Nde ikatu regueropuʼaka ne ména térã ne rembireko netraisionáramo

MARGARITA ha iména Raúl heta áñorema oiporupaite itiémpo Jehová servísiope, péro upéi ou ifamília hikuái. * Upe riremínte Raúl oñemomombyry Jehovágui ha oñepyrũ hekovai ha oñemosẽ kongregasióngui. Margarita heʼi: “Upérõ haimete amano, añeñandu vaieterei ha ndaikuaái voi mbaʼépa ajapóta”.

Peteĩ ermána hérava Jane ohasa avei ko mbaʼe ijetuʼuetéva. Mbaʼépa ojapo hese iména? Omenda riremi oñepyrũ ombyepoti chupe. Haʼe omombeʼu: “Chenupã ypýrõ guare tuichaiterei añemondýi, añeñandu vai ha atĩeterei apytávo. Haʼe ojerure chéve perdón ha aperdona chupe. Péicha ajapo heta vése apenságui kristiána haguére aperdona ha añembyesaraivaʼerãha upe oikovaʼekuégui. Namombeʼúi ningo ni umi ansiánope aimoʼãgui atraisionataha che ménape. Ha áñore roiko upéicha, haʼe ojahéi cherehe ha che aperdona chupe. Apensa voi mbaʼépa ikatu ajapove cherayhu hag̃ua.  Ha amo ipahápe orerejárõ guare chemembykuñaʼíndi, koʼýte añeñandu ndavaleiha mbaʼeverã ha apensa che añehaʼãvérire che ména ndacherejaivaʼerãmoʼã”.

Margarita ha Jane rehe oiko haguéicha, ikatu oime netraisiona avei raʼe ne ména. Ha upévare reñeñandu vaieterei, ikangy nde jerovia ha ojere vaipa ndéve. Térã ikatu oime nde peteĩ karai reñembasy ha rehasa asýva reína ne rembireko nemoakãratĩ haguére. La Bíbliape heʼi voi ‘ko ára pahápe jahasavaʼerãha heta mbaʼe ijetuʼúva’. Upe profesía heʼi avei ‘ko ára pahápe’ ijetuʼutaha jaiko porã hag̃ua ñande rogapýpe, oĩtaha heta ndojoayhúiva ha oĩtaha avei umi oservi guaʼúnteva Ñandejárape (2 Tim. 3:1-5). Koʼã mbaʼe ningo ikatu avei oiko kristianokuérare. Upévare, mbaʼépa ikatu jajapo jagueropuʼaka hag̃ua oiméramo ñane ména térã ñane rembireko ñanetraisionáraʼe?

Jehová ohecha upe nde rehasáva

Ikatúkuri ni nderegueroviaséi penerembiayhu peichaite peve nembohasa asyha. Ikatu voi reimoʼã ndekáusare netraisionaha ne ména térã ne rembireko.

Ñanemanduʼavaʼerã avei Jesúspe jepe otraisiona hague peteĩ iñamígo. Haʼe ningo heta oñemboʼe oiporavo hag̃ua umi doce apóstol omoirũtava chupe, umíva ningo ojeroviáma voi Jehováre. Upévare oiméne oñeñandu vaiete rakaʼe Judas ‘otraisionárõ guare chupe’ (Luc. 6:12-16). Péro Jehová ndokulpaivaʼekue Itaʼýrape Judas rembiapo vaikuére.

Jaikuaa ndaiporiha ména ha tembireko ndojavýiva. Upévare pe salmísta hesakuaitépe heʼirakaʼe: ‘Ore rembiapo vaikuérente remañáramo, máva piko upéicharõ Jehová opytáta ne renondépe?’ (Sal. 130:3). Upéicharõ pe ména ha tembireko osegivaʼerã Jehová ehémplo ha oheja rei ojupe hembiapo vaikue (1 Ped. 4:8).

Jaikuaa avei ‘enterove jajechataha Jehovándi ñane rembiapokuére’ (Rom. 14:12). Peteĩ ména térã tembireko ojepokuaáramo omaltrata iñirũme, katuete ojecháta Jehovándi upévare. Chupe ndogustái ñambyepoti térã ñaneñeʼẽ arhél ñande rapichápe. Upévare ivaieterei ñamaltratáramo ñane ména térã ñane rembirekópe (Sal. 11:5; Efe. 5:33; Col. 3:6-8). Ha oĩramo pyʼỹinte ojaʼo vaipáva iména térã hembirekópe ha nokambiaséiva, oñemosẽta kongregasióngui (Gál. 5:19-21; 2 Juan 9, 10). Pe ména térã tembireko ndokyhyjeivaʼerã omombeʼu hag̃ua ansianokuérape oikóva hese. Jehová ningo oiporiahuvereko umi péicha oñemaltratávape.

