Ñañatendérõ ñasẽ porãta

SAPYʼÁNTE ija porã ñandéve japredika hag̃ua ñande rapichápe. Ñañatendépa ani hag̃ua jajavy umi oportunida? Jahechamína mbaʼéichapa ñane ermanokuéra Finlandiaygua oaprovecha opredika hag̃ua ija vovéntema chupekuéra. Upe tetãme oĩ peteĩ táva hérava Turku, opytáva peteĩ puérto ypyetépe.

Ndaʼareguasúi umi ermáno upepegua ohecha og̃uahẽha pe puértope heta kuimbaʼe Asiaygua. Ou hikuái ombaʼapo hag̃ua peteĩ várko guasúre. Upéi peteĩ puvlikadór oikuaa moõpa opyta oke hikuái ha avei ouha jepi peteĩ míkro ogueraha chupekuéra voi porã itravahohápe. Pyaʼeterei omombeʼu upéva umi ermáno oñeʼẽva ingléspe oĩva upe távape.

Umi ansiáno ohechakuaa pe kongregasión oaprovechavaʼerãha upe oportunida opredika hag̃ua umi tetã ambueguápe. Upévare omokyreʼỹ umi ermánope opredika hag̃ua chupekuéra. Upe domingo pyhareve lás 7 rupi, oñembyaty 10 puvlikadór pe míkro oñehaʼarõhápe. Ndohecháimarõ ni peteĩ umi ombaʼapóvape, umi ermáno oimoʼã osẽ jepemaha pe míkro térã ohopa jeymaha hikuái hetãme. Upéi ou sapyʼa peteĩ kuimbaʼe ijao de traváho reheve, upe riremi oúma ótro. Sapyʼaitépe hetáma katu hikuái. Umi ermáno oñepyrũ opredika ha oikuaveʼẽ chupekuéra rrevísta ha folléto oĩva ingléspe. Haʼetépe pe míkro nosẽvoíri, osẽ una óra haguépe ae, ha umi ermáno oaprovecha oñeʼẽ hag̃ua hendivekuéra upe aja. Umi ombaʼapóva pe várkope ogueraha 126 folléto ha 329 rrevísta.

Ohechávo mbaʼéichapa osẽ porã hikuái, umi ermáno heʼi pe semána oúvape oho jeytaha opredika umi kuimbaʼépe. Pe superintendénte de sirkuíto oĩta upe jave. Okýramo jepe upe pyhareve, lás 6.30 oñembyaty 24 ermáno, ha pe superintendénte omoakã pe aty oñesẽ hag̃ua ojepredika. Haʼekuéra ogueraha heta puvlikasión tagalo ñeʼẽme, oĩgui heta filipíno umi ombaʼapóva apytépe. Umi ermáno oheja chupekuéra 7 lívro, 69 folléto ha 479 rrevísta. Oiméne piko ovyʼaitéraʼe umi ohovaʼekue opredika upe árape!

Umi ombaʼapóva oho mboyve hetãme, umi ermáno oho jey ovisita chupekuéra. Ha heta oñemongeta ha ohesaʼỹijo la Biblia hendivekuéra. Umi kuimbaʼe apytépe oĩ heʼíva ojepredikáma hague chupekuéra ambue lugárpe, ha oagradese umi ermánope oho haguére hendapekuéra oĩ aja Finlándiape.

Ha nde, reñatendepareína repredika hag̃ua opaichagua tapichápe nde territóriope? Reñehaʼãpa reheka nde voi umi tetã ambueguápe repredika hag̃ua chupekuéra? Oimérõ rejapo péicha, katuete revyʼáta ovyʼa haguéicha koʼã ermáno Turkugua.

[Taʼanga ha mápa oĩva páhina 32-pe]

(Emaña pe kuatiañeʼẽre rehecha hag̃ua osẽ hagueichaite ko párte)

FINLANDIA

HELSINKI

Turku