ heta ehémplo ohechaukáva Jehová oñangarekoha isiervokuérare. Koʼã ehémplo katuete ñanepytyvõta ñamombaʼeve hag̃ua umi mbaʼe Haʼe ojapóva ñanderehehápe. Avei ohechaukáta ñandéve oimérõ tekotevẽ ñakambia. Upévare ñahesaʼỹijomína umi ehémplo oĩva Ñandejára Ñeʼẽme. Umíva ñanepytyvõta ñaneñeʼẽrendu hag̃ua Jehovápe, ha péicha jajehekýita heta mbaʼe vaígui (Isa. 30:21).

“Haimete añepysãnga”

8. Mbaʼépa ojapo ymaite guive Ñandejára siervokuéra?

⁸ Ymaite guive Ñandejára siervokuéra ndojeheʼái umi hénte añáre. Iñepyrũmbýpe Jehová heʼimavaʼekue umi oĩva Satanás poguýpe ndaijaʼemoʼãiha ipuévlore (Gén. 3:15). Mbaʼérepa? Oñehaʼã rupi hikuái oiko Ñandejára oipotaháicha ha ndojeheʼái haguére ko múndore (Juan 17:15, 16; 1 Juan 2:15-17). Péro heta vése ijetuʼu chupekuéra ojapo hag̃ua iporãva. Upévare Ñandejára  siervokuéra apytépe oĩvaʼekue oñeporandúva: ‘Añetehápe piko aiko porãve ajapo haguére Jehová rembipota?’.

9. Mbaʼéichapa oñeñandurakaʼe pe kuimbaʼe ohaivaʼekue Salmo 73?

⁹ Pór ehémplo, pe kuimbaʼe ohaíva Salmo 73, oñeporanduvaʼekue odesidi porãpa raʼe oservívo Jehovápe. Haʼe ojepicha ohechávo mbaʼéichapa umi iñañáva oiko porã ha ovyʼa, ha heta Ñandejára siérvo katu ohasa asyeterei (jaleemína Salmo 73:1-13).

10. Mbaʼérepa iporã jajepyʼamongeta pe salmísta ohasavaʼekuére?

¹⁰ Ndépa reñeñandúmava ko salmísta oñeñandu haguéicha? Oimérõ upéicha, ani repensa nde jerovia ikangyha. Hetaiterei Jehová siérvo oñeñanduvaʼekue avei upéicha, umíva apytépe oĩ heta ohaivaʼekue la Biblia (Job 21:7-13; Sal. 37:1; Jer. 12:1; Hab. 1:1-4, 13). Ikatu voi jaʼe enterove jaservíva Jehovápe ñañeporanduvaʼerãha: Añetehápe piko iporãve ñaneñeʼẽrendu Jehovápe? Ko porandu ñanemomanduʼa Satanás heʼivaʼekuére hardín de Edénpe. Haʼe heʼi yvyporakuéra oiko porãvetaha Jehová nogovernáiramo chupekuéra (Gén. 3:4, 5). Upévare iporã enterovéva jajepyʼamongeta pe salmísta ohasavaʼekuére. Iporãnepa jaikose umi iñañáva oikoháicha, ñaimoʼãgui naiprovlemaiha voi hikuái? Iporãvétapa jahejárõ Jehová rape ha jaiko ko múndope ojeikoháicha? Satanás oipotaiterei jajapo upéva.

11, 12. a) Mbaʼépa oipytyvõ pe salmístape anive hag̃ua ipyʼamokõi? Mbaʼépa ñanemboʼe iñehémplo? b) Mbaʼérepa nde reguerovia iporãveha jaservi Jehovápe?

¹¹ Mbaʼépa oipytyvõ pe salmístape anive hag̃ua ipyʼamokõi? Haʼe ohechakuaa haimete hague osẽ Jehová rapégui, péro okambia oho rupi Ñandejára témplo marangatúpe. Upépe ojeheʼa meme umi ijerovia mbaretévare ha ojepyʼamongeta Ñandejára rembipotáre. Péicha ohechakuaa umi iñañáva oñehundipataha ha ivaitaha avei hendive oikóramo haʼekuéraicha. Umi hénte aña odesidi vai ha oĩ hikuái ‘peteĩ yvy isỹietereihápe’. Entéro hekovaíva oiko ‘kyhyjepópe’, péro Jehová oñangareko umi iñeʼẽrendúvare (jaleemína Salmo 73:16-19, 27, 28). Oiméne ñande jahecháma upéva añeteha. Upéicharõ jepe sapyʼánte oĩ opensáva ovyʼavetaha oikóramo iñakãre, ojapo rangue Ñandejára heʼíva. Péro amo ipahápe umi ojapóva upéicha osẽ vai katuete (Gál. 6:7-9).