Pe oporomoakãratĩva ningo ofalla iména térã hembireko ndive ha ivaiveha ofalla Jehovándi (Mat. 19:4-9; Heb. 13:4). Pe otraisionavaʼekue chupe iména térã hembireko oñehaʼãma rire ojapo la Biblia heʼíva, ndovaléi ojekulpa pe oikovaʼekuére.

Aníkena nderesarái, Jehová oikuaaha mbaʼéichapa nde reñeñandu. La Bíbliape Jehová heʼi voi ijehe haʼeha pe tetã Israel ména ha heta téystope ohechauka mbaʼeichaitépa oñeñandu vai umi isrraelíta oheja haguére chupe ha omombaʼeguasu umi ñandejára guaʼúpe (Isa. 54:5, 6; Jer. 3:1, 6-10). Jehová oikuaa porãiterei mbaʼéichapa nde reñeñandu ha ohecha hetamaha reñohẽ nderesay ne ména térã ne rembireko káusare (Mal. 2:13, 14). Jehová oikuaa avei reikotevẽha reñepytyvõ ha reñekonsola.

Mbaʼéichapa Jehová oporokonsola

Jehová ningo oporokonsola kongregasión rupive. Jane omombeʼu mbaʼéichapa oñepytyvõkuri chupe: “Pe superintendénte de sirkuíto ou cherendápe añeñandu vaive jave. Haʼe oikuaavaʼekue chejagarra hague vyʼaʼỹ che ména opoi haguére chehegui.  Upévare oñemotiémpo ha ohesaʼỹijo chendive 1 Corintios 7:15 heʼíva. Umi téysto oleéva ha umi mbaʼe heʼivaʼekue chéve tuicha chembopyʼaguapy ha añeñandu porãve upe rire”. *

Margarita ningo imanduʼa mbaʼéichapa Jehová oipytyvõ chupe kongregasión rupive. Haʼe heʼi: “Ahechakuaávo che ména nombyasyiha ojapovaʼekue, aguerahapa che membykuéra ha rova ambue siudápe. Upépe aalkila mokõi koty ha upe koʼẽme cheresay cherováre añepyrũ amohenda orekosakuéra. Upeichahágui ahendu oĩha oúva, che aimoʼã pe ogajára péro ndahaʼéi. Oumi ningo pe ermána ostudiavaʼekue la Biblia che sy ndive ha oipytyvõvaʼekue che hentekuérape oservi hag̃ua Jehovápe. Ha noimoʼãi otopaha cherehe upépe, haʼe oúnte pe ogajára ostudiáta rupi la Biblia hendive. Tuichaiterei chepyʼaguapy ahechávo chupe! Ndaikatúi ajejoko, amombeʼu chupe mbaʼépa oikókuri orerehe ha orerasẽ oñondive. Pyaʼe porã ohecha mbaʼéichapa ikatu roho rreunionhápe upe díape voi. Umi ermanokuéra oreguerohoryjoa ha umi ansiáno ohecha mbaʼéichapa orepytyvõta orejerovia imbarete hag̃ua”.

Mbaʼéichapa ikatu oipytyvõ ambue ermanokuéra

Ermanokuéra ningo ikatu ojapo heta mbaʼe oipytyvõ hag̃ua umi oĩvape peichagua situasiónpe. Pór ehémplo Margarita ohótarõ guare ombaʼapo, peteĩ família heʼi chupe oikotevẽramo oñangarekotaha imembykuérare eskuélagui osẽ rire.

Margarita heʼi voi: “Aagradeseterei ningo umi ermáno ha ermánape oregueraha haguére hendivekuéra predikasiónpe”. Katuete umi ojapóva koʼã mbaʼe ‘oipytyvõhína hapichápe ogueropuʼaka hag̃ua opaichagua mbaʼe pohýi, ha péicha ojapo Cristo heʼivaʼekue’ (Gál. 6:2).

Umi ohasa asýva hína ótro káusare, omombaʼeterei ñaipytyvõramo chupekuéra mborayhúpe. Pór ehémplo Monique peteĩ ermána ohejavaʼekue chupe iména cuatro mitã reheve ha hiʼarive peteĩ kuénta de 15.000 dólar. Haʼe heʼi: “Umi ermáno ha ermanakuéra ningo ñanderayhukuaaiterei. Ndaikuaái voi mbaʼépa ajapóne hesekueraʼỹ. Jehová omeʼẽ chéve umi che amigorã imbaʼeporãitereíva, haʼekuéra oñemotiémpo oipytyvõ hag̃ua che membykuérape. Upéicha rupi che membykuéra oservi porã Jehovápe. Ha ajeruréramo konsého umi  ansiánope, katuete chepytyvõva ha aikotevẽramo cherendumivaʼerã, cherendu avei hikuái” (Mar. 10:29, 30).