¹² Mbaʼépa ñanemboʼeve pe salmísta ehémplo? Haʼe oho rire Ñandejára témplope okambia opensa lája ha ohechakuaa umi iñañáva nosẽporãmoʼãiha. Péicha jahecha Jehová ojevaleha ipuévlore ñanerekomboʼe ha oñangareko hag̃ua ñanderehe. Umi rreunión rupive omeʼẽ konsého iporãva ha omyesakã ñandéve iñeʼẽ ñamombarete hag̃ua ñande jerovia. Upévare Jehová ndoipotái jafalta rreunionhápe. Upépe haʼe ñanemokyreʼỹ ha ñanemombarete jaha hag̃ua tape porãre (Isa. 32:1, 2; Heb. 10:24, 25).

Jaiporavo porãke ñane amigorã

13-15. a) Mbaʼépa oiko Dina rehe, ha mbaʼépa ñanemboʼe upéva? b) Mbaʼérepa iporã jajeheʼa ñane ermanokuérare?

¹³ Jacob rajy rehe oikovaʼekue ohechauka ipeligrosoha ñanejúnta vai. Génesispe heʼi Dina ohómi hague umi mitãkuña Canaangua rendápe. Péro umi hénte Canaangua nomombaʼéi tekopotĩ ojapoháicha Jehová siervokuéra. Haʼekuéra omombaʼeguasu ñandejára guaʼúpe, hekovai, oñorairõ, ojojuka ha ojapo umi mbaʼe tieʼỹ ndevaipa jepéva (Éxo. 23:23; Lev. 18:2-25; Deu. 18:9-12). Mbaʼépa ojehu Dínape ojeheʼa haguére umi mitãkuñáre?

 ¹⁴ Ñandejára Ñeʼẽ omombeʼu upépe oĩ hague peteĩ kariaʼy hérava Siquem, ‘haʼe hína pe oñemombaʼevéva itúva rógape’. Upéicharamo jepe Siquem oviola Dínape (Gén. 34:1, 2, 19). Ajépa ivaiete pe oikóva! Dina noimoʼãichéne upéva oikotaha hese. Haʼe ningo oiméne ojeheʼasénte umi mitãrusu ha mitãkuñanguéra Canaanguáre oimoʼãgui ikalidaha hikuái. Péro tuichaiterei ojavy!

¹⁵ Ko ehémplo ohechauka ñandevyroha jaikóramo jaheka ñane amigorã umi ndahaʼéiva testígo, ha ñaimoʼãramo nañasẽvaimoʼãiha. Ñandejára Ñeʼẽ heʼiháicha ‘umi júnta vai ñandegueraha tape vaíre’ (1 Cor. 15:33). Upévare, ñasẽ porã hag̃ua jajeheʼavaʼerã ermanokuérare. Haʼekuéra ojerovia Jehováre, oñehaʼã oiko haʼe oipotaháicha, ha katuete ñanemokyreʼỹta jadesidi porã hag̃ua (Pro. 13:20).

‘Peẽ ningo ijoheipyréma’

16. Mbaʼépa heʼirakaʼe apóstol Pablo umi ermáno Corintoyguáre?

¹⁶ Kongregasiónpe oñepytyvõ heta ñande rapichápe oheja hag̃ua hembiapo vaikue ha oservi Jehovápe. Pablo ohaírõ guare pe primera kárta umi Corintoyguápe omombeʼu mbaʼe mbaʼépa okambiáraʼe hikuái oservi hag̃ua Jehovápe. Ijapytepekuéra oĩvaʼekue hekovaíva, taʼanga omombaʼeguasúva, oporomoakãratĩva, kuimbaʼe oikóva kuimbaʼéndi térã kuña kuñándi, imondáva ha ikaʼúva. Péro apóstol Pablo heʼi chupekuéra: ‘Peẽ ningo ijoheipyréma’ (jaleemína 1 Corintios 6:9-11).

17. Mbaʼéichapa Ñandejára Ñeʼẽ ipuʼaka ñanderehe?

¹⁷ Umi tapicha ojeroviaʼỹva Ñandejárare ndorekói mávapa oipytyvõta chupekuéra odesidi porã hag̃ua. Oiko hikuái umi Corintoygua oiko haguéicha oservi mboyve Jehovápe. Odesidi ijeheguínte mbaʼépa iporã ha mbaʼépa ivai, térã ojapo ojeʼéva chupekuérante (Efe. 4:14). Péro Ñandejára Ñeʼẽ omboʼéva tuicha ipuʼaka ñanderehe. Ñanepytyvõ jahejaite hag̃ua umi mbaʼe vai (Col. 3:5-10; Heb. 4:12). Heta ñane ermáno yma oikuaa mboyve Jehovápe oikovaʼekue iñakãre, ha ojapo ojaposévante. Upéicharõ jepe haʼekuéra oñeñandu vai ha ndovyʼái. Upéi oñemoag̃ui hikuái Jehová puévlore ha ojapo la Biblia heʼíva, ha upépe ae ohupyty pyʼaguapy ha vyʼa añetetéva.

18. Mbaʼépa oiko peteĩ mitãkuñáre, ha mbaʼépa ñanemboʼe upéva?

¹⁸ Heta katu oĩ oñemomombyrýva Jehová puévlogui, oike pe “y ipeligrosohápe”, ha koʼág̃a ombyasy ipyʼaite guive. Peteĩ ermánare oiko upéicha. Haʼe oikuaa Jehovápe imitã guive, péro orekórõ guare 16 áño ou ogustaiterei chupe “umi mbaʼe oikuaveʼẽva ko múndo”, ha upéva omoñuhã chupe. Haʼe heta ohasa asy odesidi vai haguére, ou hyeguasu ha upéi katu oityka imemby. Koʼág̃a heʼi: “Añemomombyry kongregasióngui 3 áño, ha umi mbaʼe vaieta ahasáva upe aja ndaikatúi aipeʼa che akãgui. Chejopy pe che korasõ apensávo ajuka hague che memby. [...] Aikuaa oĩha heta mitãrusu otanteaséva michĩmi jepe ko múndo oikuaveʼẽva. Péro che haʼekuaa chupekuéra: ‘Ani, ni mbaʼevéicharõ pejapo upéva’. Ñepyrũrã haʼete igústova, péro upéi japyta jakái rasy,  ndaipóri mbaʼeve ikatúva omeʼẽ ñandéve ko múndo, akãrasýmante. Aikuaa porãgui haʼe peẽme pepytánte hag̃ua Jehová puévlope. Péicharõ añoite pevyʼa añetéta”.

19, 20. Mbaʼéichapa Jehová oñangareko ñanderehe ipuévlo rupive?

¹⁹ Heta ñane ermáno heʼi voi: “Ndaikuaái mbaʼépa oikovaʼerãmoʼã chehegui ndaikuaáirire Jehovápe”. Péicha opensa imanduʼávo hikuái mbaʼeichaitépa ndovyʼaivaʼekue oikuaa mboyve Jehová rape (Juan 6:68, 69). Ñanemanduʼákena ñaimevaʼerãha Jehová puévlope haʼe oñangareko hag̃ua ñanderehe, ha ani hag̃ua jahasa asy ko múndope ojeikoháicha. Jajeheʼa meme vaʼerã ñane ermanokuérare ha jaha rreunionhápe. Péicha jaikóta Jehová rapére ha jadesidi porãta. Pe salmístaicha, javyʼaiterei ikatu haguére ñamombaʼeguasu Jehovápe ñane ermanokuérandi! (Sal. 35:18.)

²⁰ Péro sapyʼánte enterove jahasa jejopy vaíre ha ijetuʼu jepi ñaneñeʼẽrendu hag̃ua Jehovápe. Péicha jave ñaikotevẽ oñemoñeʼẽva ñandéve. Oimérõ oikohína upéva ñane kongregasiónpe, ñañeporandumi: Mbaʼéichapa ñaipytyvõkuaa umichagua ermánope? Pe artíkulo oúvape jahecháta mbaʼéichapa ikatu ñaipytyvõ ha ñamombarete ñane ermanokuérape (1 Tes. 5:11).

Mbaʼéichapa ikatu rembohovái?

• Mbaʼépa ñanemboʼe pe salmísta ohasavaʼekue?

• Mbaʼépa ñanemboʼe Dina rehe oikovaʼekue?

• Mbaʼéichapa Jehová oñangareko ñanderehe ipuévlo rupive?

[Porandu ñahesaʼỹijóva]

[Nóta oĩva taʼanga ndive páhina 7]

Ani reike y ipeligrosohápe: aníke reheja kongregasión!