Ermanokuéra ningo oikuaa sapyʼánte iporãveha noñeʼẽinte upe oikovaʼekuére (Ecl. 3:7). Margarita heʼi: “Chéve ningo igustoiterei voi añemongeta ermanakuéra ndive predikasiónre, umi ostudiávare la Biblia ha mitãnguérare. Opa mbaʼére añemongetase péro cheprovlémarente nachemanduʼaséi. Aagradese chupekuéra chepytyvõ haguére cheresarái hag̃ua upe oikovaʼekuégui”.

Aníkena reñevenga

Sapyʼánte pe ohasa asýva hína oikuaa porã ndahaʼéi hague ikáusare iména térã hembireko otraisiona chupe. Péro ombopochy chupe ohasa asy haguére ótro káusare. Upévare ndovaléi ipyʼaro pórke ikatu hesarái iñimportanteveha iñeʼẽrendu Jehovápe. Ha ikatu voi ojedeskitase iména térã hembirekóre.

Oiméramo nde rehechakuaa ndepyʼaroha reikóvo, iporãta rejepyʼamongetami Josué ha Caleb rembiasakuére. Haʼekuéra ningo ojapeligra vai kuri ohórõ guare ohecha pe Yvy Oñeprometevaʼekue chupekuéra. Péro umi iñirũnguéra ndojeroviapái Jehováre ha hapykuerikuéra hetaiterei isrraelíta naiñeʼẽrenduvéi. Péro Josué ha Caleb omokyreʼỹ umi isrraelítape iñeʼẽrendu hag̃ua Jehovápe, upévare oĩ voi umi ojukaséva chupekuéra itápe (Núm. 13:25–14:10). Josué ha Caleb ndojapóiramo jepe mbaʼeve ivaíva, umi hapichakuéra káusare oiko avei okorre rei pe desiértore cuarenta áño.

Oiméne Josué ha Calébpe ndogustaietereirakaʼe péro noñeamargái hikuái umi hapichakuéra káusa. Upéva rangue haʼekuéra oñehaʼã oservi porãve Jehovápe. Ha ohasa rire cuarenta áño pe desiértore, haʼekuéra añoite umi levíta ndive oike pe yvy Jehová oprometevaʼekuépe chupekuéra (Núm. 14:28-30; Jos. 14:6-12).

Ne ména térã ne rembireko káusa ikatu oime hetáma rehasa asy, ojere vaipa ndéve ha nderevyʼavéi. Péro reñemeʼẽrangue neprovlémape iporãvéta nemanduʼa Jehová oikuaaha mbaʼépa ojapóta umi naiñeʼẽrendúivare. Nemanduʼánte mbaʼépa oikorakaʼe pe desiértope umi isrraelíta ndojapóivare Jehová heʼíva (Heb. 10:30, 31; 13:4).

Nde ikatu regueropuʼaka

Aníkena remboguapyeterei ndejehe umi mbaʼe vai rehasavaʼekue. Iporãta ningo repensa umi mbaʼe Jehová oipotávare rejapo. Pór ehémplo Jane heʼi: “Koʼã mbaʼe ningo tuichaiterei chepytyvõ agueropuʼaka hag̃ua ahasáva: Ahendu La Atalaya ha ¡Despertad! gravasión, aha meme rreunionhápe ha akomenta kyreʼỹ, ha asẽ meme avei predikasiónpe. Koʼã mbaʼe ajapóvo cheresarái cheprovlemakuéragui. Amombarete avei che jerovia aipytyvõvo la héntepe oikuaa hag̃ua Jehovápe. Ha ajepyʼapývo umi ostudiávare la Biblia chendive, chepytyvõ amotenonde hag̃ua umi mbaʼe iñimportantevéva”.

Monique avei omombeʼu: “Agueropuʼaka opa mbaʼe ndafaltáigui rreunionhápe ha asẽ meme rupi apredika. Koʼág̃a che membykuéra ndive rojoayhuve ha roñemoag̃uive ermanokuérare. Umi mbaʼe vai ahasavaʼekue chepytyvõ ahechakuaa hag̃ua mbaʼépepa chekangy. Ijetuʼueterei ningo kuri chéve péro Jehová chepytyvõ agueropuʼaka hag̃ua”.

Nde avei ikatu regueropuʼaka rehasáramo koʼãichagua provlémare. Ikatu reñeñandu vaieterei reikóvo ne ména térã ne rembireko ne traisiona haguére. Upéicharõ jepe eñehaʼãkena rejapo pe apóstol Pablo heʼivaʼekue: ‘Ani neateʼỹ rejapo hag̃ua pe iporãva, pórke hiʼoraitépe remonoʼõta nanekaneʼõiramo’ (Gál. 6:9).

[Nóta]

[Nóta oĩva taʼanga ndive páhina 31]

Umi ohejavaʼekue chupe iména térã hembireko oagradese ñaipytyvõramo chupekuéra predikasiónpe